Nvirelele Okhala Oomaaleleya ni Mmuroromeleke Yehova

1. Antoko mwene Davidi, ootheene ahu nniikoha eheeni?

Ootheene a hiyo, ninnatthuna ekumi yoomaaaleleya ni ya murettele. Mene khaavo ontthuna wiiniwa murima Mene emaara ekina pooti oviriha maxupo ni wiiniwa murima. Mwa yeeyo, ninnapaka makoho mamoharu mwene Davidi ampakelaawe Yehova, owo enre: “Yahvéh, munakittuwala mpaka lini vohihiyerereya?”—Nsal. 13:2.

2. Eheeni ninkela ahu woona yoosoma ahu ela?

² Mooripiha murima, hiyo khaninwera okhala moohixupeya mene nnoowera opaka ele ninwera ahu weera niwere wiithokorora. Yoosoma ela, ninkela woona itthu sintanyera maxupo. Navinya vaavo ninrowa woona itthu ithanu namosa, seiyo sinrowa onikhavihera okhala oomaaleleya naavirihaka maxupo.

ITTHU HEENI SINEERA SINIPAKIHEKE WIINIWA MURIMA?

3. Maxupo heeni ekela oonikhumelela? Neereke nnoowera ohiiha onikhumelela maxupo owo?

³ Itthu ikina sinniruuhela maxupo khaninwera omaliha. Mwa ntakihero, hiyo khaninwera omaliha epereso ya yootxa, naari soowara, naari-tho nipuro nookhala nave-tho hiyo khaninwera waahiiha asinthamwene ahu, ale ninvara naahu muteko naari ale ninsomana ahu exikola oneerera opaka itthu soonanara naari okonihana woohireerela. Nave hiyo khanniwera omaliha ikrime muttetthe ninkhalaahu. Itthu iya sinneereya mwaha wooweera elapo ninkhalaahu atthu antxipale khantthara miruku sa mBibyani. Satana muluku a vathi-va, oosuwela weera “maxupo a elapo ela” anoowootxeeliha antxipale a elapo ela omukokhorela Yehova. (Math. 13:22; 1 Yohani 5:19) Tiyeeyo nto elapo ela ekhanlaaya maxupo!

4. Itthu heeni sinnivalaveliha nuupuwelaka?

⁴ Oothene ahu nanyesereriwa vantxipale, ninnaxupeya tthiri. Mwa ntakihero hiyo tthiri pooti oxupeya mwaha woohikhalano musurukhu weera nithume itthu sinnithowa. Naari oniphwanya eretta eneera enootxeelihe ovara muteko ahu. Nave-tho pooti woova opaka etthu emmunanara Yehova. Ohiya eyo, Satana onimwaavarela muteko anamakhavihera awe weera yaatuphele atthu a Muluku, Hiyo pooti woova mwaha wa otuphela iwo ni moota nneera ahu nivirihe otuphela iho, nave hiyo pooti wiikoha ha: ‘Keereke tivoonanara okhala ooxupeya ni itthu iyo?’

5. Yesu aatthuna ohima eheeni ni masu ooweera: “Muhèteteye niwoko na ekumi anyu”?

⁵ Hiyo nooosuwela ele Yesu aalenlaawe atthareli awe: “Muhèteteye niwoko na ekumi anyu.” (Math. 6:25) Neereke Yesu aatthuna weera nihixupeyeke ni etthu eri poothe? Naari khaatthu ohima yeeyo! Arumeyi akhalayi oororomeleya a Yehova, yaavirihaka maxupo, yannixupeya nave naamwi vareene hiiho yannivirelela waakhuleliwa ni Yehova.b (1 Mam. 19:4; Nsal. 6:3) Mweekhaikhai, aamweera Yesu onimaaliha. Owo aatthuna weera nihikhaleke ooxupeyaxa vantxipalele mpakana ohiya onanariha onvarela wahu Yehova. Vano, itthu heeni nneera ahu nipake weera nihikhaleke ooxupeyaxa vantxipale?—Moone ekwaadru “Moota woopaka eyo.”

ITTHU ITHANU NAMOSA SINKELA ONIKHAVIHERA OKHALA OOMAALELEYA

6. Moovaarihana ni Afilipi 4:6, 7, eheeni enkela onimaaliha?

⁶ (1) Nvekeleke voohihiyerereya. Mwakala ooxupeyaxa, nvekeleke nikhavihero wa Yehova. (1 Ped. 5:7) Nyuwo munimwaakhela “murettele wa Muluku onipwaha nyuupuwelo sothene, [sa atthu]”. (Mmusome Afilipi 4:6, 7.) Avarelaka muteko munepa awe wootteela, Yehova onoonimaaliha.—Agal. 5:22.

