Wookhala mukhalelo weekhaikhai woomukokhorela Muluku?

1. Taani aneera ahime moota woomukokhorela Muluku weekhaikhai?

ITTIINI sintxipale sinniroromela weera, sinnixuttiha ekhaikhai ya Muluku. Mene iyo, sinnixuttiha itthu soohiyana ni annamukokhorela Muluku moohiyana. Nto, ittiini sintxipale khahiyono seekhaikhai. Neereke wookhala mukhalelo weekhaikhai woomukokhorela Muluku? Yehova Muluku pahi taneera aakhule nikoho nna.

2. Nnasuwele hayi moota woomukokhorela Muluku weekhaikhai?

² Yehova onnopwatthani ni ontthuna weera mukhaleke nnene. Mwa yeyo, onnanleela orwela mBiblyani moota woomukokhorela owo weekhaikhai. Nto mmusomeke Biblya nave Muluku animookhaviherani wiiwexexa etthu ontthunaawe. — Yesaya 48:17.

3. Nnipake eheeni weera nimukokhorele Muluku mweekhaikhai?

³ Atthu akina anuupuwela weera Muluku onnaakhulela weera ittiini sootheene ti seekhaikhai. Mene Yesu khaaxutinhe yeeyo. Owo eenre: “khaiyene othene ole onèra: ‘apwiya, apwiya’, anavolowe omwene wa Muluku, mene yoole onapanka otthuna wa Atith’aka ari wirimu.” Eyo enoonihera wi, weera niwere omukokhorela Muluku mweekhaikhai, niintthuneya osuwela ti heene eri yootthuna awe ni opaka ele owo onnilelaawe. Yesu ahalikanxera ale ahinamwiiwelela Muluku ni atthu “ampanka sopahula.” Vanonto, ti wootthuneya omukokhorela Muluku mweekhaikhai. — Matheyo 7:21-23.

4. Yesu, alenle eheeni oohusera awe?

⁴ Yesu ahaaleela oohuseraawe weera khavankhweya opaka yootthuna awe. Owo eenre: “Volowani va mulako woophureya, niwoko mulako onroiha woriheyani ori wowunnuwa, ni ephiro enroiha weiwo, eri yokhweya: vano atthu antxipale t’anivolowa’mo. Nto mulako onroiha w’okumi, ori wophureya, ni ephiro enroiha weiwo, eri yorika: Vano ari vakhani yale anaphwanya ephiro yeyo.” (Matheyo 7:13, 14) Ale antthara ephiro yoophureya, eyo tiiyo, ale anamukokhorela Muluku mweekhaikhai, anoophwanya okumi woohimala. Ole ontthara ephiro yoowunnuwa, eyo tiiyo, ale animukokhorela Muluku moohireerela, onimookhwa. Mene Yehova khontthuna weera mutthu akhwe. Mwa yeeyo, Owo ohaavaha atthu ootheene ebarakha yoomusoma Biblya. — 2 Pedru 3:9.

MUKHALELO WOOREERA WOOMUKOKHORELA MULUKU

5. Nnasuwele hai ale anamukokhorela Muluku mweekhaikhai?

⁵ Yesu enre nyuwo munoowera waasuwela ale animukokhorela Muluku mweekhaikhai, eyo tiiyo, ale ari makristu eekhaikhai. Nnisuwele hayi? Niwehexexaka soororomela saya ni soopaka saya. Yesu enre: “muni mwàsuwele ni sowima saya.” Owo enre tho: “Siso mwiri ori wothene worera onnìma sowima sorera.” (Matheyo 7:16, 17) Ale animukokhorela Muluku mweekhaikhai toohimalela, mene, anniilipihera vantxipale opaka itthu sooreera. Nrowe nixutte itthu ikina makristu eekhaikhai anipakaaya.

6, 7. Mwaha wa heeni makristu eekhaikhai emmuttharaaya paahi Biblya? Yesu ovanhe nttakihero heeni? Eyo enoonihera eheeni?

