Mukhalelo wooreera woowaakhula ohixariya

1-2. Atthu antxipale anoonela hayi ohixariya ni makoho heeni nintthuneyaahu wiikoha?

NINKHALA elapo yoohixariya. Atthu antxipale olelo ennathokororiwa moohixariya mwaha wa mathowa mantxipale, ntoko othoiwa, nipuro enkhumaaya, sookhovelela saya ni mathowa makina. Atthu antxipale olelo ennahaawa mwaha wa othokororiwa moohixariya ni atthu ookhalano, ni anamohoolela a ikuvernu yaawo eri oowiiyera atthu. Mikhalelo iyo sa ohixariya sinnanivoleela ootheene ahu ni atthu ale hiyo naasuwenlaahu.

² Hiyo khanintikiniheya vaavo nnaawehaahu atthu antxipale enyoonyiheyaka mwaha wa ohixariya oneereya mulaponi. Ootheene ahu nintthuna okhala elapo nniisoonaahu okhala oovareleleya ni ninthokororiwaahu mwa exariya. Atthu akina enniilipihera omaliha maxupo eneereya mulaponi naari elapo aya. Awo ennapaka manifestação weera etxentxe ikuvernu ni malamulo, ni ennaavotari makantidaado a ipoliitika yaawo enlaihera omaliha maxupo aya. Menento, ntoko akristu, hiyo ninnaxuttihiwa “[oheerela] eparte elapo” ni oweherera Omwene wa Muluku omaliha ohixariya wootheene. (Yoh. 17:16) Nnaamweera vareene hiiho, hiyo pooti onyoonyiheya vaavo nnoonaahu ohixariya. Hiyo pooti wiikoha ha: ‘Etthu heeni kintthuneyaaka opaka? Neereke yookhala etthu kintthuneyaaka opaka weera kimalihe ohixariya oneereya vano?’ Weera naakhule makoho ala, nnoorowa woona moota Yehova ni Yesu anoonelaaya ohixariya.

YEHOVA NI YESU ENNIITTA OHIXARIYA

3. Mwaha wa heeni ninnyoonyiheyaahu ni ohixariya? (Yesaya 5:7)

³ Biblya onnanleela mathowa enneeriha onyoonyiheya ni ohixariya. Owo onhima weera Yehova onipanke ailikanxaka ni weera Owo “ennamusivela exariya ni nthorihelo.” (Nsal. 33:5; Eph. 1:26) Owo khanaathokorora atthu moohixariya, ni khantthuna weera atthu akina ethokororaneke moohixariya! (Ola. 32:3, 4; Mik. 6:8; Zak. 7:9) Mwa ntakihero, etempu ya profeta Yesaya, Yehova aahiiwa “sokhuwela [sa ohaawa]” wa aIsraeli yaathokororiwa moohixariya ni anamwaattamanani aya. (Mmusome Yesaya 5:7.) Yehova aahaattaruxa ale yaavirelela ohiiwelela malamulo awe ni yaathokorora akhwaaya moohixariya. — Yes. 5:5, 13.

4. Moota heeni Yesu oniisoonelaawe vaavo ommoonaawe mutthu athokororiwaka moohixariya? (Nwehe-tho efootu.)

⁴ Ntoko Yehova, Yesu ennamusivela exariya ni khansiveliwa ni ohixariya. Ekwaha emoha mwa muteko awe woolaleera mulaponi, owo aamoona mulopwana mmoha oorakala ntata. Yesu ammorela ikharari ni aalamiha ntata na mulopwana ole, menento asitokweene a ettiini yaawo yaari oowuuma murima yanyoonyiwa vantxipale. Awo yaahima weera Yesu khaatthara nlamulo na Esaabadu ni awo khayaapwattha weera mulopwana ole anvoreiwa. Yesu oonenle hayi onyoonyiheya waya? Owo “[aariipiwa] murima mwaha woowuuma waya murima.” — Mar. 3:1-6.

5. Etthu heeni nintthuneyaahu wuupuwelela vaavo ninnyoonyiheyaahu mwaha wa ohixariya?

⁵ Okhala weera Yehova ni Yesu khensiveliwa ni ohixariya, khaiyene ti woonanara hiyo-tho ohisiveliwa ni ohixariya. (Aef. 4:26 ni enoota “Munyoonyiweke”) Menento, naari nreene ni mathowa ooreera nintthuneya oweha-weha onyoonyiheya wahu ni wuupuwela weera khaninwera omaliha ohixariya. Mweekhaikhai oviriha etempu yintxipale ninyoonyinweene ni ohiiweha-weha, pooti onikumihera maxupo a mmuupuweleloni ni a weerutthuni. (Nsal. 37:1, 8; Yak. 1:20) Vanonto, moota heeni ninrowaahu oviriha ohixariya? Hiyo pooti oxuttera ni ntakihero na Yesu.

