Makoho empakiwa ni ale ensoma irevista sahu

Muteko woolaleera onkela omala liini?

Yesu ohimme ha: “Ni mitthenka sooreera sa Omwene, sinaalaleiwe elapo yootheene weera atthu evahiwe onamoona yeereya eyo, elapo ela enoomala.” (Math. 24:14) Masu a ekereku etaphuleliwe ntoko “omala” mwa eversu ela ni iversu 6 ni 13, entaphulela télos. Masu ala enhima omala woomalela wa elapo ela ya Satana mu Armagedoni. (Apok. 16:14, 16) Menento, nnoovirelela olaleera mitthenka iya sa Omwene elapo ela ehinaaye omala moomalela. Eyo ennatxentxa moota naaiwexexa ahu khalayi.

Khalayi nuupuwela weera naamurowa ohiya ovara muteko woolaleera vaavo maxupo matokweene yaarowa aya opatxera ni onyaanyiwa wa Babilonia mutokweene. (Apok. 17:3, 5, 15, 16) Nuupuwela weera vaavo maxupo matokweene yaarowaaya opatxera, Yehova khaarowa waavaha atthu eparakha yoowaakhulela mitthenka sooreera. (Yes. 61:2) Nave-tho nuupuwela weera ale yaarowa ovuluwa mwa maxupo matokweene yaamoonihera ororomeleya waya wa Yehova ehinaaye ophiya etempu eyo. Hiyo nannaalikanxera awo ni Ayuda yaavulunwe wa otoloxiwa wa Yerusalemu eyaakha ya 607 Kristu ahinaaye owa. Ayuda awo yannamukokhorela Yehova ni yannasepa opaka etthu yoonanara, mwaha wa yeeyo awo yaathanliwa weera evuluwe ahinaaye otoloxiwa Yerusalemu. (Ez. 5:11; 9:4) Mene olikanxera nno khonvarihana ni masu a Yesu emphwanyeya va Matheyo 24:14, yaawo enoonihera weera atthu pooti okhalano eparakha yoowaakhulela mitthenka sooreera elapo ela ehinaaye omala moomalela mu Armagedoni.

Moota nniwexexa ahu yoolepa ya Matheyo 24:14, onnatxentxeya-tho ni moota naaiwexexa ahu woohima sa mitthenka sa nttaruxo weiwo onlikanxeriwa ni maluku a mararala amphwanyeya va Apokalise 16:21. Wuupuwelela moowiixera onnoonihera moota soolepa iya sinvarihana aya. Moota heeni? Waakhula wa nikoho nno onnooneya ni moota atthu enoonelaaya mitthenka sa Omwene. Murummwa Paulo olempe weera, “va yale anavuluxiwa,” mitthenka saarowa okhala sooreera, okhalaka ntoko “winkhela wa ekumi.” Menento wa amwiittani a Muluku, saarowa okhala mitthenka soonanara, okhalaka ntoko “winkha wa okhwa.” (2 Akor. 2:15, 16) Amwiittani awo khensiveliwa ni mitthenka sa omwene, mwaha wooweera sinnuuluma ekhaikhai ni etthu enkela weereya ni elapo ela, yeeyo ansivelaaya vantxipale: eri yoonanara, enlamuleliwa ni Satana yeeyo enkela onyaanyiwa moohipisa va. — Yoh. 7:7; 1 Yoh. 2:17; 5:19.

Ti wooreera osuwela weera Apokalise 16:21 onnahima-tho weera maralala oolemelaxa enrowa okhala “matokwene.” Apaale pooti weeraka eyo enoonihera weera emaara ya maxupo matokweene, muteko woolaleera onookhalano owera, naari neere, nsina na Yehova nnoosuweliwa opwaha khalayi. (Ez. 39:7) Neereke etempu ene yeeyo, anyaanyiwa Babilonia Mutokweene, atthu akina enahaala waakhulela mitthenka sooreera ntoko winkhela wa ekumi? Eyo pooti weereya. Apaale awo pooti wuupuwelelaka, naari osuwela weera, mwa iyaakha sintxipale, Anamoona a Yehova yannalaleya woohima sa omala wa ittiini soowootha.

Eyo ennanuupuxera ni ele yeereñye wExipitu khalayi, yeereyakaru mattaruxo 10. Yehova ‘athorihakaru miluko sa wExipitu,’ “muloko mukina mutokotoko” wahaakhanle aIsraeli waahiitakansera ni atthu a Muluku. (Ott. 12:12, 37, 38) Atthu awo yahaakhanle aIsraeli pooti weeraka yaamuthanla Yehova yoonakaru weera itthu sootheene Mose aahimmaawe woohima sa mattaruxo 10 mweekhaikhai saaheereya.

Mutthu yoole onrowa othanla okhala moono wa Yehova noomala onyaanyiwa Babilonia Mutokweene, onoorowa okhalano eparakha yoowaakhavihera asinnawe Kristu yaawo enkela okhala valaponi. (Math. 25:34-36, 40) Onnooneya weera eparakha nraahuno na othorihiwa ntoko iputtiputthi onoorowa omala ahalaka vakhanini ophiya Armagedoni, vaavo oothanliwa anrowaaya waakhela yoothanleliwa aya ya orowa wiirimu.

Matxentxo awo a moota nniiwexexaahu nnoonihera nsivelo ntokotoko ni omoriwa ikharari wa Yehova. Mweekhaikhai, owo “niwoko khanatthuna wi akina eriheye, mene othene erukunuxe murima.” — 2 Ped. 3:9.