Mutakihe wiiyeviha wa Yehova

1. Mwaha wa heeni muntikhiniheyaanyu ni wiiyeviha wa Yehova?

VAAVO nyuwo munaawehaanyu anamalamulela oolelo, neereke mwaarowa weera awo toowiiyeviha? Pooti weeraka hooye. Menento Yehova, ori nanwera sootheene toowiiyeviha. (Nsal. 113:5-8) Khaavo ori oowiiyevha ompwaha Yehova, owo khaiyene toowiisunnuwiha. Mwa yoosoma ene yeela, nnoorowa woona mikhalelo mixexe sootepa oreera sa Yehova ni woona moota wiiyeviha wawe onvoleelaaya mikhalelo iyo mixexe. Nnoorowa-tho woona moota Yesu aatakinhaawe wiiyeviha wa Tiithi awe. Mwaha wooweha mikhalelo iya, sinoonikhavihera omwaattamela Yehova ni otakiha wiiyeviha wawe.

YEHOVA TOOKHWEYA OMWAATTAMELA

2. Nsalmu 62:8 onoonihera eheeni woohima sa Yehova? (Nwehe-tho ya vakaapani.)

² Atthu oowiisunnuwiha ikwaha sintxipale khaiyene tookhweya owaattamela. Mwaha woowiisunnuwiha onnaweeriha atthu akina woova wuuluma naawo naari onnaweeriha atthu akina waasepa awo moomalela. Mene Yehova toovirikana! Ntoko Tiithi ahu a wiirimu, owo toowiiyeviha, owo onnaniwopa omwaattamela ni wuuluma ni owo itthu siri mmpuuweloni mwahu ni vamurimani vahu. ((Musome Nsalmu 62:9 [62:8, NM]) Hiihaale ntoko Tiithi oraawe oolikaneene wiiwa maxupo aanaawe moomaaleleya, Yehova onniiwa mavekelo aarumeyi awe. Mweekhaikhai, mBiblyani aalempwa mavekelo mantxipale aarumeyi awe. Eyo enoonihera weera owo tooreera murima. (Yeh. 10:12-14; 1 Sam. 1:10-18) Menento nankha wakhala weera ikwaha ikina mwaha wa mathowa makina ninniisoona weera khanimphwanela omwaattamela Yehova?

3. Mwaha wa heeni nyuwo muntthuneyaanyu ororomelaka weera Yehova ontthuna weera mmwaattamele moohihiyerera moorweela mwa nivekelo?

³ Hiyo pooti omwaattamela Yehova moorweela mwa nivekelo nnaamweera niisoonaka ohiphwanela nsivelo nawe. Mwaha wa heeni ninhimaahu eyo? Niphwanaphwaniho na Yesu woohima sa mwaana aariheñye, owo oomulikanxera Yehova ntoko Tiithi oomoriwa ikharari, yoowo mwana awe aatthanrunwe ni ahaisoona ophwanelela waakheliwa veemusini vawe. Moota heeni paapa oonenlaawe vaavo mwanawe aatthikenlaawe owaani? Yesu ohimme weera vaavo awo yaamonnaaya mwanaya “yaatthimaka ni yaamukhupaarela ni yampexari voohihiyerereya.” (Luka 15:17-20) Yehova ori ntoko paapa ole. Vaavo owo onaiwaawe mavekelo aatthu eriipinwe murima mwaha wa wiivaha mathowa naari mwaha wa maxupo, wiiyeviha wawe onnamweeriha owiiwexexa. (Wikh. 3:19, 20) Yehova toomoriwa ikharari ni onnawaasa weera aamaalihe mwaha wa omoriwa wawe ikharari ni nsivelo nawe. (Yes. 57:15) Moota heeni Yehova “onnaasaawe” olelo-va? Ikwaha sintxipale owo onnapaka moorweela mwa asitokweene a mmulokoni, amusi eri anamoona a Yehova ni asinna akina. (Yak. 5:14, 15) Yehova onnanivaha nikhavihero nna mwaha wooweera ontthuna weera hiyo nimwaattamele owo.

