1925​— Iyaakha 100 sa muttuli

AWO YAANATTHUNEYA OVIRELELA OWEHERERA

Anamasoma antxipale a Biblya yuupuwela weera eyakha ya 1925 yaamurowa okhala eparaisu mulaponi. Mwaha wa heeni? Munna Albert Schroeder, yoowo muhoolo mwaya aavanre ntoko Mukuttula Woolmulela, ohimme ha: “Asinna yuupuwela weera eyaakha ya 1925 asinna oothanliwa yaahanle elapo ya vathi yaamurowa wiirimu weera yeereleke eparte Omwene, ni weera arumeyi oororomeleya a khalayi ntoko Abrahaamu, Davidi ni akina, yaamurowa ovinyererihiwa ni ovara ntoko Mamwene elapo ya vathi yeerelaka eparte Omwene wa Muluku.” Mene emaara eyo yaheereñyaaya asinna akina yaanyoonyiheya. — Mir. 13:12.

Nnaamweera vareene hiiho anamasoma antxipale a Biblya, yannavirelela ovara muteko woolaleera nave-tho onnooneya weera awo yaakhalano muritti woovaha onamoona woohima sa Yehova. Mwa ntakihero nrowe noone moota awo yanvarihenlaaya muteko Raadiyu weera yaalaleere mitthenka sooreera atthu antxipale.

WAATXEEREREYA WA ISTASAWU SA RAADIYU

Eyaakha ya 1924 atthu antxipale yaahiiwa mitthenka sooreera moorweela mwa Raadiyu WBBR, mwaha wa yeeyo anamasoma a Bilbya yaapaka estasawu ekina etoko-toko ya radio, yeeyo yaarinono owera woowiiwanyeya mapuro oorakamela, ekwaha ela oChicago. Esiikala ya istasawu eyo enyowani yaari WORD. Ralph Leffler, enginheiro a Raadiyu yoowo aavara muteko wa estasawu eyo, ohimme ha: “Ohiyu emaara yooriira eyiita Raadiyu WORD annaiwanyeya mapuro oorakamela.” Mwa ntakihero, emusi emoha yaakhala mapuro oorakamela ookwanaka ikiloometru 5.000 oPilot Station, wAlasca, yaawera wiiwa mitthenka sooreera saahimmwale muraadiyuni mmo. Yiiwakaru mitthenka iyo, emusi eyo yaalepa ekaarta exukurelaka mwaha wa eprograma ele ya omunepani yoolipiha.

Torre de Vigia a 1 a Dezembro a 1925, uulumaka woohima sa mapuro oorakamela aaweraawe ophiya Raadiyu ole, ohimme ha: “Ni antena a 5.000 watts, estasawu WORD eneerela eparte ya Raadiyu omphiya mapuro oorakamela wEstados Unidos da America. Owo pooti wiiwanyeya ninkhuma nsuwa ni onkela nsuwa wEstados Unidos, oCuba osul ni oNorte wa wAlasca. Atthu antxipale yahintale wiiwa ekhaikhai yaakhala ni ntthuno nooxuttera ekhaikhai mwaha wa ele yaaiwalaaya muraadiyuni mmo.”

Mwa etempu eyo, Anamasoma antxipale a oCanada, yannailipihera vantxipale weera envariheleke Raadiyu mmutekoni moolaleera. Eyaakha ya 1924 yaapakiwa estasawu CHUC, oSaskatchewan. Owo aari Raadiyu oopatxera aapakinwe oCanada ni yoolakela ya olaleya nyaha sa ittiini. Eyaakha ya 1925 wannatthuneya ophwanya nipuro ntokweene weera apakiwe Raadiyu owo. Mwa yeeyo, mareherero yaathuma ni yaareherera ecinema ya khalayi oSaskatoon ni istudio sa CHUC saathamiheriwa weiwo.

Mwaha wa Raadiyu, atthu antxipale yaakhala isidade ikhaanini ni mapuro oorakamela oSaskatchewan yaahiiwa ekwaha yoopatxera mitthenka sooreera. Mwa ntakihero, esidade emoha yoorakamela, muthiyana mmoha iitthaniwa Graham aahiiwelela eprograma ya raadiyu ni aalepa ekaarta avekelaka ipublikasawu sa Biblya. Munna mmoha oneeriwa George Naish ohimme ha: “Oveka wawe nikhavihero muthiyana ole waari woowiiwanyeya, eyo yaaneeriha omurumihela ivolume sootheene sa Estudos das Escrituras.” Evirakaru etempu vakhaanini, muthiyana ole Graham aapatxera olaleera mitthenka sa Omwene mapuro oorakamela.

