Nnaamweera miyo kaari mutthu oowoona wuuliha muru vantxipale kookhala misionaariya

Kiyarinwe eyaakha ya 1951 oViena, wAustralia, emusi aka yaari makatolika. Miyo kaari mutthu oowoona wuuliha muru, mene kannamuroromela Muluku ni kannanvekela ikwaha sintxipale. Vaavo kaaraakano iyaakha 9, apapaka yaapatxera omusoma Biblya ni Anamoona a Yehova, moohipisa ameyaka yaapatxera omusoma Biblya vamoha ni awo.

Avinyaka naakhala muloko Döbling oViena. Ntoko emusi, naapaka itthu sintxipale vamoha. Nannamusoma Biblya, woonela mithukumano vamoha sa mmulokoni, ni nannakhavihera miteko sa wa asembleiyani. Mwa enamwane aka apapaka aakikhavihera omusivela vantxipale Yehova. Mweekhaikhai, mavekelo yaapakaaya apapa yaatthuna weera miyo ni munnaka nikhale mapiyoneira. Mene mwa etempu ele, khaiyene yaari yoolakela aka.

KIPATXERAKA MUTEKO WA ETEMPU YOOTHEENE

Kipatisiwe eyaakha ya 1965, kireeneno iyaakha 14. Menento, wannakixupa waalaleera atthu kihaasuwenlaaka. Ni ikwaha sintxipale kuupuwela weera atthu kaaraakano iyaakha imoharu yaari ootthuneyaxa okipwaha miyo ni kaatthuna weera awo esiveliweke ni miyo. Nto, ehivinre etempu yintxipale kipatisiwakaru, kaapatxera wiivoleihera ni ale ehinanvarela Yehova. Nnaamweera waakisivela weetta ni awo yoowuupuxera aka ya murima yannakixupa, mwaha wooweera miyo kannaviriha etempu yintxipale ni atthu ehikhanle Anamoona a Yehova. Mene nkaawera ohiya okhala asinthamwene aatthu awo. Ti heeni yaakikhavihenre?

Mwa etempu ene yeeyo, murokora mmoha oniitthaniwa Dorothée aarino iyaakha 16 aathaamela muloko ahu. Wiilipihera wawe ni muteko woolaleera waakitikiniha vantxipale. Miyo kaari oowuunnuwela ompwaha owo, mene miyo nkailiipihera mmutekoni moolaleera. Miyo kaahuupuwela ha: ‘Asipapaka ti Anamoona, mene Dorothée khaanoono mmusi ori mweekhaikhaini. Owo onkhala ni ameyawe envoreiwa, menento onniilipihera vantxipale mmutekoni moolaleera!’ Ntakihero nawe nookeeriha miyo onvarela Yehova. Muhoolo mwaya, miyo ni Dorothée naapatxera ovara ntoko mapiyoneira vamoha nipatxeraka ntoko mapiyoneira ookhavihera avinyaka nnavara ntoko mapiyoneira anthiti. Mwaha wa Dorothée osiveliwa ni muteko woolaleera aakeeriha miyo-tho osiveliwa. Owo aakikhavihera opatxeriha yoosoma aka ya Biblya. Noovira etempu, kaapatxera ohoova waalaleera atthu ni kannaalaleera mmawannyaya, mphironi ni mapuro makina.

Mpuwa mwa eyaakha kaaraaka piyoneira anthiti, munna mmoha a wAustria oneeriwa Heinz aahoowa muloko ahu. Owo aaxuttenre ekhaikhai oCanada vaavo owo aarowaawe omuxekura munnawe, yoowo aari Namoona a Yehova. Heinz aathanleliwa muloko ahu oViena ntoko pioneiru oothanleya. Kaasiveliwa ni owo ovinyera woopatxerani. Menento owo aatthuna okhala misionaariyu, mene miyo nkaarinono yoolakela yookhala misiyonaariya. Menento woopatxerani, nkaamuleela myupuwelo saka. Muhoolo mwaya, miyo ni Heinz naapatxera onamorari, naathelana ni naapatxera ovara vamoha ntoko mapiyoneiru wAustria.

