Yehova aamuleela Mose weera awele mwaako Sinayi. Mose aakhala iwe mahiku 40. Nto Yehova, aalepa malamulo 10 ootepa otthuneya va ithaapwa piili sa maluku. Malamulo awo aniitthaniwa malamulo 10.

Evinreene etempu vakhaani, ana a Israeli yaapatxera wuupuwelela weera Mose khaarowa otthika-tho veeli. Awo yaamuleela Aharoni weera: ‘Mose ontthawa. Nimmutthuna mutthu weera anikumihewo nno. Onipakele Muluku.’ Nto Aharoni, aahaavekela ewooru ana a Israeli. Owo aakuxa ewooru ele, ni aampaka mwaamompe. Emalakaru, ana a Israeli yaapatxera okokhorela emompe ele mpaka yaapakela efeesta. Ana a Israeli yanneera: ‘Mwaamompe ola muluku ahu! Onikuminhe wExipitu!’ Neereke ana a Israeli yannatthuneya opaka eyo? Hooye, khiyaatthuneya opaka eyo, awo yaalaihenre omukokhorela Yehova paahi mene khiyaapaka etthu yaalaihenraaya.

Yehova oonakaru eyo, aamweerela Mose: ‘Onnatthuneya weera weyo okhuruwe waawehe ana a Israeli. Awosa khenkiiwelela. Awo ampaka muluku eethiru ni emmukokhorela yoowo.’ Mose aakhuruwa omwaako Sinayi avarenleene ithaapwa piili sa maluku.

Emaara aattamenlaawe nipuro ana a Israeli yaaraayawo, owo aannawiiwa atthu yiipaka. Ni aattamenlaawewoxa, annawoona atthu yiinaka ni emukokhorelaka mwaamompe a ewooru. Mwaha wa yeeyo Mose aanyoonyiwa vantxipale, owo aakuxa ithaapwa iye sa maluku ni aavonyera vathi. Aavonyera vathi ni ikuru sawe sootheene mpaka ophweeya avinyaka amunyaanya mwaamompe ole. Mose aakoha: ‘Nyuwo Aharoni, mwaha wa heeni mwaahiñyaanyu atthu ala eweerihakani ompaka mwaamompe ola? Mene eyo etthu yootepa onanara, mene yootepa onanara vantxipale!’ Aharoni aaheera: ‘Mose txontte, ohinyoonyiwe. Weyo wohaasuwela ana a Israeli ala. Awo yaamutthuna Muluku. Avinyaka, awosa yaakiruhela ewooru. Miyo kaakuxa ewooru ele, kaahela vaikho ni aakhuma mwaamompe ola!’ Nto Mose awela mwaako Sinayi ekwaha yanaaveeli, ni aamutxonttela Yehova weera aalevelele ana a Israeli.

Yehova aalevelenle ale yaatthuna omwiiwelela owo. Mohoona keera? Wa Yehova, wiiwelela etthu yootepa otthuneya vantxipale.

Omwaako sinayi iwe, Yehova aamuruma Mose opaka nipuro noothanleya nenno niitthaniwa etapernakulo. Wari weiwo ana a Israeli yeeraaya emukokhorelekewo Yehova. Mose aatthuneya opaka etapernaakulu ele mwa mukhalelo wookhweya weera yaakhweeleke oteexa emaara yeeraaya ethaameke.

Weera ekhavihere muteko wooteka, Yehova aahaavekela ana a Israeli, weera evaheke ele yaaraayano. Nto ana a Israeli yannavaha ewooru, eparatha, ekhoopiri, maluku oowaara, exoiya, ixapala sa inama ni itthu ikina sintxipale. Awo yaavaha itthu sintxipale mpaka Mose ohima ha: ‘Sookwana. Khontthuneya-tho owiiha itthu ikina.’

Alopwana ni athiyana antxipale yaawera opaka itthu soovirikana, yaakhavihera opaka etapernaakulu. Emaara atthu akina yaavaraaya muteko woottottha ikuwo, akina yaavara ni maluku, ewooru naari ithaapwa. Yehova aahaakhavihera ana a Israeli oxuttera itthu sootheene saatthuneya weera epakiwe etapernaakulu.

Ana a Israeli yaapaka etapernaakulu hiihaale ntoko Yehova aarummaawe. Okhwipi wa vaate wa etapernaakulu, yaahikhalavo ebasiya emoha ya ekhoopiri, ni altaari mmoha mutokweene. Mpuwa, yaakhalamo ekuwo yootepa oreera yakawanya etapernaakulu mwa iparte piili. Eparte emoha yiitthaniwa yootteela, ni eparte ekina yiitthaniwa yootteelaxa. Mpuwa mwa ootteela, waakhalamo onyaari wa ewooru, mesa mamoha ni altaari mmoha. Ni mpuwa mwa ootteelaxa, yaakhalamo ekaaxa yeeyo yaapakinwe ni ithaapwa ni ewooru yeeyo yiitthaniwa nivuku na nivarihano. Nyuwo moosuwela nivuku na nivarihano ti heeni? Yoolaihera yoothanleya. Nivuku na nivarihano, naavareleya muteko weera ana a Israeli yuupuweleke weera yaalaihera weera yaahereke omukokhorela ni omwiiwelela paahi Yehova.

Yehova aahaathanla anamwane a Aharoni weera ekhale anamakeya. Awo yaatthuneya weera ekosoopeke etapernaakulu, ni soovaha atthu yanvahaaya Yehova. Yehova aamuthanla Aharoni weera akhale namakeya mutokweene. Owo paahi eera avoloweke wootteelaxa, ni vayaakhani ekwaha emoha. Moosuwela mwaha wa heeni? Weera avekeleke nlevelelo wa Yehova wa itthu soonanara owo, anamwane awe ni ana a Israeli yaapakaya.

Evinreene eyaakha emoha, etapernaakulu yaamala ana a Israeli ekhummeene wExipitu. Mweekhaikhai, awo yaakhalano nipuro weera emukokhoreleke Yehova. Iwe awosa yanniisoona weera Yehova aari naawosa.

Yehova aaheriha weera nihutte nimoha nikhumelele otapernaakulu. Emaara nihutte nne neemelaaya ana a Israeli yannavirelela okhalanipuro nne. Mene emaara naawelaaya, awo yannasuwela weerayaari ewoora yoovirelela weetta ekwaha. Nto awo yannateexa etapernaakulu ni yannatthara nihutte.