Noovira etempu, ana a Israeli yaapatxera waakokhorela amuluku eethiru. Mwaha wa yeeyo, mpuwa mwa iyaakha 7, Yehova aahahiya atthu oMadiyani wiiya inama sa ana a Israeli, ni onyaanya imatta saya. Weera yaatthawe atthu oMadiyani, ana a Israeli yanniipitha munikhukuni ni mmiyaakoni. Awo yaavekela nikhavihero na Yehova. Vano Yehova aaruma nlaika nimoha, orowa wuuluma ni mmiravo mmoha iitthaniwa Gideyoni. Nlaika nne naahimme weera Yehova aamuthanla Gideyoni weera aavuluxe ana a Israeli. Gideyoni aakoha: ‘Miyo, moota heeni kinrowaaka opaka eyo? Miyo khaiyene etthu!’

Gideyoni aalakela opaka etthu, weera aroromele weera aari Yehova aamuthanlale. Nto owo aahela epetasu emoha ya mapururu a eputtiputthi vathi. Ni aavekela: ‘Yehova, omaalo oxeexelo mapururu ala a iputtiputthi, yanaana ni etthaya yuuma, miyo kinoosuwela weera nyuwo Pwiya muntthuna weera kaavuluxe ana a Israeli.’ Nihiku naattharelana, mapururu ale a iputtiputthi yaanaana, ni etthaya yaari yoowuuma. Gideyoni-tho aatthuna woona etthu ekina. Mwaha wa yeeyo, anvekela Yehova etthu ekina yoovirikana. Aavekela weera nihiku naattharelana, etthaya ekhale yoonaana ni mapururu a iputtiputthi ekhale oowuuma. Ni tiyeeyo yeereñye. Vano Gideyoni aaroromela weera aathanlinwe ni Yehova. Avinyaka owo aahathukumanya anakhotto awe ni aarowa owana ni atthu oMadiyani.

Yehova aamweerela Gideyoni: ‘Miyo kinimwaakhavihera ana a Israeli owina. Mene, nkintthuna weera awo yuupuweleke weera ewinne nihikhanle nikhavihero naka. Mwaha wa yeeyo mutthu aneera ooveke omuhiye atthikeke.’ Nto anakhotto 22.000 yaatthikela owaani. Mene yaahanle 10.000 paahi. Yehova aamweerela Gideyoni: ‘Nlelo wookhalano atthu antxipale. Waarume anakhotto awo weera yawure maahi omoolokoni. Ni waakuxere okhottoni paahi ale ewunre maahi yaawehawehaka amwiittani aya.’ Alopwana 300 paahi yaapanke eyo. Nto Yehova aaleihera ovarela muteko ekhurupu ele vakhaani weera yaawine anakhotto 135.000 oMadiyani.

Ohiyu ole, Yehova aamwerela Gideyoni weera ele yaari ewoora yoowatuphela atthu a oMadiyani. Gideyoni aawinnya anakhotto awe malope, ni miyaapu itokotoko ni mithuko mpuwa ni aawerela: ‘Nweheke etthu kinrowaaka opaka ni nyuwo mpakeke yeeyo.’ Gideyoni aarumiha nlope ni aapwexa mwaapu, ni aavenxa muthuko ni aakhuwela: ‘Ekatana ya Yehova ni ya Gideyoni!’ Alopwana ootheene 300 yaapaka etthu emoharu. Atthu oMadiyani yaahoova vantxipale ni yaatthawela mapuro ootheene. Variyari va onyakulihana yaapatxera owana yaaworu. Ekwaha ya naaveeli-tho Yehova aahaakhavihera ana a Israeli waawina amwiitthani aya.

Mulopwana mmoha iitthaniwa Elkana, anneetta ekwaha iyaakha sootheene ni emusi awe, weera yamukokhorele Yehova esidade ya oSilo. Weiwo yaarayawo etapernaakulu. Owo aarinono asithiyana eeli mmoha iitthaniwa Ana mukina eeriwa Penina. Elkana annamusivela vantxipale Ana. Penina aahaayara anamwane antxipale. Mene Ana khaakhanleno naari mmoha. Ni Penina annamuhasula mwaha wa yeeyo. Ekwaha emoha awosa ereene oSilo, Elkana aamoona Ana ariipinweene murima vantxipale. Owo aaxupeya ni aarowa wuuluma nuuwo, mene khaawera ommaaliha.

Noovira etempu, Ana aarowa ovekela. Owo anninla vantxipale ni aaheera: ‘Yehova, mwakivaha mwaana mmoha kinnoolaiherani weera kinoomukuxera otapernaakulu, ni owo onoorowa woovarelakani muteko ekumi awe yootheene.’

Namakeya mutokweene Eli khuupuwela weera Ana anvekela, nto uupuwela weera owo aaroohapaliwa. Ana aahuluma nuuwo: ‘Hooye pwiyaka, miyo nkihapalinwe. Miyo kinnahaawa vantxipale, mwaha wa yeeyo kiwiiyaaka wuuluma ni Yehova.’ Eli aahoona weera khaamuthorinhe nnene ni aahima weera Yehova aamunvaha Ana etthu aatthunaawe. Nto owo aatthikela owaani atteelinweene murima. Mene khayaavinre etempu yintxipale, Ana aakhalano mwaana iitthaniwa Samuweli. Owo aahakalala vantxipale, keera?

Neereke Ana aattiwala yoolaihera ampakenlaawe Yehova? Hooye! Vano Samuweli ahiyakaru waamwa, owo aamukuxera otapernaakulu. Amwiinyereraka Samuweli Eli. Ana aaheera: ‘Onnuupuwela weera kanvekela etthu Yehova? Owo ookiiwa ni ookivaha mwaana. Ola onrowa onvarelaka Yehova ekumi awe yootheene.’ Iyaakha sootheene Ana ni Elkana yannarowa omuxekura mwanaya, ni yannakuxa ikuwo inyowani weera yanvahe. Avinyaka Yehova aanvaha Ana, anamwane asilopwana araru ni asithiyana eeli.