Yosefe aari mwaana oomalihera a Yakobe. Aari mwaana yoowo Yakobe aamusivelaawe vantxipale. Mwa yeeyo, asinnawe Yosefe oowunnuwela, yannamukhalela nrima ni khiyaasiveliwa nuuwo. Ekwaha emoha, Yosefe aaloha itthu soowoopiha, ni aahaaleela asinnawe. Menento awo khiyaasivelinwe ni sooloha iye. Awo yuupuwela weera Yosefe aatthuna okhala mwene aya, nto awo yaanyoonyiwa vantxipale!

Nihiku nimoha, asinnawe Yosefe yaarakamela, ekosoopaka iputtiputthi sa emusi aya. Yakobe anvekela Yosefe weera awoone waari weera awo yaari nnene. Emaara yaamonnaaya Yosefe awaaka, awo yaapatxera weerelana: ‘Onnawa iwe namaloha. Nrowe nimwiive!’ Emaara Yosefe aaphiñyaawe, asinnawe yaahinvara ni yaahinvonyera munlittini noowiixa. Emaara ene yeele, yeera eviraka alopwana yaarowa wExipitu. Nto Yuda, mmoha a asinnawe Yosefe, aaheera: ‘Khontthuneya omwiiva! Neere omutumiha weera akhaleke kaporo.’ Nto awo yaahaatumihera alopwana ale Yosefe ni imoeda 20.

Moottharelana, awo yaaruweya ekuwo ya Yosefe mphomeni ya epuri weera ekhaleke ntoko aakhuurinwe ni enama yoowoopiha. Avinyaka, yaaroiha ekuwo ele wa Yakobe ni yaamukoha: ‘Iya ikuwo sa mwaninyu keera?’ Yakobe aariipiwa murima vantxipale uupuwelaka weera mwanawe aahikhwa. Nto khaavo aawera ommaaliha.

WExipitu, Yosefe aatumihiwa ntoko kaporo wa mulopwana mmoha ootthuneya eeriwa Potifari. Menento Yehova annavirelela omukhavihera Yosefe. Potifari aahoona weera Yosefe annavara nnene muteko, nto owo annamuroromela. Mwa etempu vakhaani, Potifari aamuhiya Yosefe weera akosoopeke itthu sootheene owo aaraaweno.

Amwaarawe Potifari, yaahoona weera Yosefe aari mulopwana a ikuru ni oophwaneliwa. Mahiku ootheene, awo yannanvekela weera ekoneno. Eheeni Yosefe aapakaawe? Ikwaha sootheene owo anneera: ‘Hooye! Eyo yoottheka. Nyuwo muthelinwe ni Potifari, ni owo onnakiroromela miyo. Nto miyo kakona ni nyuwo, Yehova onoorowa oriipiwa murima vantxipale ni miyo!’

Nihiku nimoha, amwaarawe Potifari yaamunyeserera Yosefe weera akone naawo. Yaavara ikuwo sawe, mene owo aatthawa. Emaara Potifari aaphiñyaawe owannyawe, awo yaamoothera Yosefe yeeraka aatthuna waakoniha. Nto Potifari aanyoonyiwa vantxipale ni aalamula weera Yosefe awaleliwe mukateya. Menento Yehova khaamuttiwanle Yosefe.

Emaara Yosefe aaraawe okateya, Farawo mwene a wExipitu, aakhalano yooloha emoha, yeeyo khaavo mutthu aawera wiiwexexa. Menento mulopwana mmoha aamuleela Farawo weera, Yosefe aamurowa otaphulela yooloha ele. Menento Farawo aalamula weera aroweliwe Yosefe mukateya.

Farawo aamukoha Yosefe eeraka: ‘Nyuwo pooti otaphulela yooloha aka?’ Yosefe aamwaakhula eeraka: ‘Mpuwa mwa iyaakha 7, sinoorowa okhala sootxa sintxipale wExipitu. Avinyaka sinookhala iyaakha 7 sa etala. Mwaha wa yeeyo, omuthanle mulopwana mmoha a miruku weera awere ovitha sootxa weera atthu ehikhwe etala.’

Mwaha wa heeni Yosefe aawenraawe omutaphulela Farawo sooloha? Mwaha wooweera Yehova aamukhavihenre. Farawo aamuthanla Yosefe weera avitheke sootxa ni aamuthanla owo okhala mulopwana anaaveeli ootepa otthuneya a wExipitu.

Mpuwa mwa iyaakha 7 sooreera, Yosefe ahiiyaathi sootxa sintxipale. Avinyaka saaphiya iyaakha sa etala. Etala eyo yaari etokweene ni atthu a mapuro mantxipale yannawa othuma yootxa. Mpaka Yakobe oKanani, aasuwela weera wExipitu yaakhalawo yootxa. Mwaha wa yeeyo, aahaaruma anamwane awe 10 okelawo. Emaara yaaphiñyaaya wExipitu, asinnawe Yosefe yaarowa wuuluma nuuwo. Yaahikokhora ohoolo wawe, menento khiyaamusuwela. Menento Yosefe aahaasuwela ni aahuupuwelela yooloha aaraaweno areene mmiravo. Menento weera asuwele weera asinnawe yaatxentxa mukhalelo yaaraayano, Yosefe aaweerela: ‘Nyuwosa anamahottela! Muntthuna owana ni Exipitu.’ Awo waakhula yenre: ‘ Hooye! Hiyo khaiyene anamahottela. Hiyo ninkhuma elapo ya oKanani. Hiyo naayarinwe 12, menento munnihu mmoha ohookhwa, ni munnihu mmoha oomalihera ohanle ni apapihu.’

Mwakiruuhela munninyu owo oomalihera, miyo kinimoororomelani. Nto asinnawe Yosefe yaatthikela oKanani. Evinreene etempu awo yaatthikela wExipitu othuma yootxa. Ekwaha ela, yaamukuxa munnaya oomalihera, Benjamim. Nto Yosefe aalakela oweerera asinnawe. Aalakela ovitha ekoopho ya paratha musaakhoni mwa Benjamim, ni aaweerela weera awo yaahiya. Anamuteko a Yosefe yaahaasaasa ekoopho ni yaaphwanya musaakhoni mwa Benjamim. Asinnawe Yosefe yaahoova vantxipale awo yaamutxonttelela owo weera aahaaxe awo omuhiya Benjamim.

Vanonto Yosefe aaroromela weera asinnawe yaatxentxa mukhalelo aya. Nto owo khaawera ovilela-tho veeli. Inlaka vantxipale aahaaleela: ‘Miyo ka Yosefe munninyu! Apapaka nlelo akumi?’ Asinnawe khiyaawera waakhulela! Yosefe aari mukumi! Weera awoonihere weera aahaalevelela, Yosefe aaheera: ‘Muhuliwe muru ni etthu mwaakipakenlaanyu. Muluku okiruminhe nno weera koopole ikumi sanyu. Vano murowe mwaakuxe apapa mwaaruhe!’

Awo yaatthikela oKanani ni yaamulela mitthenka sooreera Yakobe. Mootharelana, emusi yootheene yaarowa wExipitu. Sivinreene iyaakha sintxipale, Yosefe ni apapawe yaakumana-tho veeli.