WIIWEXEXA ONYOWANI

Erevista ya Torre de Vigia ya 1 a Março a 1925 yaakumihera mwaha waarino muru waahima weera “Okhumelela wa nloko.” Mwaha wa heeni muru owo waaraaya wootepa otthuneya? Yaakhala etempu Anamasoma a Biblya yuupuwelaaya weera Satana aakhalano mareherero awe wiirimu weiwo saaraayawo minepa soonanara, ni mareherero makina elapo ya vathi, mwemmo araayamo ahooleli a ittiini, aanakoso ni a ipoliitika. Menento, muru owo “kaporo oororomeleya ni a miruku” aahaakhavihera asinna wiiwexexa weera Yehova-tho ookhalano mareherero awe, ni weera mareherero awo toovirikana ni a Satana. (Math. 24:45) Opwaha mwa yeeyo, kaporo owo aahima weera Omwene wa Muluku waakhumelela eyaakha ya 1914, ni eyaakha ene yeeyo “yàkhumelela ekhotto wirimu,” ni Satana ni mademooniyu awe yaavonyeriwa elapo ya vathi ni weera khiyaanono yooweherera yootthikela wiirimu. — Apok. 12:7-9.

Akina waahaaxupa waakhulela wiiwexexa iwo onyowani. Esuwelaka weera eyo yaamurowa weereya, mwaha ole waahima: “Wakhala weera Namasoma mmoha a Torre de Vigia khanaakhulela ele enhimmwa va, ninnamooperera weera aaweherereke Apwiya moomaaleleya ni nroromelo, avirelelaka okhalano murima wooreera.”

Tom Eyre, yoowo aari colportor (olelo onsuweliwa ntoko piyoneiru) oGrã-Bretanha, aahima moota Anamasoma akina a Biblya yiisonnaaya esomakaru mwaha ole, owo ohimme ha: “Asinna antxipale yaahakalala vantxipale ni wiiwanyeihiwa wa eliivuru ya Apokalise 12. Vaavo niiwexenxaahu weera Omwene wookhumelela wiirimu, naahakalala vantxipale weera naaleele mitthenka sooreera atthu akina. Mweekhaikhai eyo yaaneeriha waatxeerera muteko ahu woolaleera ni yaanikhavihera woona moota Yehova aaweettihaawe atthu awe wa itthu sooreera saakela weereya muhoolo.”

MURITTI WA OVAHA ONAMOONA WOOHIMA SA YEHOVA

Olelo, Anamoona a Yehova anniiwexexa nnenesene masu a Yesaya 43:10, yaawo enhima ha: “Nyuwo mwà anamon’aka, ehako ya Yahvéh, nyuwo mwà murumeyi aka kimuthanlalaka.” Menento, ehinaaye ophiya eyaakha ya 1925 yoolepa ela khiyaaromoliwa vantxipale mpublikasawuni mwahu. Menento, eyo yaamurowa otxentxa. Mpuwa mwa eyaakha ya 1925, yoolepa ya Yesaya 43:10 ni 12, yaathokororiwa mwa manummero 11 a Torre de Vigia!

Okhwipi wa mweeri wa Agosto a 1925, Anamasoma a Biblya wEstados Unidos yaathukumana weera ekhaleno konkreesu wIndianápolis, Indiana. Mpuwa mwa eprograama ya konkreesu owo, yaakhala masu oowaakheliwa a munna Rutherford, yaawo yaahima weera: “Nohoowa okonkreesuni nno weera . . . nlipihiwe ni Apwiya ni nitthikele ovara muteko woolaleera nreene oolipa ni oolikaneene weera nikhale Anamoona awe.” Mpuwa mwa mahiku 8 a konkreesu ole, yaahoopereriwa weera ettotteleke mureerelo iparakha sootheene weera evahe onamoona woohima sa Yehova.

