SOOWEEREYA SA MWEEKUMINI
Yehova oheettiha mavalu aka
WAARI OXEEXELO noopaka nsuwa eyaakha ya 1984, ehuhu ele miyo khaakhala empa yooreera muttetthe mmoha woottittimiheya oCaracas, oVenezuela. Emaara kaarowaaka omutekoni waka, kaapatxera wuupuwelela voohima sa mwaha kaasommaaka mwa Sentinela akumiheriwe vaananoru. A Sentinela owo, aahima moota ale nattamannahuno annoonelaaya. Kiwehaka ipa sa ale kaattamannaakano, kaapatxera wuupuwela: ‘ale kattamannaakano ankonela hayi? Ankonela ntoko namuteko onvara oBanku? Naari ntoko murumeyi a Yehova onvara muteko oBanku weera atxihe emusi awe?’ Waakhula waari woowooneya, ni miyo nkaasiveliwe ni waakhula waka. Nto kahuupuwela ontxentxa mavalu aka.
Miyo kiyariwe 19 a Maio eyaakha ya 1940, ecidade enitthaniwa Amioûn, oLíbano. Sivinreene iyaakha vakhaaneene, hiyo naathamela ecidade ya Trípoli. Miyo kihuuwale ni emusi ya nsivelo ni yaamukokhorela Yehova. Miyo kaari oomalihera wa anamwane athanu. Yaari asithiyana 3 ni alopwana 2. Asitithaka khayaahela nipuro noopatxera waasa musurukhu. Etthu naahelaahu nipuro noopatxera mweekumini, waari omusoma Biblya, woonela mithukumano ni olaleya mitthenka sooreera.
Muloko nathukumanaahu yaakhala asinna antxipale oothanliwa, mmoha a yaawo aari Michel Aboud. Aari munneene yoowo ahoolela ele nitthanaahu okhala yoosoma ya ebuukhu. Munna Michel aaxuttenre ekhaikhai oNova York, ni tophihale ekhaikhai oLíbano mwa iyaakha sa 1920. Muhoolo mwaya muloko ahu waakhalano eparakha yoowakhela asirokora eeli asimwali yaasomihiwe oGiladi, Anne e Gwen Beavor. Miyo kinnuupuwela moota munna Michel aakasoopaawe ninttittimiho ni moota ivahereraawe weera aakhavihere. Asimwali ale yaakhala asinthamwenaahu. Evinrene ehuhu, kahakalala okumana veeli ni Anne wEstados Unidos. Ni okumana tho ni Gwen oLondres weiwo avarawewo muteko wa oBetheli ni aiyawe Wilfred Gooch.
NLALEYAKA OLIBANO
Emaara karaka mmiravo, oLibano yaariwo Anamoona a Yehova vakhaaneene. Nto nannilipihera olaleera. Ehuhu eri poothe nannuuluma voohima sa Biblya ni atthu akina naamwi nasondiwa ni ahooleli a ittiini. Miyo kininuupuwela itthu ikina saneerenle.
Nihiku nimoha miyo ni murokoraka Sana namulaleera eprediyu emoha. Padre mmoha ahoowa mpaka nipuro nalaleeraahu. Oweharu okhala amuleenle weera hiyo namulaleera. Padre aapatxera onveha murokoraka, nto owo ari ni owali mpaka omukakhela murokoraka exikata ya vathi, ni owo avoreeya. Nrene vaalale ookhala alikarenle mapoliisiya. Mapoliisiya ephiyakaru, awo yaavekela weera akasoopiwe nnene Sana, ni yamukuxa padre emuroihaka opoliisiya. Ephiyakaru, mapoliisiya yaamoonelela weera Padre ole okhalano kapwitthi. Nto chefi amukoha Padre ole, “weyo wa muhooleli egreja naari wa muhooleli a mapantitu?”
Miyo tho kinnuupuwelela ekwaha emoha nentthaahu nirowaka olaleera. Muloko ahu wamwalukari maxibombo weera Nrowe ecidade yoorakamelana ni muttetthe nakhalaahu. Itthu sannetta nnene nto padre mmoha a ecidade ele asuwelakaru weera hiyo namulaleera, owo ahawopa atthu weera enimane enivonyaka maluku. Apapaka yaavulala mpuwa mwa munyakunyaku ole. Kinnawuupuwela awo ereene ephomeru owiitho. Awo yanwela maxibombo ni amaaye, ni asinna akina yaapaka emuha-muharu. Miyo kaahoona etthu kinhinrowaka ottiwala. Emaara amaaye yaapuputthaaya owiitho waapapa, awo yenre “Yehova mwalevelele atthu ala, khansuwela ampakaaya.”