MOOTA YESU AAVIRINHAAWE OHIXARIYA

6. Ohixariya heeni waakhanle vaavo Yesu aaraawe valaponi? (Nwehe-tho efootu.)

⁶ Yesu aahoona ohixariya vantxipale emaara aaraawe elapo ya vathi. Owo aasuwela weera ahooleli a ittiini yannaatxeerera malamulo yaawo yaaxupiha ikumi sa atthu. (Math. 23:2-4) Owo-tho aasuwela weera anamalamulela aroma khayaathokorora nnene atthu. Ayuda antxipale yaatthuna okhaliha murettele elapo aya. Akina a yaawo yaapaka ikrupu weera yawane ni aroma. Menento, Yesu kheerenle eparte ikrupu iyo saawana weera sikhalihe murettele elapo aya. Emaara aasuwenlaawe weera atthu yaatthuna onvara omwene, Yesu aakhuma nipuro nne. — Yoh. 6:15.

7-8. Mwaha wa heeni Yesu aheerenraawe omaliha ohixariya vaavo aaraawe valaponi? (Yoh. 18:36)

⁷ Emaara aaraawe valaponi, Yesu khaivoleihenre ni ipoliitika weera eerere omala-maliha maxupo a ohixariya. Mwaha wa heeni? Owo aasuwela weera khaavo mutthu aarinono edireitu yoowaalamulela atthu akina. (Nsal. 146:3; Yer. 10:23) Atthu khenwera omaliha mathowa enkumihera ohixariya. Satana, Diabo, tonlamulela elapo ela. Owo mutakhali ni atthu antxipale a elapo ela ikwaha sintxipale ennamutakiha. (Yoh. 8:44; Aef. 2:2) Naari atthu ooreera murima khenwera omaliha maxupo a elapo ela, mwaha wooweera toohimalela. — Koh. 7:20.

⁸ Yesu aasuwela weera Omwene wa Muluku paahi, tonrowa omaliha itthu sootheene sinkumihera ohixariya. Mwaha wa yeeyo, owo aavarihela muteko etempu awe ni ikuru sawe “alaleyaka mitthenka sooreera sa Omwene wa Muluku.” (Luka 8:1) Owo aahaaroromeliha “enaasa vantxipale exariya” aaleelaka weera ohixariya wootheene onoorowa omala. (Math. 5:6 ni enoota ya yoosoma; Luka 18:7, 8) Mene eyo khenrowa weereya moorweela mwa manifestação naari ikuvernu sa mulaponi, mene enkela weereya moorweela mwa Omwene wa Muluku, ni Owo “khoneerela eparte elapo ela.” — Mmusome Yohani 18:36.

MMUTAKIHE YESU VAAVO MUNVIRIHAANYU OHIXARIYA

9. Etthu heeni enoororomelihani weera Omwene wa Muluku paahi tonrowa omaliha ohixariya?

⁹ Olelo ninnoona ohixariya opwaha Yesu onnaawe emaara aaraawe mulaponi. Ninkhala “mahiku òmalihera” a elapo ela, mwaha wa yeeyo, maaxupo aasareya mulaponi opwaha emaara Yesu aaraawe elapo ya vathi. Mene ntoko etempu ya Yesu, atthu ankumihera maxupo awo Satana ni atthu enamutakiha. (2 Tim. 3:1-5, 13; Apok. 12:12) Ntoko hiihaale Yesu, hiyo noosuwela weera omwene wa Muluku paahi, tonrowa omaliha ohixariya wootheene okhanle elapo ela. Okhala weera ninnakhavihera Omwene owo, hiyo ninnakhootta weerela eparte manifestação ni opaka itthu ikina ni yoolakela ya omaliha maxupo a elapo ela. Moone yooweereya ya murokora mmoha Stacy.a Ahinaaye oxuttera ekhaikhai, Stacy anneerela eparte manifestação weera akhalihe murettele. Menento owo, aapatxera ohovela woohima sa ele aapakaawe. Owo ohimme ha: “Emaara miyo kaapakaaka manifestação, kanniikoha wakhala weera kaari eparte yoophwanelela. Vano kinkhaviheraka Omwene wa Muluku, koosuwela weera kiri eparte yoophwanelela. Koosuwela weera Yehova onoorowa omaliha ohixariya wootheene, etthu yeeyo kahaarowaaka owera opaka.” — Nsal. 72:1, 4.

