Ekumi ahu yootheene nooxuttera itthu ni Muhusiha ahu Mutokweene

NTAKIHERO NA ASITIITHI AKA

Okhwipi wa eyaakha ya 1950 asitiithi aka yaathaama wItalia erowaka oKindersley, oSaskatchewan, oCanada. Ephiyakaru iwo, moohipisa awo yaaxuttera ekhaikhai, ni ekhaikhai eyo yaari yootepa otthuneya mweekumini mwahu. Kinnuupuwela weera emaara kaaraaka mwaana kannaviriha mahiku mantxipale kivaraka muteko woolaleera vamoha ni emusi aka, miyo kinnahimaka mootthekulani weera kaari “pioneiro ookhavihera” kireeneno iyaakha 8!

Asitiithi aka yaari oohaawa, menento awo aahiya ntakihero nooreera woohima sa onvaha makeya Yehova. Mwa ntakihero, eyaakha ya 1963 asitiithi aka yaatumiha itthu yaaraayano weera ephwanye musurukhu weera yamoonele konkreesu a elapo yootheene oPasadena, oCalifornia, wEstados Unidos da America. Eyaakha ya 1972, naathaamela oTrail, oColúmbia Britânica, oCanada, weiwo okhuma nipuro naaraahuwo mpaka ophiyawo naaviriha ikiloometru 1.000 weera nakhavihereke muttetthe wuuluma nuulumo na italiano. Apapa yaavara ntoko servente awo yaakhootta miteko sintxipale seiyo saarowa waaphwanyihaka musurukhu muntxipale. Awo yaapaka eyo weera ewehexexeke muteko yanvarelaaya Yehova.

Kinnaxukurela vantxipale mwaha wa ntakihero na asitiithi aka ekivanhaaya miyo vamoha ni asinnaka araru. Ntakihero naya nipatxenre okitxentxeriha mmutekoni mwa Yehova ohela mpuwa itthu kixuttenraaka ekumi aka yootheene: Kapatxera waasa toko Omwene, Yehova onoorowa okikosoopa. — Math. 6:33.

OPATXERA WAKA OSIVELIWA NI MUTEKO WA ETEMPU YOOTHEENE

Eyaakha ya 1980, kaathelana ni Debbie, murokora mmoha ookisivela aarinono sooluluwanya soomunepani. Naatthuna ovolowa muteko wa etempu yootheene, mwaha wa yootthuna eyo, Debbie aapatxera ovara ntoko pioneira sivirakaru miyeeri miraru vaavo naathelannaahu. Evirakaru eyaakha emoha nthelanakaru, naathaamela muloko woothowa anamalaleera yoowo waatthuneya okhaviheriwa, miyo kaakhala pioneiro vamoha ni mwaaraka.

Moovira etempu, hiyo naakhulumuwa nave nannatthuna othaama. Menento nihaakunveene opaka eyo, naahuuluma ni mutokweene a esirkwiitu. Owo aahinleela mwa nsivelo mene ahikhuwaka etthu, owo enre: “Nyuwo munnatepiha maxupo anyu. Nyuwo munwehexexa paahi maxupo munvirihaanyu. Ohiya opaka eyo, nwehexexeke itthu sooreera sinkhumelela, nyuwo munoophwanya.” Miruku iye saari seiyo hiyo naahaawelaahu. (Nsal. 141:5) Moohipisa hiyo naavarihela muteko ni naahoonelela weera saakhala itthu sintxipale sootthuneya, atthu antxipale a mmulokoni yannatthuna ompakela itthu sintxipale Yehova, waahela mpuwa amiravo ni atthu ale yaathelanne ni mutthu ahanvarela Yehova. Ele yaari etthu yootepa otthuneya wa hiyo. Nooxuttera owehexexa itthu sooreera ni onweherera Yehova oreherera itthu sinkhala ntoko ti sooxupa. (Mik. 7:7) Hiyo nootthikela okhala oohakalala ni itthu sooreera.

Asinna yaanisomiha eskola ahu yoopatxera ya mapioneiru, yaapatxenre ovara ilapo ikina. Vaavo yaanooniheraaya ifootu ni wuuluma woohima sa maxupo ni mareeliho yaaphwannyaaya, awo yaaneeriha hiyo okhala ni ntthuno noovara ntoko mamisiyonariyu, nto naalakela ovara muteko owo.

