Nyuwo pooti okhala mahiku ootheene

1. Eheeni enkhumelela vaavo ninphimelela ahu yooweherera ya okhalano ekumi yoohimala?

YEHOVA oolaihera onivaha yooweherera yooreera, “ekumi yoohimala.” (Arom. 6:23) Yehova onnanisivela vantxipale ni owo onnatthuna okhala ni hiyo mahuku ootheene. Vaavo ninphimelelaahu yoolaihera Yehova onivanhaawe, moohihovela nsivelo nahu nuwo ninnalipa.

2. Yooweherera yookhalano ekumi yoohimala ennikhavihera moota heeni?

² Yooweherera Muluku onivanhaawe yookhalano ekumi yoohimala ennanikhavihera ovilela maxupo a mweekumini, nnaamweera amwiittani ahu enoopopihaka weera enooniva, hiyo khaninrowa ohiya onvarela muteko Yehova. Mwaha wa heeni? Mwaha wooweera nakhwa nreene oororomeleya wa Yehova, owo onoorowa onivinyereriha ni nnookhalano yooweherera yoohitthikela tho okhwa. (Yoh. 5:28, 29; 1 Akor. 15:55-58; Aheb. 2:15) Mathowa heeni nikhalannaahu enniroromeliha weera nnookhala mahiku ootheene? Nrowe noone.

YEHOVA MULUKU A MAHIKU OOTHEENE

3. Eheeni enniroromeliha weera hiyo nnokhala mahiku ootheene? (Nsal. 102:12, 24, 27)

³ Hiyo noosuwela weera Yehova pooti onivaha ekumi yoohimala, mwaha wooweera owo ephattuwelo ya ekumi ni owo onkhala mwa mahiku ootheene. (Nsal. 36:9) Nwehe soolepa sa mBiblyani sinoonihera weera Yehova ookhala ovinyera khalayi, nave onookhala woohimala. Yoolepa ya Nsalmu 90:2 ennahima weera Yehova Muluku “ovinya khalayi mpaka ehuhu yothene.” Ni Nsalmu 102 mwa iversu sintxipale sinnoonihera eyo. (Mmusome Nsalmu 102:12, 24, 27.) Mprofeti Habakuki alempe ha woohima sa Yehova: “Yahvéh Muluku aka khohiyono weyo onakhala ovinyera khalayi? Weyo, Muluku aka, Òttela aka, ohinrwa okhwa.” — Hab. 1:12.

4. Neereke ohiiwexexa weera Yehova ookhala ovinyera khalayi maxupo? Muthalihe

⁴ Nyuwo onnooxupani waakhulela weera “Yehvéh Muluku òhimala”? (Yes. 40:28) Nyuwo khamukhanle meekhiinyu, Eliyu enre ha woohima sa Yehova: “Iyakha sawe khasinèrekeleya.” (Yobi 36:26) Itthu ikina sinnanixupa wiiwexexa, nto eyo khentaphulela weera itthu iyo khasihiyono seekhaikhai, mwa ntakihero, antxipale a hiyo onnanixupa wiiwexexa moota aluuxu envarayaano muteko, mene eyo khentaphulela weera awo khekhanle. Vamoha-moharu, Yehova ookhala ovinyera khalayi eyo eri ekhaikhai naamwi niiwexexaka kapena hooye. (Arom. 11:33-36) Ehinaaye okhala etthu mulaponi mu — oheela mpuwa — nsuwa ni ithenyeri, Yehova aakhala. Yehova onnanroromeliha weera “ti yowo òpale etthaya ni ikuru sawe, olipinhe olumwenku ni iseru sawe òkonle irimu ni miruku sawe!” (Yer. 51:15; Mit. 17:24) Etthu heeni ekina enniroromeliha weera nnookhala mahiku ootheene?

