Moota woompaka palano a ekasamentu enrowa onvuwiha Yehova

1-2. Yehova ontthuna eheeni nihiku na ekasamentu anyu?

NYUWOSA munoonamorari ni munampaka palano oothelana? Waakhula waareene aani, wooreera! Pooti weeraka mohaatteliwa vantxipale murehereraka nihiku nno ntokweene. Yehova onnahakalala mwaha wa nyuwo. Owo ontthuna weera nyuwosa muttottele mureerelo nihiku na ekasamentua anyu ni weera muhoolo muhakalaleke vamoha. — Mir. 5:18; Etx. 3:11.

² Ti wootthuneya onvaha ovuwa Yehova nihiku na ekasamentu. Owo onnaphwanela eyo. Mwaha wa heeni? Ni moota heeni nyuwosa munrowaanyu opaka eyo? Yoosoma ela erehererinwe yuupuweleliwaka otepaxa wene ale ennamorari eniireherera weera ethelane. Mene miruku ninrowaahu woona, pooti onikhavihera ootheene ahu onvaha ovuwa Yehova vaavo nimwompwaahu okasamentuni, naari wakhala weera ale enthelana ennanivekela miruku woohima sa oreherera waya ekasamentu.

MWAHA WA HEENI NINTTHUNEYAAHU ONVAHA OVUWA YEHOVA?

3. Etthu heeni ale ennamorari entthuneyaaya othokorora vaavo enampakaaya palano woohima sa ekasamentu aya, ni mwaha wa heeni?

³ Ale ennamorari enampaka palano oothelana, entthuneya opaka eyo ni miruku sa Yehova ohenlaawe mBiblyani. Mwaha wa heeni? Mwaha wooweera Yehova tokumihenre ekasamentu. Ti yoowo aapanke ekasamentu yoopatxera awiiraanihaka Adamu ni Eva ntoko atthu oothelana. (Eph. 1:28; 2:24) Mwa yeeyo, vaavo enampakaaya palano a ekasamentu, ale enrowa othelana entthuneya ohela mpuwa moonelo wa Yehova, weera envuwihe owo.

4. Nthowa heeni nikina nikhanle weera ale ennamorari envuwiheke Yehova nihiku na ekasamentu aya?

⁴ Nookhala nthowa nikina nootthuneya, nintthuneya oweerihani nyuwo ohela mpuwa moonelo wa Yehova woohima sa ekasamentu anyu. Yehova Tiithi anyu a wiirimu ni nthamwene anyu. (Aheb. 12:9) Ni moohihovela nyuwo muntthuna weera nvireleleke omusiveliha. Nyuwo khamwaarowa opaka etthu nihiku na ntheli nanyu naarowa omunyoonyiha nthamwene anyu Yehova. (Nsal. 25:14) Vaavo nyuwo munuupuwelelaanyu itthu sootheene Yehova oopakenlaaweni ni onrowaawe woopakelani, khamunoona weera ti wootthuneya nihiku na ekasamentu anyu onvuwiha Owo? — Nsal. 116:12.

MOOTA HEENI MUNROWAANYU ONVUWIHA YEHOVA?

5. Moota henei Biblya onrowaawe waakhavihera ale ennamorari woonihera onwuwiha Yehova vaavo enampakaaya palano a ekasamentu aya?

⁵ Wakhala weera ale enrowa othelana entthuna opakiha efeesta, Biblya khanvaha eliista ya malamulo a moota entthuneyaaya opakiwa efeesta eyo. Nto, ale enrowa othelana pooti waapaka apalano aya moovarihana ni makhalelo aya, sookhovelela saya naari sootthuna saya. Mene akristu eekhaikhai, entthuneya weera yiiweleleke malamulo a Kuvernu vaavo empakaaya ekasamentu. (Math. 22:21) Ekhaikhai ti yooweera, vaavo ale enthelana enrehereraaya ekasamentu aya ettharaka miruku sa mBiblyani, awosa ennanvaha ovuwa Yehova ni ennamuhakalaliha. Vanonto, miruku heeni awo entthuneyaaya wuupuwelelaka?

