Hiyo khanikhanle meekhiihu

1-2. (a) Mwaha wa heeni ninhimaahu weera emaara yeeyo ninvirihaahu maxupo khaninkhala meekhiihu? (b) Eheeni ninkelaahu woona mwa yoosoma ene yeela?

VAAVO ninvirihaahu itthu sooxupa, hiyo pooti wiisoonaka ntoko nri mbarkuni mukhaanini ephareya yeeyo enviraaya epheyo yoowuupa. Menento, hiyo khaninviriha maxupo awo meekhiihu. Tiithi ahu a wiirimu yoowo ori a nsivelo ohiya paahi onimwaasa oniweha nivirihaka maxupo awo, owo onnalaihera onikhavihera owina maxupo awo. Yehova onnaaroromeliha arumeyi awe oororomeleya eeraka: “Miyo [kinimookhaviherani].” — Yes. 41:10.

² Yoosoma ela nnoorowa woona moota Yehova onnikhaviheraawe (1) aneettihaka, (2) anivahaka itthu ninhaawelaahu, (3) anikosoopaka, ni (4) animaalihaka. Yehova onnanroromeliha weera woohipwattha maxupo ninvirihaahu mweekumini mwahu, owo khanrowa onittiwala. Owo khanrowa onihiya, mwa yeeyo khanikhanle meekhiihu.

YEHOVA ONNANEETTIHA

3-4. Moota heeni Yehova onneettihaawe? (Nsalmu 48:15 [48:14, NM])

³ Musome Nsalmu 48:15 [48:14, Tradução do Novo Mundo]. Yehova khontthuna weera hiyo niihooleleke asineene ahu. Moota heeni owo onaahooleelaawe arumeyi awe oororomeleya olelo va? Mukhalelo mmoha ompakaawe eyo ori moorweela mwa masu a mBiblyani. (Nsal. 119:105) Moorweela mwa masu awe oowuupuxeriwa, Yehova onnanikhavihera opaka soothanla ni wunnuwihera mikhalelo sinrowa onikhavihera ohakalala viinaano va ni sinrowa oniphwanyiha ekumi yoohimala muhoolo.a Mwa ntakihero, owo onnanxuttiha ohimmira supi, okhala oororomeleya mwa itthu sootheene nimpakaahu, ni waasivela akina ni murima wootheene. (Nsal. 37:8; Aheb. 13:18; 1 Ped. 1:22) Vaavo nnooniheraahu mikhalelo iya, hiyo ninnakhala asitiithi ooreerela, mutthu oothelanano ooreerela, ni asinthamwene ooreerela.

⁴ Opwaha mwa yeeyo, Yehova oohela mBiblyani sooweereya sa atthu yaavirinhe maxupo ni miyuupuwelo sinlikana ni sawihu. (1 Akor. 10:13; Yak. 5:17) Vaavo ninsomaahu sooweereya iyo ni ninvarihela muteko itthu ninxutteraahu, ninnattottela mureerelo mwa mikhalelo miili. Woopatxera, ninnoonelela weera khanikhanle meekhiihu, atthu akina aaviriha maxupo mamoharu ni aawera ovilela ekhaviheriwaka ni Yehova. (1 Ped. 5:9) Ni wanaaveeli, ninnaxuttera etthu enrowa onikhavihera ovilela maxupo ahu ni ovirelela okhala oohakalala. — Arom. 15:4.

