MWAHA ONTHOKORORIWA 19
ETXIPO 6 “Erimu Ennilaleya Ovuwa wa Muluku”
Mutakiheke malaika oororomeleya
“Mmuttottopele Yahvéh nyuwo, antxelo awe.” — NSAL. 103:20.
ELE NINKELA AHU OXUTTERA
Ninrowa woona itthu ninxutteraahu ni malaika oororomeleya.
1-2. (a) Moota heeni nivirikannaahu ni malaika? (b) Itthu heeni ninlikanaahu ni malaika?
VAAVO Yehova oopurulenlaaweni mweekhaikhaini, owo ohoowopani va emusi yoowiiraana ni ya nsivelo ya atthu emmukokhorela ohela mpuwa malaika mantxipale oororomeleya. (Dan. 7:9, 10) Emaara hiyo nnuupuwelaahu woohima sa malaika, ninnoona moota awo eraaya oovirikana ni hiyo. Mwa ntakihero, malaika aakhala mwa etempu yintxipale hiyo nihaakunveene okhala. (Yobi 38:4, 7) Awo toowera vantxipale onipwaha hiyo. Nave-tho awo tootteela ni toomalela mwa mukhalelo yoowo nihinweraahu waaphwanya mwaha wookhala oohimalela. — Luka 9:26.
2 Menento, nnaamweera nivirikanneene, sookhala itthu ikina hiyo ninlikanaahu ni malaika. Mwa ntakihero, ntoko malaika, hiyo ninnawera woona mikhalelo sootepa oreera sa Yehova. Nookhalano otaphuwa woopaka soothanla hiihaale ntoko malaika. Nave-tho, ntoko malaika, hiyo nookhalano masina, nave nookhalano mikhalelo soovirikana nihihimaka miritti nraahuno. Nave-tho hiihaale ntoko malaika, hiyo ninnatthuna omukokhorela Mpattuxa ahu. — 1 Ped. 1:12.
3. Eheeni ninxutteraahu ni malaika oororomeleya?
3 Okhala weera sookhala itthu sintxipale ninlikanaahu ni malaika, ntakihero naya nooreera pooti onlipiha ni onimwaleela. Ohima ekhaikhai, hiyo pooti oxuttera itthu sintxipale sooreera woohima sa malaika. Mwa yoosoma ene yeela, nnoorowa woona moota ninrowaahu otakiha mukhalelo woowiiyeviha wa malaika oororomeleya, nsivelo naya ni atthu, ovilela waya ni wiilipihera waya weera ereherere muloko.
MALAIKA TOOWIIYEVIHA
4. (a) Moota heeni malaika enooniheraaya wiiyeviha? (b) Mwaha wa heeni malaika eraaya oowiiyeviha? (Nsalmu 89:8 [89:7, NM])
4 Malaika oororomeleya toowiiyeviha. Nnaamweera ereene amiruku, oowera ni oosuwela, awo enniiwelela miruku envahiwaaya ni Yehova. (Nsal. 103:20) Emaara empakaaya itthu, awo kheniivuwiha mwaha wa itthu iyo, naari khenoonihera itthu enweraaya opaka seiyo atthu ehinweraaya. Awo ennapaka yootthuna ya Muluku nnaamweera ehihimmwaka masina aya.a (Eph. 32:24, 29; 2 Mam. 19:35) Awo khenaakhulela ovuwihiwa weiwo onamphwanela Yehova. Mwaha wa heeni malaika eraaya oowiiyeviha? Mwaha wooweera ennamusivela Yehova ni ennamuttittimiha vantxipale. — Musome Nsalmu 89:8 [89:7, Tradução do Novo Mundo].
5. Moota heeni nlaika nimoha noonihenraaya wiiyeviha vaavo nuulumaaya ni murummwa Yohani? (Nwehe efootu.)
5 Moone etthu yeereñye enoonihera wiiyeviha wa malaika. Okhwipi wa eyaakha 96 Kristu awiiyeene, nlaika nimoha nihisuwelinwe nsina naahiisoonihera wa Yohani. (Apok. 1:1) Yohani oonenle moota heeni yoowooniheriwa ele? Owo aaheerera okokhorela nlaika nne. Menento nlaika nne noororomeleya, naakhootta neeraka: “Weyo wìthokorore, ohère siso: yomi tho kiri mukhw’á ni mukhw’aya àsinn’á . . . Omulapele Muluku.” (Apok. 19:10) Tthiri nno waari waakhula woowiiyeviha. Nlaika nne khinaatthuna ovuwihiwa naari ottittimihiwa. Nno moowaakuveya naamuleela Yohani weera anvuwihe Muluku. Emaara emoharu, nlaika nne khinaamuyevinhe Yohani. Nnaamweera nlaika nne nanvarenle Yehova mwa etempu yintxipale ni naari noowera ompwaha Yohani, nno moowiiyeviha, naahiilikanxera ni mukhwaawe murummwa Yohani. Nave, nnaamweera nlaika nne naatthuneya omuleela Yohani, nno khinaamuximwenle naari khinaamuthokoronre murummwa Yohani moohireerela. Opwaha mwa yeeyo, nlaika nne naahuuluma mooreerela. Nno naasuwela weera Yohani aatikiniheya vantxipale.