NIPAKINWE WEERA NIKHALEKE MAHIKU OOTHEENE

5. Adamu ni Heva yaamwiwelenle Muluku yaarowa okhalano eheeni?

⁵ Neereke Yehova opanke itthu sootheene weera sikhaleke mahiku ootheene? Hooye, atthu paahi taapankaawe weera ekhaleke mahiku ootheene. Naamwi vaarene hiiho, Yehova anvaha nlamulo nna Adamu: “Nto sowima sa mwiri wosuweliha yorera ni yonanara, hoye, ohitxe sowima saya, niwoko nihiku onrowa awe otxa sowima saya, okhwa onimokhwa.” (Eph. 2:17) Adamu ni Heva yaamwiwelenle Yehova awosa khiyarowa okhwa. Vanoneya weera apaale muhoolo mwaya, Yehova anwakhulela weera “etxeke mwiri ole wa ekumi”. Mwa yeeyo, Yehova amwaroromeliha weera yaamukhalano “ekumi yoohimala.”b — Eph. 3:22.

6-7. (a) Eheeni enoonihera weera khanipakinwe weera nikhweeke? (b) Itthu heeni nyuwo muntthunaanyu opaka elapo enyowani? (Nwehe efootu.)

⁶ Mahukwaano atthu ankhala iyaakha 70 naari 80. Mene nto masientista makina ahoonelela weera okooko onnawera ovitha soohimmwa mwa iyaakha sintxipale. Eyaakha ya 2010, erevista emoha ya masientista (Scientific American Mind) yaahimme weera okooko wookhalano owera woowiyaathi soohimmwa imiliyau 2.5 sa egigabytes, yoowo onphiyera emiliyau 3 sa iwoora sigravariwaka iviidiyu, otakansera sootheene seiya sinnapwaha iyaakha 300, mene nto, vannooneya weera okooko onnawera wiiyathi soohimmwa sintxipale. Owera wa okooko onnoonihera weera Yehova onipanke weera nikhaleke mwa iyaakha sintxipale ohiya 70 naari 80. — Nsal. 90:10.

⁷ Yehova onipanke ni yootthuna ya ovirelela okhala mahiku ootheene. Biblya oneera: “Òhela tho mmurimani mwa atthu warya wohimala.” (Koh. 3:11) Ti vawonto nimmoonaahu nookhwa okhala mwiittani ahu. (1 Akor. 15:26) Mwa ntakihero, vaavo mutthu onvoreyiwaawe neereke onimweera wiikhuraana paahi owehereraka okhwa? Moohihovela hooye, owo onnarowa hospitale weera akosoopiwe eretta awe mpaka olama. Mweekhaikhai ootheene hiyo ninnapaka ele ninwera ahu weera nihikhwe ni vaavo atthu nnasivela ahu enkhwaaya nihipwatthaka weera aari owuuluvala naari mwaana naari mmiravo ninnariipiwa murima vantxipale. (Yoh. 11:32, 33) Moohihovela, Muluku ahu khaarowa onivaha yootthuna ya okhala mahiku ootheene, waari weera aatthuna weera nikhaleke mwa etempu vakhaaneene. Mene hiyo, nookhalano mathowa enniroromeliha weera nnookhala mahiku ootheene. Nroowe noone itthu Yehova opanka awe khalayi ni onpakaawe viinaano sinoonihera weera owo nlelo khatxentxale miruku sawe.

YEHOVA KHATXENTXALE YOOTTHUNAAWE

8. Yesaya 55:11 onnixuttiha eheeni woohima sa yootthuna ya Yehova?

⁸ Adamu ni Heva yaamutthekela Muluku, nto ti yeeyo enneeriha hiyo ninkhwa ahu, naamwi yaamutthekenle, owo khatxentxale yootthuna awe. (Mmusome Yesaya 55:11.) Ntonlelo owo ontthuna waavaha atthu oororomeleya ekumi yoohimala, eyo ennooneya vaavo nnuupuwela ahu itthu Yehova opanka awe weera akwanihere yootthuna awe.

