Muupuweleleke waavekelela atthu akina

1. Moota heeni ninsuwelaahu weera mavekelo tootthuneya wa Yehova?

NIVEKELO etthu yootthuneya. Muupuwele ela, Yehova oovaha miritti malaika. (Nsal. 91:11) Owo-tho onvaha mwanawe miritti itokweene. (Math. 28:18) Nankha woohima sa mavekelo? Owo muritti wawawe paahi. Yehova yoowo “oniiwa mavekelo” onnaniiwa mwaneene awe. — Nsal. 65:3 [65:2, Tradução do Novo Mundo].

2. Ntakihero heeni murummwa Paulo ovanhaawe woohima sa waavekelela atthu akina?

² Nnaamweera ninvekelaka Yehova woohima soohaawela sahu, hiyo-tho onnatthuneya waavekelela atthu akina. Murummwa Paulo aapaka eyo. Mwa ntakihero, owo aalepela ekaarta wa Aefeso: “[Kinnavirelela owupuwelelani] mmavekeloni mwaka.” (Aef. 1:16) Paulo annanvekelela mutthu ti mutthu. Mwa ntakihero, owo aamuleela ha Timotheyo: “Kinnamuthamala Muluku kiwùpuwelaka weyo vohihiyerereya mmavekeloni mwaka, ohiyu ni othana.” (2 Tim. 1:3) Paulo aakhalano maxupo awe yaawo aatthuneyaawe weera avekeleke. (2 Akor. 11:23; 12:7, 8) Menento nnaamweera vareene hiiho, owo aaniihiyera etempu weera aavekeleleke atthu akina.

3. Etthu heeni yaarowa oneeriha ottiwala waavekelela atthu akina?

³ Ikwaha ikina hiyo pooti ottiwala waavekelela atthu akina. Mwaha wa heeni? Murokora mmoha oniitthaniwa Sabrinaa, oohima nthowa naya, owo ohimme ha: “Ekumi ahu elapo ela ninnaatteliwa vantxipale. Hiyo ninnaxupeya vantxipale ni maxupo ahu nnavekela woohima sa yaawo paahi.” Neereke eyo enneereya ni nyuwo? Wakhala weera aani, mwaha ola onoorowa wookhaviherani. Mwaha ola onoorowa, wiiwanyeiha yoopatxera (1) mwaha wa heeni oraaya wootthuneya waavekelela atthu akina, yanaaveeli (2) onimoovahani miruku sa moota woopaka eyo.

MWAHA WA HEENI NINTTHUNEYAAHU WAAVEKELELAKA ATTHU AKINA?

4-5. Moota heeni mavekelo ahu enrowaaya okhala a “ikuru”? (Yakobe 5:16)

⁴ Waavekelela atthu akina wookhalano “ikuru.” (Mmusome Yakobe 5:16.) Neereke waavekelela atthu akina pooti otxentxa mukhalelo aya? Aani, Yesu aasuwela weera murummwa Pedru ammukhootta, owo aahimme ha: “Mene kinnapaka mavekelo koovekelelakani nyuwo weera nroromelo nanyu nihitteettheye.” (Luka 22:32) Paulo-tho aasuwela weera nivekelo pooti otxentxa yooweereya ya mutthu. Vaavo aawalelinwaawe oRoma, owo aamulepela Filemoni: “Mwaha wa mavekelo anyu kinrowa ohokoloxeriwa wa nyuwo.” (Film. 22; nwehe-tho enoota ya yoosoma ‘mene kinnaweherera eyo moorweela mwa mavekelo anyu.’) Ni ti yeeyo yeereñye, Paulo aataphuliwa mukateya ni aatthikela olaleya veeli.

⁵ Ekhaikhai weera vaavo nimpakaahu mavekelo khontaphulela weera ninrowa omukhanyerera Yehova onaakhula. Owo onnasuwela maxupo arumeyi awe envirihaaya ni ikwaha okina onnathanla waakhula moovarihana ni ele evekenlaaya. Osuwela eyo onnanikavihera onvekela ni murima ahu wootheene, woohima sa maxupo ahu ni ohiya mwaha owo mmatatani mwawe. — Nsal. 37:5; munwehe 2 Akorinto 1:11 ni enoota ya yoosoma.

