“Awìtthane asitokwene [a mmulokoni]”

1. Moota heeni Yehova onooniheraawe weera iputtiputthi sawe ti sootthuneya wa Owo?

IPUTTIPUTTHI sa Yehova ti sootthuneya wa Owo. Owo oothuma iputtiputthi iyo ni ephome ya Yesu ni ohaathanla asitokweene a mmulokoni weera ekosoopeke. (Mit. 20:28) Muluku ontthuna weera iputtiputthi sawe sikosoopiweke nnene. Asitokweene a mmulokoni ehooleliwaka ni Kristu, ennamaaliha iputtiputthi iyo ni ennakosoopa wa soowoopiha sa omunepani. — Yes. 32:1, 2.

2. Taani Yehova onaakosoopaawe moothanleya? (Ezekiyeli 34:15, 16)

² Yehova onnaxupeya vantxipale ni iputtiputthi sawe, menento onnakosoopa moothanleya ale enviriha maxupo. Moorweela mwa asitokweene, Owo onnaakhavihera yaale enhaawa mwa mukhalelo woomunepani. (Mmusome Ezekiyeli 34:15, 16.) Mwa yeeyo, Owo ontthuna weera naasaaseke nikhavihero naahaawelaka vale. Mwa etempu eyo ohiya paahi onvekela Muluku nikhavihero, onnatthuneya-tho ovekela nikhavihero wa “akukhuli ni ahusiha” a mmulokoni. — Aef. 4:11, 12.

3. Moota heeni ootheene ahu ninttottelaahu mureerelo vaavo nnuupuwelelaahu muritti eraayano asitokweene a mmulokoni?

³ Mwa yoosoma ene yeela, nnoorowa woona moota Muluku onaavarihelaawe asitokweene weera yaakhavihere ale onthamwene aya ni Yehova ottettheñye. Nnoorowa waakhula makoha ala: Emaara heeni nintthuneyaahu owiitthana asitokweene a mmulokoni? Mwaha wa heeni nintthuneyaahu opaka eyo? Awo enkela onikhavihera hayi? Nnaamweera nihivirihaka maxupo, waakhula wa makoho ala onimwaatxeerera osiveliwa ni mareherero a Yehova ni onimweeriha ovuluxa ekumi ahu.

EMAARA HEENI NINTTHUNEYAAHU ‘OWIITTHANA ASITOKWEENE A MMULOKONI’?

4. Ninsuwela moota heeni weera Yakobe 5:14-16, 19, 20, ommuhima mutthu onvoreiwa moomunepani? (Nwehe-tho efootu.)

⁴ Murummwa Yakobe onnaiwanyeiha moota Yehova onaavarihelaawe asitokweene a mmulokoni weera enikhavihere, owo olempe ha: “Mukina a nyuwo onavoreiwa? Awìtthane asitokwene [a mmulokoni].” (Mmusome Yakobe 5:14-16, 19, 20.) Mwaha ola onoonihera weera Yakobe onuuluma eretta ya omunepani. Mwa ntakihero mutthu onvoreiwa onnavekeliwa owiitthana, ohiya meediku, mene asitokweene a mmulokoni. Ni Yakobe onnaiwanyeiha weera mutthu onvoreiwa onrowa okhala nnene wakhala weera soottheka sawe sooleveleliwa. Mwa mukhalelo mmoharu, itthu sintthuneya weera ekosoopiwe eretta ya omunepani sinoolikana ni itthu sintthuneya weera ekosoopiwe eretta ya weerutthuni. Vaavo ninvoreiwaahu mwa mukhalelo wa weerutthuni, ninnaasa nikhavihero wa meediku, ninnamuleela itthu sinnivoreya ni ninnatthara miruku onnivahaawe. Emoha-moharu, vaavo ninvoreiwaahu mwa mukhalelo woomunepani, nintthuneya waasa nikhavihero wa asitokweene a mmulokoni, ninnaaleela itthu ninvirihaahu ni ninnatthara miruku ennivahaaya sa mBiblyani.