Nave yaakhala ekwaha naronwaahu wa xekura amusi ahu elapo ahu. Niphiyakaru waavovo namphwanya muhooleli a ettiini oottittimihiwaxa bispu. Nto bispu ole asuwela weera asitithaka yaari Anamoona a Yehova. Naamwi kaarino iyaakha 6 owo akiwehexexa ni anakikoha: “we heeni ohibatizinwaawe?” Miyo kahakhula: “ninlelo miyo ka mwaana weera kibatiziwe, ontthuneya toko asuwela ikhaikhai sa mBiblyani ni okhalano nroromelo noolipa.” Bispu ole khawamusivenle waakhula waka. Owo ahaleela avovo aka weera musulwaanyu okakhula onyala.
Moohakalaliha ti wooweera sookumanano ntoko iya, khasaatta. Atthu olibanês tootheleyano ni toowakhela aletto. Ikwaha sintxipale nannatthekula ni atthu voohima sa nyaha sa mBiblyani ni nannapakiha soosoma sa Biblya.
NAATHAAMELA ELAPO EKINA
Ninlelo miyo kisomaka, munna mmoha mmiravo oVenezuela ahoowa oxekura oLíbano. Owo oonela mithukumano muloko ahu, vahoolo vaya aamuttomera murokoraka Wafa ni moottharelana, yaathelana enarowa okhala oVenezuela. Wafa annankheliwa ni hiyo mwaha wa yeeyo, ikarta alepaawe annonihera weera atthuna weera amusi ootheene ethamele oVenezuela. Muhoolo mwaya yahereya etthu owo atthunaawe. Hiyo naathamela ovenezuela!
Naaphiya oVenezuela eyaakha 1953, ni naakhala oCaracas, watthamela empa ya presidente. Okhala weera kaari mmiravo, wannakisivela omoona presidente aviraka ni ikaaro sawe sa musurukhu. Mene wahaavila asipapaka okhovelela elapo ele, nuulumo, sookhovelela, yootxa ni makhalelo a elapo. Nto “epatxeraka okhovelela elapo ele”, yookhala etthu yooripiha murima yaakhumelenle.
Moono woothiya okelaka moono woolopwana: Apapaka. Ameyaka. Miyo eyaakha ya 1953 emaara amusi aka yaathamenlaya oVenezuela.
YAANIPWANYA ETTHU YOORIPIHA MURIMA
Apaapa yaapatxera ohoona nnene mweerutthuni. Nto natikhiniheya mwaha wooweera, apaapa yaari mutthu a ikuru ni yaakhala ntoko yaakhalano ekumi yooreera. Naari keere há, nkintoko owoona evoreiwaka. Nto awo yaaphwanyiwano eretta ya câncer no pâncreas ni waatthuneya wooperariwa. Mooripiha murima, mwa isemana vakaani awo yahookhwa.
Onnaxupa ohima moota naaripiwahu murima, miyo kaarino iyaakha 13. Naavalavela, waakhala ntoko elapo yaronimaleela. Mwa ehuhu yintxipale amaaye wannavila waakhulela weera apaapa ahookhwa. Mene naahonelela weera mwannatthuneya orowa vahoolo, nnikhavihero na Yehova naawera oviriha ehuhu ele yooxupa. Kikwanihakaru iyaakha 16 kaamwera kurso médio oCaracas. Miyo kannatthuna vantxipale okhavihera emusi aka.
Murokoraka Sara ni aiyawe, Rubén, yaakikhavihera wunnuwa moomunepani
Mwa ehuhu eyo ya vakhaani, murokoraka Sana atheliewa ni Rubén Araujo, asomme exikola ya oGiladi ni vahoolo vaya atthikenle oVenezuela. Awo saya yaalakela okhala oNova York. Amusi aka yaalakela weera miyo kamusomeke universidade oNova York, nto kaarowa okhala ni amaana ni akunyado. Awo yaakikhavihera wuunnuwa waka wa omunepani. Opwaha wa yeeyo, hiyo nathukumana muloko wuuluma espanhola Brooklyn. Ni muloko ahu yaakhala asinna yaarino sookumanano sintxipale. Kaakhalano eparakha yoowaasuwela asinna eeli yaavara muteko eBetheli ya oBrooklyn, munna Milton Rangel ni Frederico Francis.
