Neereke nyuwo muri oolikaneene weera “muhiyeriwe elapo”?
NINNOONA opisa okwanela masu a Yesu eri va Matheyo 5:5 “Òreriwa òpixa murima, niwoko enehiyeriwe elapo.” Othanliwa eneehiyeriwe elapo vaavo enrowaaya okhala mamwene ni Yesu wiirimu. (Apok. 5:10; 20:6) Mene akristu antxipale anrowa ohiyeriwa elapo ela weera ekhaleke mahiku ootheene vaavo enrowaaya okhala oomalela ni murettele ni ohakalala. Weera eyo yeereye moomalela awosa enookhalano muteko muntxipale weera evare. Nroowe noone matakihero mararu: Otatuxa elapo okhala eparadiso, waakosoopa ni waaxuttiha alipa oovinyererihiwa. Muupuwele moota nyuwo muneeraanyu moonihereke viinaano vaava weera munnatthuna okhavihera miteko iyo mparadiso.
NYUWO MURI OOLIKANEENE WEERA MUTATUXE ELAPO OKHALA EPARADISO?
Vaavo Yehova amulamulenlaawe Adamu weera “musarihe elapo ni mulamuleleke,” vanooneya weera vakhaani-vakhaani elapo yootheene yaamuthatuwa eparadiso. (Eph. 1:28) Nto ale enrowa ohiyeriwa elapo ela enatthuneyeke wiiwilela nlamulo nene nenna. Okhala weera eJardim ya wEdeni khekhanle tho — hiyo ninrowa opatxeriha sootheene inyowani. Noovira Harmagedoni hiyo nnookhalano muteko wooreherera elapo atthu enanarinhaaya. Nto owo onkela okhala muteko mwintxipale woovara!
Eyo ennanuupuxera muteko ana Israel yaatthuneyaaya ovara etthikakaru oBabilonia. Saavira iyaakha 70 wIsrael ohikhaliwaka. Mprofeti Yesaya aahimme weera ekhaviheriwaka ni Yehova ana Israel yaanwera oreherera elapo ele weera ekhale yooreera ntoko khalayi. Eprofesiya eyo yaahimme ha: “Onnatatuxa nikare nawe nikhale Edeni ni ehewehewe awe nikhala nttimpe na Yahvéh.” (Yes. 51:3) Ni eyo yaahereya. Vamoha-moharu, ekhaviheriwaka ni Yehova ale enrowa ohiyeriwa elapo enoowera otatuxa elapo okhala eparadiso. Sookhala itthu muntthuneyaanyu opaka viinaano vaava weera moonihere weera nyuwo munnatthuna okhavihera muteko owo.
Itthu nyuwo muntthuneyaanyu opaka ori oreherera vaate vanyu ni ohela etthu eri poothe nipuro naya. Nyuwo pooti opaka eyo nnaamweera mavizinyu anyu ehoonaka okhakala etthu yootthuneya. Nyuwo tho pooti okhavihera oreherera empa ya Omwene ni mapuro empakiwa Assembleya. Makhalelo anyu yaaweemererakani, nyuwo tho pooti wiivaherera weera mwaakhavihere asinna sinaakhumelela irisa sa ephattu. Mweera haawo, munimoonihera weera muri oolikaneene weera mwaakhavihere asinna ni asirokora. Nyuwo pooti wiikoha: ‘Miteko heeni kintthuneyaaka oxuttera viinaano vaava weera kavarele muteko elapo enyowani?’
NYUWO MURI OOLIKANEENE WEERA MWAAKOSOOPE ALIPA OOVINYERERIHIWA?
Noomala ovinyererihiwa mwaana mwaamuthiyana a Jairo, Yesu aaruma weera avahiwe etthu yootxa mwaana ole. (Mar. 5:42, 43) Mene khoowaxunpe omukosoopa mwaarusi ole a iyaakha 12. Vanonto muupuwele muteko ninrowaahu okhalano Yesu akwanihera yooleihera ela “atthu ari mmahiyeni anèraya yìwe nsu nawe ni evinye.” (Yoh. 5:28, 29) Nnaamweera Biblya ohihimaka itthu sootheene mene ninnasuwela weera alipa oovinyererihiwa eneereke otthuna yootxa, ikuwo nave nipuro nookhala. Nyuwo pooti woonihera viinaano vaava weera munnatthuna okhavihera. Nrowe noone itthu nyuwo muntthuneyaanyu opaka.
