Mukhale mutthu oororomeleya

Atthu ootheene annaatthuna atthu oororomeleya. Yehova tho onaatthuna atthu hiiho. Mene okhala mutthu oororomeleya elapo ela esareñyaaya atthu oohiroromeleya khahiyono wookhweya. Mene nnamweera vareene hiiho, mwaha wa heeni oraaya wootthuneya okhala oororomeleya?

1. Mathowa heeni anneeriha okhala oororomeleya?

Vaavo ninroromeleyaahu ninnoonihera weera ninnamusivela Yehova ni omuttittimiha. Nuupuweleleke ela: Yehova oosuwela sootheene nnuupuwelaahu ni nimpakaahu. (Aheberi 4:13) Owo onnoona vaavo ninthanlaahu okhala oororomeleya. Masu awe aneera: “Yahvéh onnamuthanya mutakhali, vahera onthamwen’awe ti wa anaxariya.”—Miruku 3:32.

2. Moota heeni nneeraahu nikhaleke oororomeleya mahuku ootheene?

Yehova ontthuna weera vaavo nnuulumaahu ni ‘atthu akina nihimeke ekhaikhai.’ (Zakariya 8:16, 17) Eyo entaphulela heeni? Eyo entaphulela weera khanintthuneya wootha vaavo nnuulumaahu ni amusi ahu, ale ninvaraahuno muteko, asinna a mmulokoni naari anamalamulela. Mutthu oororomeleya khaniiya naari khanwaapa atthu akina. (Musome Miruku 24:28 ni Aefeso 4:28.) Mutthu oororomeleya onnaliva misonkho sootheene. (Aroma 13:5-7) Naari neere hiyo ninnaroromeleya ni ‘mikhalelo sahu sootheene.’—Aheberi 13:18.

3. Mwaha wa heeni oraaya wootthuneya okhala oororomeleya?

Wakhala weera nnookhalano mukhalelo wootthuna okhala oororomeleya, atthu eneereke onroromela. Mwa yeeyo, nnookhavihera okhala murettele mmulokoni ni okhala oororomeleya, ntoko emusi yeekhaikhai. Ohiya eyo-tho, nnookhalano yoosuweliha ya murima yooreera. Ororomeleya wahu pooti tho weeriha “nihusiho na Muluku, Nvulux’ahu, nittittimihiwe,” eyo pooti waapakiha atthu akina otthuna ooxuttera voohima sa Yehova.—Tito 2:10.

WEERA MUXUTTERE SINTXIPALE

4. Ororomeleya onnamusivela Yehova

Musome Nsalmu 44:21 ni Malakhiya 3:16. Avinyaka mutthekule ni ipontu sinttharelana:

• Mwa moonelo anyu mwaha wa heeni nihintthuneyaahu wuupuwela weera nnoovitha etthu vamaithoni va Yehova?

• Moota heeni Yehova onoonelaawe vaavo ninthanlaahu wuuluma ekhaikhai, naari opaka eyo ohikhanle wookhweya?

5. Muroromeleyeke mwa itthu sootheene

EVIIDIYU: Etthu heeni enniphwanyiha ohakalala?—Yoosuweliha ya murima yooreera (2:32)

Mmusome Aheberi 13:18. Avinyaka mutthekule voohima sa moota wookhala oororomeleya . . .

• vatthokoni vahu.

• omutekoni naari oxikola.

• mikhalelo mikina.

6. Naaroromeleyaka nnookhala nnene

Ekhaikhai weera ororomeleya pooti oruuhela maxupo. Nnaamweera ekumiheraka maxupo, etthu yooreera opaka. Musome Nsalmu 34:12-16. Avinyaka mutthekule ni epontu enttharelana:

• Moota heeni ororomeleya oneeraaya oreherere okumi anyu?

1. Alopwana ni athiyana oororomeleya annaliphiha ntheli naya

2. Anamuteko oororomeleya annaroromeliwa ni mapatrawu aya

3. Atthu oororomeleya annattittimihiwa ni anamalamulela

NYAHA SOOTTHUNEYA

Yehova ontthuna weera asinthamwene awe ekhaleke oororomeleya mwa itthu sootheene anhimaaya ni ampakaaya.

Wuuluula

• Mwa itthu heeni nintthuneyaahu okhala oororomeleya?

• Mwaha wa heeni nihintthuneyaahu wuupuwelaka weera nnoowera wiipithiha etthu vamaithoni va Yehova?

• Mwaha wa heeni nyuwo muntthuneyaanyu ororomeleya mwa sootheene?

WEERA MUSUWELE ITTHU SINTXIPALE

Moota heeni asitiithi enkelaaya waaxuttiha anamwanaaya okhala oororomeleya?

Muulumeke ekhaikhai (1:44)

Mwaha wa heeni oraaya wootthuneya okwanihera etthu nlaihenraahu?

Mukwanihere soolaihera sanyu ni mureelihiwe (9:09)

Moone mwaha wa heeni nintthuneyaahu olivaka musonkho nnaamweera ohivariheliwaka muteko wooreera.

“Nyuwo munnatthuneya oliva musonkho?” (A Sentinela, 1.º a Setembro a 2011)

Eheeni yaamweerinhe mulopwana mmoha oohiroromeleya otxentxa mukhalelo awe mweekumini mwawe?

“Kooxuttera weera Yehova ta ikharari ni toolevelela” (A Sentinela, 1.º a Maio a 2015)