Anamahottela ephiyakaru oYerikho, awo yaahikhala empa ya muthiyana mmoha iitthaniwa Rahabi. Menento mwene oYerikho asuwelakaru eyo aahaaruma anakhotto orowa owannyawe Rahabi weera yaavare anamahottela ale. Anakhotto ephiyakaru, Rahabi aahaalela anamahottela ale weera yiipithe. Avinyaka, owo aahaalela anakhotto ale: ‘Anamahottela yaari vaava menento awo aapwaha. Mwaatthimakele! Apaale nyuwo munimwaaphwanya.’ Anakhotto ale epwahakaru, Rahabi aahaaleela anamahottela ale eeraka: ‘Miyo koosuwela weera Yehova ontthuna waavaha ana a Israeli esidade ya oYerikho. Menento miyo kintthuna wookhaviherani. Txontte mukilaihere weera munookivuluxa miyo ni amusi aka.’

Mene awo yaaheera: ‘Hiyo ninnalaihera weera ootheene enaakhale empa ela enoovuluxiwa. Nyuwo muntthuneya paahi otthukelela mukhoyi ola wooxera vaxanelani.’

Nto, anamahottela ale yaahivira vaxanelani ni yaahirowa wiipitha omwaako mpuwa mwa mahiku mararu. Ni yaahirowa okumana ni Yehoxuwa. Eyo yeereñye ana a Israeli elapuwakaru mooloko Yordani. Esidade ana a Israeli yaapatxenraaya otuphela yaari ya oYerikho. Yehova aahaaleela ana a Israeli weera etthimakeke erukureraka esidade ele vanihikuni omoha, awo yaatthuneya opaka ele mpuwa mwa mahiku 6. Nihiku nanaa 7, awo yaatthimaka erukureraka ikwaha 7. Anamakeya yannarumiha mapenka ni ana a Israeli yannakhuwela ni ikuru saya sootheene. Nto, ixiri sa oYerikho saamora! Ni empa ya Rahabi yeeyo yaakhala vasulu va exiri ya esidade, khayaamonre. Rahabi aamuroromela Yehova ni aapaka ele anamahottela yaamuleenlaaya, mwaha wa yeeyo owo ni amusi awe yaavuluwa.

Atthu ootheene oKanani yaasuwela etthu yeereñye oYerikho. Nto mamwene oKanani yaalakela owana ni ana a Israeli. Mene atthu a esidade ya oKanani yiitthaniwa aGibiyoni yaahilakela opaka etthu weera ekhaleke ntoko khaiyene ta oKanani. Mwaha wa yeeyo, awosa yaahaaruma alopwana akina owara ikuwo soothaala ni orowa wuuluma ni Yehoxuwa. Awosa yaaheera: ‘Hiyo na atthu a elapo yoorakamela. Hiyo noosuwela etthu Yehova oopakenlaaweni wExipitu ni oMowabi. Mwanilaiheraru weera khamunrowa onyaanya esidade ahu, hiyo nnoorowa ovaraka ntoko akaporo anyu.’

Yehoxuwa aahaaroromela awo ni aalaihera weera khaarowa waatuphela. Mene, evirakaru mahiku mararu, Yehoxuwa aahoonelela weera awo khaiyene yaari a nipuro noorakamela, mene awo yaari oKanani. Yehoxuwa aahaakoha atthu a oGibiyoni mwaha wa heeni awo yanwonkaaya. Awo yaamwaakhula: ‘Mwaha wooweera hiyo ninnoova. Hiyo noosuwela weera Yehova onimookhaviherani nyuwo okuxa elapo ya oKanani, txontte, muhiwiive atthu ahu!’ Nto Yehoxuwa aakwanihera ele aalaihenraawe ni aahaahiya atthu oGiboni weera ekhaleke.

Evinreene etempu vakhaani, mamwene a oKanani yaarowa owana ni Gibiyoni. Mwene Yehoxuwa ni atthu awe yaarowa waakhavihera atthu a oGibiyoni. Awo yaatthimaka ohiyu wootheene ni nihiku naattharelana ohinaakuve oxa yaahipatxera owana. Atthu a oKanani yaavalavela, enatthimakela mapuro ootheene. Nto Yehova aaheeriha waamorela maralala matokotoko. Nto, Yehoxuwa aanvekela Yehova weera eemexe nsuwa. Mene Yehoxuwa khaatonko woona nsuwa neemenleene. Mwaha wa heeni owo aaraaweno miruku soovekela eyo? Mwaha wooweera Yehoxuwa annamuroromela vantxipale Yehova. Nsuwa naaheemela nihiku nootheene nave khawiilale. Wiilale paahi ana a Israeli yaawinakaru mamwene ootheene a oKanani ni anakhotto aya.