YOOSOMA 48
Mwaathanleke nnene asinthamwene anyu
Tiwoorera ookhalano asinthamwene weera ntthekulekeno ehuhu yoohakalaliha ni onlipiha ehuhu yooxupa. Mene Biblya onnanileela eeraka khohiyono atthu ootheene tooreera wapaka asinthamwene. Vanonto moota heeni nneeraahu naathanleke asinthamwene ahu? Muupuwele makoho ala anttharelana.
1. Eheeni asinthamwene anyu anooxuttihaayani?
Vaavo ninvirihaahu ehuhu yintxipale ni mutthu, pooti okhala mu redeni sociais naari otthekula nreene wamoha, hiyo ninkela ovala mikhalelo sawe. Etthu eyo pooti okumihera etthu yoonanara naari yooreera. Ntoko Biblya onhimaawe weera: ‘Watthara asuweli onokhale musuwele watthara alavilavi onoxere maitho naari neere [watthara ale ahimmusivela Yehova] onoopaka etthu yoonanara.’ (Miruku 13:20) Asinthamwene ammusivela Yehova, enimookhaviherani omwaattamela Yehova ni opaka soothanla sooreera. Mene okhalano asinthamwene ahimmusivela Yehova pooti woohiihani omusivela Yehova. Ti yeeyo nto Biblya onnoopereraawe weera naathanleke nnene asinthamwene ahu! Vaavo asinthamwene ahu ammusivelaaya Muluku etthu eyo enoonikhavihera, nave-tho nimwaakhavihera awo. Napaka eyo, ‘nneereke owera olipihana mukina ni mukhwaawe.’—1 Atesalonika 5:11.
2. Moota heeni waathanla asinthamwene ooreera ommuhakalalihaaya Yehova?
Yehova onnaathanla nnene asinthamwene awe. Owo “othamwene awe ti wa anaxariya.” (Miruku 3:32) Moota heeni Yehova onkelaawe woonela wakhala weera nnimwaathanla asinthamwene ahimmusiveliha yoowo? Mweekhaikhai owo aamunyoonyiwa! (Mmusome Yakobe 4:4.) Mene nto, wakhala weera ninnaakhootta asinthamwene ahimmusivela Yehova ni waathanla asinthamwene ammusivela, owo onoohakalala ni onoonithanla okhala asinthamwene awe.—Nsalmu 15:1-4.
WEERA MUXUTTERE SINTXIPALE
Moone mwaha wa heeni oraaya wootthuneya wathanla nnene asinthamwene anyu. Moone-tho moota woowaathanla asinthamwene ankela wookhaviherani ovirelela okhala oororomeleya.
3. Mwiikosoopeke ni asinthamwene ahimmusivela Yehova
Atthu ahimmusivela Yehova ni ahiniiwelela malamulo awe, atthu oonanara weettano. Moone EVIIDIYU. Avinyaka mutthekule ni ipontu sinttharelana.
Moota heeni nneeraahu nikhalane onthamwene woohireerela moohisuwelani?
Mmusome 1 Akorinto 15:33. Avinyaka mutthekule ni ipontu sinttharelana:
Mutthu heeni eera akhale nthamwene oohireerela wa nyuwo? Mwaha wa heeni?
Musome Nsalmu 119:63. Avinyaka mutthekule ni ipontu sinttharelana:
Nyuwo mwaaseke heeni wa nthamwene?
Ntoko hiihaale maçã oowuutta annanarihaaya makina, moota heeni onthamwene woonanara oneeraaya woonanariheni?
4. Asithamwene ahu khantthuneya olikana iyaakha ni hiyo
Biblya onnaathaliha alopwana eeli a nihimo na ana a Israyeli khalayi, yeeriwa Yonathani ni Davidi. Yonathani aari mwaana a mwene ni aahaattano iyaakha ompwaha Davidi. Nnaamweera vareene hiiho, awosa yaakhalano onthamwene woolipa. Mmusome 1 Samuweli 18:1. Avinyaka mutthekule ni ipontu sinttharelana:
Mwaha wa heeni nihintthuneyaahu olikana iyaakha ni asinthamwene ahu naari olikana makhalelo?
Mmusome Aroma 1:11, 12. Avinyaka mutthekule ni ipontu sinttharelana:
Moota heeni asinthamwene ansivelana eneeraaya ekhaviheraneke mukina ni mukhwaawe?
Moone EVIIDIYU, weera moone moota mmiravo aaphwannyaawe ehuhu, yeeyo ahaawehereraawe. Avinyaka mutthekule ni ipontu sinttharelana.
Nviidiyuni, mwaha wa heeni asitiithi awe Akil yaaxupeñyaaya ni asinthamwene awe ooxikola?
Mwaha wa heeni Akil awaattamelaawe amiravo ale?
Moota heeni owo awinnaawe omeekhaawe?
5. Moota heeni muneeraanyu mukhaleno asinthamwene ooreera
Moone moota wookhalano asinthamwene eekhaikhai. Moone tho moota wookhala nthamwene ooreera. Moone EVIIDIYU..
Musome Miruku 18:24 ni 27:17. Avinyaka mutthekule ni ipontu sinttharelana:
Moota heeni asinthamwene eekhaikhai ankhaviheranaaya mukina ni mukhwaawe?
Nyuwo mookhalano asinthamwene hiiho? Wakhala weera khamunano, munkela opaka heeni weera mukhaleno nthamwene eekhaikhai?
Mmusome Afilipi 2:4. Avinyaka mutthekule ni epontu enttharelana:
Weera mwaaphwanye asinthamwene eekhaikhai, nyuwo muntthuneya okhala nthamwene ooreera. Nyuwo munaapake hayi eyo?
Weera mukhaleno asinthamwene a ekhaikhai nyuwo muntthuneya okhala nthamwene ooreera
ATTHU AKINA ANEERA: “Etthu yootthuneya ori okhalano onthamwene muhipwatthaka taani mumpakanaanyu.”
Mwaarowa wakhula hayi?
NYAHA SOOTTHUNEYA
Nintthuneya wiikosoopa naathanlaka asinthamwene, eyo ti yooreera wa hiyo weera nimusivelihe Yehova
Wuuluula
Mwaha wa heeni waathanla wahu asinthamwene oraaya wootthuneya vamaithoni va Yehova?
Onthamwene heeni nintthuneyaahu osempa?
Moota heeni muneeraanyu mukhaleno onthamwene ni atthu akina?
WEERA MUSUWELE ITTHU SINTXIPALEORE
Moone moota asinthamwene akina eneeraaya yookhavihereni ehuhu yooxupa.
“Mulipihe Ompatthani Anyu Ohinatthi Ophiya Wanikisa” (Owehaweha, a Novembro a 2019)
Moone miruku soovareleya muteko weera mwaapake asinthamwene ooreera.
Etthu heeni nyuwo muntthuneyaanyu osuwela woohima sa moota woowaapaka asinthamwene munternetini?
Mukhale a miruku: musuwele onvarela muteko redes sociais (4:12)
Weera moonelele etthu yaamweerinhe mulopwana mmoha waathanla asinthamwene, musome mwaha “Miyo kannoona munkhela ni apapaka”.
“Biblya onnatxentxa mirima sa atthu” (A Sentinela, a 1.º a Abril a 2012)