Nlaika naahoonihera wiiyeviha vaavo nuulumaaya ni Yohani (Nwehe eparagrafu 5)
6. Moota heeni ninrowaahu otakiha wiiyeviha wa malaika?
6 Moota heeni ninrowaahu otakiha wiiyeviha wa malaika? Hiyo-tho khontthuneya wiivuwiha mwaha wa itthu nimpakaahu naari weerera ovuwihiwa mwaha wa itthu iyo. (1 Akor. 4:7) Nave-tho hiyo khontthuneya wiisoonaka okhala atthu ootthuneyaxa mwaha wonvarela Yehova mwa iyaakha sintxipale naari mwaha wa iparakha nraahuno. Opwaha mwa yeeyo, emaara ninkhalaahuno miritti sintxipale nintthuneya wiisoonaka okhala atthu ooyevaxa. (Luka 9:48) Ntoko malaika, hiyo nintthuneya waavarela atthu akina, hiyo khontthuneya wiivuwiha.
7. Moota heeni ninrowaahu woonihera wiiyeviha vaavo ninrowaahu onvaha miruku mutthu?
7 Nave-tho nintthuneya woonihera wiiyeviha vaavo nnanvahaahu miruku mutthu, ntoko asinna naari mwanihu. Emaara ninvahaahu miruku, nintthuneya wiiwanyeiha miruku iyo, mene ntoko nlaika nanvanhe miruku mooreerela Yohani, nintthuneya wiiwanyeiha miruku iyo nihimunyoonyihaka mutthu owo. Wakhala weera khanniisoona okhala a vasuluxa, nnoorowa ovaha miruku sinvarihana ni Biblya mwa nttittimiho ni moopixa murima. — Akol. 4:6.
MALAIKA ENNAASIVELA ATTHU
8. (a) Moovarihana ni Luka 15:10, moota heeni malaika enwooniheraaya nsivelo atthu? (b) Muritti heeni malaika eraayano mmutekoni moolaleera? (Nwehe efootu ya .)
8 Malaika khekhanle ottayi naari khemwalanyihinwe ni atthu. Awo ennaasivela atthu. Nave awo ennahakalala vantxipale vaavo mutthu otthenke onttharuwaawe, naari neere, vaavo eputtiputthi eriheñye entthikelaaya wa Yehova, naari vaavo mutthu ontxentxaawe ephiro awe anvolowa mweekhaikhaini. (Mmusome Luka 15:10.) Nave-tho malaika ennavoleela muteko woolaleera. (Apok. 14:6) Nnaamweera awo ehaalaleeraka atthu moowooneya, awo pooti omweeriha namalaleera omphwanya mutthu ontthuna oxuttera woohima sa Yehova. Ekhaikhai weera hiyo khaninwera ohima nnene sene moota malaika envoleelaaya miteko sootheene, mwaha wooweera, Yehova pooti ovarihela muteko itthu ikina ntoko munepa awe wootteela weera aakhavihere atthu naari oweettiha arumeyi awe. (Mit. 16:6, 7) Nnaamweera vareene hiiho, owo onnavarihela muteko malaika awe voohihiyerereya. Tivawonto, ikwaha sootheene ninlaleyaahu mitthenka sooreera, nroromeleke weera malaika eri oolikaneene weera enikhavihere. — Nwehe ekwaadru “Mavekelo aya yaahaakhuliwa.”b
Ntheli nimoha ntthikelaka owaani noomala ovara muteko woolaleera ni ekarinyu. Mphironi ninnakumana ni muthiyana mmoha yoowo onkhala ntoko ooxupeya. Murokora ole onnuupuwelela weera malaika pooti oneettiha wa yaale enhaawela nikhavihero noomunepani. Owo onnuuluma ni muthiyana ole moomaaliha (Nwehe eparagrafu 8)