10. Moovarihana ni Matheyo 5:43-48, mwaha wa heeni nihineereraahu otxentxa malamulo ni ikuvernu? (Nwehe-tho efootu.)

¹⁰ Atthu antxipale olelo, ennathukumana mwa ikurupu sineerera otxentxa ikuvernu. Menento antxipale a yaawo, ennanyoonyiheya ni ehiniiwelela malamulo, ni mwaha wa yeeyo ennaakumihera maxupo atthu akina. Khaiyene ti yeeyo Yesu onixuttinhaawe weera nipakeke. (Aef. 4:31) Munna mmoha oniitthaniwa Jeffrey ohimme ha: “Miyo koosuwela weera vaavo atthu empakaaya manifestação yaawo enhimmwa okhala a murettele, moowaakuveya awo ennanyoonyiheya enapatxera onyaanya itthu, owiiyera atthu ni waapakela itthu soonanara.” Menento Yesu, oonixuttiha weera nintthuneya waathokororaka atthu ootheene mwa nsivelo, naari yaale ehinaakhulela moonelo ahu ni ennitthara-tthara. (Mmusome Matheyo 5:43-48.) Ntoko akristu, ninnapaka ele ninweraahu weera niiwelele malamulo Yesu onivanhaawe.

11. Etthu heeni yeera yeerere yoothanla ahu ya ohikhavihera ikrupu sineerera opaka matxentxo a elapo aya?

¹¹ Nnaamweera nsuwelaka weera Omwene wa Muluku tonrowa omaliha moomalela ohixariya wootheene, hiyo pooti woona okahala wooxupa otthara ntakihero na Yesu, vaavo ninthokororiwaahu moohixariya. Ti yeeyo yeereñye ni murokora mmoha oniitthaniwa Janiya, emaara yeeyo aathokororinwaawe moohixariya mwaha wa eraasa awe. Owo ohimme ha: “Kaanyoonyiheya ni kaariipiwa murima ni kaatthuna weera atthu ale yaakithokoronre moohixariya ettaruxiwe. Nto kaahuupuwela okela ekurupu emoha yeeyo yaapaka manifestação ookhootta nthalu. Kuupuwela weera opaka eyo waari mukhalelo woowonihera onyoonyiheya waka.” Noovira etempu Janiya aahoonelela weera annatthuneya opaka matxentxo. Owo ohimme ha: “Miyo kannaakhulela weera atthu akina evoleele moota kinuupuwelaaka. Awo yannakeeriha omuroromela mutthu ohiya Yehova. Miyo kaalakela oheerela eparte ekurupu eyo.” Nintthuneya wiikosoopa weera onyoonyiheya wahu naari oreene ni mathowa ooreera ohineeriheke weerela eparte nyaha sa epoliitika sa elapo ela. — Yoh. 15:19.

12. Mwaha wa heeni nintthuneyaahu wiikosoopa ni ele ninsomaahu, ninwehaahu ni nniiwaahu?

¹² Etthu heeni enrowa onikhavihera okosoopa myuupuwelo sahu sa onyoonyiheya mwaha wa ohixariya? Etthu enrowa onikhavihera ori wiikosoopa ni itthu ninsomaahu, nniiwaahu ni ele nnoonelaahu mu inotiisiyani. Soohimmwa sintxipale mu internet sinnawuuluma moohireerela anamalamulela ni eyo ennaweeriha atthu ohisiveliwa ni anamalamulela awo. Ikwaha sintxipale atthu anhima itthu iyo, anhima moonelo aya ohiya etthu yereñye. Naari hiyo niiwaka soohimmwa seekhaikhai sa ohixariya, neereke ottharelela itthu iyo sinoorowa onikhavihera? Wakhala weera hiyo nnooviriha etempu yintxipale niwiiwaka ni waasoma anotiisia awo, hiyo pooti onyoonyiheya ni okhulumuwa. (Mir. 24:10) Ni hiyo pooti ottiwala weera Omwene wa Muluku tonrowa omaliha maxupo ootheene.

13. Moota heeni omusoma Biblya mahiku ootheene onnikhaviheraaya vaavo nnoonaahu ohixariya?

¹³ Wakhala weera nnoomusoma Biblya mahiku ootheene ni ophimelela ele ninsomaahu, eyo enoonikhavihera osuwela etthu yooreera opaka vaavo nnoonaahu naari ninvirihaahu ohixariya. Murokora mmoha oniitthaniwa Alia, aanyoonyiheya vantxipale vaavo aawoonaawe atthu yaathokororaka moohixariya atthu akina. Owo aanyoonyiheya vaavo aawoonawa atthu yaapaka itthu soonanara ehittaruxiwaka. Owo ohimme ha: “Miyo kaakilaathi kiniikoha: ‘Keereke mweekhaikhai kinnaroromela weera Yehova onoomaliha maxupo ala?’ Yaari emaara ene yeeyo kaamusommaaka Yobi 34:22-29. Iversu iya saakuupuxera weera Yehova onnoona sootheene. Owo osuwela moota onrowaawe waathoriha atthu, ni yoowo paahi tosuwenle moota woomaliha maxupo ootheene.” Vanonto, niwehereraka Omwene wa Muluku omaliha maxupo ootheene, etthu heeni nintthuneyaahu opaka viinaano?