OBatiziwawaka eyaakha ya 1957
Ehalelaka omala eyaakha yoopatxera ya kurso aka ya universidade oNova York, miyo kaapatxera ohovela etthu kaapakaaka mweekumini mwaka. Miyo kaamusoma A Sentinela aahima sa moota wookhalano soolukama sa omunepani, ni kahuupuwelela mwaha owo. Emaara kawoonaka mapiyoneiru ni mabetelita a muloko aka, kanniwera owoona moota yaahakalalaya. Ni miyo kaatthuna okhala ntoko yaawo. Mene miyo nkaabatiziwe. Nto miyo kahoonelela weera wannatthuneya oveleela ekumi aka wa Yehova. Ti yeeyo miyo kaapankaaka, nihiku na 30 a Março eyaakha ya 1957, miyo kaathanla oBatiziwa.
SOOTHANLA SOOTTHUNEYA
Kibatiziwakaru, kannupuwela opaka yoothanla ekina yootthuneya,—okela muteko wa ehuhu yootheene. Yootthunaaka yookhala pioneiru yannannuwa, nto kahoona wi weera kikwanihere yootthunaaka ele khawaarowa okhala wookhweya. Kaarowa owera hayi muteko wa opiyoneiru ni kurso aka ya universidade? Kaharumihela ikarta sintxipale amaaye, kaaleelaka weera kaatthuna omuhiya kurso weera kakhale piyoneiru oVenezuela.
Kaatthikela oCaracas mweeri wa Junho eyaakha ya 1957. Mene wannoneya weera mukhalelo wa amusi khawakhanle nnene. Wannatthuneya mutthu a veemusini ovara muteko. Miyo kaarowa okhavihera hayi? Miyo kawompwa orowa ovara muteko oBanku, mene miyo yootthunaaka yaari yookhala piyoneiru. Mwaha wooweera, yaari yeeyo yaakerinhe otthikela oVenezuela. Nto khathanla ovara miteko soomiili. Mwa iyaakha sintxipale kaavara muteko oBanku ni muteko wa opiyoneiru. Ehuhu ele yaari yootthimaka-tthimaka mene tho yookalaliha!
Etthu yaatxerenre ohakalala waka waari ehuhu kamusuwenlaka murokora ooreera Sylvia, aari a elapo ya wAlemanha amusivela vantxi Yehova. Owo aathamenle oVenezuela ni asitithawe. Hiyo naathelana ni naahayara anamwane eeli, Michel (Mike) ni Samira. Nave wannatthuneya waakosoopa amaaye, ni yaapatxera okhala ni hiyo. Mwaha wa miritti saka sa vatthokoni, kaahiya muteko wa opiyoneiru. Mene kaakhalano yootthuna ya ovara muteko wa ehuhu yootheene. Ehuhu ya iferia miyo ni Sylvia nannakhala mapiyoneiru ookhavihera.
NIVALU NIKINA NOOTTHUNEYA
Anamwane aka yeera ere oxikola yaakhumelenlaaya ele kihimmaka woopatxerani. Kinnakhulela weera ekumi aka yaari yooreera. Miyo kaakhalano mukhalelo wooreera ni atthu kaavaraakano muteko oBanku. Naamwi vareene hiiho, etthu kaatthunaaka waari weera atthu ekooneke ntoko murumeyi a Yehova. Etthu ele kuupuwelaka khayaakimalenle, nto miyo ni amwaraka naakilathi weera nivaanele voohima sa musurukhu. Waakhanle weera miyo kaamuhiya ovara muteko oBanku, kahereke ovirelela waakhela musurukhu woowaatta. Woona wi khanaakomphe, wanwereya otxentxa ekumi ahu ni okhalano musurukhu waniphiyera.
Waari wooxupa opaka matxentxo ale, mene amwaraka ni amaaye yaakihavihera. Matxentxo ala kapankaaka kanwera otthikela muteko wa ehuhu yootheene, kihimmaka woopatxerani! Itthu nawehereraahu sa muhoolo saari sooreera. Nto moohipisa naasuwela etthu nahawehereraahu.