4. Moota heeni Yesu oonihenraawe weera aari ooreera murima?

⁴ Yesu onnamutakiha Tiithi awe. Hiihaale ntoko Tiithi awe, Yesu toowiiyeviha. Yookhumelelaaya, emaara yeeyo aaraawe elapo ya vathi, atthu yaanniisoona okhala ootaphuwa onpakela makoho. (Mar. 4:10, 11) Emaara yeeyo aapakelaawe makoho woohima sa mwaha mmoha, awo yannamuleela mweekhaikhai moota yiisoonelaaya. (Math. 16:13-16) Ni vaavo yaapakaaya soottheka, awo khiyoova mwaha wooweera yaasuwela weera Yesu aari oreera murima, oomoriwa ikharari, ni oopixa murima. (Math. 17:24-27) Mwaha wa Yesu omutakiha Tiithi awe, atthareli awe yaamusuwela nnene sene Yehova. (Yoh. 14:9) Awo yaaxuttera weera Yehova khaalikana ni ahooleli a ittiini a etempu ele yaawo yaari oowuuma murima, oowiisunnuwiha ni oorakamelana ni atthu. Ohiya okhala ntoko atthu awo, Yesu aari oowiiyeviha ni ookhweya omwaattamela.

5. Moota heeni wiiyeviha onrowaaya onikhavihera okhala atthu ooreera murima?

⁵ Moota heeni ninrowaahu omutakiha Yehova? Vaavo nnunnuwiheraahu wiiyeviha nnookhala atthu oowaareerela murima atthu akina. Wiiyeviha onooneeriha osepa okhala atthu a nrima, oowiisunnuwiha, ni oohilevelela, mikhalelo seiyo simmweeriha mutthu orakameliwa ni atthu akina. Mene wiiyeviha onoonikhavihera okhala atthu ooreera murima, oopixa murima, ni oolevelela, mikhalelo seiyo sinweeriha atthu akina onaattamela. (Akol. 3:12-14) Asitokweene a mmulokoni ennatthuneya wiilipihera okhala atthu ooreera murima. Ekhaikhai weera, weera ekhale atthu oreera murima, awo entthuneya okhala vamoha ni asinna ni asirokora ikwaha sintxipale. Eyo entaphulela weera awo entthuneya wiilipiheraka woonela mithukumano Empa ya Omwene, ohiya woonela moorweela mwa videoconferensia ohitthuneyaka. Ni wakhala weera makhalelo aya ennawaakhulela, awo enniilipihera ovara vamoha ni asinna ni asirokora mmutekoni moolaleera empa ni empa. Ni vaavo asinna awo enaakhovelelaaya asitokweene a mmulokoni, awo enookhala ootaphuwa wuuluma naawo waatthuneyaka vale.

YEHOVA TOOWAATHOKORORA ATTHU AKINA

6-7. Nvahe matakihero a moota Yehova aiwalaawe mavekelo aarumeyi awe.

⁶ Atthu oowiisunnuwiha ikwaha sintxipale enuupuwela weera ennasuwela etthu yooreera ni khentthuna otxentxa muupuwelo aya. Mene Yehova osuwenle etthu yooreera, owo khaiyene toowiisunnuwiha, mwaha woowiiyeviha owo ori oolikaneene wiiwa etthu atthu akina enuupuwelaaya. Moone ele yeereñye ni murokoraawe Mose, Miriã. Owo vamoha ni Arão yaahimuuluma moohireerela Mose, yoowo aari namathoonyera a Yehova. Mweekhaikhai Miriã khoonihenre nttittimiho wa Yehova. Yookhumelelaaya, Yehova aanyoonyiheya ni Miriã ni aamukumihera eretta ya makokho. Mene Arão aamutxonttelela Mose weera amukhavihere ni Mose anvekela Yehova weera amulamihe murokorawe, etthu heeni Yehova aapankaawe? Mutthu oowiisunnuwiha khaakela otxentxa muupuwelo awe. Mene Yehova aatxentxa. Okhala weera Yehova toowiiyeviha, owo aamulamiha Miriã. — Nam. 12:1-15.