YOOLAKELA AKA YA OKHALA MISIONARIYA

Heinz annakileela yootthuna awe ya okhala misionariyu. Nnaamweera owo ahaakikhanyerera owo annakipakela makoho oovara murima, ntoko, “Okhala weera hiyo khinaanoono anamwane neereke hiyo pooti waatxeerera onvarela wahu Yehova?” Mwaha wa mukhalelo aka woowulliwa muru, miyo kannoova okhala misionaariya. Ekhaikhai weera kaari piyoneira, mene nkaakhanleno yoolakela ya okhala misionariya. Mene, Heinz moopixa murima annavirelela okikhavihera okhalano yoolakela ya okhala misionaariya. Owo-tho annakilipiha weera kihiisuupuweleleke meekhaaka mene kiwuupuweleke atthu akina. Miruku sawe mweekhaikhai sookikhavihera.

Vakhaani-vakhaani, kaahunnuwihera ntthuno na okhala misionariya, mwaha wa yeeyo naapaka epetisawu yoorowela exikola ya oGileadi. Menento, munna mmoha aavara oGileadi aakileela weera waamukhala wooreera oxuttera nuulumo na Enkleexi. Sivirakaru iyaakha 3 kaaxuttera nuulumo na Enkleexi, ni naatikiniheya vaavo naakhenlaahu yoothanleliwa ya ovara muloko Yugoslavian, oSalzburg, wAustria. Naavara iwo mpuwa mwa iyaakha 7 soottharelana, ohela mpuwa eyaakha emoha nivaraka ntoko maviajante. Nuulumo na servo-croata naari nooxupa wuuluma, mene hiyo naakhalano soosoma sintxipale sa Biblya.

Eyaakha ya 1979 asinna yaahoolela muteko woolaleera yaanivekela weera onrowe mpuwa mwa “etempu vakhaani” oBulgaria. Okhala weera muteko woolaleera wannakhoottihiwa, awo yaanileela weera nootherereke weera naarowenle “iferiya.” Yaanileela weera nihilaleere mene nikuxe moohisuweliwa ipublikasau sahu ikhanini weera naavahe asirokora 5 yaakhala oSofia ekapitale ya oBulgaria. Miyo kannoova vantxipale, mene Yehova aakikhavihera ni yoothanleliwa ele. Woona olipa murima wa asirokora ni ohakalala, nnaamweera yaatthara-tthariwa weera ewaleliwe mukateya waakivaha nroromelo woopaka ele kaaweraaka, yeeyo keeraaka kivekeliwe mmarehereroni mwa Yehova.

Mwa yeeyo, naatthikela opaka epetisau veeli ya oGileadi, ekwaha ela naahakhuleliwa. Hiyo nuupuwela weera Eskola yaarowa okhala ni nuulumo na Enkleexi wEstados Unidos. Menento, Novembro a 1981, Eskola yaahaatxeerereya oGileadi oWiesbaden. Mwa yeeyo, Eskola naarowenlaahu yuulummwa ni nuulumo na Alemão, neeno naari nookhweya wa miyo wiiwexexa. Woowini neeraahu nthanleliwewo?

NIVARAKA ELAPO YOOWANIWA EKHOTTO

Hiyo naathanleliwa orowa oQuenia! Menento, efiliyaale ya oQuenia yaanikoha wakhala weera naari oolikaneene ovara waattamela elapo ele wUganda. Mene mwa iyaakha 10 sa muttuli wUganda waalamuleliwa ni Idi Amin. Mpuwa mwa olamulela wawe yaakhala atthu antxipale yaakhwiiye ni yaavulanle, ni ekumi ya iwe yaari yooxupa vantxipale. Menento, eyaakha ya 1979, Idi Amin, yoowo aalamulela aaweriwa. Moohihovela, apaale nyuwo munoowera wiiwexexa woohima sa mwaha wa heeni koovaaka othamela elapo ele, mwaha woowera elapo ele yannawaniwa ekhotto yintxipale. Mene, oGileadi naahoopereriwa weera nintthuneya omuroromelaka Yehova. Mwaha wa yeeyo, naahaakhulela orowa.