9. Moota heeni ninrowaahu otakiha nsivelo na malaika wa atthu?
9 Moota heeni ninrowaahu otakiha nsivelo na malaika wa atthu? Vaavo nniiwaahu weera munna naari murokora ootthikiheriwa mmulokoni, hiyo onnatthuneya ohakalala ntoko malaika enhakalalaaya. Hiyo pooti opaka etthu weera nimwaakhele munna naari murokora owo, nimooniheraka weera ninnamusivela. (Luka 15:4-7; 2 Akor. 2:6-8) Nave-tho hiyo pooti otakiha malaika nipakaka ele ninweraahu mmutekoni moolaleera. (Koh. 11:6) Nave-tho hiihaale ntoko malaika ennikhaviheraaya mmutekoni moolaleera, hiyo pooti waasaasera mikhalelo weera naakhavihere asinna ni asirokora mmutekoni moolaleera. Mwa ntakihero, hiyo pooti ompaka palanu ookhuma muteko woolaleera ni namalaleera munyowani. Naari pooti waakhavihera asinna ni asirokora oowunnuwela naari envoreiwa nivaraka vamoha muteko woolaleera.
10. Eheeni nixuttenraahu ni yooweereya ya Sara?
10 Nankha wakhala weera khaninwera opaka itthu ikina mwaha wa mikhalelo sahu? Naari vareene hiiho, hiyo pooti ophwanya mikhalelo mikina soovara vamoha ni malaika mmutekoni moolaleera. Moone yooweereya emoha ya murokora Sara,c yoowo onkhala wIndia. Noomala ovara ntoko pioneira mpuwa mwa iyaakha 20, Sara aavoreiwa ni aahaapaxari. Onnooneya weera, owo aaxupeya vantxipale. Mene nnikhavihero na emusi awe yoomunepani ni yoosoma awe ya Biblya, Sara aawera okhalano mikhalelo sooreera. Okhala weera owo khaawera okilaathi weera alepe ikaarta, annanvarela muteko telefooni weera avare muteko woolaleera. Nto, owo aalikarela irevisita sawe, ni irevisita iyo sannaaleela atthu akina yaarinono ntthuno. Etthu heeni yaakhumelenle? Mwa miyeeri vakhaani, Sara aawera okhalano soosomiha sa Biblya 70! Anamasoma antxipale mpaka viinaano va, ennoonela mithukumano sahu. Malaika ennahakalala vantxipale ovara vamoha ni asinna ni asirokora ntoko Sara, yaawo empaka ele enweraaya mmutekoni moolaleera!
MALAIKA ENNAVILELA
11. Moota heeni malaika oororomeleya enooniheraaya ovilela?
11 Malaika oororomeleya, ntakihero nooreera na ovilela. Awo aavilela ohixariya ni itthu soonanara mpuwa mwa iyaakha sintxipale. Awo aamoona Satana ni malaika makina yaavaraayano vamoha emurukunuwelaka Yehova. (Eph. 3:1; 6:1, 2; Yuda 6) Biblya onnuuluma nlaika nimoha naatthara-ttharinwe ni demooniyu oowera. (Dan. 10:13) Opwaha mwa yeeyo, ovinyera khalayi, malaika enwoona atthu vakhaani paahi yaasaka okokhorela weekhaikhai. Nnaamweera vareene hiiho, malaika awo oororomeleya, ennavirelela onvarela Yehova moohakalala ni moowiilipihera. Awo aasuwela weera etempu yooreerela, Muluku onoomaliha ohixariya wootheene.
12. Eheeni enrowa onikhavihera ovilela?
12 Moota heeni ninrowaahu otakiha ovilela wa malaika? Hiihaale ntoko malaika, hiyo pooti oviriha ohixariya naari otthara-tthariwa. Mene ninnaweherera ni nroromelo weera etempu yooreerela, Muluku onoomaliha itthu sootheene soonanara. Hiihaale ntoko malaika oororomeleya, “nihikhulumuwe opanka sorera.” (Agal. 6:9) Nave Muluku oolaihera onikhavihera ovilela. (1 Akor. 10:13) Hiyo-tho pooti onvekela Yehova nivekaka munepa awe wootteela yoowo onkumihera opixa murima ni ohakalala. (Agal. 5:22; Akol. 1:11) Nankha nyuwo mwaavirihaka otthara-tthariwa? Mmuroromeleke Yehova ni murima anyu wootheene, nave muhooveke. Yehova ikwaha sootheene onoorowa wookhaviherani nyuwo ni woolipihani. — Aheb. 13:6.
