Moota heeni muneeraanyu mukhaleno etthoko yoohakalaliha?—Eparte 2

Anamwane yoovaha enkhuma wa Yehova. Owo onweherera weera asitiithi ekosoopeke nnene yoovaha ela. Yehova onnavaha miruku sooreera sa moota woopaka eyo. Miruku tho sa Muluku sinnaakhavihera anamwane opaka empari aya weera emusi ekhale yoohakalala.

1. Miruku heeni Yehova onaavahaawe asitiithi?

Yehova ontthuna weera asitiithi yaasiveleke anamwane aya nave eviriheke ehuhu yintxipale, owo tho ontthuna weera asitiithi yaakosoopeke anamwane aya ni evariheleke muteko miruku sa mBiblyani weera yaaxuttiheke. (Miruku 1:8) Owo onnaalela asitiithi: ‘Mwàleleke yawo orattene mwàlakaka ni mwàttaruxaka mwa Apwiya.’ (Mmusome Aefeso 6:4.) Yehova onnahakalala vaavo asitiithi anttharaaya miruku iya. Owo onnahakalala vaavo asitiithi ankwaniheraaya muritti woowaahuwa anamwane aya ehaahiyeraka mwiritti owo atthu akina.

2. Miruku heeni Yehova onaavahaawe anamwane?

Yehova onnaaleela anamwane weera: “Nwìweleleke asinamuyari anyu.” (Mmusome Akolosi 3:20.) Vaavo anamwane anwiiwelelaaya asitithaya ni waattittimiha, awo annamuhakalaliha Yehova. Nave tho asitiithi annahakalala. (Miruku 23:22-25) Yesu aavaha ntakihero nooreera emaara araawe mwaana. Owo aari mutthu oohittheka. Nnaamweera vareene hiiho, khaahiyerenre owiiwelela ni waattittimiha asitithawe, yaawo yaayariwe ni yoottheka.—Luka 2:51, 52.

3. Moota heeni etthoko eneeraaya emwaattameleke Muluku?

Nyuwo mwaareene tiithi naari maaye, mweekhaikhai muntthuna weera anamwane anyu emusiveleke Yehova ntoko nyuwo. Munkela owera hayi opaka eyo? Mpakeke ele Biblya onxuttihaawe, owo enre: “ohele mmurimani mwa anamwane á [eyo tiyo masu a Yehova] olokohe masu ala vankilathawe vate vá nari vanrowawe mphironi.” (Olaleya 6:7) “Ohela” entaphulela otthikela veeli-veeli. Woonaru moosuwela weera, anamwane anyu weera ehele mmuru etthu emoha, ontthuneya otthikela veeli-veeli etthu eyo. Vanonto, etthu yoolepa ela entthunaaya ohima eri yooweera nyuwo onnatthuneya waasaasera ehuhu weera muulume ni anamwane anyu woohima sa Yehova. Etthu yooreera opaka ori okawanya ehuhu isemana sootheene weera mmukokhorele Yehova vatthokoni. Wakhala weera khamukhanleno anamwane, nnaamweera vareene hiiho ontthuneya ookhalano ehuhu weera mmusomeke Biblya isemana sootheene.

WEERA MUXUTTERE SINTXIPALE

4. Mwaaxuttiheke anamwane anyu ni nsivelo

Waaxuttiha anamwane maxupo matokweene. Vano neereke Biblya onoowera wookhaviherani? Mmusome Yakobe 1:19, 20. Avinyaka mutthekule ni ipontu sinttharelana:

• Moota heeni asitiithi eneeraaya yoonihereke nsivelo yuulumaka ni anamwane aya?

• Mwaha wa heeni tiithi naari maaye ohintthuneyaawe omulaka mwanawe onyoonyiweene?a

5. Asititiithi onnitthuneya waakosoope anamwane aya

Weera asitiithi yaakosoope anamwane aya, onnitthuneya weera yaaleeleke woohima sa okonihana nnaamweera yoonaka wuuliha muru waaleela eyo. Moone EVIIDIYU. Avinyaka mutthekule ni ipontu sinttharelana.

EVIIDIYU Mwaakosope anamwanaanyu mwa itthu soonanara (2:58)

• Mwaha wa heeni oraaya wooxupa wa asitiithi akina wuuluma ni anamwane aya woohima sa okonihana?

• Asitiithi akina yuuluma hayi ni anamwane aya woohima sa okonihana?

Biblya aahima weera, elapo ya Satana yaakela ovirelela otepa oxupa. Mmusome 2 Timotheyo 3:1, 13. Avinyaka mutthekule ni ipontu sinttharelana:

• Eversu 13 ennaahima atthu oowuuma murima, nsuwelaka weera akina a yaawo annakoniha anamwane akhaanene. Mwaha wa yeeyo, mwaha wa heeni oraaya wootthuneya asitiithi wuuluma ni anamwane aya woohima sa okonihana ni waaxuttiha wiikosoopa ni ale anaakoniha anamwane?