7. Naavekelaka, nuupuweleke eheeni?

⁷ Mwaavekelaka, mmuleeleke Yehova itthu soothesene siri vamurimani vanyu. Muhimeke etthu enooxupani. Mmuleeleke owo maxupo anyu ni mmuleeleke etthu enweerani. Maxupo anyu yaahiwereyaka oreheriwa, mmuleeleke Yehova weera ookhavihereni, etthu yoopaka weera ookhavihereni ovarela muteko. Wakhala weera maxupo anyu khamunwera munene anyu, munvekele Yehova weera ookhavihereni nave woohikhala ooxupeya vantxipale ni etthu eyo. Nanvekelaka Yehova ni omuleela Yehova etthu enneera, ninnawera oweha waakhula wa Yehova. Wakhala weera Yehova onnapisa waakhula nivekelo nanyu, muhikhulumuwe, khontthuneya paahi omuleela Yehova itthu sinnixupa, owo ontthuna weera nnyeserereke onvekela.—Lu. 11:8-10.

8. Eheeni entthuneya ohela mpuwa naavekelaka vale?

⁸ Mwaaveleelaka wa yoowo soovalaveliha sanyu sootheene, ontthuneya ohela mpuwa omuxukurela nave onnitthuneya oxukurela itthu sooreera nraahunoo naamwi itthu sixumpe ene. Wakhala weera murima anyu woowiinani muhinoona etthu yoowuuluma, muupuweleke weera tho Yehova onniiwa mavekelo ookhuveya, mwa ntakihero, ‘Txonde mukikhavihere!’—2 Sow. 18:31; Arom. 8:26.

9. Ninkela ophwanya woowini ovareleleya weekhaikhai?

⁹ (2) Muroromeleke osuwela wa Yehova, ohiya wawinyu. Mahiku a mprofeti Yesaya, atthu oYuda yaamoopopihiwa ni Asiriya. Awo yaahoova vantxipale otupheliwa iwo mpaka ovekela nikhavihero o Xipitu. (Yes. 30:1, 2) Yehova aahaleela vahinaaye weera waaroromela atthu a weXipitu, yaamwaakhumelela erisa. (Yes. 30:7, 12, 13) Anvareleka muteko Yesaya, Yehova ahaaleela atthu oYuda woowiini yeeraaya ephwanye ovareleleya weekhaikhai. Owo aaharoromeliha: ‘Mwìtthuwa ni mwavirelela okhala oowiwelela, munolipa [miyo].’—Yes. 30:15b.

10. Emaara heeni nintthuneya ahu weera ninnimuroromela Yehova?

¹⁰ Ninkela woonihera hayi weera ninnimuroromela Yehova? Muupuwele matakihero vakhaani. Muupuwele ha, mwavahiwa muteko onakheliwa musurukhu mwintxipale, mene munkelaanyu oviriha ehuhu yintxipale nvaraka muteko, ni owootxeelihani ovara itthu ikina soomunepani. Naari muupuwele weera mutthu munvaranaanyu muteko onimootthunani nto khaiyono Namoona a Yehova ooBatiziwa, naari mmusi anyu onoosivelani vantxipale anooleelani masu ala: “Muntthuna okiiwelela miyo naari Muluku anyu.” Itthu iyo sookhumelela, yoothanla khenrowa okhweya. Mene nto, Yehova tonkela woovahani miruku muneera anyu mutthune. (Math. 6:33; 10:37; 1 Akor. 7:39) Nikoho tinna: Neereke munoomuroromela Yehova ni otthara miruku sawe?

