Neereke mutthu ooreera murima khankumanano maxupo? Moone etthu yeereñye ni Yobi, nthamwene awe Muluku. Owo aakhala elapo yeeyo yiitthaniwa Uzi. Owo aari namuhakhu ni aakhalano emusi etokweene. Yobi aari mulopwana ooreera murima, yoowo aakhavihera atthu oohaawa, ookhweliwa ni anamwane yahaakhanleno asipapaya.

Yobi khaasuwela, mene Satana annoona etthu aapakaawe. Yehova aasuwela eyo nave aamukoha Satana: ‘Mwaha wa heeni onanwehexexaawe murumeyi aka Yobi? Khaavo mutthu onlikana nuuwo valaponi vootheene. Owo ikwaha sootheene onnakiiwelela ni onnapaka etthu yooreera.’ Satana waakhula enre: ‘Aani, weyo khonhiya etthu yoonanara emukhumelelaka owo. Ni onnanvaha itthu sooreera, ntoko imatta ni asinama. Mene omwaakhe itthu sootheene owo araaweno, ni woone wakhala weera owo onoovirelela okhala nthamwene aa.’ Yehova omwaakhula enre: ‘Aani weyo pooti ompakela Yobi etthu eri poothe menento waahimwiivaru.’ Mwaha wa heeni Yehova aamuhiñyaawe Satana apakaka eyo? Mwaha wooweera owo annamuroromela vantxipale Yobi. Yehova aasuwela weera Yobi anvirelela okhala nthamwene awe, nnaamweera aarowa okumanano maxupo matokweene.

Nto, Satana aapatxera opaka itthu weera Yobi akumanekeno maxupo. Yoopatxera, aaheeriha weera inama sootheene sa Yobi sihisiwe naari wiiviwa, ni aaheeriha weera anamuteko ootheene yaakosoopa inama iye yiiviwe. Moottharelana, Satana aapaka etthu yootepa onanara. Owo aaheeriha weera ekhwe anamwane ootheene a Yobi. Awosa yaari vamoha, etxaaka efesta ni empa yaaraayamo yaahaamorela. Yobi aariipiwa murima ni etthu ele yeereñye, menento aavirelela okhala nthamwene a Yehova.

Satana aatthuna weera Yobi ahaawe vantxipale. Nto, owo aaheeriha weera Yobi akhaleno makhwatta yaawo yaavoreya vantxipale. Yobi khaasuwela mwaha wa heeni itthu sootheene saamukhumelelaaya. Nnaamweera vareene hiiho, owo khaahiñye okhala nthamwene a Yehova. Mwaha wa yeeyo, Yehova aahakalala vantxipale.

Moottharelana, Satana aaheeriha weera asilopwana araru Yobi aasuwenlaawe yanwoke. Awo yaamweerela weera aapaka etthu yoonanara ni weera Muluku aammuttaruxa. Yobi aahima weera khaantale opaka etthu yoonanara, mene aapatxera woona weera aari Yehova aamukumihera maxupo ale. Mpaka Yobi aahima weera Muluku khaakhanleno exariya ni yoowo.

Mulopwana iitthaniwa Elihu, aarimwaasa omaala iiwelelaka sootheene saahimmwa. Nto owo aalakela wuuluma: ‘Etthu nyuwo muhimmaanyu khaiyene ekhaikhai.’ Mpaka hiyo pooti ohiiwexexa mwaha wa heeni Yehova aahiñyaawe yeereyaka eyo. Mweekhaikhai, owo khaarowa opaka etthu yoonanara ntoko eyo. Owo onnoona itthu sootheene sinkhumelela ni onnaakhavihera atthu emaara enkumanaayano maxupo.

Avinyaka Yehova aamweerela Yobi: ‘Mwaha wa heeni onoonaawe weera nthowa ti nawaka? Okhala weera weyo khosuwenle moota kipattunxaaka erimu ni elapo, moota heeni onrowaawe wiiwexexa mwaha wa heeni sinookhumelelaaya itthu iya?’ Yobi aaheera: ‘Yehova onhima ekhaikhai. Weyo wa mutthu oowera okhanle elapo ela. Ni miyo ka mutthu ohinsuwela etthu. Txontte okilevelele etthu kuulummaaka.’