5. Yehova onaavarihela muteko taani weera aneettihe ephiro ya okumi?

⁵ Yehova-tho onnaavarihela muteko asinna ni asirokora weera aneettihe.b Mwa ntakihero, asitokweene a esirkwiitu ennaxekukura ikwaha sintxipale miloko weera enlipihe. Miyaha empakaaya sinnalipiha nroromelo nahu ni ennanikhavihera ovirelela okhala oowiiraana. (Mit. 15:40–16:5) Ni-tho asitokweene a mmulokoni ennaapwattha vantxipale anamalaleera. (1 Ped. 5:2, 3) Asitiithi ennaakhavihera anamwane aya mwa mukhalelo wa omunepani, wuupuwelela itthu nnene, ni okhalano mikhalelo sooreera. (Mir. 22:6) Ni asirokora oowuunnuwela eri oolipa moomunepani ennaakhavihera asirokora asimwali, yaavahaka ntakihero nooreera, yaavahaka miruku soovareleya muteko, ni yaalipihaka. — Tito 2:3-5.

6. Etthu heeni nintthuneyaahu opaka weera nttottele mureerelo miruku Yehova onnivahaawe?

⁶ Yehova oopaka eparte awe anivahaka miruku ninhaawelaahu. Moota heeni ninrowaahu woonihera weera ninnaxukurela miruku onnivahaawe? Miruku 3:5, 6 ohimme ha: “Omuroromele [Yehova] ni murim’á wothene, ohìphitere miruku sá pahi.” Vaavo nimpakaahu eyo “owo onahala [wookolola] iphiro [sahu],” naari neere, owo onoorowa onikhavihera osepa maxupo mantxipale ni okhalano ekumi yoohakalaliha. Ninnamuxukurela Yehova mwaha wonvaha mutthu ti mutthu a hiyo miruku sa nsivelo! — Nsal. 32:8.

YEHOVA ONNANIVAHA ITTHU NINHAAWELAAHU

7. Mwa mikhalelo heeni Yehova onnivahaawe ele ninhaawelaahu? (Afilipi 4:19)

⁷ Mmusome Afilipi 4:19. Ohiya paahi onikhavihera moomunepani, Yehova onnareeliha wiilipihera wahu weera nikhaleno yootxa, ikuwo, ni nipuro nookhala. (Math. 6:33; 2 Ates. 3:12) Nnaamweera ohikhalaka woonanara oxupeya ni itthu sa weerutthuni, Yehova onnanooperera weera nihitepeke oxupeyaxa ni itthu iyo. (Nwehe enoota ya yoosoma va Matheyo 6:25.) Mwaha wa heeni? Mwaha wooweera Tiithi ahu khonrowa waahiya arumeyi awe oororomeleya emaara yeeyo enhaawelaaya itthu sa weerutthuni. (Math. 6:8; Aheb. 13:5) Hiyo nroromeleke ele Biblya onhimaawe weera Yehova onoorowa onivaha itthu ninhaawelaahu.

8. Eheeni Yehova ampakenlaawe Davidi?

⁸ Moone moota Yehova aamukhavihenraawe Davidi. Mpuwa mwa iyaakha seiyo saari sootepa oxupa vaavo aamutthawaawe mwene Saul, Yehova anvaha owo vamoha ni anakhotto awe etthu yeeyo yaahaawelaaya weera ekhale akumi. Uupuwelaka moota Yehova aamukosompaawe mpuwa mwa iyaakha sintxipale, Davidi olempe ha: “Kàri mmiravo, vano kòhùluvala nto nkitonke omóna naxariya òttuwaliwa nari osùlu awe ololihaka yotxa.” (Nsal. 37:25) Pooti weeraka mpuwa mwa ekumi anyu, nyuwo-tho mohoona moota Yehova onaavahaawe mwa nsivelo arumeyi awe itthu awo enhaawelaaya.