9. Eheeni Yehova onilaihenra awe? (Daniyeli 12:2, 13)

⁹ Yehova onroromeliha weera onimwaavinyereriha ale ekhwiiye ni waavaha yooweherera ya ekumi yoohimala. (Mit. 24:15; Tito 1:1, 2) Yobi murumeyi oororomeleya a Muluku annaroromela weera Yehova ohunkheliwa ni atthu ale akhwiiye ni onnatthuna vantxipale waavinyereriha. (Yobi 14:14, 15) Mprofeti Daniyeli aasuwela weera atthu yanvinyererihiwa ni okhalano eparakha ya ekumi yoohimala. (Nsal. 37:29; mmusome Daniyeli 12:2, 13.) Ayuda a etempu ya Yesu, yaasuwela weera arumeyi oororomeleya a Yehova yaamwaakhela “ekumi yoohimala.” (Luka 10:25; 18:18) Ni Yesu tho annuuluma woohima sa yooweherera ene yeeyo, ni mwaanene yoowo tho aavinyererihiwa ni Yehova. — Math. 19:29; 22:31, 32; Luka 18:30; Yoh. 11:25.

10. Ovinyererihiwa weereñye khalayi onoonihera eheeni? (Nwehe efootu.)

¹⁰ Yehova naapwiipwi a okumi owo ookhalano owera woowavinyereriha atthu ale ekhwiiye. Nave tho, Yehova anvaha owera mprofeti Eliya weera anvinyererihe mwaana anaamukhweli Sarepta. (1 Mam. 17:21-23) Muhoolo mwaya, Yehova aamukhavihera mprofeti Eliseyo weera anvinyererihe mwaana a muthiyana Muxunemi. (2 Mam. 4:18-20, 34-37) Ovinyererihiwa nno, onnoonihera weera Yehova ookhalano owera woowavinyereriha ale ekhwiiye, emaara Yesu araawe elapo ela ya vathi owo ahoonihera weera Atithaawe yaanvaha owera iwo. (Yoh. 11:23-25, 43, 44) Viinaano va, Yesu ori wiirimu. Mene nto, oovahiwa “owerya wotheene . . . wirimu ni elapo ya vathi.” Owo onoowera okwanihera yoolakela “yoowaavinyereriha ale eri mmahiyeni” weera ekhaleno yooweherera yookhala mahiku ootheene. — Math. 28:18; Yoh. 5:25-29.

11. Mukuttho wa Yesu onneeriha moota heeni hiyo okhalano ekumi yoohimala?

¹¹ Eheeni yaamweerinhe Yehova waakhulela weera mwaana awe akhwe mooteene yoole woomoriha ikharari? Mwaanene Yesu enre: “Khweli Muluku òtthuna vantxipale elapo ya vathi ophiyera onvaha Mwan’awe mmosaru, wera yeyo eri yothene enamwìwelela, ehiriheye, nto ekhaleno ekumi yohimala.” (Yoh. 3:16) Mukuttho wa Yesu woomweeriha Yehova olevelela soottheka sahu ni onivaha ekumi yoohimala. (Math. 20:28) Murummwa Paulo aathaliha eparte ela yootthuneya ya yoolakela ya Muluku vaavo enraawe: “Niwoko mwa mutthu mmosaru yòkhumelela evinyerero ya alipa òkhwa. Khweli sawasawa mwa Adamu atthu othene anakhwaya, siso tho mwa Kristu atthu othene enekhalihiwe tho akumi.” — 1 Akor. 15:21, 22.

12. Moota heeni Yehova onrowa awe ovarihela muteko Omwena awe weera akwanihere yootthuna awe?

¹² Yesu ahaaxuttiha atthareli awe weera evekeleke weera Omwene wa Muluku orwe ni yootthuna awe yeereye elapo ela ya vathi. (Math. 6:9, 10) Yootthuna ya Muluku ori weera atthu ekhaleke elapo ya vathi mahiku ootheene. Weera aweranyihe opaka eyo, Yehova amuthanla mwaana awe Yesu weera akhale mwene a Omwene owo. Nto Yehova onnathukumanya atthu oophiyera 144.000 a elapo ela ya vathi weera yalamulele vamoha ni Yesu weera ekwanihere yootthuna ya Muluku. — Apok. 5:9, 10.

