Yehova “ori ohakalala [wahu]”

1-2. (a) Itthu heeni atthu antxipale envirihaaya olelo? (b) Etthu heeni ninrowaahu woona mwa yoosoma ene yeela?

ATTHU antxipale olelo ennapaka itthu sintxipale weera ehakalaleke. Menento khemphwanya ohakalala weekhaikhai. Atthu antxipale ennariipiwa murima ni ennuupuwela weera itthu khasinrowa okhala nnene ni awo. Atthu a Yehova pooti oviriha itthu imoha-moharu, okhala weera ninkhala “mahiku òmalihera” ninnaweherera okumanano “ehuhu yowopopiha.” — 2 Tim. 3:1.

² Mwa yoosoma ene yeela, nnoorowa woona etthu ekhanle ooneeriha ohihakalala ni etthu nintthuneyaahu opaka wakhala weera nooyeleela ohakalala. Mene woopatxerani, ninrowa omusuwela Taani onkumihera ohakalala weekhaikhai.

TAANI ONNEERIHA OPHWANYA OHAKALALA WEEKHAIKHAI?

3. Soopattuxiwa sinnixuttiha eheeni woohima sa Yehova? (Nwehe efootu.)

³ Yehova toohakalala, Owo-tho ontthuna weera hiyo nihakalaleke. Mwa yeeyo, khaiyene ti wootikiniha vaavo nnoonaahu ohakalala wawe niwehaka soopattuxiwa ntoko eplaneeta yeeyo enrukurenre ni erinono ikoore soovirikana, asinama oovirikana ni yootxa yoosiva. Mweekhaikhai Muluku ontthuna weera hiyo nihakalaleke!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Mwaha wa heeni Yehova onvirelelaawe ohakalala nnaamweera oonaka ohaawa onkhumelela mulaponi? (b) Yoovaha heeni ya Yehova wa hiyo? (Nsalmu 16:11)

⁴ Nnaamweera Yehova areene ‘Muluku oohakalala,’ Owo oosuwela maxupo ni ohaawa wootheene oneereya mulaponi. (1 Tim. 1:11) Mene Owo khahiñye itthu iyo weera simweeriheke ohihakalala. Owo oosuwela weera ohaawa wootheene onoorowa omala, ni Owo oosuwela nihiku onrowaawe omaliha. Owo onnavilela moopixa murima. Awehereraka etempu eyo, Yehova oosuwela itthu ninvirihaahu ni ontthuna onikhavihera. Moota heeni Owo onnikhaviheraawe? Owo onnapaka eyo anivahaka ohakalala. (Musome Nsalmu 16:11.) Noone moota omusuwela Yehova omweerinhaaya Yesu okhala mutthu oohakalala.

5-6. Mwaha wa heeni Yesu onhakalalaawe?

⁵ Mwa soopattuxiwa sootheene, Yesu tori mutthu oohakalalaxa. Mwaha wa heeni? Muthokorore mathowa meeli. (1) “Owo ori eruku ya Muluku òhòneya” ni onnoonihera mikhalelo sootheene sa Atithi awe mwa itthu sootheene. (Akol. 1:15; moone enoota ya yoosoma “ohakalala” va 1 Timotheyo 6:15.) (2) Yesu ooviriha etempu yintxipale areene ni Atithi awe, yaawo eri ephattuwelo ya ohakalala.

⁶ Yesu annahakalala vaavo aapakaawe itthu sootheene Atithi awe yaanvekelaaya. (Mir. 8:30, 31; Yoh. 8:29) Ni yookhumelelaaya mwaha woowiiwelela, owo onnaakhuleliwa ni Yehova. — Math. 3:17.

7. Moota heeni ninrowaahu ophwanya ohakalala weekhaikhai?

⁷ Hiyo-tho pooti ophwanya ohakalala weekhaikhai nimwaattamelaka Yehova, Yoowo ori ephattuwelo ya ohakalala. Wakhala weera nnooviriha etempu yintxipale nixutteraka woohima sa Yehova ni omutakiha, nnoovirelelaka okhala oohakalala. Nave-tho nnoorowa ohakalala mwaha woopaka yootthuna ya Muluku ni osuwela weera Owo onnanaakhulela.a (Nsal. 33:12) Vanonto nankha wakhala weera khaninhakalala mwa etempu vakhaaniini naari mwa etempu yintxipale? Neereke eyo entaphulela weera khannaakhuleliwa ni Muluku? Hooye! Hiyo na atthu oohimalela. Ni ikwaha ikina ninnahaawa ni ninnariipiwa murima. Yehova onnaiwexexa eyo. (Nsal. 103:14) Nnoorowa woona etthu heeni ekhanle ooneeriha oyeleela ohakalala wahu, ni moota heeni ninrowaahu otthikihera ohakalala wahu.