⁷ Yehova tho aahoonihera wiiyeviha wa moota aamuthokoronraawe mwene Ezekiya. Moorweela mwa profeta awe, Yehova aamuleela mwene weera owo aamurowa okhwa. Ezekiya aahinla ni anvekela Yehova weera amulamihe. Yehova aamwaakhula moomoriwa ikharari aatxeereraka ekumi ya mwene ole iyaakha 15. (2 Mam. 20:1, 5, 6) Mweekhaikhai, wiiyeviha onnamweeriha Yehova okhala oomoriwa ikharari ni waathokorora atthu akina.

8. Matakihero heeni anoonihera weera Yesu toowaathokorora atthu akina? (Marko 3:1-6)

⁸ Yesu onnamutakiha Tiithi awe. Emaara aaraawe valaponi, Yesu annaapakela itthu sooreera atthu akina ikwaha sootheene waatthuneyaaya. Mwa ntakihero, owo aanaalamiha atthu nihiku na eSaabadu, etthu yeeyo ahooleeli a ittiini yuupuwelaaya weera khiyaaphwanela opakiwa. Yesu khaiyene aari oowuuma murima mene aari oomoriwa ikharari ni oowaathokorora atthu akina. (Mmusome Marko 3:1-6.) Yesu onnavirelela waathokorora atthu akina ntoko muru wa muloko. Mwa ntakihero, vaavo mutthu a mmulokoni ompakaawe yoottheka etokweene, owo onnampixera murima, anvahaka eparakha weera atxentxe mukhalelo awe. — Apok. 2:2-5.

9. Moota heeni ninrowaahu wunnuwihera ni woonihera weera ninnaathokorora atthu akina? (Nwehe-tho efootu.)

⁹ Moota heeni ninrowaahu omutakiha Yehova? Nintthuneya wiilipiheraka moowiiyeviha wunnuwihera mukhalelo woowaathokorora atthu akina ntoko Yehova. (Yak. 3:17) Mwa ntakihero, asitiithi emmutakiha Yehova khenweherera weera anamwane aya epakeke itthu ehinweraaya. Ntakihero nooreera ti na Yakobe, nenno nimphwanyeya va Ephattuwelo 33:12-14, yoowo aapwattha anamwane awe. Asitiithi oowiiyeviha ennatthuneya osepa omulikanxera mwaana ni mwaana mukina. Asitokweene a mmulokoni entthuneya okhala oowiiyeviha. Mukhalelo mmoha woopaka eyo ori waakhulela yoothanla ya ekhurupu ya asitokweene a mmulokoni, wakhala weera yoothanla eyo ennavarihana ni Biblya. (1 Tim. 3:2, 3) Ni ootheene ahu nintthuneya wiiwexexaka moonelo wa atthu akina nnaamweera hiyo nreeneno moonelo woovirikana. (Arom. 14:1) Aani, ootheene ahu a mmulokoni nintthuneya wiilipihera weera “opixa [wahu] murima [osuweliwe] n’atthu othene.” — Afil. 4:5.

YEHOVA TOOPIXA MURIMA

10. Mwa mikhalelo heeni Yehova oonihenraawe weera toopixa murima?

¹⁰ Pooti weeraka nyuwo mohoonelela weera atthu oowisunnuwiha khonaasivela oweherera. Wiisunnuwiha onnaweeriha okhala atthu oohipixa murima. Yehova khanono mukhalelo owo. Owo toopixa murima waapwaha atthu ootheene! Mwa ntakihero, mahiku a Nowe, Yehova aahima weera anweherera iyaakha 120 ahinaaye waatoloxa atthu oonanara murima. (Eph. 6:3) Nowe aakhalano etempu weera aahuwe anamwane awe ni opaka nikula nnikhavihero na emusi awe. Muhoolo mwaya, nlaika nenno naamuthoonyera Yehova naamwiiwa moopixa murima Abrahaamu yoowo aapaka makoho woohima sa otoloxiwa wa Sodoma ni Gomora. Mutthu oowiisunnuwiha aarowa wakhula ha, ‘Nyuwo munnapaka makoho mantxipale!’ Mene nimutakihaka Yehova nlaika nne nampixera murima Abrahaamu. — Eph. 18:20-33.