6. Mwaha wa heeni oraaya wootthuneya weera ale ennamorari etthareke malamulo enkumiheriwa ni kuvernu?

⁶ Mwiiweleleke malamulo a kuvernu. (Arom. 13:1, 2) Ilapo ikina, ale ennamorari ennatthuneya okwanihera malamulo envekeliwa ni kuvernu weera ewere othelana. Awo ennatthuneya woonelela etthu envekeliwa mmuttettheni enkhalaaya. Wakhala weera munnahovela woohima sa woowiini munrowaanyu ophwanya soohimmwa, mwaavekeleke nikhavihero asitokweene a mmulokoni.b

7. Etthu heeni muntthuneyaanyu opaka weera ekasamentu anyu yeette nnene?

⁷ Mpake sootheene weera itthu seette mwa nttittimiho. (1 Akor. 10:31, 32) Ekasamentu anyu entthuneya woonihera soowiima sa munepa wootteela wa Muluku ohiya wa elapo ela. (Agal. 5:19-26) Moovarihana ni miruku sa mBiblyani woohima sa muhooleli a etthoko, munna onrowa othela torinono muritti wooweeriha itthu sootheene weetta mooreerela ni mwa nttittimiho. Etthu heeni enrowa okhavihera? Okhalano mwaha wa vanlakani onuuluma sa ekasamentu onkhuma mBiblyani ompakiwaaya mwa nsivelo, moomaaleleya ni mwa nttittimiho, onnaakhavihera atthu ootheene wiiwexexa weera akasamentu yoovaha ya Yehova. Mwaha owo-tho onnaakhavihera ale enoonela ekasamentu eyo ohikuxera matheela emaara eyo. Yuupuwelaka eyo, antxipale enthelana ennathanla opakiwa mwaha owo empa ya Omwene wawereya vale. Wakhala weera nyuwo muntthuna weera mwaha anyu opakiwe empa ya Omwene muntthuneya waalepela ekaarta asitokweene a mmulokoni vahinaaye.

8. Etthu heeni enrowa wookhaviherani weeriha ekasamentu anyu okhala yooreerela? (Aroma 13:13)

⁸ Mmusome Aroma 13:13. Wakhala weera nyuwosa muntthuna opaka efeesta ya ekasamentu anyu, etthu heeni muntthuneyaanyu opaka weera efeesta eyo ehoonihere munepa wa mulaponi? Masu eekereku etaphuleliwe ‘ifeesta soohireerela’ sinhimmwa ifeesta sinhela mpuwa iviinyu ni itxipo seiyo sinrowa mpaka ohiyu eriyari. (Nwehe enoota ya yoosoma “festas descontroladas” va Aroma 13:13.) Wakhala weera nyuwosa muntthuna othuma eviinyu yoowaawa muupuwele vahinaaye etthu muntthuneyaanyu opaka weera ahikhale mutthu onrowa owura mpaka ohapaliwa.c Wakhala weera sinookhalawo itxipo muheleke evolume yooreerela, weera ale mwaawompa anyu evireleleke otthekula. Muthanleleke itxipo sooreerela sinrowa orumuhiwa weera sihimukwattulihe mutthu.

9. Etthu heeni ale ennamorari entthuneyaaya wuupuwelelaka vaavo enuupuwelaaya matthekulelo enrowa okhala okasamentuni?

⁹ Nyuwosa munnampaka palano a okumiha iviidiyu, ifootu naari moota mukina wootthekula? Pooti weeraka mutthu owompwale onnatthuna ohima masu wa ale enthelana. Itthu ntoko iyo pooti weeriha nihiku na ekasamentu okhala nihiku nootepa othanleya. Muhipwathaka etthu eri poothe, muroromeleke weera itthu sootheene sinrowa opakiwa okasamentuni sikhale soolipiha. (Afil. 4:8) Mwiikoheke ha: ‘Neereke eyo enimoonihera nttittimiho waatthu? Enoottittimiha ekasamentu?’ Ni etthu yootthuneya: ‘Neereke enonvaha ovuwa Yehova?’ Ekhaikhai weera pooti okhala wooreera ohela mpuwa itthu ikina sootthekulela, mene mwiikosoopeke weera ehikhale etthu yoohireerela, mwa ntakihero, ntoko, etthu enrowa oweeriha atthu akina wuupuwela okonihana woohireerela. (Aef. 5:3) Wakhala weera amusi naari asinthamwene anyu entthuna ohima etthu mpuwa mwa efeesta, nwehexexeke wakhala weera awo enniiwexexa nnene sene etthu entthuneyaaya ohima naari hooye.