MUHIHIYE ETTHU ERI POOTHE EWOOTXEELIHAKANI OKHALA OOHAKALALA

8. Moota heeni maxupo a mweekumini ennivoleelaaya?

⁸ Etthu yoopatxera: Maxupo a mweekumini. Neereke nyuwo munnaviriha maxupo ootthara-tthariwa, erisa ya ephattu, othoiwa musurukhu, ovoreiwa, naari wuuluvala? Hiyo pooti oyeleela ohakalala wahu vaavo ninvirihaahu maxupo awo, otepaxa wene wakhala weera khaninwera opakavo etthu ni etthu ninvirihaahu, weera nimalihe maxupo awo. Biblya onnaakhulela weera “murima woripa khonahakalala.” (Mir. 15:13) Babis mutokweene mmoha a mmulokoni, yoowo omuyelenle munnawe ni asitithi awe mpuwa mwa iyaakha 4, ohimme ha: “Kanniisoona okhala meekhaaka ni kuupuwela weera khaavo aawera okikhavihera. Ikwaha ikina, kannaxupeya mwaha wooweera nkaawera oviriha etempu yintxipale ni asitithi aka ehinaaye okhwa.” Maxupo a mweekumini pooti onikhulumula mweerutthuni ni mmuupuweloni.

9. Etthu heeni enrowa onikhavihera otthikihera ohakalala wahu? (Yeremiya 29:4-7, 10)

⁹ Etthu heeni enrowa oniikhavihera otthikihera ohakalala wahu? Hiyo pooti otthikihera ohakalala wahu nikhalaka atthu ooxukurela. Atthu mulaponi enhima weera ekumi ahu enrowa ohakalalaka wakhala weera itthu sootheene sinnaneettela nnene. Menento eyo khaiyene ekhaikhai. Mwa ntakihero, Yehova aaweerela ayuda weera yannatthuneya opaka ele yaaweraaya weera ekhaleno ekumi yoohakalala. (Mmusome Yeremiya 29:4-7, 10.) Etthu heeni ninxutteraahu? Mweerereke waakhulela makhalelo anyu ni mukhaleke ooxukurela ni itthu muraanyuno mweekumini. Muupuweleleke weera Yehova onoorowa wookhaviherani mwa etempu yootheene. (Nsal. 63:8 [63:7, Tradução do Novo Mundo]; 146:5) Effie yoowo ompanke asidente ni mpaka ahinwera weetta, ohimme ha: “Kohaakhela nikhavihero na Yehova, wa emusi aka ni mmulokoni. Miyo kinnaaxukurela mwaha wa itthu sootheene ekipakenlaaya ni enkipakelaaya. Kintthuna woonihera oxukurela wa Yehova ni wa asinthamwene aka mwaha wookikhavihera vantxipale.”

10. Mwaha wa heeni ninhakalalaahu nnaaweera nivihaka maxupo?

¹⁰ Nnaamweera ekumi ahu ereene yooxupa, naari emusi ahu evirihaka maxupo, hiyo pooti okhala oohakalala.b (Nsal. 126:5) Mwaha wa heeni? Mwaha wooweera ohakalala wahu khonlipa ni itthu ninkumanaahuno. Pioneira mmoha Maria, ohimme ha: “Vaavo nyuwo munvirihaanyu maxupo avinyaka munahakalala, khoontaphulela weera nyuwo munkhootta miyuupuwelo sanyu. Opwaha mwa yeeyo, entaphulela weera nyuwo khamuttiwanle soolaihera sa Yehova. Tiithi ahu onoorowa onikhavihera ovirelela okhala oohakalala.” Nuupuwelele ela, nnaamweera nivirihaka maxupo mantxipale mahikwaano, awo enoorowa omala, ntoko hiihaale entxiphaaya manaani a mutthu eentte ophareya. Moohipisa maxupo ootheene anoomala ni itthu sinkumihera maxupo awo.