YOOTUTUXERA YOOREERA!
Mwanihu anaararu, Gabriel, yaari yoovaha yooreera wa hiyo
Nihiku nimoha, meediko ahu aanileela weera Sylvia oorupala. Yaari yootutuxera wa hiyo atthu eeli, nto nahakalala. Naari vaari hiiho, kannuupuwela mavalu kapankaaka—yootthikela muteko wa opiyoneiru. Neereke kanvirelela ovara muteko wa ehuhu yootheene? Hiyo nahakhulela yootutuxera ele, ni nannanwehera omwaakhela mwanihu. Ankha voohima sa apalano aka ookhala piyoneiru?
Nivaanelakaru voohima sa soolukama sahu, naalakela omuhiya palano ahu oopatxera. Mwanihu Gabriel oyariwe mweeri wa Abril eyaakha ya 1985. Eyaakheene yeele, kaahiya muteko woovara oBanku, kinavara muteko wa opiyoneiru. Muhoolo mwaya, kaavahiwa eparakha ya okhala mmoha a ekomisau ya eFiliyaale. Okhala weera eBetheli khayaakhala oCaracas, miyo kaatthuneya weetta ikwaha piili naari tthaaru vasemanani. Nto weera kiphiyewo waatthuneya weetta ikilometru 80.
OTHAAMA OKINA
Ecidade ya La Victoria yaaraayawo eBetheli. Vano weera nikhuvele eBetheli, naathamela ecidade ele. Nlo tho naari nivalo nikina wa hiyo. Miyo nkimasu, a moota woowaxukurela amusi aka mwaha wookikhavihera miyo. Murokoraka Baha ahivaherera waakasoopa amaaye. Mike aathela, Samira ni Gabriel yeera nnelo ekhalaka ni hiiyo. Nto othamela oLa Victoria wataphulela waahiiya otthuli asinthamwene aya. Opwaha wa yeeyo, mwaraka kaamusivelaka Sylvia aakhovelela okhala okapital. Waatthuneya wiikhoveleliha ecidade ekhaanene. Ni oothene hiyo watthuneya wiikhoveleliha okhala empa ekhaanene. Moohihovela othamenla ecidade ya oLa Victoria waatthuneya wiilipihera.
Nto itthu saatxentxeya tho veeli. Mwanihu Gabriel aathela ni Samira ahunnuwa vawereyaawe weera akhaleke meekhaawe. Nto miyo ni Sylvia nawompwa weera neereleke empari emusi ya oBetheli eyaakha ya 2007 ni tiweiwo nrahuwo mpaka olelo. Mwanihu oopatxera Mike mutokweene ni onnavara muteko wa opiyoneiru vamoha ni amwariye aneeriwa Monica. Gabriel mutokweene tho ni owo onkhala wItália ni amwaariye aneeriwa Ambra. Samira khanvara paahi mutekoru wa opiyoneira, owo onnakhavihera muteko wa oBetheli.
Moono woothiyana orowaka moono woolopwana: Kireene ni amwaaraka, Sylvia, eBetheli ya oVenezuela. Mwanihu oopatxera Mike, areene ni amwaariye Monica. Mwanihu Samira. Mwanihu Gabriel, areene ni amwariye Ambra
VAAWEREYA KAAMUTTHIKELA
Mwekumini mwaka koopaka matxentxo mantxipale. Mene nkinoona weera koolusa etthu. Vawereya kaamutthikela opaka veeli matxentxo ale kipankaaka. Miyo kinneera asantte vantxipale mwaha wa iparakha ni soothanleliwa saka kaakhenlaaka mmutekoni mwa Yehova. Moovirani iyaakha, kohoona weera etthu yootepa otthuneya ori okhalano onthamwene woolipa ni Yehova. Ni waatthuneyaka opaka soothanla, ikhale ikhaani naari itokweene Yehova onoowera onivaha murettele “ompwaha myupuwelo sothene”. (Afil. 4:6, 7) Sylvia ni miyo onnanisivela ovara muteko wa oBetheli. Nave ninnaroromela weera Yehova oonireeliha ni oonikhavihera ni matxentxo ootheene nipankaahu.