5. Moota heeni ninrowaahu osuwela wakhala weera onthamwene ahu ni Yehova onnakhulumuwa?

⁵ Yakobe ekapiitulu ya 5 ennanooperera owaattamela asitokweene vaavo nnoonaahu weera ekumi ahu ya omunepani ennahaawa mwa mikhalelo soovirikana. Menento ti wa miruku waasa nikhavihero nihinaaye onanariha onthamwene ahu ni Muluku! Hiyo-tho onnatthuneya ororomeleya wa mwaneene ahu. Biblya onnanleela weera wakhala weera hiyo khanniikosoopa, pooti wuupuwelaka weera Yehova onnanaakhulela menento ahinaakhulelaka. (Yak. 1:22) Akristu akina a khalayi oSardi yaapaka-tho yoottheka eyo, menento Yesu aahaaleela woohima sa mukhalelo aya woomunepani. (Apok. 3:1, 2) Mukhalelo mmoha wooweha-weha ekumi ahu ya omunepani ori olikanxera moota okokhorela wahu oraaya vano, ni moota waaraaya khalayi. (Apok. 2:4, 5) Hiyo pooti wiikoha ha: ‘Keereke ohakalala waka wa omusooma Biblya ni ophimelela woovukuwa? Keereke kinnaireherera weera koonele mithukumano? Keereke ohakalala waka ni muteko woolaleera woovukuwa? Keereke kinnaviriha etempu yintxipale kuupuwelelaka itthu sa weerutthuni?’ Wakhala weera waakhula wahu makoho ala nneera aani, eyo enoonihera weera onthamwene ahu ni Yehova woovukuwa, ni wakhala weera hiyo khannaaleela asitokweene pooti waatxeerereya. Wakhala weera khaninwera olipiha onthamweene ahu ni Yehova, naari wakhala weera noopaka etthu ehimmusivela Owo, hiyo nintthuneya ovekela nikhavihero wa asitokweene a mmulokoni.

6. Etthu heeni ale epanke yoottheka etokweene entthuneyaaya opaka?

⁶ Wa ale epanke yoottheka etokweene, yeeyo ekhanle ooweeriha okumihiwa mmulokoni, ennatthuneya wuuluma ni asitokweene. (1 Akor. 5:11-13) Mutthu ori poothe opanke yoottheka etokweene ontthuneya nikhavihero weera atthikihere onthamwene awe ni Yehova. Weera naakhele nlevelelo na Yehova moorweela mwa nlivo na Yesu, nintthuneya woonihera “miteko simphwanapwhana n’orukunuxa murima.” (Mit. 26:20) Miteko iyo sinhela mpuwa waaleela asitokweene wakhala weera noopaka yoottheka etokweene.

7. Taani-tho entthuneya waakhela nikhavihero na asitokweene a mmulokoni?

⁷ Asitokweene a mmulokoni ohiya paahi enaakhavihera ale epanke yoottheka etokweene, mene-tho awo ennaakhavihera ale ehilimpe moomunepani. (Mit. 20:35) Mwa ntakihero, pooti weeraka nyuwo munoona weera khamunwera owina mikhalelo soonanara. Ekhotto anyu eyo pooti okhala yooxupa otepaxa wene, wakhala weera muhinaaye oxuttera ekhaikhai mwannavarihela muteko itthu soohapala, mwannamoonela pornografia, naari mwannakonihana moohireerela. Nyuwo khamuntthuneya oviriha maxupo awo meekhaanyu. Nyuwo pooti omuthanla mutokweene a mmulokoni ni owo onoorowa wiiwa itthu sinooxupani, ni onimoovahani miruku soovareleya muteko seiyo sinrowa wookhaviherani omusiveliha Yehova musepaka mikhalelo soonanara. (Koh. 4:12) Wakhala weera nyuwo munnakhulumuwa ni wiilipihera wanyu, asitokweene a mmulokoni pooti wooleelani weera eyo enoonihera weera nyuwo munnavarexexa onthamwene anyu ni Yehova ni munnasepa wiiroromelaxa. — 1 Akor. 10:12.