11. Moota heeni ntakihero na murummwa Paulo ninnilipihaaya?

¹¹ Nankha wakhala weera noopatxera wuupuwela weera maxupo ninvirihaahu enoonihera weera khannaakhuleliwa ni Yehova? Ti wa miruku owuupuwelela arumeyi ooromeleya a Yehova, yaawo yaavirinhe itthu sootepa oxupa. Moone ntakihero na murummwa Paulo. Owo aathanlinwe ni mwaneene Yesu weera akuxe ekhaikhai weera aaleele amalapo, mamwene, ni “anamwane a Israeli.” (Mit. 9:15) Eyo yaari eparakha! Menento eyo khayaataphulela weera Paulo khaarowa ovirihaka maxupo. (2 Akor. 11:23-27) Neereke maxupo aavirihaawe yaawo yahaamala yaataphulela weera Paulo khaakhuleliwa ni Yehova? Hooye! Moovirikana ni eyo, ovilela wawe wannoonihera weera aakhalano mareeliho a Yehova. (Arom. 5:3-5) Vanonto muupuwelele wa nyuwo, nyuwo munnavilela maxupo ootheene munkumanaanyuno. Mwa yeeyo, nyuwo-tho pooti ororomela weera munnaakhuleliwa ni Yehova.

12. Moota heeni sooluluwanya nihinwenraahu okwanihera saarowaaya oneeriha ohihakalala?

¹² Etthu yanaaveeli: Wakhala weera sooluluwanya sahu khasinkwanela. (Mir. 13:12) Nsivelo nahu ni omuxukurela wahu Yehova, ninnaneeriha okhalano sooluluwanya mmutekoni mwawe. Menento, wakhala weera khasinkhumela nnene mwaha wa makhalelo ahu, hiyo pooti okhulumuwa. (Mir. 17:22) Pioneira mmoha oniitthaniwa Holly, ohimme ha: “Miyo kaatthuna osoma Eskola ya Anamalaleera a Omwene ni okhavihera ilapo ikina, naari ovara muteko wooteka oRamapo. Makhalelo aka yaatxentxa ni nkiwenre okwanihera yoolakelaaka eyo. Nto kaanyoonyiheya. Ti wooxupa, wakhala weera muntthuna ompakela Yehova itthu, menento muhinwera.” Atthu antxipale ennaviriha etthu emoha-moharu.

13. Wakhala weera makalelo ahu ennanootxeeliha ompakela itthu ikina Yehova, etthu heeni nintthuneyaahu opaka?

¹³ Etthu heeni enrowa onikhavihera otthikihera ohakalala wahu? Muupuweleke weera Yehova khanninyeserera etthu nihinweraahu opaka. Owo khanweherera etthu nihinweraahu ompakela. Yehova onnanivaha mwiitti naari nihiweraka opaka etthu atthu akina empakaaya. Yehova ontthuna weera nikhaleke oowiiyeviha ni oororomeleya. (Mik. 6:8; 1 Akor. 4:2) Owo onwehexexa mukhalelo ahu wa mpuwa ohiya etthu nihinweraahu opaka. Neereke waamurowa okhala wooreera oweherera ompakela Yehova itthu nihinweraahu?c Hooye! Mwa yeeyo, wakhala weera makhalelo anyu ennawootxelihani opaka itthu mmutekoni mwa Yehova, mweerereke woona etthu munweraanyu opaka. Nyuwo pooti waalipiha amiravo naari asinna ni asirokora oowuuluvala. Nyuwo pooti okhalano yooluluwanya ya waalipiha atthu awo mukumanaka naawo naari munvarihelaka muteko telefooni. Yehova onoorowa wooreelihani moohakalala mwaha wa wiilipihera wanyu weera mukwanihere sooluluwanya sanyu sooreera. Ni muupuweleleke weera moohipisa va, nnoorowa okhalano iparakha sintxipale elapo enyowani, mwa mukhalelo nihinuupuwelaahu. Holly, ohimmwale woopatxerani, omalihenre eeraka ha: “Vaavo kimpatxeraaka wiisoona okhala ookhulumuwa, kinneemela kinuupuwela weera ‘muhoolo kinookhalano ekumi yoohimala.’ Mene nnikhavihero na Yehova, miyo kinoowera okwanihera sooluluwanya saka elapo enyowani.”