11. Soolepa heeni siri mBiblyani, sineera sinikhavihere okhala oomaaleleya naamwi nisoonttiwaka?

¹¹ (3) Muxuttere ni matakihero ooreera ni oonanara. Biblya ookhalano soohima sintxipale sinoonihera otthuneya waya okhala oomaaleleya ni oororomeleya wa Yehova. Mwaasomaka sooweereya iya, moone moota arumeyi akhalayi yaawenraaya okhala oomaaleleya ni oororomeleya naamwi yaaviriha maxupo mantxipale. Mwa ntakihero, vaavo anamalamulela oYudeya yaawerenlaaya oohusera a Yesu weera ehiyerere olaleera, awo khayoonve. Moolipa murima awo yenre: “Entthuneyaxa omwìwelela Muluku wàpwaha atthu.” (Miteko 5:29) Naamwi yaawaxulinwene, oohusera khiyaakhanle oowoovaxa. Mwaha wa heeni oohusera yahaakhanlaaya oowoovaxa? Mwaha weera yaasuwela weera Yehova aamwaakhavihera ni yaahakalala mwaha woothanla omwiiwelela Yehova. Mwaha wa yeeyo, awo yaavirelela olaleya mitthenka sooreera. (Miteko 5:40-42) Ntakihero nikina nooreera naari na mutthareli Stefano. Ahalelaka wiiviwa, Stefano aavirelela okhala oomaaleleya owiithowawe aakhala ntoko “ekhove ya ntxelo”. (Miteko 6:12-15) Mwaha wa heeni? Mwaha wooweera, aasuwela weera etthu aapankaawe yaamusivela Yehova.

12. Moovarihana ni 1 Pedru 3:14 ni 4:14, mwaha wa heeni nneera ahu nihakalaleke naamwi nsonttiwaka?

¹² Oohusera a Yesu yanniroromela weera Yehova aari vakhiviru vaya. Ni atthareli ale yaavahiwa ni Muluku owera woopaka miiriira. (Miteko 5:12-16; 6:8) Olelo va khasaavo miiriira. Moorweela wa mBiblyani, Yehova onnaniroromeliha weera, naahasuliwaka mwaha woopaka exariya, owo onnihakalala mwaha woororomelelya wahu ni onninivaha munepa awe wootteela. (Mmusome 1 Pedru 3:14; 4:14.) Mwa yeeyo, muhixupeyeke muupuwelaka etthu munkelaanyu opaka yoohooxa etokwene yapatxera. Opwaha mwa yeeyo, mpakeke etthu munweraanyu vaanaano vaava, weera nvirelele okhala oororomeleya wa Yehova ni ororomela weera, owo onoonivuluxa . Sintoko atthareli ale a Yesu, onnitthuneya omuroromela natiri ommannaaiye Yseu: “Mweekhaikhai miyo kinimovahani eyano ni miruku, seiyo amwittan’anyu othene ahinaweryaya opwaha nari ovanya.” Nave tho aaroromeliha: “Movilelani mwanyu muni nvuluxe ekum’anyu.” (Lu. 21:12-19) Muhittiwale weera naari kaporo oororomeleya a Yehova akhwaaka, Yehova onnamuupuwela mutthu owo ni ononvinyereriha.

13. Ninxuttera eheeni wa atthu yaale yahaavirelenle okhala oomaaleleya ni omuroromela Yehova?

¹³ Hiyo tho pooti oxuttera itthu ni yaale yahaawenre otthara miruku sookhala oomaaleleya ni omuroromela Yehova. Osoma matakihero awo, enoonikhavihera osempa opaka itthu imohamoharu soonanara yaapankaaya. Mwa ntakihero, woopatxerani wa omwene wa Asa, anakhotto antxipale yaarowa owana ni aYuda. Asa aamuroromela Yehova, nave Yehova aamukhavihera owera ekhotto ele. (2 Sow. 14:9-12) Voottharelana mwene Bayexa aamoopopiha Yuda, naanakhotto vakhaaneene. Mene ohiya omuroromela Yehova ntoko aapankaawe woopatxerani, Asa ahaaliva anakhotto a wAsiriya weera emukhavihere. (2 Sow. 16:1-3) Nave vaavo avoreiwalaawe vantxipale, Asa khavekenle nikhavihero wa Yehova.—2 Sow. 16:12.

14. Ninxuttera eheeni mwaha wa wiiroromela wa Asa?

¹⁴ Voopatxerani, Asa yamphwanyaka maxupo, anaasaasa nikhavihero wa Yehova. Mene othanathanru aapatxera wiisaasera nikhavihero. Voopatxerani, plano onvekala nikhavihero wa aSiriya waakhala ntoko aamukhumelela nnene. Mene yookhumelela aya khiyaaronwe ottayi. Moorweela mwa mprofeti, Yehova aamuleela Asa: “Wòhìphitera ni mwene w’Arami, omuhiyaka Yahvéh Muluku á: tivo anakhotto amwene a w’Arami yatthanwaya mmatatani mwá.” (2 Sow. 16:7) Nihiyo tho, onnitthuneya weera ntxentxere weera niheerereke weera nimalihe maxupo meekhiihu, nihiyaka otthara miruku onnivahaawe Yehova siri mBiblyani. Mene onnitthuneya otthara miruku siri mBiblyani naamwi ntthunaka opaka soothanla moowaakuveya, okhala oomaaleleya ni omuroromela Yehova, ni onimookhaviherani.