8. Itthu heeni nihintthuneyaahu waaleela asitokweene a mmulokoni?

⁸ Khontthuneya orowa wa asitokweene ikwaha sootheene ninkumanaahuno maxupo woohima sa mukhalelo ahu wa omunepani. Mwa ntakihero, muupuwele weera nyuwo mohuuluma masu onveeha munna naari murokora, naari nyuwo moonyoonyiheya vantxipale ni owo. Ohiya orowa wa mutokweene, nyuwo pooti ovarihela muteko miruku sa Yesu woohima sa okhaliha murettele wa nyuwo ni munna owo naari murokora owo. (Math. 5:23, 24) Nyuwo-tho pooti othola-thola nyaha sa oreera murima, opixa murima ni wiihiiha weera moonihere mikhalalelo iya sooreera muhoolo. Ekhaikhai weera nyuwo pooti ohiwera owina maxupo anyu, yeereya eyo pooti onvekela nikhavihero mutokweene. Mwa ekarta awe wa Afilipi, murummwa Paulo anvekela munna yoowo nsina nawe nihihimmwale weera amukhavihere Evodia ni Sintikhe omaliha maxupo aya, ni mutokweene mmoha a mmulokoni pooti wookhaviherani mwa mukhalelo mmoharu. — Afil. 4:2, 3.

MWAHA WA HEENI NINTTHUNEYAAHU OWIITTHANA ASITOKWEENE?

9. Mwaha wa heeni nihintthuyaahu wuuliwa muru waasa nikhavihero na asitokweene a mmulokoni? (Miruku 28:13)

⁹ Nintthuneya nroromelo ni olipa murima weera naase nikhavihero vaavo nimpakaahu yoottheka etokweene naari vaavo nnoonaahu weera khaninwera owina mikhalelo soonanara. Nihihiyeke woona wuuliha muru onootxeelihaka wuuluma ni asitokweene. Mwaha wa heeni? Yehova ohaaruma asitokweene weera enikhavihere ni olipiha onthamwene ahu ni Owo. Mwa yeeyo, vaavo nnuulumaahu ni asitokweene, ninnoonihera weera ninnamuroromela Yehova ni ninnamwiiwelela Owo, ni ninnoonihera weera ninnaakhulela weera ninnahaawela nikhavihero na Yehova vaavo ninhalelaahu omora. (Nsal. 94:18) Nroromeleke weera Yehova ononlevelela wakhala weera nniimwaaleela asitokweene etthu nipankaahu ni ohitthikela opaka yoottheka eyo. — Musome Miruku 28:13.

10. Etthu heeni enkela weereya wakhala weera nnimwiipithiha soottheka sahu?

¹⁰ Vaavo nnaaleelaahu asitokweene a mmulokoni soottheka nipankaahu, Yehova pooti onlevelela ni nnookhalano onthamwene wooreera ni Owo. Mene wakhala weera khannaaleela asitokweene, nnoorowa waatxeerera maxupo a soottheka sahu. Vaavo mwene Davidi eerenraawe wiipithiha soottheka sawe, owo khaakhanle nnene moomunepani, mmuupuweloni ni mpaka weerutthuni. (Nsal. 32:3-5) Hiihaale ntoko eretta naari nikhwatta, maxupo oomunepani ikwaha sintxipale ennaatxeerereya wakhala weera khenkosoopiwa nnene. Yehova oosuwela eyo, ti nthowa naya onniwopaawe weera ‘nireherere itthu nuuwo’ nivarihelaka itthu seiyo oreherenraawe weera anikhavihere olama moomunepani. — Yes. 1:5, 6, 18.

11. Moota heeni akina yaarowaaya ovoleeliwa waakhanle weera nohiipithiha yoottheka etokweene?

¹¹ Waakhanle weera nanniipithiha soottheka sahu, opaka eyo, yaamwaavoleela atthu akina. Naamurowa okhoottihera munepa wa Muluku okhala mmulokoni mwahu ni ohela veerisani murettele okhanle eriyari ya asinna ni asirokora. (Aef. 4:30) Mwa mukhalelo mmoharu, wakhala weera noosuwela weera mutthu a mmulokoni oopaka yoottheka etokweene, nintthuneya omooperera orowa wuuluma ni asitokweene woohima sa mwaha owo.a Hiyo nnookhalano mathowa wakhala weera ninniipithiha yoottheka ya mutthu mukina. (Onam. 5:1) Okhala weera ninnamusivela Yehova, onnoorowa ohima wa asitokweene wakhala weera mutthu oopaka yoottheka etokweene. Wakhala weera nnoopaka eyo, nnootteeliha muloko ni nnooweeriha ale etthenke okhalano onthamwene wooreera ni Yehova.

