Kwaarta mmoha aakhala mukristu

Esidade ya oFilipi, aakhalawo mwali mmoha yoowo aalamuleliwa ni munepa woonanara. Munepa ole woonanara, wannamweeriha mwali ole owera ohima itthu sa muhoolo, ni asipwiyawe yannaphwanya musurukhu mwaha wa etthu eyo. Emaara Paulo ni Sila yaaronwaaya oFilipi, mahiku mantxipale owo annaatthara muttuli akhuwelaka: “Atthu ala ari akaporo a Muluku Namusulú.” Nto, Paulo aaheerela munepa ole woonanara: ‘Mwa nsina na Yesu, omukhume mwali owo!’ Emaara ene yeele, munepa woonanara ole waamuhiya mwali.

Emaara asipwiyawe yonnaaya weera khiyaarowa ophwanyaka musurukhu ni mwali ole, awo yaanyoonyiwa vantxipale. Awo yaahinvara Paulo ni Sila enaapurula mpaka wa anamalamulela aya, ni yaaheera: ‘Asilopwana ala ennavaanyiha nlamulo, ni ennakumihera munyakunyaku esidade yootheene!’ Anamalamulela yaaruma weera Paulo ni Sila emaniwe ni ewaleliwe mukateya. Kwaarta a okateya aamuhela Paulo ni Sila mukateya ya epiphi ni yoowiipithiheya, ni aatthukelela metto saya vamwirini.

Paulo ni Sila yaapatxera omwiipela itxipo Yehova, ni maperesu makina yanniiwa. Mootutuxera, ohiyu eriyari yaakhumelela etetere etokweene yeeyo yaattikinnye ekateya yootheene. Milako sootheene sa ekateya saahuleya, ni ikorenti sootheene sa ale yaatthukinwe, saataphuwa. Kwaarta a okateya aatthimaka ni aahoona weera milako sootheene sa ekateya saahuleya. Uupuwelaka weera maperesu ootheene yaatthukinwe yaatthawa, aakuxa ekatana awe weera iisiive.

Emaara ene yeele, Paulo aakhuwela: ‘Ohiisiive! Ootheene nri muumu!’ Kwaarta ole aatthimaka mpaka yaaraayavo Paulo ni Sila ni aakokhora ohoolo wayasa. Avinyaka, aahaakoha: “Asipwiya, kariki kivuluxiwe, kère xeni?” Awosa yaamwaakhula: ‘Weyo ni emusi aa, muntthuneya omuroromela Yesu.’ Nto Paulo ni Sila yaamulaleera kwaarta ole, ni owo vamoha ni emusi awe yaakhala akristu.