10. Mwaha wa heeni ale ennamorari entthuneyaaya okhala oowiiyeviha vaavo enampakaaya palano a ekasamentu aya? (1 Yohani 2:15-17)

¹⁰ Mukhaleke oowiiyeviha. (Mmusome 1 Yohani 2:15-17.) Yehova onnahakalala vantxipale vaavo arumeyi awe empakaaya ele enweraaya weera envuwihe Owo ohiya wiivuwiha asinneene aya. Mwa yeeyo, mukristu oowiiyeviha khaarowa ovarihela musurukhu muntxipale, naari otthuna ‘woonihera itthu oraaweno.’ Mareeliho heeni enkhumelela mwaha woopaka ekasamentu yookhweya? Moone ntakihero na Mike, munna mmoha a oNoruega. Owo ohimme ha: “Hiyo khanaakomphe ni eyo yaanikhavihera ovirelela ovara ntoko mapioneiro. Ekasamentu ahu yaari yookhweya, mene yooreera ni yoohittuwaleya.” Tabitha murokora mmoha a wIndia, ohimme ha: “Hiyo naasepa oxupeya vantxipale. Mwaha wookhaalano ekasamentu yookhweya, naarino itthu vakhaani naatthuneya ahu ompaka palano ni saari itthu vakhaanini naarowaahu ovaanyihana.”

11. Moota heeni ale enrowa othelana enrowaaya woonihera wiiyeviha wa moota enwaraaya ni eniireheraaya? (Nwehe-tho efootu.)

¹¹ Nyuwo moothanla ikuwo munrowaanyu owara nihiku na ekasamentu anyu? Moohihovela, nyuwo muntthuna ophwaneliwa. Mpaka etempu ya khalayi, muthiyana aarowa otheliwa ni mulopwana aarowa othela, yannathanla moomaaleleya ikuwo yaarowaaya owara. (Yes. 61:10) Ekhaikhai weera ikuwo munrowaanyu owara nihiku na ekasamentu anyu ti soovirikana ni ikuwo mwaarowaanyu owara nihiku nikina. Menento, nnaamweera vareene hiiho, entthuneya ekhaleke ekuwo yooreerela ni yoottittimiheya. (1 Tim. 2:9) Muhihiye weera ikuwo naari etthu ekina ya weerutthuni ekhale etthu yootepa otthuneya nihiku na ekasamentu anyu. — 1 Ped. 3:3, 4.

12. Mwaha wa heeni ale ennamorari entthuneyaaya osepa yookhovelela eri poothe ehinvarihana ni Biblya ekhovelelinwe mmuttettheni mwaya?

¹² Musepeke sookhovelela sihinvarihana ni Biblya. (Apok. 18:4) Elapo ela enlamuleliwa ni Satana, ikasamentu soosareya sookhovelela sinvarihana ni ettiini yoowootha, ni onaamunepani. Yehova onnanleela mwa mukhalelo woowooneya weera nintthuneya okhala ottai wa itthu iya soohiira. (2 Akor. 6:14-17) Wakhala weera nyuwosa munnahovela woohima sa sookhovelela ikina sa muttetthe anyu, muthola-tholeke moota sikhumelenlaaya sookhovelela iyo ni miruku sa mBiblyani sinrowa wookhaviherani nyuwo othanla etthu munrowaanyu ohela mpuwa ekasamentu anyu.

13. Moota heeni ale ennamorari enrowaaya okhalano moonelo mmoha wa Yehova woohima sa ipresente?

¹³ Neereke yookhovelela ya muttetthe anyu ale enwompwa ovaha ipresente? Mwaha woothoiwa musurukhu, pooti oweeriha atthu akina mwawompaanyu ovaha epresente moovarihana ni makhalelo aya. Ekhaikhai weera makristu ennoopereriwa ovaha, ni awo ennahakalala mwaha woopaka eyo. (Mir. 11:25; Mit. 20:35) Mene khanintthuneya weera ale naawompaahu yiisooneke okhala oonyesereriwa ovaha ipresente, naari oweeriha awo wuupuwela weera khaninrowa ohakalala wakhala weera khenrowa onivaha ipresente soorika. Hiyo nimmutakiha Yehova nikhalakano moonelo awe woohima sa ipresente. Vaavo nimpakaahu eyo, ninnaweeriha atthu akina ovaha ipresente ni murima aya wootheene moovarihana ni makhalelo aya. — 2 Akor. 9:7.