11. Moovarihana ni 2 Pedru 3:9, mwaha wa heeni Yehova ompixaawe murima mahiku ahu ala?

¹¹ Mahiku ahu ala-tho moowiiyeviha, Yehova onnoonihera opixa murima. Owo onnaweherera etempu othanliyaawe weera amalihe elapo ela. Mwaha wa heeni owo oraawe oopixa murima? “Niwoko khanatthuna wi akina eriheye, mene othene erukunuxe murima.” (Mmusome 2 Pedru 3:9.) Neereke opixa murima wa Yehova ti wavasionvene? Hooye! Atthu imilyawu sintxipale a murima wooreera ennamwaattamela owo. Ni ninnaweherera weera imilyawu sintxipale sa atthu epake etthu emoharu. Menento, opixa murima wa Yehova wookhalano elimite. Yehova onnaasivela atthu, mene owo khanaakhulela itthu sootheene atthu akina empakaaya. Owo khanrowa waahiya atthu oonanara murima evirelelaka okhala. — Hab. 2:3.

12. Moota heeni Yesu ontakihaawe opixa murima wa Yehova?

¹² Yesu onnamutakiha Tiithi awe. Mwa iyaakha sintxipale, Yesu ootakiha opixa murima wa Yehova. Yesu aamoona Satana amootheraka Yehova ni atthu oororomeleya. (Eph. 3:4, 5; Yobi 1:11; Apok. 12:10) Yesu tho owoona atthu antxipale ehaawaka. Nkuupuwelani moota owo oraawe ni ntthuno “wera atoloxe sopanka sa [Diabo]”! (1 Yoh. 3:8) Etthu heeni emmukhavihera Yesu oweherera moopixa murima waakhuleliwa ni Yehova weera atoloxe moomalela soopaka sa Diabo? Etthu yoopatxera, wiiyeviha onnamweeriha Yesu oweherera etempu Yehova othanliyaawe. — Mit. 1:7.

13. Moota heeni ni mwaha heeni Yesu aapixenraawe murima arummwaawe?

¹³ Emaara aaraawe elapo ya vathi, Yesu aanaapixera murima arummwaawe. Mwa ntakihero, vaavo arummwaawe yaanyakulihanaaya ikwaha sintxipale woohima sa taani aari mutokweene, Yesu khaahiñye awo. Ohiya opaka eyo, owo aavirelela waapixera murima. (Luka 9:46; 22:24-27) Owo annaroromela weera noovira etempu awo yampaka matxentxo yaatthuneyaaya opaka. Neereke nyuwo mootoko opaka yoottheka emoharu? Wakhala weera munaakhula aani, neereke khamunxukurela mwaha wookhalano Mwene oowiiyeviha ni oopixa murima yoowo onoohoolelani nyuwo?

14. Moota heeni ninrowaahu wunnuwihera opixa murima?

¹⁴ Moota heeni ninrowaahu omutakiha Yehova? Vaavo nnunnuwiheraahu ‘muupuwelo wa Kristu,’ ninnakhala oolikaneene wuupuwela ni opaka itthu ntoko Yehova. (1 Akor. 2:16) Etthu heeni enrowa onikhavihera wiiwexexa nnene muupuwelo wa Kristu? Etthu emoha yootepa otthuneya vantxipale ori osoma ivanjelyu. Muhoolo mwaya, nintthuneya wiihiyera etempu weera nuupuwelele moota sooweereya sa Yesu nisommaahu sinooniheraaya muupuwelo wa Yesu woohima sa mwaha owo. Ni moohihovela, nintthuneya onvekelaka Yehova weera anikhavihere okhala oowiyeviha ntoko Yesu. Vaavo ninrowaahu oxutteraka moota Yesu onuupuwelaawe, nnoorowa omutakiha Yehova, nikhalaka oopixa murima ni atthu akina ni asineene ahu. — Math. 18:26-30, 35.