9. Moota heeni Yehova onaakhaviheraawe atthu awe emaara yeeyo enkhumelelaaya erisa ya ephattu? (Nwehe efootu.)

⁹ Yehova-tho onnaavaha atthu awe itthu enhaawelaaya emaara yeeyo enkhumelelaaya erisa ya ephattu. Mwa ntakihero, emaara yeeyo yaakhumelenlaaya etala eseekulu yoopatxera, makristu a ilapo soovirikana yaahaavaha itthu saya asinna ni asirokora yaatthuneya okhaviheriwa. (Mit. 11:27-30; Arom. 15:25, 26) Atthu a Muluku olelo, ennoonihera mukhalelo mmoharu wa ovaha. Emaara eneereyaaya erisa ya ephattu, Yehova mwa nsivelo onnaweeriha atthu awe ovaha itthu sootthuneya ntoko yootxa, maahi, ikuwo ni mirette siroihiwaka mapuro yaawo sikhumelenle irisa sa ephattu. Asinna envara muteko wooteka ennareherera impa sa asinna ni Impa sa Omwene sintthuneya orehereriwa. Ni arumeyi a Yehova toowiisaakuviha ovaha nikhavihero na mmuupuweloni ni na omunepani wa ale evirinhe maxupo awo.c

10-11. Eheeni nyuwo muxuttenraanyu ni yooweereya ya Borys?

¹⁰ Yehova-tho onnaavaha mwa nsivelo atthu ale ehinanvarela. Moolikana ni eyo, hiyo ninnaasaasera iparakha soowaareerela murima atthu ale ehikhanle Anamoona a Yehova. (Agal. 6:10) Eyo ikwaha sintxipale ennavaha onamoona wooreera. Moone yooweereya ya Borys diretor a oxikola onkhala wUcrania. Nnaamweera Borys ahikhanle Namoona a Yehova, ikwaha sootheene annaakosoopa mooreera murima anaxikola yaari Anamoona a Yehova ni annattittimiha soororomela saya. Vaavo Borys aatthuneyaawe ohiya muttetthe awe mwaha wa ekhotto ni orowa muttetthe woovareleleya, asinna yaamukhavihera. Muhoolo mwaya aahoonela muthukumano wa wuupuwelela okhwa wa Yesu Kristu. Uupuwelelaka woohima sa yooweereya awe, Borys ohimme ha: “Anamoona a Yehova yannakipwattha ni yaakikosoopa. Kinnaaxukurela vantxipale Anamoona a Yehova.”

¹¹ Hiyo-tho pooti omutakiha Tiithi ahu a wiirimu a ikharari niwooniheraka nsivelo ale enhaawela nikhavihero, naari ereene asinna naari hooye. (Luka 6:31, 36) Ninweherera weera wiilipihera wahu owoonihera nsivelo atthu oweerihe okhala atthareli a Kristu. (1 Ped. 2:12) Woohipwattha etthu enrowa okhumelela hiyo nnoohakalala vantxipale mwaha woovaha. — Mit. 20:35.

YEHOVA ONNANIKOSOOPA

12. Etthu heeni Yehova olaihenraawe waavaha atthu awe? (Nsalmu 91:1, 2, 14)

¹² Musome Nsalmu 91:1, 2, 14. Olelo va, Yehova onnalaihera onikosoopa moomunepani. Owo khanrowa omuhiya Satana weera amalamalihe okokhorela weekhaikhai. (Yoh. 17:15) Ni vaavo ‘maxupo matokweene’ enrowaaya okhumelela, hiyo nintthuneya ororomela weera Yehova onoorowa okwanihera yoolaihera awe ya waakosoopa arumeyi awe ohiya paahi mwa mukhalelo wa omunepani mene-tho mwa mukhalelo wa weerutthuni. — Apok. 7:9, 14.

13. Mwa mikhalelo heeni Yehova onnikosoopaawe mutthu ti mutthu a hiyo?

¹³ Moota heeni Yehova ommukosoopaawe mutthu ori poothe a hiyo? Moorweela mwa soolepa Yehova onnanikhavihera osuwela yooreera ni yoonanara. (Aheb. 5:14) Vaavo ninkhalaahu moovarihana ni miruku nimphwanyaahu mBiblyani, ninniikosoopa ni maxupo a omunepani ni a weerutthuni. (Nsal. 91:4) Opwaha mwa yeeyo, Yehova onnanikosoopa moorweela mwa muloko. (Yes. 32:1, 2) Vaavo ninkhalaahu vamoha ni asinna ni asirokora emmusivela Yehova ni yaawo enkhala moovarihana ni miruku sawe, ninnakhala oolipa ni ninnakhala oolikaneene osepa etthu eri poothe yaarowa onikumihera maxupo. — Mir. 13:20.