15. Nipakeke eheeni naamusomaka vale Biblya?

¹⁵ (4) Muheleke mmuru soolepa sa mBblyani. Mwaamusomaka Biblya, nyuwo munkela oxuttera ele eri yootthuneya okhala oomaaleleya ni oomuroromela Yehova. Mweerereke ohela mmuru soolepa. Onnitthuneya osoma ni masu amusulu olepa ni ohela nipuro munviraviraanyu veeli-veeli. Yehova aamuleela Yehoxuwa weera amusomeke buukhu amalamulo vathi-vathi woohihiyerera. (Yoh. 1:8, 9) Eyo yammukhavihera ohiya paahi opaka itthu mwa miruku, mene tho ovenxa woova mwaha wa muritti aakhenlaawe. Emohamoharu, soolepa sintxi sa mBiblyani sinimookhaviherani okhala oomaaleleya ni itthu soovahani wiiniwa murima ni woova.—Nsal. 27:1-3; Mir. 3:25, 26.

16. Yehova onaavarihela hayi asinna a mmulokoni, weera anikhavihere okhala oomaaleleya ni omurorormela yoowo?

¹⁶ (5) Nvirelele waataana ni muloko wa Muluku. Weera niwere okhala oomaaleleya ni omuroromela Yehova, owo onnaavarihela muteko asinna. Mmithukumanoni mwahu, ninnalipihiwa ni inyaha sinuulummwa, moorweela mwa ikomentaariyu ni otthekula ninkhalanaahu ni asinna ni arokora. (Aheb. 10:24, 25) Opwaha mwa yeeyo, etthu ekina eneera enikhavihere, ori omuleela mukhwiihu oororomeleya a mmulokoni itthu sinnivalaveliha. “Nsu nosiva” na nthamwene, ninnavukula soovalaveliha sahu.—Mir. 12:25.

17. Moovarihana ni Aheberi 6:19, yooweherera ya Omwene ennikhaliha eriyariru moota heeni naavirihaka maxupo?

¹⁷ (6) Mulipihe yooweherera anyu. Yooweherera ahu ya Omwene wa Muluku enkhala ntoko “nankura òlipa a ekumi”. Nroromelo ninnanivaha okhala eeriyariru naavirihaka maxupo ni wiiniwa murima. (Mmusome Aheberi 6:19) Vano onnitthuneya weera nuupuweleleke soolaihera sa Yehova seiyo onkelaawe opaka muhoolo, vaavo muupuwelo ootheene woonanara enkelaaya omala. (Yes. 65:17) Mwiixuupuweleleke mureene elapo enyowani yeeyo enkela okhala yoomaaleleya, elapo eyo ehinkela okhala etthu yookattamiha. (Mik. 4:4) Nyuwo tho pooti olipiha yooweherera anyu muulumaka eyo ni akina. Mpake ele munwera anyu weera mulaleyeke ni waapaka atthareli. Mweera haawo, nyuwo munkela okhalano “yooweherera yoolipa mpaka omamaliheroni”.—Aheb. 6:11

18. Itthu heeni sinkela weereya muhoolo, nave nintthuneya ahu opaka?

¹⁸ Vaavo elapo ela enkelaaya omamaliheroni, veeli-veeli nnahala ovirihaka maxupo eneera enivaheke wiiniwa murima. Yoolepa ya eyaakha ya 2021 enoonikhavihera ovilela maxupo ene yaawo ni okhala oomaaleleya, ohiya ororomela ikuru sahu, mene nroromela ikuru sa Yehova. Mpuwa mwa eyaakha ela, moonihere ni ikuru sanyu sootheene mpaka okhwipi, weera mookhalano nroromelo wa itthu seiyo Yehova olaihenraawe: ‘Mwìtthuwa ni mwavirelela okhala oowiwelela, munolipa.’—Yes. 30:15.