Ekumi wUganda yaari yooxupa. Heinz ohimme ha mu Anuário a 2010: “Kuvernu khaawera waavaha atthu maahi, energia ni itthu ikina sootthuneya. Atelefooni khiyaavara ni atthu yannoopelana ni wiiyerana otepaxa wene ohiyu. Mwa yeeyo, wiila vale atthu antxipale yaakhala mmawannyaya ni yaanavekela weera ehiiyeriwe naari wiiviwa.” Nnaamweera asinna yaaviriha maxupo ala, awo yannavirelela okhala oolipa moomunepani.

Eyaakha ya 1982, Heinz ni miyo naaphiya oKampala, ekapitaale ya wUganda. Sivirakaru miyeeri 5 soopatxera, hiyo naakhala empa ya Sam ni Christina Waiswa vamoha ni anamwane awe 5 ni amusi awe 4. Munna ni murokora Waiswa ni emusi awe ikwaha sintxipale yaatxa ekwaha emoha vanihikuni, mene awo yaari oolikaneene okawana ele yaaraayano ni atthu akina. Mwa etempu ene yeele, nikhalaka vamoha ni Waiswa, Heinz ni miyo naaxuttera itthu saanikhavihenre mwa ekumi ahu ya omisionaariyu. Mwa ntakihero, naaxuttera orapa maahi vakhaani ni maahi ootuluxa nannavarela muteko olatirina. Eyaakha ya 1983, Heinz ni miyo naaphwanya empa ahu nipuro noovareleleya oKampala.

Kannasiveliwa vantxipale ni muteko woolaleera. Kinnuupuwela weera mweeri mmoha naakawela irevista sookwanelaka 4.000! Mene etthu yooreera, moota atthu yoonelaaya ekhaikhai. Awo yannamuttittimiha Muluku ni wannaasivela wuuluma woohima sa Biblya. Heinz ni miyo ikwaha sintxipale nannakhalano soosoma 10 naari 15 mutthu ti mutthu a hiyo. Ni naaxuttera vantxipale ni anamasoma ahu, mwa ntakihero nnaamweera awo yeetta vathi weera yoonele mithukumano sootheene awo khiyaikhupanyera, ni emaara yootheene yannahakalala.

Eyaakha ya 1985 ni 1986, saakhumelela ikhotto piili wUganda. Ikwaha sintxipale nannawoona anamwane ereene ni ikaruma sa ekhotto, ikaruma iyo saahela mpuwa akaputthi ni yannawehaweha mmiseweni. Mpuwa mwa etempu eyo, nanvekela Yehova miruku ni murima woomaaleleya vaavo naawaasaahu atthu yaatthuna wiiwa mitthenka mmutekoni moolaleera. Ni Yehova aahaakhula mavekelo ahu, vaavo namphwanyaahu mutthu aakhulela mitthenka sa Omwene.

Hiyo-tho wannanisivela waalaleera atthu yaawa wUganda. Mwa ntakihero, naamusuwela ni naasoma vamoha ni Murat ni Dilbar Ibatullin, ntheli nimoha na oTartaristão (oRussia Central). Murat aari meediku. Ootheene aya aapatisiwa ni ennanvarela Yehova moororomeleya. Muhoolo mwaya, kaakhalano eparakha yoomusuwela Tatjana Vileyska, yoowo aakhala wUcrania ni aatthuna wiisiiva. Tatjana apatisiwakaru, owo aatthikela wUcrania ni muhoolo mwaya aavara ntoko namataphulela a iliivuru sahu.a

MAXUPO MANYOWANI

Eyaakha ya 1991, vaavo Heinz ni miyo naarahu ifeeriya, naahiitthaniwa ni efiliyaale ni naaleeliwa yoothanleliwa ahu enyowani: Ovara oBulgaria. Emalakaru ekuvernu ya Comunismo wEuropa Oriental, muteko wa Anamoona a Yehova waahakhuleliwa oBulgaria. Ntoko nihimmaahu muttuli, Heinz ni miyo naatoko ophiyawo iwo niroihaka ipublikasau vaavo muteko ahu waakhoottihiwaaya. Menento vano, naarummwa orowa iwo weera nalaleere.

