Mose aakhala oMidiyani mwa iyaakha 40. Owo aathela ni aahaayara anamwane. Nihiku nimoha, akosoopaka iputtiputthi sawe omwaako Sinayi, owo aahoona etthu yootepa otikhiniha. Mwiri mmoha mukhaanini waapatta mooro, mene khawaasa! Emaara Mose aattamenlaawe mwiri ole weera oone etthu yeereya, aahiiwa nsu neeraka: ‘Mose! Okhale vaavo oraawevo ottittimihe nipuro nna orulaka isantaaliya.’ Aari Yehova uuluma ni Mose moorweela mwa nlaika.

Mose aahoova vantxipale ni aahikokhora akhuneelaka owiitho wawe. Yehova aaheera: ‘Miyo koosuwela weera ana a Israeli ennahaawa vantxipale. Kinimwaakuxa kaaroihaka nipuro nootepa oreera ni awo enoohiya okhala akaporo a atthu a wExipitu. Miyo kohoothanla weeyo weera waakumihewo atthu aka wExipitu. Mose aahoova aleliwakaru ni Yehova etthu ele.

Ni aamukoha: ‘Vano ankha awo yakikoha weera taani okirumme weera kaakhavihere? Etthu heeni kinrowaaka waaleela?’ Waaleele weera ti Yehova, Muluku a Abrahamu, Muluku a Isakhi, ni Muluku a Yakobe, yoowo oorumme. Ankha awo yaahikiroromela? Yehova aalakela onvaha etthu yoonihera weera aamurowa omukhavihera. Aahimuruma Mose ovonyera vathi muttotto awe. Nto muttotto owo waathatuwa enowa! Mose aavara mwiila wa enowa, ni yaatthikela okhala muttotto veeli. Yehova aaheera: ‘Ana a Israeli yawoona weyo opakaka eyo, awo enoororomela weera ti miyo koorumme.’

Mose aaheera: ‘Mene wa miyo, okixupa wuuluma ohoolo wa atthu antxipale.’ Yehova aamwaakhula: ‘Miyo kinimooxuttiha etthu onrowaawe ohima, ni munnaa Aharoni onoorowa ni weyo.’ Vano Mose aaroromela weera Yehova aamurowa omukhavihera. Nto owo aatthikela wExipitu ni amwaarawe ni anamwanaawe.

WExipitu, ana a Israeli yannanyesereriwa ovara muteko ntoko akaporo. Nto Yehova, aamuruma Mose ni Aharoni weera yamuleele Farawo: ‘Waahiye atthu aka okhuma wExipitu weera yakikokhoreleke weeheweheweni.’ Menento Farawo aahiiteexa ni aawaakhula: ‘Miyo nkintthuna osuwela etthu Yehova onhimaawe. Miyo nkinrowa waahiya ana a Israeli orowa!’ Anyoonyinweene Farawo aaheeriha weera ana a Israeli evareke muteko muntxipale. Moosuwela etthu Yehova aapankaawe? Owo aaheeriha weera sikhumelele itthu soonanara wExipitu, seiyo siitthaniwa mattaruxo. Yehova aamweerela Mose: ‘Omuleele Farawo, okhala weera khantthuna okiiwelela, maahi ootheene oNilo kinootatuxa okhala ephome.’ Mose aarowa wuuluma ni Farawo. Emaara Aharoni aamannaawe maahi a mooloko wa oNilo ni muttotto awe, maahi awo yaathatuwa ephome! Maahi awo yaahipatxera winkha vantxipale ni ihopa sootheene saahikhwa. Mene maahi a omooloko wa oNilo khayaatthuneya-tho owuriwa. Nnaamweera vareene hiiho, Farawo khaahiñye ana a Israeli opwaha.

Evinreene esemana emoha, Yehova aamuleela Mose: ‘Wuulume ni Farawo veeli, omuleele weera, aahaahiya atthu aka opwaha, wExipitu wootheene enoosarawo anaphulu.’ Menento Aharoni, aahookola muttotto awe ni wExipitu wootheene yaasareyawo anaphulu. Anaphulu yaahikhala mapuro ootheene mpaani, vasulu va ikaama ni mpaka mutixelani. Mwaha wa yeeyo Farawo aamuleela Mose weera anvekele Yehova weera amalihe ni nttaruxo nne. Owo aalaihera waahiya ana a Israeli orowa, nto Yehova aaheemexera nttaruxo nne, ni anaphulu ootheene yaakhwa. Atthu a wExipitu yaahaathukumanya anaphulu ookhwa mapuro mantxipale. wExipitu wanninkhawo vantxipale nnaamweera vareene hiiho, Farawo aavirelela waakhoottiha ana a Israeli okhumawo iwe.

Mwaha wa yeeyo, Yehova aamuleela Mose: ‘Omuleele Aharoni weera amane vathi ni muttotto awe ni ntthupi nnookhala ithxetxema.’ Nto Aharoni aapaka eyo, ni saakhumelela ithxetxema sintxipale. Emaara atthu a wExipitu yonnaaya ithxetxema iye, yaamweerela Farawo: ‘Itthu iya sinkhuma wa Muluku!’ Menento Farawo khaatthuna waahiya ana a Israeli weera epwaheke.