Weera nikwanihere yooluluwanya eyo, eyaakha ya 1984 naathaamela oQuebec weiwo nnuulummwaayawo nuulumo na efrances, weiwo waarakamelanne ni oColúmbia Britânica ikiloometru sookwanelaka 4.000. Eyo yaataphulela weera hiyo naakumanano ni nuulumo nnyowani ni sookhovelela inyowani. Maxupo makina naavirihaahu yaari oothowa musurukhu. Yookhala etempu naakhalaahu nimuuraka kharaka mmatta mwa mutthu mukina. Debbie annawaapeya akharaka awo mwa mikhalelo soovirikana soosiva! Nnaamweera naaviriha maxupo awo, hiyo naavilela ni nannahakalala. Opwaha mwa yeeyo, nannoona weera Yehova annanikosoopa. — Nsal. 64:11 [64:10 Tradução do Novo mundo].

Nihiku nimoha naahaakhela examada nahaawehereraahu. Waari nwopelo woorowa okhavihera eBeteli ya oCanada. Hiyo naahiivaherera weera nrowe Eskola ya oGileyadi, mwa yeeyo nwopelo ole woorowa oBeteli wansivela, mene-tho naaxupeya. Mene nnaamweera vareene hiiho, naahaakhulela. Emaara naaphiñyaahu oBeteli, naamukoha munna Kenneth Little, munna mmoha a ekomisau ya eFiliyaale neeraka, “Etthu heeni ninrowaahu opaka nawompwa vale oGileyadi?” Owo aahaakhula eeraka, “Nnoorowa waakhula mwaha owo emaara ekina, wakhala weera nyuwo munoorowa owompwa.”

Evirakaru esemana emoha, hiyo naahuuluma woohima sa mwaha ole mwaha wooweera miyo ni amwaaraka naawompwa orowa Eskola ya oGileyadi, nto hiyo wannatthuneya opaka yoothanla. Munna Little, aaneerela: “Yootthuneya khaiyene yoothanla munrowaanyu opaka, mwaha wooweera Yehova pooti oreeliha yoothanla eri poothe.” Hiyo naahaakhulela nwopelo woorowa oGileyadi, ni moovira iyaakha, hiyo nohoona ovareleya muteko wa miruku iye sa munna Little, ikwaha sintxipale hiyo ninnuuluma masu a munna ole naaleelaka atthu akina yaawo-tho entthuneya opaka yoothanla.

EKUMI YA OMISIYONAARIYU

Naahakalala vantxipale weerela eparte ya anaskola 24, yaasoma eturma 83 ya oGileyadi. Eyo yeereñye oBrooklyn, oNova York, mweeri wa Abril eyaakha ya 1987. Asinna Ulysses Glass ni Jack Redford, yaari asinna yanxuttiha ikwaha sintxipale. Sivirakaru miyeeri 5 naavahiwa yoothanleliwa ahu nihiku na 6 a Setembro a 1987. Naathanleliwa orowa oHaiti vamoha ni John ni Marie Goode.

Mamisiyonaariyu a oGileyadi khiyaarummwa orowa oHaiti ovinyera eyaakha ya 1962 vaavo misiyonaariyu oomalihera aakhanyererinwaawe okhuma elapo ele. Sivirakaru isemana tthaaru vaavo naavahinwaahu yoothanleliwa ahu, naakhavihera oHaiti muloko mukhaanini, waarino anamalaleera 35 waari mittetthe sa omwaako. Naari amiravo ni khinaasuwenle itthu sintxipale ni naakhala meekhiihu nivaraka muteko ole wa omisiyonaariyu. Atthu a muttetthe ole yaari oothoiwa musurukhu ni antxipale a yaawo khiyaawera oleeri. Mahiku ale oopatxera a omisiyonaariyu, naaviriha maxupo ntoko ikhotto, ottiiwa misewe, ni aciclone.

Hiyo nooxuttera ni asinna ni asirokora oowiilipihera ni oohakalala a oHaiti. Antxipale a yaawo yaarinono ekumi yooxupa, mene yannamusivela Yehova ni muteko woolaleera. Murokora mmoha oowuuluvala, khaawera oleeri, menento owo annawera ohela mmuru soolepa sa mBiblyani soophiyeraka 150. Othowa yootxa ya nihiku ti nihiku, waalipiha yoolakela ahu ya ovirelela olaleya weera Omwene wa Muluku paahi tonrowa omaliha maxupo atthu enkumanaayano. Hiyo noohakalala vantxipale owoona anamasoma ahu akina a Biblya ekhalaka mapioneiru a nthiti, mapioneiru oothanleya ni asitokweene a mmulokoni.