MALAIKA ENNAKHAVIHERA OREHERERA MULOKO
13. Yoothanleliwa heeni yootepa othanleya malaika eraayano mahiku ala oomalihera? (Matheyo 13:47-49)
13 Mpuwa mwa mahiku ala oomalihera, Yehova oovaha malaika yoothanleliwa yoothanleya. (Mmusome Matheyo 13:47-49.) Muteko woolaleera onnaakhavihera atthu a makhalelo ootheene. Atthu akina a yaawo, ennathanla okhala akristu oororomeleya, mene akina hooye. Malaika aathanleliwa weera “[yaamwalamwaxe] atthu oonanara murima ni anaxariya.” Mene eyo khentaphulela weera atthu ale ehiñye ororomeleya mwaha wa etthu eri poothe khenrowa otthika. Naari khentaphulela weera mmulokoni khokhalaka ohiiwanana. Menento, nroromeleke weera malaika ennavara vantxipale weera ereherere miloko.
14-15. Moota heeni ninrowaahu otakiha wiilipihera wa malaika weera ereherere muloko mwa mukhalelo wa mmuupuweloni ni wa omunepani? (Nwehe efootu.)
14 Moota heeni ninrowaahu otakiha wiilipihera wa malaika weera ereherere muloko? Nipakaka ele ninweraahu weera nikhavihere muloko mwa mukhalelo wa mmuupuweloni ni wa omunepani. Mwa yeeyo, nintthuneya wiilipihera okosoopa murima ahu naathanlaka asinthamwene ooreera, ni osepa etthu eri poothe yaarowa oneeriha opaka etthu yoonanara. (Nsal. 101:3) Nave-tho nintthuneya waakhavihera asinna ni asirokora ovirelela okhala oororomeleya wa Yehova. Mwa ntakihero, etthu heeni nintthuneyaahu opaka noonelela weera munna naari murokora oopaka yoottheka etokweene? Mwaha wa nsivelo, hiyo ninnamooperera orowa wuuluma ni asitokweene a mmulokoni. Wakhala weera owo khapanke eyo, hiyo ninnaaleela asitokweene a mmulokoni mwaha owo. Nintthuna weera munna naari murokora ori poothe akhulumunwe moomunepani, akhaviheriwe moowaakuveya! — Yak. 5:14, 15.
15 Mooriipiha murima, atthu empaka soottheka itokweene, ennakumihiwa mmulokoni. Mwaha wa yeeyo, hiyo ‘khanimpwexeererana’ ni atthu awo.d (1 Akor. 5:9-13) Mareherero ala ennakhavihera muloko okhala wooreera. Opwaha mwa yeeyo, emaara hiyo nneemexeraahu weetta ni atthu ale ekumihinwe mmulokoni, ninnawoonihera weera ninnaasivela. Wiiwelela wahu miruku iya, pooti oweeriha awo oottharuwa. Wakhala weera awo enoopaka eyo, hiyo nnoorowa ohakalala ni Yehova vamoha ni malaika awe. — Luka 15:7.
Etthu heeni nintthuneyaahu opaka wakhala weera munna naari murokora oopaka yoottheka etokweene? (Nwehe eparagrafu 14)e
16. Mwa mikhalelo heeni nyuwo munrowaanyu otakiha malaika?
16 Eparakha etokweene wa hiyo, owera osuwela itthu vakhaani woohima sa malaika ni ovara vamoha naawo! Hiyo nintthuneya otakiha mikhalelo saya ntoko: wiiyeviha, nsivelo naya wa atthu, ovilela waya ni wiilipihera waya weera ereherere muloko mwa mukhalelo wa mmuupuweloni ni wa omunepani. Wakhala weera hiyo nnootakiha malaika oororomeleya, nnoorowa weerela eparte emusi ya arumeyi a Yehova wa mahiku ootheene.
ETXIPO 123 Nimwiiweleleke Yehova ni Mutthenkeso Awe
a Wa malaika mantxipale ekhanle, mBiblyani emphwanyeya masina meeli paahi, Mikhayeli ni Gabriyeli. — Dan. 12:1; Luka 1:19.
b Nyuwo pooti ophwanya soohimmwa ikina va Índice das Publicações da Torre de Vigia muru oneera “Anjo” naari “direção angélica (exemplos).”
c Masina makina aatxentxiwa.
d Moovarihana ni Soohimmwa sa naaveeli sa Mukuttula Woolamulela 2024, wakhala weera mutthu okumihinwe mmulokoni oophiya omuthukumanoni, namalaleera pooti ovarihela muteko yoowuupuxera awe ya murima yootxentxerihiwa ni Biblya waari weera anaamuulumihe ni omwaakhela.
e OTAPHULELA WA EFOOTU YA : Murokora mmoha onnuuluma ni murokora mukina yoowo ori nthamwene awe weera uulume ni asitokweene a mmulokoni. Moovira etempu, murokora ole onnuuluma ni asitokweene a mmulokoni vaavo onoonelelaawe weera nthamwene awe khuulummeno.