Mose ni Aharoni yaarowa wuuluma ni Farawo veeli: ‘Muluku ohimme weera waahaahiya ana a Israeli ovinyawo nno owo onrowa waasariha aphuure elapo yootheene.’ Menento aphuure atokotoko oowaatta ni ooluma yaasareya impa sootheene sa atthu a wExipitu. Mene aphuure awo khayaavolonwe impa sa ana a Israeli. Nttaruxo nna ni makina enttharelana yaakhumelenle paahi atthu a wExipitu. Oonakaru etthu eyo Farawo aahimme ha: ‘Mose onvekele Yehova weera aamalihe aphuure ala, ni miyo kinimoohiyani opwaha.’ Emaara Yehova aakuminhaawewo aphuure ale, Farawo aatxentxa miruku.

Mwaha wa yeeyo Yehova aahimme ha: ‘Wakhala weera Farawo khanahiya atthu aka ovinyawo, asinama ootheene a wExipitu enookhala oovoreiwa ni enimookhwa.’ Ni eyo yaaheereya nihiku naattharelana. Asinama a ana a Israeli paahi yaavirelenle okhala akumi. Farawo aasuwela etthu eyo, mene okhala weera aari mutthu oohiiwa khaahiñye ana a Israeli orowa.

Menento Yehova aamweerela Mose weera avahule ettuura ni ayeehere vapheyoni ohoolo wa Farawo. Epheyo yaahisareya ntthupi. Emaara ntthupi nne naapatxenraaya omora, atthu a wExipitu ni inama yaakhalano makhwatta mantxipale yaawo yaavoreya vantxipale. Nnaamweera vareene hiiho Farawo khaahiñye ana a Israeli ovinyawo.

Yehova-tho aamulela veeli Mose weera amuleele Farawo: ‘Okhala weera khuntthuna waahiya atthu aka orowa, omaalo enoomora maralala wiirimu.’ Nihiku naattharelana, Yehova aarupiha epula yoowaatta ya maralala, ni itari. Khayintale omora maralala matokotoko ntoko ale wExipitu. Maralala ale yaananariha miri ikhaanene ni itokotoko. Mene nipuro yaakhalaaya ana a Israeli eyo khiyeereñye. Farawo aamweerela Mose: ‘Omuleele Yehova weera amaalihe maralala ala avinyaka vawo pooti muroweke.’ Menento emaalihiwakaru epula ele ya maralala, mooripiha murima Farawo aahitxentxa miruku.

Menento Mose aaheera: ‘Misoope sinoorowa otxa miri sootheene sihanle maralala ehinanarinhaaya.’ Mene misoope sintxipale saananariha wExipitu sitxaaka miri ikhaanene ni itokweene saahanle. Farawo aaheera: ‘Onvekele Yehova avenxewo misoope iya.’ Yehova aamaliha misoope iye, mene Farawo aavirelela okhala oohiiwelela.

Moottharelana, Yehova aamuruma Mose weemexera ntata nawe wiirimu. Emaara Mose aapankaawe eyo, moohipisa yaakhala epiphi. Mpuwa mwa mahiku mararu, atthu a wExipitu khayaawera woona etthu. Nipuro yaakhalaayawo ana a Israeli waakhalawo waara.

Nto Farawo aamwiitthana Mose ni aamweerela: ‘Weyo ni atthu aa muroweke. Menento inama sanyu munoohiya.’ Mose aahimme ha: ‘Inama iyo sintthuneya orowa ni hiyo weera nanvahe Yehova.’ Farawo aanyoonyiwa vantxipale ni aamukhuwelela Mose ni Aharoni: ‘Mukhumewo ohoolo waka! Katthikela owoonani kinoowiivanisa!’

Mose aamulaihera Farawo weera khaarowa-tho otthikela omoona owo. Mene, ahinaaye orowa, Mose aamuleela Farawo: ‘Ohiyu eriyari, ni anamwane ootheene oopatxera oyariwa wExipitu enookhwa. Khiyaavo emusi eneera ehale, naari anamwane aakaporo naari mwanawe Farawo.’

Nto Yehova, aawerela ana a Israeli weera epake yootxa yoothanleya ohiyu ole. Muluku aaweerela: ‘Mwiive eputtiputthi naari epuri erinono eyaakha emoha, ni mukuxe ephome aya muhele muxerexere mwa mulako wa impa sanyu. Mooxeke enama aya ni mutxeeke ni epawu yoohiheliwa efaramenta. Mukhale oolikaneene weera muroweke. Olelo ohiyu kinimookumihaniwo wExipitu.’ Muupuwele moota ana a Israeli yaatteelinwaaya vantxipale! Moohihovela, awo yaamurowa okhumawo wExipitu!

Ohiyu eriyari, nlaika na Yehova naavira impa sootheene sa wExipitu. Impa seiyo owo ahoonaawe ephome ettikittheliweene muxerexere mwa mulako, annavolowa ni annamwiiva mwaana oopatxera oyariwa. Mene, vaavo noonaaya mulako ottikittheliwene ephome, nlaika nne nannavira vasulu va empa, naari neere, khanaavolowa mpaani. Mwaha wa yeeyo, imusi sootheene sa wExipitu, saanamuhakhu ni ale yahaakhanle anamuhakhu, yaahayeleela anamwane aya oopatxera oyariwa. Mene khaavo mwaana ana a Israeli aakhwiiye.

Mpaka mwanawe Farawo oopatxera oyariwa aahikhwa. Farawo khaawera-tho ovilela veeli. Mwaha wa yeeyo, aamweerela Mose ni Aharoni: ‘Nyuwosa ni atthu anyu nvinyewosa nno! Muroweke ni mwamukokhoreleke Muluku anyu! Mukuxe inama sanyu ni muroweke!’

Vano, ohiyu ene yoole mweeri waaraka, ana a Israeli yaakhumawo wExipitu, erehereñyeene mwa ikhurupu. Yaakhala alopwana ana a Israeli oophiyeraka 600.000 ni athiyana antxipale ni anamwane. Ni atthu antxipale yahaakhanle ana a Israeli yaarowa-tho naawo weera yamukokhoreleke Yehova. Moohihovela ana a Israeli yaari ootaphuwa!

Weera yuupuweleleke moota Yehova aakumihaawe wExipitu, iyaakha sootheene, ana a Israeli yannapaka yootxa yoohiyu yoothanleya. Awo yanniitthana yootxa eyo yoohiyu okhala mpasika, yeeyo entaphulela, ovira vasulu.