Emaara naaphiñyaahu oHaiti kaamusuwela Trevor mmiravo mmoha aari misiyonaariyu a ettiini Mormon, ni naakhalano eparakha yoovaanela woohima sa Biblya ikwaha ikina. Sivirakaru iyaakha, kaahaakhela ekaarta awe, yeeyo miyo kahaawehereraaka, owo aalempe ha: “Kintthuna otthikela oHaiti ni ovara ntoko pioneiru oothanleya muttetthe yoole kaavaraaka ntoko misiyonaariyu a ettiini Mormon.” Owo oopaka eyo mpuwa mwa iyaakha sintxipale, vamoha ni amwaarawe.

WEUROPA NI MUHOOLO MWAYA WAFRICA

Naathanleliwa orowa okhavihera eparte ya wEuropa weiwo muteko woolaleera weeraaya opatxera. Eyaakha ya 1992 naaphiya oLjubljana, wEslovênia, waattamela nipuro asitiithi aka yaahuuwalaaya ehinaaye othaamela wItalia. Ekhotto nlelo khiyaamanle mapuro a oLugoslávia. Esede ya oViena, wÁustria, ni iscritorio sa oZagreb, oCroácia ni oBelgrado, oSérvia, sannaweha-weha muteko woolaleera waavariwa muttetthe ole. Vano yeele eri elapo yaarowa okhalano eBeteli aya.

Eyo yaataphulela weera hiyo naatthuneya wiikhoveleliha nuulumo nnyowani ni sookhovelela inyowani. Atthu a muttetthe ole yeera ha, “Ježik je težik,” yeeyo entaphulela “Nuulumo nna oxupa.” Ni eyo yaari ekhaikhai! Nannatikiniheya ni ororomeleya wa asinna ni asirokora yaawo yaari oolikaneene waakhulela matxentxo a mmarehereroni mwa Yehova ni woona moota Yehova aareelihaawe. Ekwaha ela-tho, naahoona moota Yehova onrehereraawe itthu mwa nsivelo ni etempu yooreerela. Itthu naaxuttenraahu nihinaaye ophiya wEslovênia, saanikhavihera ovilela maxupo naakumanaahuno ni-tho naaxuttera itthu inyowani iwo.

Mene matxentxo makina yaamurowa okhumelela. Eyaakha ya 2000 naathanleliwa orowa oCosta do Marfim, wAfrica oCidental. Menento mweeri wa Novembro a 2002, naathaamiheriwa oSerra Leoa mwaha wa ekhotto. Ekhotto ele ya iyaakha 11 yaawaniwa, yaamala. Waari wooxupa okhuma oCosta do Marfim moowaakuveya. Menento itthu nxuttenraahu soonikhavihera ovirelela okhala oohakalala.

Hiyo ninnawuupuwelela atthu yaatthuna oxuttera ekhaikhai ni asinna ni asirokora ansivelo yaawo evilenle iyaakha sintxipale saawaniwa ikhotto. Asinna awo yaari oohaawa, mene yannakawana ni atthu akina ele yaaraayano. Murokora mmoha anvaha ikuwo Debbie. Menento vaavo Debbie aakhoottaawe, murokora ole aamunyeserera eeraka: “Mpuwa mwa ekhotto, asinna a ilapo ikina aanikhavihera. Vanonto ela ewooraahu yookhavihera.” Hiyo noolakela otthara ntakihero naya.

Muhoolo mwaya, naatthikela oCosta do Marfim, mene ekhotto yaatthikeleya-tho. Nto Novembro a 2004, naathaamihiwa ni elikopetru, yoole ori mutthu aakuxa maala yaalemela ikiilo 10. Naakona nipuro nenno yaakhalaayawo atoropa ooFrança ni oxaakaru naakuxeriwa oSuíça. Niphiyakaru ofiliyaale ohiyu eriyari, ekomisau ya eFiliyaale ni asinna yaaxuttiha iskola sa muteko woolaleera vamoha ni asaaraya, yaanaakhela mwa nsivelo ni yaanivaha yootxa yooviha ni chocolate oSuíça. Naahakalala vantxipale.

Naathanleliwa mpuwa mwa etempu vakhaani okhavihera oGana ni muhoolo mwaya naatthikela oCosta do Marfim okhala weera ekhotto yaamala iwo. Oreera murima wa asinna waanikhavihera emaara yeeyo naathaamaahu ni wa soothanleliwa sahu sa etempu vakhaani. Miyo ni mwaaraka naahoonelela weera nnaamweera nsivelo neerelaka eparte wa atthu a Yehova, eyo khentaphulela weera khinaarowa ovirihaka maxupo. Veekhaikhai, hiyo naaxuttera etthu mwaha wooviriha maxupo.