Esaabadu, 29 a Agosto, munna Rutherford aapaka mwaha yoowo waarino muru waahima: “Woopereriwa olaleera.” Mwaha owo, owo aahima otthuneya waya ovara muteko wolaleera eeraka: “Yehova ohaaleela atthu awe. . . : ‘Nyuwo mwa anamon’aka . . . ni miyo ka Muluku anyu.’ Ni Owo onnaavaha muritti ni nsu noowiiwanyeya, eeraka: ‘Koovaha ethoonyero ya waaleela atthu.’ Khekhanle ekhurupu ekina valaponi enaavaha ethoonyero ya waaleela atthu ehikhanle [atthu awe], yaawo erino munepa wa Apwiya, ni mwaha wa yeeyo ti Anamoona awe.” — Yes. 43:12; 62:10.

Omalakaru mwaha ole munna Rutherford, aasoma ekaarta ya mukwasu yeeyo waarino muru “Mitthenka sa yooweherera,” atthu yaari vale yaahaakhulela vamoha ele mitthenka saahimaaya, yeeyo yaahima weera Omwene wa Muluku yooweherera emoha ninrowaahu waakhela “mareeliho ntoko murettele, okhala nnene, ovareleleya, ekumi yooreera, otaphuwa, ni ohakalala woohimala.” Esommwakaru ekaarta eyo ya mukwasu, yaatxentxiwa ekhala Efolhetu ni Efolhetu eyo yaataphuleliwa mwa muulumo mantxipale. Saakaiwa ikoopiya sa efolyetu eyo sookwanaka imilyawu 40.

Anamasoma a Biblya yaaviriha iyaakha sintxipale weera evariheleke muteko nsina na “Anamoona a Yehova.” Mene vaavo yaaviraaya etempu, awo yannasuwela weera yaakhalano muritti wa ovaha onamoona woohima sa Yehova.

WOOPERERIWA WEERA YAAXEKUREKE ATTHU YOONIHERA NTTHUNO

Vaavo nummero na Anamasoma a Biblya naatxeerereyaaya elapo yootheene, wannaatxeerereya-tho woopereriwa waaxekura ale yoonihera ntthuno ni mitthenka sooreera. Epakiwakaru ekanpaanya, yeeyo yaakaiwa Efolhetu Mitthenka sa yooweherera, eBoletima yaahima miruku iya: “Mutthikelemu mwaaxekure yaale mwaahiyenraanyu ekoopia ya Mitthenka sa yooweherera.”

Eboletim ya 1925 yaawiiha yooweereya ya Namasoma mmoha a Biblya a esidade ya oPlano, oTexa: “Naatikiniheya mwaha wa mittetthe naaxekunraahu okhalamo atthu erino ntthuno opwaha mittetthe minyowani. Esidade ekhaanini ya muttetthe ahu yaavariwa ikwaha 5 mpuwa mwa iyaakha 10. . . . Viinaanoru, murokora Hendrix ni ameyaka yaatthikela oxekura esidade ele ni yaahaakawela aliivuru antxipale opwaha khalayi.”

Colportor (naari neere piyoneiru) mmoha oPanama olempe ha: “Atthu antxipale yaakoomonle mmawannyaya yaatxentxa mukhalelo aya, vaavo kaatthikenlaaka waaxekura ekwaha yanaaveeli naari yanaararu. Muteko aka mutxipale woolaleera eyaakha ela kintthikela waaxekura atthu kuulummaakano khalayi, ni akina a yaawo annoonihera ntthuno.”

SOOWEHERERA SA MUHOOLO

Mwa ekaarta awe ya vayaakhani aaleelaka mapiyoneiru, munna Rutherford miteko saavarinwe eyaakha ele ni aahuuluma woohima sa muteko waarowa opakiwa muhoolo. Owo aahimme ha: “Eyaakha evinre, asinna yaakhalano eparakha yoowaamaaliha atthu antxipale yaaripinwe murima. Ovara muteko ola wooniwiihera ohakalala vamurimani . . . Eyaakha enttharelana asinna anookhalano iparakha sintxipale soovaha onamoona woohima sa Muluku ni Omwene awe ni ovaha ethoonyero ya waaleela atthu. . . . Vamoha nnoovirelela wuuluma moowiiwanyeya ni omwiipela itxipo sonvuwiha Muluku ahu ni Mwene ahu.”

Woomaliherani wa eyaakha 1925, asinna yannaapaka apalano oowaatxeerera eBeteeli ya oBrooklyn. Eyaakha ya 1926 wampatxereya muteko mutoko-toko wooteka wa mareherero a Yehova.