⁶ Ampaka itthu moovarihana ni Biblya. “Yolempwa eri yotthene yòhùpuxeriwa ni munepa wa Muluku, ni muteko aya ti wohusiha, wovanya, wolaka ni wolela mwa xariya. Wera mutthu a Muluku akhale òmalela ni òwera miteko sothene sorera.” (2 Timotheyo 3:16, 17) Murummwa Paulo ahaalepela makristu a ehuhu ele: “Ni mwa yeyo hiyo tho ninnimuthamala Muluku vohihiyerereya, niwoko vowakhela nsu na mutthenka ahu, ori wa Muluku, khamwàkhenle ntoko nsu na atthu, hooye, mene ntoko nsu na Muluku.” (1 Atesalonika 2:13) Makristu eekhaikhai enitthara paahi masu a Muluku, ari Biblya. Awo khanxuttiha miruku saya naari sookhovelela seethiru.

⁷ Yesu aahonihera nttakihero nooreera. Sootheene aaxutihaawe saakhuma mBiblyani, aani yaawo ari masu a Muluku. (Mmusome Yohani 17:17.) Owo, imaara sinxipale annaromola soolempwa. (Matheyo 4:4, 7, 10) Soweera sa Yesu, sinoonihera weera sootheene makristu eekhaikhai enxuttihaya simphwanela weera sikhumeke mBiblyani.

8. Makristu ekhaikhai emutakihaka Yesu, awo anipaka eheeni weera amukokhorele Muluku?

⁸ Amukokhoreleke Yehova paahi. Nsalmu 83:19 [83:18 NM] Nneera: “Nyuwo nsina nanyu ti Yehova, nyuwo mekhinyu mwà namusulú velaponi vothene.” Yesu anaaxuttiha atthu nsina na Yehova mwaha wooweera aatthuna weera atthu emukokhoreleke Muluku mmoharu eekhaikhai. (Mmusome Yohani 17:6.) Yesu enre: “Wàkokhorele apwiya Muluku à [Yehova] ni wàlapele yaworu.” (Matheyo 4:10) Mene akristu ekhaikhai annitthara ntakihero na Yesu, animukokhorela Yehova ni annivarihela muteko nsina nawe. Ale animukokhorela Muluku ni ekhaikhai, annaaxuttiha atthu akina nsina nawe ni itthu sooreera onrowaawe opaka muhoolo.

9, 10. Makristu eekhaikhai, anoonihera hayi weera annaasivela atthu?

⁹ Annasivelana mukina ni mukhwaawe. Yesu ahaaxuttiha oohuseraawe weera esivelaneke mukina ni mukhwaawe. (Mmusome Yohani 13:35.) Makristu ekhaikhai khankhalelana nthalu, awo khampwattha waari weera tooripa, ooweela, akunya, oohaawa naari ookhalano muhakhu. Mene, awo annasivelana mukina ni mukhwaawe. (Akolosi 3:14) Awo khaniiva naari khanrowa okhottoni. Biblya oneera: “Mwemmo anòneyaaya’mo anamwane a Muluku ni anamwane a Nanrima: Othene ole ohinèra exariya, khanakhuma mwa Muluku, siso tho othene ole ohinamutthuna mukhaw’awe.” Ni oneera tho: “Wera nisivelaneke mukina ni mukhw’áwe. Khahiyene ntoko Kayimi ari mwa mutakhali [Satana]: àmwìva munn’awe.” — 1 Yohani 3:10-12; 4:20, 21.

¹⁰ Makristu eekhaikhai annivarihela muteko ehuhu aya, ikuru saya ni itthu saya weera ekhaviherane mukina ni mukhwaawe. (Aheberi 10:24, 25) Hiyo “napakeleke sorera atthu othene.” — Agalata 6:10.