14. (a) Mwaha wa heeni Muluku ohinnikosoopaawe mwa maxupo ootheene? (b) Nsalmu 9:10 onanroromeliha eheeni? (Nwehe enoota.)

¹⁴ Khalayi, imaara ikina Yehova annaakosoopa arumeyi awe weera ehivirihe maxupo naari ehiiviwe. Menento, owo khaapaka eyo imaara soothesene. Imaara ikina hiyo ninnaviriha ‘itthu nahaawehereraahu.’ (Koh. 9:11) Opwaha mwa yeeyo, ovinyera khalayi Yehova onnaahiya arumeyi awe etthara-tthariwaka weera yoonihere weera Satana namootha. (Yobi 2:4-6; Math. 23:34) Etthu emoharu enneereya olelo va. Nnaamweera Yehova ahimalamalihaka maxupo ahu, nroromeleke weera owo khanrowa waahiya ale emmusivela.d — Nsal. 9:11 [9:10, NM].

YEHOVA ONNANIMAALIHA

15. Moota heeni nimmaalihiwaahu moorweela mwa nivekelo, Biblya, ni asinna? (2 Akorinto 1:3, 4)

¹⁵ Mmusome 2 Akorinto 1:3, 4. Ikwaha ikina, hiyo ninnariipiwa murima, naari oxupeya. Neereke nyuwo munnaviriha maxupo yaawo enweerihani wiisoona okhala meekhiinyu? Neereke ookhala mutthu oniiwexexa moota nyuwo muniisoonelaanyu? Yehova onniiwexexa. Owo ohiya paahi woona ovoreya, mene-tho “[onnanimaaliha] mwa sohawa sahu sothene.” Moota heeni? Vaavo nnanvekelaahu Yehova, owo onnanivaha “murettele wa Muluku onapwaha miyupuwelo sothesene.” (Afil. 4:6, 7) Ni-tho ninnaphwanya nimaaliho vaavo nniiwaahu masu oomaaliha a Yehova mBiblyani. Masu oowuupuxeriwa ansivelo, amiruku, ni yooweherera nraahuno pooti onihakalaliha. Ni mithukumano sahu sinnanimaaliha vaavo ninkhalaahu vamoha ni asinna ni asirokora ni ninnalipihiwa moorweela mwa mBiblyani.

16. Etthu heeni muxuttenraanyu ni yooweereya ya Nathan ni Priscilla?

¹⁶ Weera nivahe ntakihero na moota Yehova onnimaalihaawe ni onnilipihaawe moorweela mwa masu awe moone ele yeereñye ni Nathan ni Priscilla, yaawo enkhala wEstados Unidos. Mwa iyaakha vakhaani sivinre, awo yaalakela orowa muttetthe woothowa anamalaleera. Nathan ohimme ha, “Hiyo nannaroromela weera Yehova aamureeliha wiilipihera wahu.” Menento ephiyakaru iwo, awo yaaviriha maxupo a eretta ni othowa musurukhu. Ntheli nne wannatthuneya otthikela owannyaya weiwo-tho yaavirelenlaaya oviriha maxupo oothowa musurukhu. Nathan onnuupuwela eeraka, “Miyo kanniikoha mwaha wa heeni Muluku ahanreelinhaawe ntoko hiyo nuupuwelaahu weera owo ampaka, mpaka miyo kanniikoha wakhala weera kaapaka etthu yoonanara.” Menento noovira etempu, Nathan ni Priscilla yaapatxera woonelela weera Muluku khaahiñye emaara ele yaavirihaaya maxupo, Nathan onnavirelela eeraka, “Etempu ele yooxupa Biblya aari nthamwene ahu amiruku ni annanilipiha ni onivaha miruku. Owehexexa moota Yehova aanikhaviheraawe ovilela maxupo ale ohiya owehexexa maxupo awo waanikhavihera okhala oolikaneene oviriha maxupo a muhoolo ni nroromelo.”