YEHOVA ONNAWUNNUWIHA ATTHU OOWIIYEVIHA

15. Moota heeni Yehova onvarihelaawe muteko masu nimphwanyaahu va Nsalmu 138:6?

¹⁵ Musome Nsalmu 138:6. Eparakha etokweene atthu oowiiyeviha waakhuleliwa ni Nanwera a elapo yoothene! Moone matakihero vakhaani aatthu oowiiyeviha yannuwihinwe mpuwa mwa siseekulu sintxipale. Akina a yaawo khinaasuwenle nnene, mene Yehova ohaahela mBiblyani. Yehova aamupuxera Mose ohela mBiblyani nsina na muthiyana iitthaniwa Debora, aakhala ehuhu ya Isakhi ni Yakobe. Owo aahaavarela awo mpuwa mwa iyaakha 125! Nnaamweera nihisuwelaka itthu sintxipale woohima sa muthiyana ola, Yehova oheeriha weera nsina nawe nlempwe mBiblyani ntoko mutthu oosiveleya. (Eph. 24:59; 35:8, enoota.) Mwa iyaakha saattharelana, Yehova aamuthanla mmiravo mukukhuli iitthaniwa Davidi weera akhale mwene, ni aamweeriha okhala mwene a nloko na aIsraeli. (2 Sam. 22:1, 36) Yesu ayariwakaru, Muluku aarumiha malaika weera yaarowele akukhuli ni aahaavaha eparakha weera epatxere osuwela weera Mesiya oyariwa oBetelehemu. (Luka 2:8-11) Ni vaavo Yosefe ni Maria yaamukunxaaya Yesu erowaka otemplu, Yehova aahinvaha eparakha Simeyoni ni Ana weera emoone Mwaana owo. (Luka 2:25-30, 36-38) Aani, “nnaamweera Yehova areene mutokweenexa, owo onnawunnuwiha ale oowiiyeviha”!

16. Moota heeni Yesu otakinhaawe mukhalelo wa Tiithi awe woohima sa moota woowaathokorora atthu akina?

¹⁶ Yesu onnamutakiha Tiithi awe. Hiihaale ntoko Tiithi awe, Yesu aawunnuwiha atthu oowiiyeviha. Owo aahaaxuttiha atthu ‘yahaasomme ni atthu sakala’ ikhaikhai woohima sa Omwene wa Muluku. (Mit. 4:13; Math. 11:25) Yesu tho aahaalamiha aretta ni owo aapaka eyo mwa mukhalelo waaweerinhe wiisoona osiveliwa ni ottittimihiwa. (Luka 5:13) Ahinaaye okhwa, Yesu aarapiha inaani sa arummwaawe, etthu yeeyo yaapakiwa ni akaporo. (Yoh. 13:5) Ahinaaye owela wiirimu, owo aawunnuwiha atthareli awe onihela mpuwa hiyo, anivahaka eparakha yoovara muteko wootepa otthuneya mutthu ori poothe aatthuneyaawe okhalano, yoowo ori waakhavihera atthu akina okhalano ekumi yoohimala. — Math. 28:19, 20.

17. Moota heeni ninrowaahu owunnuwiha atthu akina? (Nwehe-tho efootu.)

¹⁷ Moota heeni ninrowaahu omutakiha Yehova? Ninnawoonihera nsivelo ni nttittimiho atthu vaavo nnaalaleeraahu mitthenka sooreera sa Omwene ootheene, nihipwatthaka enkhumaayawo, makhalelo aya, yaareene akunya naari hooye, naari yaareene oosoma naari hooye. Ni ninnawunnuwiha asinna ni asirokora vaavo ninwoonaahu okhala a vasulu onipwaha hiyo, nihipwatthaka miritti ni iparakha nraahuno. (Afil. 2:3) Yehova onnahakalala vaavo ninkhalaahu oowiiyeviha ni ninthokororanaahu mukina ni mukhwaawe mwa nsivelo ni nttittimiho mwa mikhalelo sene seiyo ni mikhalelo mikina. — Arom. 12:10; Sof. 3:12.

18. Mwaha wa heeni nyuwo muntthunaayu otakiha wiiyeviha wa Yehova?

¹⁸ Vaavo nniilipiheraahu otakiha wiiyeviha wa Tiithi ahu a Wiirimu, nnookhala atthu ooreera murima, owaathokorora atthu akina, ni oopixa murima. Ni nnoorowa owunnuwiha atthu akina, ntoko Yehova ompakaawe. Ni muupuwele weera vaavo nniilipiheraahu otakiha wiiyeviha wa Muluku ahu, eyo enooneeriha okhala ootepa otthuneya vamaithoni vawe! — Yes. 43:4.