Nyuwo waasuwela?

Anamoona a Yehova aakhalano iliivuru sintxipale sinaakhavihera asitiithi moota eneeraaya yaaxuttiheke anamwanaaya woohima sa moota eneeraaya yuulumeke ni yaawo woohima sa okonihana. ni waaxuttiha weera yiikosoopeke ni atthu ale anaakoniha anamwane. Moone matakihero vaakhaani:

• Mwaakosoope anamwane anyu (eviidiyu)

• Aprende do Grande Instrutor, capítulo 10 ni 32

• ““Moota woowuuluma ni anamwane anyu woohima sa okonihana” (Despertai!, N.º 5 a 2016)

6. Mwaattittimiheke asitithi anyu

EVIIDIYU: Kinkela owera hayi otthekula ni asipapaka? (2:19)

• Mwaha wa heeni oraaya woorera amiravo wiilipihera otthekula ni asitithi aya?

• Moota heeni mmiravo aneeraawe uulumeke ni asitithi awe mwa nttittimiho?

Musome Miruku 1:8. Avinyaka mutthekule ni epontu enttharelana.

• Moota heeni mmiravo aneeraawe ooneleke vaavo asitithi awe aninvekelaaya etthu yoopaka?

7. Mmukokhorele Yehova vatthokoni

Itthoko sa Anamoona a Yehova sinniisukera ehuhu isemana sootheene weera emusome Biblya vamoha. Etthu eyo, eneeriwa omukokhorela Muluku vatthokoni. Moota heeni empakiwaaya yookokhorela eyo? Moone EVIIDIYU. Avinyaka mutthekule ni ipontu sinttharelana.

EVIIDIYU: Okokhorela vatthokoni—Maxupo ni mareliho (8:04)

• Moota heeni atthu a vatthokoni eneeraaya yiireherere weera emukokhorele Muluku vatthokoni vaya?

• Moota heeni asitiithi eneeraaya epakeke okokhorela moohixupeya oneera waakhavihere anamwane aya?—Moone efootu woopatxerani mwa yoosoma

• Mwa moonelo anyu, eheeni yeera yooxupiheni omukokhorela Muluku vatthokoni?

Nloko na ana a israeli khalayi, Yehova aatthuna weera amusi etthekuleke ehuhu yootheene ni soolepa sa mBiblyani. Mmusome Olaleya 6:6, 7. Avinyaka mutthekule ni ipontu sinttharelana:

• Moota heeni nyuwo muneeraanyu nvariheleke muteko miruku iya?

Miruku sa okokhorela vatthokoni:

• Mureherereke mithukumano sa mmulokoni.

• Musome yooweereya ya mBiblyani, ni avinyaka mutthekule voohima sa eyo.

• Wakhala weera nyuwo mookhalano anamwane akhaanene, mbaxari naari mwimprimiri nyaha saanamwane va esaite jw.org.

• Wakhala weera nyuwo mookhalano anamwane oowunnuwela, mutthekule voohima sa mwaha wa anamwane oowunnuwela va saite jw.org.

• Musome mpaka omaliha sooweereya sa mBiblyani ni anamwane anyu.

• Moone iviidiyu va saite jw.org ni mutthekule woohima sa eyo.

NYAHA SOOTTHUNEYA

Yehova ontthuna weera (1) asitiithi yaasiveleke, yaaxuttiheke ni waakosoopa anamwanaaya, (2) anamwane ewiiweleleke ni waattittimiha asitithaya ni (3) amusi emukokhoreleke Owo vamoha.

Wuuluula

• Moota heeni asitiithi eneeraaya yaaxuttihe ni waakosoopa anamwane aya?

• Moota heeni anamwane eneeraaya yoonihereke nttittimiho waasitithaya?

• Mwaha wa heeni oraaya wooreera omukokhorela Muluku vatthokoni isemana sootheene?

WEERA MUSUWELE ITTHU SINTXIPALE

Itthu heeni sinkela omukhavihera mwaninyu weera akhumelele nnene annuwa vale?

“Itthu 6 weera mmuxuttihe mwaninyu” (Despertai!, N.º 2 a 2019)

Moone miruku Biblya onaavahaawe ale anaathokorora asipapaya oowuuluvala.

“Biblya onthaliha heeni woohima sa moota woowaathokorora asitiithi oowuuluvala?” (Mwaha va jw.org)

Moone moota mulopwana ahaasuwenle waahuwa anamwane, aakhanlaawe tiithi ookosopa nnene.

Yehova onxuttiha waahuwa anamwane (5:58)

Moone moota tiithi mmoha aneeraawe alipihe onthamwene awe ni anamwane awe.

“Moota heeni tiithi aneeraawe alipihe onthamwene awe ni mwanawe?” (A Sentinela, a 1.º a Novembro a 2011)