14. Etthu heeni ekhanle ooneeriha ohihakalala?

¹⁴ Etthu yaneeraru: Wiisiveliha asineenaahu. Atthu akina enaavarihela muteko areedi sociais, ennahima ha, weera niphwanye ohakalala weekhaikhai, ontthuneya wiisivelihaka asineenaahu. Atthu ennoopereriwa ohela nipuro noopatxera otthekula, othuma soohaawela saya, ni opaka mikwaha. Khaiyene ti woonanara opaka itthu iyo. Yehova onipanke ni mukhalelo woosiveliwa ni oweha itthu sooreera. Menento, atthu antxipale yeerenre wiisiveliha asineenaaya, muhoolo mwaya, ahoonelela weera itthu yuuwpuwelaaya weera saamwaaphwanyiha ohakalala khasaaphwanyiñhe. Eva, piyoneira mmoha, ohimme ha: “Vaavo mutthu oniisivelihaawe meekhaawe paahi, owo khankwaneya.” Wakhala weera hiyo nnimweerera wiisiveliha asineenaahu, emaara yootheene, hiyo pooti okhulumuwa ni ohihakalala.

15. Etthu heeni ninxutteraahu ni mwene Salomoni?

¹⁵ Hiyo pooti oxuttera ni yookumanano ya mwene Salomoni, ni maxupo enkhumelela mwaha woowiisiveliha mutthu meekhaawe. Owo aaheerera wiisiveliha meekhaawe apakaka itthu sa weerutthuni, ntoko otxa yootxa yooreera, wiiwelela itxipo, itthu sootheene sooreera seiyo musurukhu weeraaya owereke othuma mwa etempu awe. Nnaaweera vareene hiiho, owo khaakwaneñye. Owo ohimme ha: “Nitho nònaka khaninvona khwuluwi, siso tho naru nìwaka khannìwa’mo sothesene.” (Koh. 1:8; 2:1-11) Miruku sa atthu a mulaponi woohima sa oruuha ohakalala weekhaikhai sinlikana ni musurukhu. Awo enkhala ntoko tootthuneyaxa, menento, awo khanwera okwanihera itthu enlaiheraaya.

16. Moota heeni ovaha onrowaaya onikhavihera otthikihera ohakalala wahu? (Nwehe efootu.)

¹⁶ Etthu heeni enrowa onikhavihera otthikihera ohakalala wahu? Yesu onxuttinhe weera “ovaha ti etthu yerera opwaha wakhela.” (Mit. 20:35) Mutokweene mmoha oniitthaniwa Alekos ohimme ha: “Miyo kinnaapakela itthu sooreera atthu akina. Vaavo kinaavahaaka atthu akina nkiniiwehexexa mwaneenaaka paahi, ni eyo ennakeeriha okhala oohakalala.” Etthu heeni nyuwo muntthunaanyu waapakela atthu akina? Wakhala weera nyuwo moomusuwela mutthu onviriha maxupo, mweerere omulipiha. Apaale nyuwo pooti ohiwera omaliha maxupo awe. Mene nyuwo pooti ommaaliha mmwiiwelelaka ni mwiihelaka nipuro nawe, ni mummorelaka ikharari, ni mmuupuxeraka weera ontthuneya ovaherera maxupo awe wa Yehova. (Nsal. 55:23 [55:22, NM]; 68:20 [68:19, NM]) Nyuwo-tho pooti omukhavihera mutthu owo woonelela weera Yehova khamuhinye. (Nsal. 37:28; Yes. 59:1) Nyuwo-tho pooti wiivaherera mumpakelaka etthu yooreera mutthu owo, ntoko oreherera yootxa, naari orowa weetteetta vamoha. Munwope orowa muteko woolaleera, ni opaka eyo enoorowa omukhavihera okhala oomaaleleya. Mwaakhulele weera Yehova oovarihelekeni muteko. Vaavo nnaapakelaahu itthu sooreera atthu akina ohiya wiisiveliha asineenaahu, ninnaphwanya ohakalala weekhaikhai! — Mir. 11:25.

17. Wakhala weera mweekhaikhai nintthuna okhala oohakalala, nipakeke eheeni? (Nsalmu 43:4)

¹⁷ Hiyo pooti ohakalala wakhala weera nnoovirelela omwaattamela Tiithi ahu a wiirimu. Biblya onnanroromeliha weera ‘Yehova ori ohakalala wahu ni otthapa.’ (Musome Nsalmu 43:4.) Mwa yeeyo nihipwatthaka etthu ninvirihaahu mweekumini, hiyo nnoowera okhala oomaaleleya. Osuwela weera Yehova nthamwene ahu owo onoorowa onikhavihera okhala oohakalala! — Nsal. 144:15.