MOOTA HEENI ASITOKWEENE ANNIKHAVIHERAAYA?

12. Moota heeni asitokweene enaakhaviheraaya ale ekhulumunwe moomunepani?

¹² Asitokweene a mmulokoni aaxuttihiwa waakhavihera ale ehilimpe moomunepani. (1 Ates. 5:14) Wakhala weera nyuwo moottheka asitokweene enimoopakelani makoho weera ‘esuwele’ miyuupuwelo sanyu ni moota muniisoonelaanyu. (Mir. 20:5) Nyuwo pooti waakhweihera muulumaka ni awo mootaphuwa, naari okhalaka wooxupa wa nyuwo mwaha wa sookhovelela sanyu, omutthu anyu naari oxupeya wanyu ni etthu yeereñye. Khontthuneya woova muupuwelaka weera munimuuluma ‘masu oohireerela.’ (Yobi 6:3) Asitokweene khenaakuvela othoriha itthu munaaleelaanyu. Ohiya opaka eyo, awo anoorowa owiiwani moomaaleleya weera esuwele itthu sootheene ehinaaye woovahani miruku sa mBiblyani. (Mir. 18:13) Asitokweene a mmulokoni, aasuwela weera entthuneya etempu weera envahe mutthu nikhavihero onhawelaawe, mwa yeeyo, ikwaha ikina awo anoorowa wuuluma ni mutthu owo ohiya paahi ekwaha emoha mene-tho ikwaha ikina weera emukhavihere.

13. Moota heeni asitokweene enrowaaya onikhavihera moorweela mwa mavekelo ni miruku sa mBiblyani? (Nwehe-tho efootu.)

¹³ Vaavo munaasaanyu nikhavihero na asitokweene a mmulokoni, awo animwiilipihera weera ehaatxeerere wiivaha wanyu nthowa. Ohiya opaka eyo, awo animoovekelelani. Nyuwo munimwiisoona okhala oolipa ni oomaaleleya mwaha wa “ikuru” sa mavekelo aya. Nikhavihero naya ninhela mpuwa ‘woohelani makhura nyuwo mwa nsina na Yehova.’ (Yak. 5:14-16) “Makhura” awo, enhimmwa masu eekhaikhai a Muluku. Envarihelaka nnene Biblya, asitokweene a mmulokoni pooti woomaalihani, ni wookhaviherani oreherera onthamwene anyu ni Yehova. (Yes. 57:18) Miruku sa mBiblyani enoovahaayani, pooti wookhaviherani wiilipihera wanyu opaka etthu yooreera. Moorweela mwa awo, nyuwo munimwiiwa nsu na Yehova nenno ninhima ha: “Ephiro t’ila, otthareke.” — Yes. 30:21.

14. Moovarihana ni Agalata 6:1, moota heeni asitokweene emmukhaviheraaya mutthu ori poothe oneetta ‘ephiro yoohireerela’? (Nwehe-tho efootu.)

¹⁴ Mmusome Agalata 6:1. Mukristu oneetta ‘ephiro yoohireerela’ khaneetta moovarihana ni malamulo axariya a Muluku. Owo pooti opaka yoothanla yoohireerela naari opaka yoottheka etokweene. Asitokweene a mmulokoni eneettihiwa mwa nsivelo, “[ennalaka] ni miruku sopixa murima.” Masu a ekereku etaphulelinwe a “olaka” pooti otaphulela otthikiheriwa wa nikhuva nipuro naaraayavo weera nlame. Ntoko hiihaale meediku oosuwela oniilipiheraawe weera alamihe nikhuva noophweeya moohivoreya, asitokweene ennailipihera weera enilamihe mwa eretta ahu yoomunepani ehaatxeereraka woona wahu ovoreya. Awo-tho aaxuttihiwa okhala ‘oowiiweha-weha.’ Vaavo awo eneeraaya enikhavihereke oreherera iphiro sahu, asitokweene ennasuwela weera awo-tho toohimalela ni pooti weetta ephiro yoohireerela. Mwa yeeyo, awo enniikosoopa weera ehiisooneke okhala axariya ompwaha mutthu enamukhaviheraaya. Ohiya opaka eyo, awo anrowa okhala oowiiyeviha ni oopixa murima. — 1 Ped. 3:8.