11. Heeni oraaya wootthuneya waakhulela weera woopoliwa onikhuma wa Yesu Kristu?

¹¹ Annaakhulela weera Yesu ephiro emphwanyiha ovuluxiwa. Biblya oneera: ‘Ovuluxiwa khomphwanyaneya mwa mutthu mukina, naari khweli khanivovo nsina nikina vathi va erimu, nivahiwe variyari va atthu, nenno nnaphwanelahu ovuluxiwano.’ (Miteko 4:12) Muru wa  5 nohiiwa weera Yehova aamurumiha mwanawe Yesu, weera avaherere ekumi awe weera awoopole atthu oowiiwelela. (Matheyo 20:28) Yehova oomuthanla Yesu weera akhale Mwene a Omwene awe. Mwa yeeyo, ti wootthuneya omwiiwelela Yesu weera niphwanye okumi woohimala. — Mmusome Yohani 3:36.

12. Mwaha wa heeni makristu eekhaikhai ahiniivoleiheraaya myaha sa ipoliitika?

¹² Khaanniivoleihera myaha sa ipoliitika. Yesu khaivoleihera myaha sa ipoliitika. Emaara waphukiwaya mulattu awe, Yesu aamuleela Pilatu weera: “Omwene aka kahiyo wa elapo ela.” (Mmusome Yohani 18:36.) Emutakihaka Yesu, Makristu ekhaikhai annaroromela Omwene wa Muluku, ti yeeyo ahinivoleiheraaya ni nyaha sa ipoliitika mapuro ootheene. Mene Biblya onahima weera makristu eekhaikhai annawiiwelela “atthu anlamula,” eyo tiiyo, maGuvernu. (Aroma 13:1) Nto awo anniwelela malamulo a elapo anikhalaaya, wakhala weera malamulo awo, khaanivirikanya malamulo a Muluku. Malamulo a iGuvernu yaavirikanyaka malamulo a Muluku, makristu ekhaikhai annitthara ntakihero na arummwa nneera: “Entthuneyaxa omwìwelela Muluku wàpwaha atthu.” — Miteko 5:29; Marko 12:17.

13. Eheeni makristu eekhaikhai anlaleyaaya voohima sa Omwene wa Muluku?

¹³ Awo annilaleya weera, Omwene wa Muluku tonrowa omaliha maxupo ootheene. Yesu ahimme weera “evanjelyo ela ya omwene” enolaleiwa elapo yootheene. (Mmusome Matheyo 24:14.) Khiyavo eGuvernu eneera ewere opaka itthu Omwene wa Muluku onrowaya onipakela. (Nsalmu 146:3) Nave Yesu ooxuttiha moota woovekela Omwene wa Muluku munivekeloni: “Omwen’á orwe, otthuna wá opankiwe ntoko wirimu siso vathi vava.” (Matheyo 6:10) Nto Biblya onnahimexexa tho weera, Omwene wa Muluku onoonyaanya imwene sootheene sa atthu ni atikitheraka omwene “yowo okhalaka wa mahiku othene.” — Daniyeli 2:44.

14. Taani munawoonaanyu weera annamukokhorela Muluku mwekhaikhai?

¹⁴ Vano musommaanyu itthu iya makristu eekhaikhai anipakaaya, nto pooti wiikoha: ‘Taani antthara malamulo ootheene a mBiblyani? Taani anxuttiha nsina na Muluku? Taani anoonihera nsivelo wa atthu ootheene ni anaakhulela weera Muluku oomuruma Yesu weera anoopole? Taani ahinkhavihera myaha sa ipoliitika? Ni taani anlaleya weera omwene wa Muluku toneera omalihe mahooxo ootheene?’ Anamoona a Yehova paahi tanipaka itthu sootheene sithalihiwe. — Yesaya 43:10-12.

MUNROWA OPAKA EHEENI?

15. Nipakeke eheeni weera nimukokhoreleke Muluku sintoko ontthunaawe?

¹⁵ Atthu akina anupuwela weera waakhulelaru weera Muluku ookhala onnakwana etthu, nto hooye! Mwaha wooweera naari Satana ni malaika awe, awo annaakhulela weera Muluku okhala. Yoxupa ti yooweera awo khaanimwiiwelela. (Yakobe 2:19) Eyo enoonihera weera ohiya waakhulela weera Muluku ookhala, weera nimukokhoreleke sintoko ontthunaawe, ontthuneya opaka itthu sootheene onahimaawe.