6. Moota heeni waavekelela atthu akina onvoleelaaya ele nnuupuwelaahu wa awo? (1 Pedru 3:8)

⁶ Waavekelela atthu akina onnanikhaviherawunnuwihera “omoriwa ikharari.” (Mmusome 1 Pedru 3:8.) Mutthu oomoriwa ikharari onnasuwela ohaawa onvirihaawe mutthu mukina, ni onnapakavo etthu weera amukhavihere. (Mar. 1:40, 41) Mutokweene mmoha oniitthaniwa Michael, ohimme ha: “Vaavo kinaavekelelaaka atthu akina woohima sa soohaawela saya, kinnasuwela itthu awo envirihaaya ni eyo ennakeeriha waatxeerera nsivelo naka naawo. Kinniisoona okhala vakhiviru naawo nnaamweera awo ehisuwelaka.” Mutokweene mukina oniitthaniwa Richard onnahima etthu ekina yooreera enkhumelela. Owo ohimme ha: “Vaavo nnaavekelelaahu atthu akina ninnakhalano ntthuno noowaakhavihera.” Owo onnaatxeerera eeraka: “Vaavo nnaakhaviheraahu atthu nnaavekelelaahu, mwa mukhalelo mukina hiyo ninkhavihera waakhuliwa wa mavekelo naapakenlaahu.”

7. Moota heeni waavekelela atthu akina onnikhaviheraaya okhalano moonelo wa eriyari-neeriyari woohima sa maxupo ahu? (Afilipi 2:3, 4) (Nwehe efootu.)

⁷ Waavekelela atthu akina onnanikhavihera woona maxupo ahu mwa mukhalelo wooreera. (Mmusome Afilipi 2:3, 4.) Okhala weera ninkhala elapo ela enlamuleliwa ni Diabo, kata mutthu a hiyo ookhalano maxupo awe. (1 Yoh. 5:19; Apok. 12:12) Vaavo nniikhovelelihaahu waavekelela atthu akina, ninuupuwela weera “ohawa wene wuwu onnàkhumelela tho [asinn’ihu] a velaponi” yootheene. (1 Ped. 5:9) Pioneira mmoha oniitthaniwa Katherine ohimme ha: “Waavekelela-tho atthu akina onnakuupuxera weera atthu akina ennaviriha maxupo. Vaavo kinuupuwelelaaka eyo kinnahiya wuupuwelela maxupo aka paahi.”

AWO ENNAHAAWELA MAVEKELO AHU

8. Nvahe matakihero na atthu nintthuneyaahu waahelaka mpuwa mmavekeloni mwahu.

⁸ Taani nintthuneyaahu waahela mpuwa mwa mmavekeloni mwahu? Hiyo pooti ovekelela ikhurupu sintxipale sa atthu, mwa ntakihero, wa ale enviriha maxupo a mweekumini, amiravo ennyesereriwa opaka itthu soonanara oskola, naari ale enviriha maxupo mwaha woowuuluvala. Asinna antxipale ennatthara-tthariwa ni amusi aya naari ni anamalamulela. (Math. 10:18, 36; Mit. 12:5) Asinna akina aahiya impa saya mwaha wa maxupo aipoliitika eneereya muttetthe aya, akina aaphwanyiwa ni irisa sa ephattu. Apaale hiyo pooti ohaasuwela asinna ni asirokora awo, mene vaavo nnaavekelelaahu, ninnoonihera weera ninnatthara nlamulo na Yesu na osivelana “mukina ni mukhwaawe.” — Yoh. 13:34.

9. Mwaha wa heeni nintthuneyaahu waavekelelaka ale enhoolela mareherero a Yehova, waahela mpuwa asaaraya?

⁹ Hiyo-tho pooti waavekelela ale enhoolela mareherero a Yehova. Waahela mpuwa asinna a Mukuttula woolamulela ni anamakhaviheraaya, asinna a ikomisau sa ifiliyaali, asitokweene a isirkwiitu, asitokweene a mmulokoni ni arumeyi ookhavihera. Antxipale a asinna awo ennaviriha maxupo, ni emaara emoharu enniilipihera weera eniikhavihere. (2 Akor. 12:15) Mwa ntakihero, mutokweene mmoha a esirkwiitu, ohimme ha: “Maxupo matokweene kinvirihaaka ori orakamelana ni asipapaka oowuuluvala. Ooweeli aya aakhalano maxupo a mweerutthuni. Nnaamweera murokoraka ni aiyawe yaakosoopaka awo nnene sene, kinnakhala ooxupeya mwaha woohikala iwo weera kaakhavihere.” Apaale hiyo pooti ohisuwela itthu sootheene sinaaxupa asinna awo, menento tiwootthuneya owuupuwelela ni waavekelela awo. (1 Ates. 5:12, 13) Hiyo-tho pooti waavekelela asaaraya asinna awo. Menento, nikhavihero naya ninnaakhavihera asiiyaya okosoopa soothanleliwa saya.