Sivirakaru itthu iye sootheene, Yehova aamulamiha Yobi nave-tho anvaha itthu sintxipale opwaha iye aayelenlaawe. Yobi aakhalano ekumi iyaakha sintxipale ni aari oohakalala vantxipale. Yehova aapaka eyo mwaha wooweera ikwaha sootheene Yobi aari oowiiwelela, nnaamweera aakumanano maxupo matokweene. Ankha nyuwo? Muntthuna weera Yehova ahakalaleke ni nyuwo? Nto, nvireleleke okhala nthamwene a Yehova, nnaamweera mukumanakano maxupo matokweene.

Munnuupuwelela weera emusi ya Yakobe yaathaama enarowa okhala wExipitu? Ereene iwe emusi aya yannaatxeerereya, ni awo yannasuweliwa okhala ana a Israeli. Yakobe ni Yosefe ekhwaakaru, mwanawe Farawo aakhala mwene a wExipitu. Owo annoova aasuwenlaawe weera yaakhala ana Israeli antxipale waapwaha atthu a wExipitu. Owo annaanyeserera ana a Israeli weera evareke muteko ntoko akaporo omatta naari opaka ibuloku. Menento waanyeserera ovara muteko khiwaakhumela nnene. Nto Farawo aalamula weera anamwane ootheene asilophwana yaakela oyariwa yiiviwe. Ana a Israeli yiiwalaaya eyo yaahoova. Keera?

Etempu ene yeele, muthiyana mmoha iitthaniwa Yokebeti aakhalano mwaana mwaamulopwana. Weera Farawo ahimwiive mwaana ole, Yokebeti aahirowa onvitha vamalaxini mmoolokoni wa oNilo. Murokorawe mwaana ole yoowo iitthaniwa Miriyamu, aahala iipintheene iwe weera oone etthu yaakela weereya.

Mwa yeeyo, mwanawe Farawo mwaamuthiyana aarowa orapa omoolokoni wa oNilo. Emaara aaphiñyaawe iwe, aahoona muttanka mmoha mukhaanene areenemo mwaana inlaka. Owo ammorela ikharari. Miriyamu aahikela owanyawe mwaana a Farawo ni aamukoha eeraka: ‘Munnatthuna weera kimwiitthane muthiyana mmoha weera amukosoopeke mwaana owo wa nyuwo?’ Mwanawe Farawo aahaakhulela. Mwa yeeyo, Miriyamu aarowa owiitthana ameyawe Mose, Yokebeti. Mwanawe Farawo aahimweerela Yokebeti: ‘Omukuxe mwaana ola wamukosoope. Miyo kinimooliva wa muteko owo.’

Innuwakaru mwaana ole, Yokebeti aamukuxa amuroihaka wa mwanawe Farawo. Owo aahinvaha nsina na Mose, ni aamukosoopa owo ntoko mwanawe oomuyara. Mose aahuuwale ntoko munahumu ni aamukhalano itthu sootheene seiyo owo eeraawe atthuneke. Mene owo aasuwela weera aari mwisraeli, menento aathanla opaka yootthuna ya Yehova.

Vaavo araweno iyaakha 40, Mose aathanla waakhavihera atthu a Muluku. Nihiku nimoha, aamona mutthu a wExipitu ammanaka mwisraeli. Mwa yeeyo, Mose ammana mwixipitu ole. Ni ammana ni ikuru sawe sootheene mpaka omwiiva. Moottharelana, owo aamuuheela veehaavani. Nto Farawo aahoonelela etthu ele ni aaheerera omwiiva Mose. Mwaha wa yeeyo, owo aatthawela nipuro nenno nniitthaniwa Midiyani. Mene Yehova aavirelela omukosoopa owo.