Naaleeliwa weera nihitthikele wUganda. Nto nihinaaye otthikela empa ahu ya omisionaariyu weera nakuxe itthu sahu, naari waalaxera asinthamwene ahu, naarowa oBeteli ya wAlemanha, naawela ekaaro ni naaheetta ekwaha nirowaka oBulgaria. Naathanleliwa ekhurupu emoha ya anamalaleera 20 oSofia.

Naaviriha maxupo mantxipale manyowani oBulgaria. Woopatxerani, khinaasuwela nuulumo na iwo. Yanaaveeli, saari paahi ipublikasau piili saavareliwa muteko oBulgaria seiyo saari Conhecimento Que Conduz à Vida Eterna ni Meu Livro de Histórias Bíblicas. Ni kaahoona okhala wooxupa opatxeriha soosoma sa Bilblya. Nnaamweera kaaviriha maxupo ale, ekhurupu ahu ekhaanini ya asinna oowiilipihera yaannarowa vahoolo. Ekerexa Ortotoxa yaapatxera onitthara-tthara yoonakaru eyo.

Eyaakha ya 1994 Anamoona a Yehova yaakhoottihiwa elapo ele. Asinna akina yaawaleliwa mukateya. Ijornal ni Tv sannahima soowootha woohima sa hiyo, sihimaka weera Anamoona a Yehova ohiya paahi ewiivale anamwane mene-tho aaweeriha Anamoona akina wiisiva. Heinz ni miyo wannanxupa olaleera. Ikwaha sintxipale, nannakumana ni atthu oowali ni yaanikhuwelela, awo yannawiitthana mapolisia ni mpaka yannanivonya maluku, khiwaawereñye oroiha ipublikasau sahu elapo ele, ni waalukari empa weera nipake mithukumano sahu waari wooxupa. Mapolisia aatoko weemexera mithukumano sahu. Heinz ni miyo khinaakhovelenle oviriha maxupo ntoko ale. Eyo yaari yoovirikana vantxipale ni wUganda naaraahuwo, weiwo atthu yaaraaya ni ntthuno noomusoma Biblya! Etthu heeni yaanikhavihenre oviriha maxupo ntoko ala?

Hiyo nannahakalala mwaha wookhala vamoha ni asinna ni asirokora. Awo yannahakalala mwaha woophwanya ekhaikhai ni yannaxukurela mwaha wa nikhavihero naavahaahu. Ootheene aya yanniiwanana ni yannakhaviherana mukina ni mukhwaawe. Nooxuttera vantxipale ni sooweereya iya weera nnoowera okhala oohakalala ni muteko ori poothe wakhala weera nnimwaasivela atthu ohiya owehexexa maxupo ahu.

Sivirakaru iyaakha vakhaani, itthu saakhala nnene. Olaleera waari wookhweya, mareherero ahu yaahaakhuleliwa veeli eyaakha ya 1998, ni upublikasau sintxipale sannaphwanyeya ni nuulumo na Bulgaro. Eyaakha ya 2004 yaapakiwa efiliyaale enyowani. Olelo sookhala miloko sookwanaka 57 oBulgaria ni anamalaleera 2.953. Eyaakha yoomalihera ya muteko atthu ookwanaka 6.475 yaahoonela okhwa wa Yesu. Mene khalayi yaariwo paahi asirokora 5 oSofia, vano nookhalano miloko 9! Hiyo mweekhaikhai noowera woona okwanela wa eprofesia enhima weera: “Mwamukhani . . . Onotatuxiwa akhale atthu milokó sene milokó mulokó (1.000).” — Yes. 60:22.

KIVIRIHAKA MAXUPO AKA MWEEKUMINI

Mweekumini mwaka kannaviriha maxupo mantxipale a eretta. Sivinreene iyaakha saakhala ithuku sintxipale saakiipela ohela mpuwa mookookoni. Kaahooperariwa mpuwa mwa iwoora 12 wIndia weera sivenxiwe ithuku iyo. Kilamakaru kikhalaka efiliyaale ya India naatthikela ni yoothanleliwa ahu oBulgaria.