10-11. Neereke Yehova onnahakalala vaavo nimpakaahu mavekelo nnahelahu mpuwa asinna ni asirokora ootheene? Muthalihe.

¹⁰ Ntoko noonnahu, ninnapaka mavekelo a ikhurupu sintxipale sa asinna ni asirokora. Mwa ntakihero, ninnapaka mavekelo nihimuhimaka mutthu mmoha paahi. Mene ninvekelaka Yehova weera aakhavihere ale ewalelinwe mukateya, naari aamaallihe ale ekhweliwe atthu yaasivelaaya. Mutokweene mmoha oniitthaniwa Donald, ohimme ha: “Nookhalano asinna ni asirokora antxipale enviriha maxupo ni emaara nimpakaahu mavekelo ninnaahela mpuwa ootheene aya.”

¹¹ Mavekelo ala, ennamusivela Yehova? Aani! Mwaha wooweera khaninsuwela soohaawela sootheene sa asinna ni asirokora. Mwa yeeyo, ti wootthuneya emaara nimpakaahu mavekelo waahela mpuwa asinna ni asirokora ootheene enviriha maxupo. (Yoh. 17:20; Aef. 6:18) Mavekelo ala anoonihera weera nookhalano ‘nsivelo ni asinna a elapo yootheene’. — 1 Ped. 2:17.

VAAVO MUNANVEKELELAANYU MUTTHU TI MUTTHU

12. Moota heeni okhala ooweha-weha, onrowaaya onikhavihera opaka mavekelo ooluluwanya?

¹² Mukhaleke oowehaweha. Ohiya ovekelela ikhurupu sa asinna ni asirokora paahi, ti wootthuneya-tho oromola masinaaya emaara nimpakaahu mavekelo. Neereke muloko anyu ookhala mutthu onwanano eretta ehinlama? Neereke mmiravo mmoha a muloko anyu onnaxupeya mwaha wa makoleeka awe omukhanyerera opaka itthu soonanara? Neereke tiithi oohithela naari maaye oohitheliwa onnawanano maxupo weera amuhuwe mwanawe, ‘amulakaka ni omuttaruxa mwa Apwiya [Yehova]’? (Aef. 6:4) Mwakhala oowehaweha munimoonihera nsivelo ntokweene ni munimwiihela nipuro naya. Ni eyo, enooweerihani okhalano ntthuno noowaavekelela awo.b — Arom. 12:15.

13. Moota heeni ninrowaahu waavekelela ale nihaasuwenlaahu?

¹³ Mwaavekeleleke atthu akina muromolaka nsina naya. Hiyo pooti opaka eyo naari ni atthu ale nihaasuwenlaahu. Mwa ntakihero, nkawuupuweleni asinnihu ni asirokorihu ewalelinwe ilapo ntoko oCrimea, wEritreia, oRussia naari oSingapura. Va jw.org, nyuwo pooti ophwanya masina awo aasinna ewalelinwe.c Mutokweene mmoha oniitthaniwa Brian, ohimme ha: “Kohoonelela weera vaavo kinlepaaka nsina na munna naari murokora owalelinwe mukateya avinyaka kinuuluma moowiiwanyeya, ti wookhweya wuupuwelela nsina nno, ni oromola mmavekeloni mwaka.”

14-15. Moota heeni ninrowaahu opaka mavekelo ooluluwanya?

¹⁴ Mpakeke mavekelo ooluluwanya. Michael, yoole nimuhimmaahu ohimme ha: “Vaavo kinsomaaka sooweereya sa asinna ewalelinwe mukateya va jw.org, kinneerera wuupuwelela moota heeni kaarowaaka wiisoonela kaakhanle nipuro naya. Miyo koosuwela weera kaamuxupeya vantxipale ni amwaaraka, ni waamukisivela osuwela weera awo ennakosoopiwa nnene. Nto, eyo ennakikhavihera osuwela etthu kintthuneyaaka ohima vaavo kinvekelaaka, wa asinnihu ale ewalelinwe mukateya ethenle.” — Aheb. 13:3, enoota.