13. Eheeni Yehova onpaka awe weera akwanihere yootthuna awe ni hiyo ninrowa opaka eheeni weera nimukhavihere?

¹³ Yehova onnathukumanya “muloko mutokotoko wa atthu” weera aaxuttihe ni weera aalamuleleke moomweneni mwawe. (Apok. 7:9, 10; Yak. 2:8) Elapo ninkhala ahu atthu antxipale eri ookawanyeya mwaha woowiittana ni ikhotto mene ale eneerela eparte muloko mutokotoko wa atthu, enniilipihera weera mmurimani mwaya ehikhaleno wiittana naari nthalu. Atthu awo enkhala ntoko enhana ikatana saya, weera sikhale mukattahiya. (Mik. 4:3) Ohiya wivoloihera mukhottoni seiyo sinaahasula atthu antxipale ni owiiva, muloko mutokotoko wa atthu, onnaakhavihera atthu oxuttera woohima sa yoolakela ya Muluku ni ennaakhavihera atthu ophwanya “ekumi yekhaikhai.” (1 Tim. 6:19) Mwaha wookhavihera Omwene wa Muluku awosa ennakumanano maxupo mantxipale ntoko ottharatthariwa ni amusi aya ni othoiwa musurukhu mene Yehova onnavaha sootheene awo anhaawelaya. (Math. 6:25, 30-33; Luka 18:29, 30) Nto itthu sootheene iya sinnoonihera weera Omwene wa Muluku onookhala ni onovirelela opaka yootthuna ya Yehova.

YOOWEHERERA YOOREERA

14-15. Yehova onrowa okwanihera moota heeni yoolaihera awe yommaliha nookhwa weera ahikhale tho?

¹⁴ Viinaano va Yesu onnalamulela wiirimu, nto owo ori oolikaneene weera akwanihere soolaihera sootheene Yehova opanka awe. (2 Akor. 1:20) Ovinyera eyaakha ya 1914 Yesu ahaawina amwiittani awe. (Nsal. 110:1, 2) Moohipisa va owo ni a 144.000 enrowa waanyaanya atthu ootheene oonanara murima a elapo ela ya vathi. — Apok. 6:2.

¹⁵ Mpuwa mwa iyaakha miili Yesu onrowa waavinyereria alipa ookhwa ni waakhavihera ale ammwiiwelela Muluku weera ekhale oomalela. Ni wavira othorihiwa woomalihera anaxariya “enrowa ohiyeriwa elapo ni okhala wa mahiku othene.” (Nsal. 37:10, 11, 29) Ni woomaliherani, “mwittani òmalihera onrowa otoloxiwa, ti okhwa.” — 1 Akor. 15:26.

16. Nanvarelaka muteko Yehova yoolakela ahu ekhaleke teevi?

¹⁶ Ntoko nonnaahu mwa yoosomeene yeela, yooweherera ahu ya okhalano ekumi yoohimala ti yoolipa mwaha wooweera eri mBiblyani, yooweherera ela ennanikhavihera okhala oororomeleya wa Yehova mahiku ala oomalihera ni ooxupa. Weera nimuhakalalihe Yehova nihinvareleke muteko owo ni yootthuna paahi weera owo anivahe ekumi yoohimala mene nikhaleke nsivelo nraahuno ni Yehova vamoha ni Yesu. (2 Akor. 5:14, 15) Nsivelo nno nnooneeriha otakiha mikhalelo sa Yehova ni Yesu nipakaka ele ninwera ahu mmutekoni woolaleera. (Arom. 10:13-15) Vaavo ninxuttera ahu okhala atthu oohiisoona ni atthu oovaha, Yehova aneereke otthuna okhala nthamwene ahu mahiku ootheene. — Aheb. 13:16.

17. Yoothanla heeni mutthu ti mutthu a hiyo ontthuneya awe opaka? (Matheyo 7:13, 14)

¹⁷ Neereke hiyo nri mpuwa mwa atthu ene yaala enrowa okhalano ekumi yoohimala? Yehova onnanivaha eparakha eyo, vano mutthu ti mutthu a hiyo onttuneya othanla ovirelela weetta ephiro ya okumi. (Mmusome Matheyo 7:13, 14.) Okhala wa mahiku ootheene onrowa okhala moota heeni? Nikoho nna, nnimwaakhula yoosoma enttharelana.