Muhoolo mwaya, Heinz aapatxera ovoreiwa eretta yeeyo envaliwa wa asitiithi, yeeyo yoothowa vantxipale eniitthaniwa Huntington. Eretta eyo yannamweeriha ohiwera weetta, wuuluma naari wiisookola. Vaavo eretta eyo yaavirelelaaya waatxeerereya, miyo kaamukhavihera. Miyo kanniisoona okhala oowaatteliwa ni ikwaha ikina kannaxupeya ni etthu yaarowa okhumelela. Menento munna mmoha mmiravo oniitthaniwa Bobi ikwaka sintxipale annanwopa Heinz weera elaleere vamoha. Bobi khaaxupeya ni ele atthu yaarowaaya wuupuwelaka wakhala weera Heinz khaarowa wuulumaka nnene naari oteexa miyoono sawe naari metto sawe. Bobi annakikhavihera vaavo kahaaweraka omukosoopa Heinz. Nnaamweera miyo ni Heinz naalakenle ohikhalano anamwane elapo ela nohoona weera Yehova oonivaha Bobi ntoko mwanihu! — Mar. 10:29, 30.

Heinz annavoreiwa-tho ni eretta ya cancro. Mooriipiha murima aiyaka, ahookhwa eyaakha ya 2015. Miyo kinniisoona okhala oohivarereleya vaavo Heinz okhwinnyaawe, aakinkhela vantxipale aiyaka ni kinnawuupuwela emaara eri yootheene. Ti yaawo ekikhavihenre ohixupeya vantxipale! (Luka 20:38) Nlelo kinnuupuwela itthu sintxipale ekikhavihenraaya. Kinnuupuwela ikwaha sintxipale masu aya a nsivelo ni miruku soovareleya muteko vaavo kinvirihaaka nihiku ti nihiku. Kinnaxukurela vantxipale mwaha wa iyaakha nivirinhaahu nivaraka vamoha moororomeleya.

KINNAXUKURELA NIKHAVIHERO NA YEHOVA

Yehova mweekhaikhai ookikhavihera vantxipale ni maxupo ootheene. Owo-tho ookikhavihera omalamaliha woova ni okhala misionaariya oowaasivela atthu. (2 Tim. 1:7) Mwaha wa nikhavihero na Yehova, munnaka mukhaanini ni miyo ninvara muteko wa ehuhu yootheene. Olelo, owo ni aiyawe envara esirkwiitu ya wEuropa. Mavekelo aapapaka mwa iyaakha sootheene iya ahaakhuliwa!

Yoosoma aka ya Biblya ennakikhavihera okhalano murettele. Emaara ya maxupo, kooxuttera ovekela ‘kiilipiheraka,’ ntoko Yesu aapankaawe. (Luka 22:44) Mukhalelo mmoha yaakhulinwaaya mavekelo aka mwaha wa nsivelo ni oreera murima wa asinthamwene aka a muloko wa Nadezhda, oSofia. Awo ikwaha sintxipale ennakiwopa ni ennakixukurela, ni eyo ennakeeriha ohakalala vantxipale.

Kinnuupuwelela vantxipale woohima sa ovinyererihiwa. Kinnawuupuwela asitiithi aka ohoolo wa empaahu ephwanelinweene ntoko emaara yeeyo yaathelanaaya. Kinnamuupuwela munnaka arehereraka yootxa. Kinnapuupuwelela Heinz anwenleene kavalo awe. Wuupuwelela itthu iya onnakikhavihera ohikhalano myupuwelo soowiisoona ohivareleya muteko ni sinnakihalaliha vantxipale ni sinnakeeriha omuxukurela vantxipale Yehova.

Kuupuwelelaka woohima sa ekumi aka ni kiwehaka muhoolo, kinnaakhulela ni murima aka wootheene masu a Davidi emphwanyeya va Nsalmu 27:13, 14: “Kaharoromenle wona orera murima wa Yahvéh mwelaponi ya akumi. Omuroromele Yahvéh, wìlipihe! Olipihe murim’á ni omuroromele Yahvéh!”