ETTHU HEENI NINTTHUNEYAAHU OPAKA VANO VAAVO NINVIRIHAAHU OHIXARIYA?

14. Etthu heeni nintthuneyaahu opaka weera nisepe weerela eparte ohixariya okhanle elapo ela? (Akolosi 3:10, 11)

¹⁴ Hiyo khaninwera omaliha ohixariya atthu akina empakaaya, mene hiyo nnoowera waapakela itthu sooreera atthu akina. Ntoko nonnaahu, nimmutakiha Yesu nooniheraka nsivelo. Nsivelo nno ninnaneeriha waakosoopa atthu akina mwa nttittimiho naari yaale ennithokorora moohixariya. (Math. 7:12; Arom. 12:17) Yehova onnahakalala vaavo nnaathokororaahu atthu ootheene mooreera murima ni mwa exariya. — Mmusome Akolosi 3:10, 11.

15. Moota heeni nneeraahu naakhavihere atthu naaleelaka woohima sa ele Biblya onxuttihaawe?

¹⁵ Mukhalelo wootepa oreera wa okhaliha exariya ori waaxuttiha atthu ikhaikhai sa mBiblyani. Mwaha wa heeni? Mwaha wooweera ‘osuwela wa Yehova’ pooti omweeriha mutthu aapaka itthu soonanara okhala ooreera murima ni a murettele. (Yes. 11:6, 7, 9) Mulopwana oniitthaniwa Jemal ahinaaye oxuttera ekhaikhai aahiitakansera ni ekurupu emoha weera awane ekhotto ni yootthuna ya otxentxa elapo awe, yeeyo oonawe okhala yonanara. Owo ohimme ha: “Nyuwo khontthuneya waatxentxa atthu nwanaka ni awo. Miyo nkitxentxiwe evariheliwaka ekhotto. Mene kitxentxiwe ni ekhaikhai ya mBiblyani kaaxutteraaka.” Etthu Jemal oxuttenraawe yoomweeriha ohiya owana ekhotto. Wakhala weera nnimwaaxuttiha atthu antxipale ikhaikhai sa mBiblyani, awo enoohiya waathokorora atthu akina moohixariya.

16. Mwaha wa heeni nyuwo muntthunaanyu waaleela atthu woohima sa yooweherera ahu ya Omwene?

¹⁶ Ntoko Yesu, hiyo nookhala ni ntthuno noowaaleela atthu weera Omwene wa Muluku tonrowa omaliha moomalela ohixariya wootheene. Yooweherera eyo pooti waalipiha ale ehasulinwe. (Yer. 29:11) Stacy, nimuhimmaahu muttuli, ohimme ha: “Oxuttera ekhaikhai wookikhavihera okhala oomaaleleya mwaha wa ohixariya kivirinhaaka ni konnaaka.” Yehova onnavarihela muteko mitthenka sa mBiblyani weera animaalihe. Weera nlaleye mitthenka soomaaliha sa mBiblyani woohima sa omala wa ohixariya, nintthuneya okhala oowireherera nnene. Vaavo hiyo ninrowaahu ororomelaka soolepa sa mBiblyani noonnaahu mpuwa mwa mwaha ola, hiyo nnoorowa okhala oolikaneene waalaleera atthu woohima sa mwaha ola oskola naari omutekoni.b

17. Moota heeni Yehova onnikhaviheraawe oviriha ohixariya?

¹⁷ Noosuwela weera nlelo nneereke oviriha ohixariya wakhala weera Satana onoovirelela okhala “namalamulela a elapo ela.” Menento hiyo pooti oweherera etempu yooreerela, mwaha wooweera Yehova oolaihera onikhavihera vano ni ‘omoomola’ Satana ni omaliha ohixariya wootheene. (Yoh. 12:31) Moorweela mwa Biblya, Yehova onnanleela ohiya paahi mwaha wa heeni okhanlaaya ohixariya, mene-tho moota owo oniisoonelaawe vaavo onnoonaawe nivirihaka ohixariya. (Nsal. 34:18-20 [34:17-19, Tradução do Novo Mundo]) Moorweela mwa mwanawe, Yehova oonixuttiha etthu nintthuneyaahu opaka vaavo nnoonaahu ohixariya oneereya vano ni moota Omwene awe onrowaaya omaliha moomalela ohixariya wootheene. (2 Ped. 3:13) Nivireleleke olaleera mitthenka sooreera sa Omwene owo moowiilipihera, niwehereraka etempu yeeyo elapo enrowaaya osareya “ekhaikhai ni exariya.” — Yes. 9:7.