¹⁵ Vaavo nnuupuwelelaahu moota eraaya ekumi ya asinnihu etthukinwe, hiyo-tho pooti ophwanya mikhalelo mikina sa moota woowaavekelela asinna awo mooluluwanya. Mwa ntakihero, hiyo pooti ovekela weera makwaarta enwehaweha ekateya ekhaleke oorera murima, ni ale eri anamahoolela ewaakhuleleke asinnihu omukokhorela Yehova mootaphuwa. (1 Tim. 2:1, 2) Hiyo-tho pooti ovekelela muloko wa asinna awo weera olipihiweke moorweela mwa muunna oororomeleya yoowo otthukinwe. Weera ale ehikhanle Anamoona a Yehova yooneke oreera murima wa munna naari murokora owalelinwe, ni waakhulela mitthenka enlaleyaaya. (1 Ped. 2:12) Miruku iyo, inoonikhavihera vaavo nnaavekelelaahu asinnihu ni asirokorihu yaawo enviriha maxupo ootthara-tthariwa. Vaavo ninkhalaahu ooweha-weha nneereke waavekelela atthu akina nihimaka nsina naya ni opaka mavekelo ooluluwanya ninnoonihera weera ‘ninnasivelana vatxipale mukina ni mukhwaawe.’ — 1 Ates. 3:12.

NIKHALEKENO MOONELO WOOREERA WEERIYARI-NEERIYARI WOOHIMA SA MAVEKELO AHU

16. Moota heeni ninrowaahu okhalano moonelo wa eriyari-neeriyari, woohima sa mavekelo ahu? (Matheyo 6:8)

¹⁶ Ntoko noonnaahu, mavekelo pooti otxentxa ele eneereya ni mutthu nnanvekelelaahu. Menento, nintthuneya okhalano moonelo weeriyari-neeriyari. Nintthuneya wuupuwelaka weera vaavo ninvekelaahu khaiyene nimmuleela etthu Owo ohisuwenlaawe, ni khanintthuneya onvaha miruku woohima sa etthu Owo ontthuneyaawe opaka. Yehova oosuwela etthu arumeyi awe enhaawelaaya naari awo ehisuwenleene. (Mmusome Matheyo 6:8.) Vanonto, mwaha wa heeni nintthuneyaahu waavekelela atthu akina? Ohiya mwaha wa mathowa nuulummaahu mwa mwaha ene yoola, owo mukhalelo mmoha nnooniheraahu weera ninnaapwattha atthu akina. Ni mwaha wa nsivelo, niinnaneeriha waavekelela atthu akina. Ni Yehova onnahakalala vaavo onwoonaawe arumeyi awe yooniheranaka nsivelo.

17-18. Mavekelo nnaapakelaahu asinna ni asirokora, hiyo pooti olikanxera ni eheeni?

¹⁷ Naari mavekelo ahu ekhalaka ntoko khetxentxale mukhalelo wa mutthu, awo ennoonihera nsivelo nraahuno ni asinna ni asirokora. Ni Yehova onnavaha mwiitti eyo. Hiyo pooti olikanxera eyo mwa mukhalelo mukina: Nkuupuwelani emusi erinono anamwane eeli akhaanini, mulopwana ni muthiya, mwaana mulopwana onnavoreiwa ni mwaamuthiyana onnaavekela apapawe eeraka: “Txontte mmukhavihere munnaka owo onnavoreiwa vatxipale!” Tiithi onnamukosoopa mwanawe owo, owo onnamusivela ni onnamukosoopa nnene. Menento, tiithi onnahakalala vantxipale vaavo ommoonaawe mwanawe muthiyana ampwatthaka munnawe mpaka anaveka nikhavihero.

¹⁸ Ti yeeyo Yehova onnoopereraawe opaka, ovekelelana ni okosoopana mukina ni mukhwaawe. Vaavo nimpakaahu eyo, ninoonihera moowiixera weera ninnaapwattha atthu akina, ni Yehova onnoona eyo. (2 Ates. 1:3; Ahe. 6:10) Opwaha mwa yeeyo, mavekelo ahu pooti otxentxa mukhalelo wa mutthu. Mwa yeeyo, nipakeke ele ninweraahu weera naavekeleleke atthu akina.