16. Heeni ontthuneyaaya ohiya ettiini yoowotha?

¹⁶ Ontthuneya okhuma ettiini yoowotha. Mprofeti Yesaya enre: “Mukhume mwa yowo, mwìrapihe.” (Yesaya 52:11; 2 Akorinto 6:17) Heeni oraaya wootthuneya opaka eyo? Mwaha wooweera, napaka eyo, ovekela wahu onoomusivela Muluku.

17, 18. Taani Biblya onamwiitthanaawe okhala “Babilonia mutokwene,” ni heeni ontthuneyaaya okhumamo moowakuveya?

¹⁷ Ninsuwela hayi ettiini yoowotha? Ninnasuwela weera ettiini ti yoowotha, mwaha wooweera eniixuttiha omukokhorela Muluku moovirikana ni yeeyo Biblya oniixuttihaawe. Biblya, onniitthana ittiini sootheene soowotha okhala “Babilonia mutokwene.” (Apokalise 17:5) Mwaha wa heeni? Mwaha wooweera atthu antxipale yawo yaaxuttiha mu ittiini iye, yaakhuma Ebooma ya oBabilonia. Mwa ntakihero, awo yannixuttiha weera Muluku ori muraru, eyo tiyo, amuluku araru mwa muluku mmoha. Awo annakhulela tho weera mutthu akhwa annavirelela okhala mukumi nipuro nikina naari onnahisiwa omooroni. Ittiini sowootha mahikwaano, sinnaxuttiha itthu imoharu. Iyo sinxuttiha weera aMuluku eri araru, nto Biblya onahima weera Yehova ori Muluku a ekhaikhai, ni ori mmoha. Ni Yesu mwana a Muluku. (Yohani 17:3) Nave ittiini sintxipale sinxuttiha weera, etthu vekunyani eneeriwa alma naari munepa khonikhwa, opwaha mwa yeeyo owo onnahasuliwa omooroni. Mene yooxuttiha eyo ti yoowotha ni kheemomo mBiblyani. — Nwehe Enoota 14, 17, ni 18.

¹⁸ Muluku onoonyaanya ittiini sootheene soowotha. (Apokalise 18:8) Wakhala weera muri ettiini yoowotha, mwaakuve mukhumemo. Mwaha wooweera Yehova ontthuna weera mpake moowakuveya. — Apokalise 18:4.

19. Yehova onaakosoopa moota heeni atthu antthuna onvarela Muteko?

¹⁹ Emaara munrowaanyu othanla omukokhorela Yehova ni okhuma ettiini yoowotha, asinthamwene anyu, amusi anyu khanrowa osuwela mwaha wa heeni mukhumanyu ettiini ele ni pooti owiittani. Etthu entthuneya oosuwela tiila, Yehova onnaakosoopa ale anithanla onvarela muteko awe. Nto owo onimoovahani asinthamwene antxipale yaawo anamukokhorela. Ni kharwa ohiyaani. Asinthamwene awo oneeraiye oovaheeni anrowa okhala amusi anyu. Nave munookhalano yooweherera ya okhala mparadiso, elapo enyowani. (Marko 10:28-30) Apaale emaara ekina, atthu yaale yaawiittani pooti otthuna omusoma Biblya.

20. Mwaha wa heeni ontthuneyaaya othanla vaanano vaava omukokhorela Yehova?

²⁰ Ehanle ehuhu vakhaanene weera Muluku amalihe maxupo anniphwanya. Nto Omwne wa Muluku onrowa olamulelaka elapo yootheene ya vathi. (2 Pedru 3:9, 13) Nkoonani moota onrowaaya okhala woohakalaliha, atthu ootheene anrowa omukokhorelaka Yehova ntoko owo ontthunaawe. Ontthuneya othanla vaanaano vaava omukokhorelaka Yehova ntoko owo ontthunaawe.