17. Moota heeni murokora oneeriwa Helga aakhenlaawe nimaaliho? (Nwehe efootu.)

¹⁷ Hiyo-tho ninnamaalihiwa ni asinna ni asirokora. Moota heeni? Moone ntakihero na Helga, onkhala wUngria. Mwa iyaakha sintxipale aaviriha maxupo mantxipale yaawo yaamweeriha oxupeya ni wiisoona ohikhalano mwiitti. Mene vaavo onwehaawe muttuli owo onnoona moota Yehova ammaalihaawe moorweela mwa muloko. Owo olempe ha: “Yehova imaara soothesene annakikhavihera vaavo oonaawe ikuru saka simalaka mwaha wa muteko kaavaraaka, mwanaka kaamuhuwaaka yoowo aavoreiwa, ni maxupo makina. Mpuwa mwa iyaakha iya 30 owo ookwanihera yoolaiheraawe ya okimaaliha, owo ikwaha sintxipale onnakilipiha moorweela mwa masu oolipiha a asinna, ni imaara sintxipale kannaakhela imensagem, ikaarta, ni masu oolipiha emaara yeeyo kaahaawelaaka.”

18. Moota heeni ninrowaahu waamaaliha atthu akina?

¹⁸ Hiyo nookhalano eparakha yoomutakiha Muluku ahu naamaalihaka atthu akina. Moota heeni ninrowaahu opaka eyo? Hiyo pooti opaka eyo niwiiwelelaka moopixa murima, nuulumaka masu oomaaliha, ni naakhaviheraka moorweela mwa miteko. (Mir. 3:27) Ninniilipihera weera naamaalihe atthu ootheene yaale enviriha maxupo, waahela mpuwa ale ehinanvarela Muluku. Vaavo mavizinho ahu enxupeyaaya, enriipiwaaya murima, naari envoreiwaaya, hiyo ninnaaxekura, ninnawiiwelela moopixa murima, ni ninnaaleela awo soolepa soolipiha sa mBiblyani. Vaavo nimmutakihaahu Yehova, ‘Muluku a nimaaliho,’ hiyo ohiya paahi nnaalipiha asinna ni asirokora ovilela maxupo, mene-tho ninnaakhavihera ale ehinanvarela Yehova otthuna onvarela. — Math. 5:16.

YEHOVA IKWAHA SOOTHEENE ORI NI HIYO

19. Etthu heeni Yehova onnipakelaawe, ni ninrowa omutakiha moota heeni?

¹⁹ Yehova ikwaha sootheene onnaapwattha atthu emmusivela. Owo khanninyanyala emaara yeeyo ninvirihaahu maxupo. Hiihaale ntoko tiithi naari maaye ommukosoopaawe mwanawe mwa nsivelo, Yehova onnaakosoopa arumeyi awe oororomeleya. Owo onnaneettiha, onnanivaha ele ninhaawelaahu, onnanikosoopa, ni onnanimaaliha. Ninnamutakiha Tiithi ahu a nsivelo a wiirimu vaavo nnaakhaviheraahu ni waalipiha atthu yaale enviriha maxupo. Nnaamweera nivirihaka maxupo, hiyo nroromeleke weera Yehova ori ni hiyo. Aani, owo oolaihera: “Ohòve, niwoko kiri ni weyo.” (Yes. 41:10) Eyo ennalipiha nroromelo nahu! Mweekhaikhai, hiyo khanikhanle meekhiihu.