Nintthuneya opaka eheeni weera moonihere weera muri oolikaneene weera mwaakhele elapo yoohiyeriwa?
Vaavo munsuwelanyu weera muloko anyu onooxekuriwa ni mutokweene a esirkwiitu nyuwo pooti wiivaherera weera munvahe yootxa owannyinyu. Vaavo munna aavara oBetheli naari mutokweene a esirkwiitu enammalelaaya yoothanleliwa awe anawa okhavihera mmulokoni mwaahu, hiyo pooti wiivaherera weera nimukhavihere ophwanya nipuro nookhala. Vaavo onkhalaawe kongresu waattamela muttetthe anyu nyuwo pooti wiivaherera weera mukhavihere ohinaaye weereya ni avira vale, nave tho nyuwo pooti wiivaherera weera nwaakhele owannyinyu asinna enkhuma ottayi eweelaka omoona kongresu.
NYUWO MURI OOLIKANEENE WEERA MWAAXUTTIHE ALIPA OOVINYERERIHIWA?
Moovarihana ni Miteko 24:15, vanooneya weera ibiliyau sintxipale sa atthu enoovinyererihiwa. Antxipale atthu awo khayaarinono eparakha yoomusuwela Yehova. Nto enookhalano eparakha eyo yavinyererihiwa vale.a Muluku onkela waavarihela arumeyi awe oororomeleya weera yaaxuttihe atthu awo. (Yes. 11:9) Murokora mmoha onitthaniwa Charlotte, olalenre wEuropa ni wAmerica do Sul ni wAfrica ontthunaxa okhavihera muteko owo. Owo ohimme ha: “Miyo kintthuna waalaleera alipa ovinyererihiwa. Vaavo kinsomaaka itthu sa atthu akhalayi miyo kinnuupuwela: ‘Moota ekumi ya mutthu ole yeeraaya ekhale yoovirikana aamusuwenle Yehova.’ Miyo kinnoona opisa ophiya etempu weera kaaxuttihe atthu awo itthu woohima sa Yehova.”
Arumeyi oororomeleya a Yehova yaakhala elapo ya vathi Yesu ahinaaye owa eneereke otthuneya oxuttera itthu sintxipale. Nkuupuwelani moota enrowaaya okhala eparakha etokweene ni woohakalaliha omuleela Daniyeli moota sikwanenlaaya iprofesiya owo aalenpaawe seiyo owo ahiwexexaawe. (Dan. 12:8) Nkuupuwelani tho moota onrowaaya okhala wooreera omuxuttiha Ruthi ni Nowemi weera Mesiya aawenle erukulu awe. Moohihovela onrowa okhala wooreera weerela eparte muteko woolaleera oneera opakiweke elapo yootheene woohikhala maxupo a elapo ela ninkhalaahu.
Muntthuneya opaka eheeni weera moonihere weera muri oolikaneene weera mwaaxuttiwe alipa oovinyererihiwa? Moota woopaka eyo ori wiilipihera weera nreherere moota ninxuttihaahu ni ohitxonpela ovara muteko woolaleera. (Math. 24:14) Nnaamweera nyuwo muuluvanleene naari mureeneno mathowa makina enwootxelihani ovara muteko woolaleera ntoko nyuwo mwaatthunelaanyuno, nyuwo pooti woonihera weera munnatthuna vantxipale waalaleera alipa ovinyererihiwa mpakaka ele munweraanyu viinaano vaava weera nvare muteko woolaleera.
Nto nikoho tinna: Neereke nyuwo muri oolikaneene weera muhiyeriwe elapo? Nyuwo tho munnoona opisa weera mutatuxe elapo weera ekhale eparadiso weera mwaakosoope ni waaxuttiwa alipa oovinyererihiwa? Nyuwo pooti woonihera weera muri oolikaneene muttottelaaka mureerelo miteko sootheene nimpakaahu olelo va sinlikana ni miteko iye nyuwo munkelaanyu ovaraka mwaakhela vale elapo yoohiyeriwa!
a Nwehe mwaha onthokororiwa “Atthu antxipale anookuxiwa mwa xariya” va Nwehereri, a Setembro a 2022.