YOOSOMA 16
Yesu aapanke heeni emaara aaraawe elapo ya vathi?
Atthu akina yuupuwelaka sa Yesu, anoona weera owo aari mwana a mmatatani, mprofeti a Muluku naari mulopwana yoowo aahalela okhwa. Mene naasomaka sooweereya sa mweekumini mwawe, emaara aaraawe elapo ya vathi, ninnoona weera owo aakhalano mikhalelo opwaha seiya. Mwa yoosomeene yeela, ninkela woona itthu sootepa otthuneya Yesu aapankaawe ni moota sineeraaya sitxentxe ekumi anyu.
1. Muteko heeni waari wootepa otthuneya wa Yesu?
Muteko waari wootepa otthuneya wa Yesu waari “ovanjelizera omwene wa Muluku.” (Mmusome Luka 4:43.) Mitthenka sooreera Yesu aalaleyaawe, saari sa Omwene, naari neere, eguvernu ya Muluku yeeyo eneera emalihe maxupo ootheene aatthu.a Iyaakha tthaaru ni emeya Yesu ahiilipihera weera aaleele atthu mitthenka saahima sa yooweherera.—Matheyo 9:35.
2. Mwaha wa heeni Yesu aapakaawe miiriira?
Biblya onnuuluma itthu ‘sotikiniha ni inenero Muluku ènraiye variyari vanyu, morwela mwa [Yesu].’ (Miteko 2:22) Ni owera Muluku anvanhaawe Yesu, aawera omaaliha epheyo, waatxiha atthu antxipale, waalamiha aretta ni wavinyereriha atthu ookhwa. (Matheyo 8:23-27; 14:15-21; Marko 6:56; Luka 7:11-17) Miiriira Yesu aapakaawe soonihera mweekhaikhai weera owo aarumihiwe ni Muluku. Miiriira iyo sohoonihera weera Yehova ookhalano owera woomaliha maxupo ahu.
3. Ninxuttera heeni ni sooweereya sa Yesu?
Yesu imaara sootheene annamwiiwelela Yehova. (Mmusome Yohani 8:29.) Owo aapaka eyo ekumi awe yootheene, nnaamweera aasonttiwaka. Eyo yooniheraka weera atthu enoowera onvarela Muluku nnaamweera ekumanakano maxupo. Mwa eyo, Yesu ‘ohiya ntakihero nintthuneyahu otthara mororomeleya manaani awe’.—1 Pedru 2:21.
WEERA MUXUTTERE SINTXIPALE
Moone moota Yesu aalaleñyaawe mitthenka sooreera ni aapankaawe miiriira.
4. Yesu annilaleya mitthenka sooreera
Yesu aaheetteetta mapuro mantxipale a elapo ya vathi ni yootthuna awe yaari ya: olaleya mitthenka sooreera wa atthu antxipale. Mmusome Luka 8:1, avinyaka mutthekule ni ipontu sinttharelana:
Neereke Yesu aalaleera atthuru paahi yaale yaamwaasa?
Yesu iilipihera hayi weera aaphwanye atthu?
Muluku aahima vahinaaye weera Mesiya aakela olaleya mitthenka sooreera. Mmusome Yesaya 61:1, 2, avinyaka mutthekule ni ipontu sinttharelana:
Yesu aakwanihenre hayi yoolohera ela?
Nyuwo munoona weera mitthenka sooreera iya onnitthuneya weera atthu yiiwe?
5. Yesu aaxuttiha ikhakhai sootepa otthuneya
Ohiya paahi olaleya mitthenka sooreera sa Omwene wa Muluku, Yesu aavaha miruku sootepa oreera. Moone miruku owo aavanhaawe mpuwa wa mwahaawe va mwaako. Mmusome Matheyo 6:14, 34 ni 7:12, avinyaka mutthekule ni ipontu sinttharelana:
Miruku heeni sootepa oreera Yesu aavanhaawe mpuwa mwa iversu iya?
Nyuwo munuupuwela weera miruku iyo sinimwaakhavihera atthu olelo va?
6. Yesu aapaka miiriira
Yehova amukhavihera Yesu opaka miiriira sintxipale. Moone ntakihero nimoha. Mmusome Marko 5:25-34 naari moone EVIIDIYU, avinyaka mutthekule ni epontu enttharelana.
Nohoona weera muthiyana ole annivoreiwa vantxipale vaano owo aaroromela heeni?
Eheeni yoosivenleni wa mwiiriireene yoola?
Mmusome Yohani 5:36, avinyaka mutthekule ni epontu enttharelana:
Miiriira sa Yesu ‘sinhelela onamoona’ heeni?
Nyuwo mwaasuwela?
Sootheene seiyo ninsuwelaahu voohima sa Yesu siri mBiblyani ebuukhu ya—Matheyo, Marko, Luka ni Yohani. Iliivuru iya sineeriwa ivanjelyu. Yootikhiniha eri yooweera anamalepa ootheene a ivanjelyu iya, aathaliha soowereeya sa Yesu moovirikana. Vano natakanxera soohima iyo, ninnoona moota yaaraaya ekumi ya Yesu elapo ya vathi.
MATHEYO
Yaari evanjelyu yoopatxera yaalempwe. Mmo, ninnaphwanya sooxuttiha sa Yesu vantxipalexa sinxuttiha voohima sa Omwene wa Muluku.
MARKO
Ela eliivuru ekhaanene mwa ivanjelyu. Enviherela miteko sa Yesu.
LUKA
Ela eliivuru enthaliha moota Yesu oonaawe okhala wootthuneya ovekela ni moota owo aathokororaawe athiyana.
YOHANI
Ela eliivuru enthaliha moota Yesu aatthekulaawe ni asinthamwene awe ni atthu akina. Eyo ennanikhavihera woona mikhalelo sa Yesu.
ATTHU AKINA ANEERA: “Yesu khaakhanle mwaana a Muluku; mene aari mutthu ooreera murima paahi.”
Nyuwo munoonela hayi eyo?
NYAHA SOOTTHUNEYA
Yesu aalaleya voohima sa Omwene wa Muluku, aapaka miiriira ni annimwiiwelela Yehova mwa sootheene.
Wuuluula
Muteko heeni Yesu oonaawe okhala wootepa otthuneya emaara aaraawe elapo ya vathi?
Miiriira sa Yesu sinnoonihera eheeni?
Miruku heeni sooreera Yesu ovanhaawe?
WEERA MUSUWELE ITTHU SINTXIPALE
Eheeni Yesu yaatepaxa omusivela wuuluma?
“Mwaha wa heeni Yesu onhelaawe mwiitti Omwene wa Muluku” (A Sentinela, 1.º a Outubro a 2014)
oone mwaha wa heeni nneeraahu naakhuleleke weera miiriira Yesu aapankaawe soheereya.
“Miiriira Yesu aapakaawe sinnixuttiha eheeni” (A Sentinela, 15 a Julho a 2004)
Moone moota okumi wa mulopwana mmoha waatxentxeñyaaya axutterakaru sa moota Yesu aathokororaawe atthu.
“Miyo kaasa mureerelo aka paahi” (A Sentinela, 1.º a Outubro a 2014)2014)
Moone itthu seiyo Yesu aapankaawe saakhumelenle moottharana.
a Soosoma sa 31-33 sinkela wuuluma sa Omwene wa Muluku.