OVINYERERIHIWA WA OKUMI NI WA OTHORIHIWA

13-14. (a) Khalayi naaiwexexa hayi woohima sa ovinyererihiwa uulummaawe Yesu omphwanyeya va Yohani 5:29? (b) Etthu heeni yootepa otthuneya nintthuneyaahu wuupuwela mmasuni mwa Yesu?

¹³ Yesu aahaathaliha yaale eneera evinyererihiwe weera ekhaleke vathi vaava. Mwa ntakihero, owo enre: “Niwoko ehuhu enimorwa, atthu ari mmahiyeni anèraya yìwe nsu nawe ni evinye: yale yènre sorera eyaka movinyererani mwa okumi, ohera yale yènre sonanara eyaka movinyererani mwa othorihiwa.” (Yoh. 5:28, 29) Yesu aatthuna ohima heeni ni masu ala?

¹⁴ Khalayi naaiwexexa weera masu ala Yesu aahima miteko saatthu yaale yeera evinyererihiwe muhoolo, naari neere, naiwexexa weera atthu akina yeera evinyererihiwe yaahereke opaka itthu sooreera ni akina itthu soonanara. Mene Yesu khaahimme weera yaaheereke opaka itthu sooreera naari yaaheereke opaka itthu soonanara. Owo aavarenle muteko masu avinre, ohiya a muhoolo. Wa ale aahimmaawe weera “yaaheereke opaka itthu sooreera” naari “yaaheereke opaka itthu soonanara”. Naari neere, atthu awo yaapanke ehinaakuve okhwa, ohiya evinyerenre. Masu ala anniiwanyeya keera? Mwaha wooweera khavo aneera aakhuleliweke opaka itthu soonanara elapo enyowani. Mene nto, atthu oohixariya yannapaka itthu iyo soonanara ehinaakuveene okhwa. Vanonto, Yesu eheeni aatthunaawe ohima vaavo uulummaaawe woohima sa ovinyerera wa okumi ni ovinyerera wa othorihiwa?

15. Taani ankela “ovinyererihiwa” ni mwaha wa heeni?

¹⁵ Atthu a xariya yaapaka itthu sooreera ehinaaye okhwa, anookela ovinyererihiwa weera ekhaleke “mahuku ootheene”. Masinaaya aalempwa muliivuruni mwa ekumi. Eyo etaphulelaka weera ovinyererihiwa wa ale “apanke itthu sooreera”, ntoko elempwalaaya va Yohani 5:29, onoolikana ni wa “atthu a xariya”, othalihiwe va Miteko 24:15. Yoothaliha ela ennavarihana ni ele onhimaawe Aroma 6:7, vavo oneera: “Khweli ole okhwiye, òvuluxuwa mwa yottheka.” Ni masu makina, Yehova oolevelela soottheka sa atthu a xariya ekhwiiye. Mene onnuupuwela miteko saya sooreera sootheene yaapakaaya etempu yaaraaya akumi. (Aheb. 6:10) Vanooneya weera atthu a xariya, yavinyererihiwa vale, oneereke otthuneya ovirelela okhala oororomeleya yaatthunaka vale weera masinaaya evirelele olempwa muliivuruni mwa ekumi.

16. Entaphulela heeni “ovinyererihiwa noothorihiwa”?

¹⁶ Ankha ale epanke itthu soonanara ehinaakuve okhwa? Nnaamweera soottheka saya itxipihiweene ekhwaakaru, mene nto awo khenvarenle muteko moororomeleya Yehova etempu yaaraaya akumi. Masina aya khaalempwe muliivuruni mwa okumi. Ovinyererihiwa wa ale “apanke itthu soonanara”, onoolikana ni wa “atthu ohixariya” onhimwa va Miteko 24:15. Awo anookhalano “ovinyererihiwa ni othorihiwa.”c Eyo etaphulelaka weera awo eneereke owehexexiwa ni Yesu. (Luka 22:30) Moovira etempu vakhaani, Yesu onoosuwela yaaphwanelaka atthu awo olempwa muliivuruni mwa ekumi. Weera eyo yeereye, oneereke otthuneya ohiya moomalela ekumi yaaraayano ehinaakuve omusuwela Yehova.