Asinna eeli anyowani a Mukuttula Woolamulela

NIHIKU NA 5 a Outubro a 2024, naakhalano soohimmwa soothanleya wa muthukumano wa vayaakhani. Asinna Jody Jedele ni Jacob Rumph yaathanliwa weera ekhale asinna a Mukuttula Woolamulela wa Anamona a Yehova. Asinna awo ennanvarela Yehova moororomeleya mwa iyaakha sintxipale.

Munna Jedele oyarinwe oMissouri, wEstados Unidos, ni ohuuwale mweekhaikhaini. Emusi awe yaakhala waattamela muttetthe wahaavariwa vantxipale muteko woolaleera. Mwa yeeyo, owo aahaasuwela asinna antxipale a mapuro oovirikana yaawo yaaxekura muttetthe ole weera ekhavihere olaleya mitthenka sooreera. Nsivelo ni wiiraana waya naamutikhiniha vantxipale. Owo opatisinwe woopatxerani wa omiravo awe, nihiku na 15 a Outubro a 1983. Owo annasiveliwa ni muteko woolaleera, ni amalihakaru osoma, aapatxera ovara ntoko pioneiru a nthiti Setembro a 1989.

Vaavo aaraawe mmiravo, munna Jedele vamoha ni murokorawe, yannakuxiwa ni asipapaya weera yaxekure oBeteli. Oxekura iwo waaweeriha anamwane ale okhalano yoolakela ya ovara oBeteli, ni ooweeli aya aawera okwanihera yoolakelaaya eyo. Munna Jedele aapatxenre okhavihera eBeteli ya oWallkill Setembro a 1990. Woopatxerani owo aavara edepartamento ya limpesa ni muhoolo mwaya anvara edepartamento ya mameediku.

Mwa etempu ene yeele, miloko saakhuvenle nuulumo na espanhol sanninnuwa ni yannatthuneya asinna. Nto munna Jedele aahoonela muthukumano wa nuulumo na espanhol ni aapatxera oxuttera nuulumo nne. Evinreene etempu vakhaaniini, owo aamusuwela Damaris, murokora mmoha pioneira a esirkwiitu emoha. Okhwipi waya, awo yaathelana ni yaarowa ovara oBeteli vamoha.

Eyaakha ya 2005, awo yaavinyawo oBeteli weera yaakosoopeke asitithi aya. Mpuwa mwa etempu eyo, awo yaavara ntoko mapioneiru a nthiti. Munna Jedele ookhavihera oxuttiha eskola ya mapioneiru ni oovara ni ekomisau eniiwanana ni espitaale muttetthe awe, nave-tho, oovara ni Ekomisau Regional ya Muteko Wooteka.

Eyaakha ya 2013, murokora ni munna Jedele yaawompwa weera etthikele oBeteli weera yavareke muteko wooteka oWarwick. Ovinya vaavo, awosa-tho yaakhavihera oPatterson ni oWallkill. Munna Jedele oovara edepartamento yooteka wa muttetthe ole ni miteko siniiwanana ni espitaale. Eyaakha ya 2023, mweeri wa Março, aathanliwa okhala namakhavihera a ekomisau ya muteko. Uupuwelelaka soothanleliwa sawe, owo ohimme ha: “Vaavo munvahiwaanyu soothanleliwa inyowani, ikwaha ikina nyuwo pooti wiisoona okhala oowaatteliwa. Menento, ti vaavo nyuwo muntthuneyaanyu wuupuwela omuroromela Yehova, mwaha wooweera ti yoowo oneeriha weereya etthu.”

Munna Rumph oyarinwe wEstados Unidos da America, mwa emiravo awe, ameyawe yaahiya woonela mithukumano ni olaleera, mene yaanniilipihera omuxuttiha ikhaikhai sa mBiblyani. Nave-tho owo annaaxekura iyaakha sootheene avovo awe, yaawo yaari Namoona a Yehova oororomeleya. Awo yaamukhavihera okhalano ntthuno neekhaikhai, ni emaara aaraaweno iyaakha 13 owo aavekela yoosoma ya Biblya. Nihiku na 27 a Setembro a 1992, areene mmiravo owo aapatisiwa. Moohakalaliha, ameyawe yaatthikela woonela mithukumano ni olaleera, ni emusi awe yootheene moowaakuveya yapatxera orowa vahoolo ni yaapatisiwa.

Emaara aaraawe mmiravo, munna Rumph annawoona moota mapioneiru yaakhalaaya oohakalala. Mwa yeeyo, amalihakaru osoma, aapatxera ovara ntoko pioneiru eyaakha ya 1995, mweeri wa Setembro. Eyaakha ya 2000, aathameela wEquador weera avareke mapuro oothowa anamalaleera. Iwo aamusuwela Inga, pioneira mmoha a oCanada, ni muhoolo mwaya yaathelana. Awo yaapatxeriha ekumi aya ntoko ntheli esidade emoha ya wEquador yeeyo yaarino ekhurupu ekhaanini ya anamalaleera. Olelo wookhalawo muloko onkhumela nnene.

Noovira etempu, murokora ni munna yaawompwa weera ekhale mapioneiru oothanleya, ni muhoolo mwaya yaavara osirkwiitu. Eyaakha ya 2011, yaawompwa weera yoonele eskola ya eturma 132 ya oGileade. Esomakaru eskola ele, yaakhavihera mapuro oovirikana ni yaattottela mureerelo mikhalelo soovirikana sa muteko, ntoko ovara oBeteli, muteko wa omisionario ni muteko wa esirkwiitu. Munna Rumph tho aakhalano eparakha ya oxuttiha eskola ya Anamalaleera a Omwene.

Mwaha wa eretta ya Koronaviru murokora ni munna Rumph yaatthikela wEstados Unidos. Awo yaawompwa orowa oBeteli ya oWallkill, weiwo munna Rumph aaxuttihinwaawe ni edepartamento ya muteko. Okhwipi waya yaathanleliwa otthikela efiliyaale ya wEquador, weiwo munna Rumph aavaraawewo ni ekomisau ya efiliyaale. Eyaakha ya 2023, awo yaathaamela oWarwick. Eyaakha ya 2024, mweeri wa Janeiro, munna Rumph aathanliwa weera akhale Namakhavihera a Ekomisau ya Muteko. Uupuwelelaka mapuro okhavihenraawe owo ohimme ha: “Etthu eneeriha yoothanleliwa okhala yoothanleya, khaiyene nipuro, mene atthu yaawo nyuwo munvaraanyuno.”

Ninnaxukurela wiilipihera wa asinna ala ni ‘ninnavirelela okhalano alopwana arinono nsivelo ntoko nno.’ — Afil. 2:29.