NROWAKA WORIENTE MÉDIO

Eyaakha ya 2006, naahaakhela ekaarta yaakhuma oSede mundial enleelaka woohima sa yoothanleliwa ahu enyowani wOriente Médio. Ekwaha-tho ela, hiyo naaviriha maxupo, nannatthuneya wiikhoveleliha ni muulumo ni sookhovelela inyowani. Nipuro nne yaakhalawo maxupo mantxipale yaakumiheriwa ni ipoliitika ni ittiini. Hiyo wannansivela wiiwa muulumo oovirikana mmulokoni ni woona wiiraana waakhumelela, mwaha wootthara miruku sa mareherero a Yehova. Hiyo nannatikiniheya ni asinna mwaha wooweera antxipale a yaawo yaavilela moolipa murima otthara-tthariwa ni amusi aya, makoleeka aya oskola, oomutekoni, ni mavisiinyu aya.

Naamoonela konkreesu oothanleya a 2012 oTel Aviv, wIsrael. Konkreesu ole yaari ekwaha yoopatxera atthu a Yehova a muttetthe ole yaathukumannaaya antxipale okhuma Pentekoste a 33 Kristu awiiyeene. Tthiri ele yaari etempu yoohakalaliha!

Mpuwa mwa iyaakha iya, naathanleliwa orowa elapo yeeyo muteko ahu waakhoottihiwaaya. Naakuxa irevista vakhaani, naavara muteko woolaleera ni naakhalano asembleya ni atthu vakhaani. Atoropa ni ikapwitthi saya yannaweha-weha mapuro eri poothe, nnaamweera vareene hiiho, hiyo nanniisoona okhala oovareleleya vaavo naavaraahu muteko woolaleera moohisuweliwa ni anamalaleera vakhaani.

NTTHIKELAKA WAFRICA

Eyaakha ya 2013 naahaakhela yoothanleliwa yoovirikana, ovara efiliyaale ya oKinshasa, oCongo. Elapo yeeyo yoosareya soopattuxiwa sooreera, mene yoothowa musurukhu ni ikwaha sintxipale sannawaniwa ikhotto. Woopatxerani naahimme ha, “Noosuwelawo wAfrica nri oolikaneene.” Mene nlelo nannatthuneya oxuttera vantxipale, otepaxa wene vaavo naapakaahu mikwaha neettaka iphiro sooxupa. Nannoona itthu sintxipale sooreera seiyo naawehexexaahu, ohela mpuwa ovilela ni ohakalala wa asinna nnaamweera yaaviriha maxupo oothowa musurukhu, nsivelo naya ni muteko woolaleera, ni wiilipihera waya woonela mithukumano, ni owoonela asembleya. Naahoona asineene ahu moota muteko woolaleera waarowaaya vahoolo mwaha wa nikhavihero ni mareeliho a Yehova. Iyaakha nivirinhaahu nivaraka muteko wa etempu yootheene oCongo, soonihakalaliha vantxipale ni sohaatxeerera emusi ahu ya omunepani.

Okhwipi wa eyaakha ya 2017, naavahiwa yoothanleliwa ekina, ovara wAfrica do Sul. Ela efiliyaale etokweene hiyo nikhavihenraahuwo, ni mpaka soothanleliwa sahu oBeteli saari inyowani wa hiyo. Ekwaha ela-tho hiyo wannatthuneya oxuttera itthu sintxipale, mene itthu naaxuttenraahu muttuli saanikhavihera. Hiyo ninnaasivela vantxipale asinna ni asirokora evirinhe iyaakha sintxipale evilelaka. Ni ti wootikiniha woona emusi ya oBeteli evaraka moowiiraana nnaamweera ereene oovirikana mahuweliwo ni sookhovelela soovirikana. Hiyo ninnawera woona mareeliho a Yehova, vaavo atthu awe eniilipiheraaya okhalano omutthu onyowani ni ovarihela muteko miruku sa mBiblyani.

Mpuwa mwa iyaakha sintxipale, miyo ni mwaaraka nohaakhela soothanleliwa soohakalaliha, nohiikhoveleliha sookhovelela soovirikana ni nooxuttera muulumo manyowani. Khaiyene ikwaha sootheene waari wookhweya, mene nohoona nsivelo na Yehova moorweela mwa mareherero awe ni emusi ahu ya omunepani. (Nsal. 144:2) Ninnaroromela weera itthu nxuttenraahu mmutekoni mwa etempu yootheene, soonikhavihera okhala arumeyi ooreera a Yehova.

Kinnavaha mwiitti ntakihero na asitiithi aka, ntakihero na amwaaraka Debbie, ni matakihero ooreera a emusi ahu ya omunepani a elapo yootheene. Vaavo ninrowaahu muhoolo nri oolikaneene ovirelela oxuttera itthu inyowani sa Muhusiha ahu Mutokweene.