15. Etthu heeni nintthuneyaahu opaka wakhala weera nookhalano maxupo?

¹⁵ Hiyo pooti waaroromela asitokweene a mmulokoni. Awo aaxuttihiwa weera ehaaleeleke atthu akina nyaha sahu, weera enivaheke miruku sinvarihana ni Biblya ohiya ni miyoonelo saya, ni weera enikhavihereke ni maxupo ahu. (Mir. 11:13; Agal. 6:2) Mikhalelo saya ni sooweereya saya pooti ovirikana, mene hiyo pooti okhala ootaphuwa wuuluma ni mutokweene ori poothe a mmulokoni weera anikhavihere ni maxupo ahu. Ekhaikhai weera khaninrowa waasa miruku wa asitokweene oovirikana niwehereraka omphwanya mutokweene onrowa onileela etthu nintthunaahu wiiwa. Waakhanle weera nampaka eyo, naarowa olikanaka ni atthu ale entthuna “sosivela owaruni” ohiya oxuttera ‘nihusiho na ekumi’ na masu a Muluku. (2 Tim. 4:3) Vaavo nimmuleelaahu mutokweene a mmulokoni maxupo ahu, owo pooti onikoha wakhala weera noohuuluma ni mutokweene mukina a mmulokoni woohima sa mwaha owo ni miruku heeni nivahinwaahu. Ni wiiyeviha pooti omweeriha mutokweene owo orowa waasa miruku wa mutokweene mukina. — Mir. 13:10.

MURITTI NRAAHUNO

16. Muritti heeni nraahuno?

¹⁶ Nnaamweera asitokweene ekosoopaka iputtiputthi sa Muluku, awo khannileela etthu yoopaka. Mutthu ori poothe a hiyo onnatthuneya woonihera moorweela mwa itthu nimpakaahu ni itthu nnuulumahu nihiku ti nihiku weera ninnamusivela Yehova ni nintthuna omuhakalaliha. Nikhaviheriwaka ni Owo, nnoowera oviriha maxupo ni ovirelela okhala oororomeleya. (Arom. 14:12) Mwa yeeyo, asitokweene ohiya onleela etthu yoopaka, awo ennanvarihela muteko Biblya weera enikhavihere wiiwexexa etthu Yehova onuupuwelaawe woohima sa mwaha owo. Ni awo ennanihiya weera nipakeke soothanla sahu. Vaavo ninttharaahu miruku sa mBiblyani hiyo ninnatxentxeriha ‘muupuwelo ahu’ weera nipake soothanla sooreera. — Aheb. 5:14.

17. Etthu heeni Yehova onwehereraawe weera nipake?

¹⁷ Eparakha etokweene nraahuno ya okhala iputtiputthi sa Yehova! Yehova oomurumiha Yesu, yoowo ori “mukukhuli ooreera murima,” weera anlivere hiyo, yoowo olenve ekumi awe wa hiyo, weera nikhaleno eparakha yookhalano ekumi yoohimala. (Yoh. 10:11) Ni moorweela mwa asitokweene a mmulokoni, Yehova ookwanihera yoolaihera awe, yeeyo ohimmaawe ha: “Kinimovahani akukhuli mowiwanana ni murim’aka, yawo anrowa owèttihani ni miruku ni wiwa’mo.” (Yer. 3:15) Vaavo ninkhulumuwaahu naari ovoreiwa mwa mukhalelo woomunepani, hiyo khanintthuneya woovelela ovekela nikhavihero wa asitokweene. Nikhale oolikaneene ottottela mureerelo mareherero Yehova opankaawe aavarihelaka asitokweene a mmulokoni.