MUSEPAKA NI NWINAKA MAXUPO

14. Maxupo heeni atthu akina ennamorari envirihaaya?

¹⁴ Pooti weeraka nyuwosa munooviriha maxupo vaavo munampaka anyu palano a moota ekasamentu anyu enrowaaya onvuwiha Yehova. Mwa ntakihero, pooti okhala wooxupa ompaka palano oopaka ekesamentu yookhweya. Charlie a wIlhas Salomão, ohimme ha: “Waari wooxupa vantxipale waathanla atthu naarowaahu waawopa. Hiyo nookhalano asinthamwene antxipale, ni mwaha wa sookhovelela sahu, atthu ootheene enweherera owompwa!” Tabitha ohimmwale woopatxerani ohimme ha: “Nipuro miyo kinkhalaaka, ikwaha sintxipale sinnapakiwa ifeesta itokweene sa ekasamentu. Yaavira etempu weera asipapihu yaakhulele yoothanla ahu yoowaawopa atthu 100 paahi.” Sarah a wIndia ohimme ha: “Atthu akina ennavahaxa mwiitti ovuwihiwa. Asipirimu aka yaavarihela musurukhu muntxipale vakasamentuni vaya ni yaapakiha efeesta etokweene. Nto miyo, kahiisoona okhala ookhanyereriwa opaka efeesta yootepaxa oreera.” Etthu heeni enrowa waakhavihera ale ennamorari owina maxupo awo ni maxupo makina?

15. Mwaha wa heeni oraaya wootthuneya opaka nivekelo woohima sa mareherero a ekasamentu?

¹⁵ Nvekeleke woohima sa apalano anyu a ekasamentu. Nyuwosa pooti onvekela Yehova woohima sa mxupo anyu ni omuhulela murima anyu mmuleelaka moota munisonelaanyu. (Afil. 4:6, 7 ni enoota yoosoma “em tudo”) Nyuwosa pooti onvekela nikhavihero weera mpake soothanla sooreera, weera nvirelele okhala oomaaleleya vaavo munxupeyaanyu, ni weera mukhale oolipa murima watthuneya vale. (1 Ped. 5:7) Vaavo munrowaanyu woonelela weera Yehova onnaakhula mavekelo anyu, nroromelo nanyu wa Yehova nnamwaatxeerereya. Tabitha ohimmwale woopatxerani ohimme ha: “Miyo ni ole kaarowaaka othelanano nannoova onyakulihana mukina ni mukhwaawe ni emusi ahu. Mwa yeeyo, ikwaha sootheene naarowaahu wuuluma woohima sa ekasamentu, naapatxera opaka nivekelo. Nohoona nikhavihero na Yehova ni nannakhala ni murettele.”

16-17. Mwaha wa heeni oraaya wootthuneya ovaanela nnene vaavo munampakaanyu palano a ekasamentu?

¹⁶ Muulumeke mwa nttittimiho mene muhikhuwaka etthu. (Mir. 15:22) Nyuwosa munoorowa otthuneya opaka soothanla sintxipale woohima sa ekasamentu anyu. Eyo enhela mpuwa othanla nihiku, musurukhu mukavi munrowaanyu ovarihela muteko, taani munrowaanyu waawopa ni soothanla ikina. Muhinaaye opaka yoothanla, nvaaneleke woohima sa miyoonelo muraanyuno ni woohima sa miruku sa mBiblyani sinvareleya muteko. Nave-tho, muheleke mpuwa miruku mwaakhenlaanyu sa asinna ni asirokora oolipa moomunepani ni erinono sookumanano. Mwaahimaka itthu muntthunaanyu, mukhaleke ooreera murima, oowiiyeviha ni oowiisaakuviha. Mwa ntakihero, wakhala weera asipapinyu ennoovekelani opaka etthu ni onwereya opaka eyo, mweerereke opaka. Eyo etempu yoothanleya wa awo. Wakhala weera khamunwera opaka etthu enoovekelaayani, nwiiwanyeihe mooreera murima ni mwa nttittimiho. (Akol. 4:6) Mwaaleele amusi anyu weera yoolakelaanyu etokweene ti yooweera ekasamentu anyu ekhale emaara yoohakalaliha ni enanvuwiha Yehova.

¹⁷ Wakhala weera asipapinyu khaiyene Anamoona a Yehova, pooti okhala wooxupa wuuluma naawo woohima sa itthu muntthunaanyu. Mene nyuwo pooti owiiwanyeiha awo moonelo anyu mwa nttittimiho. Munna mmoha a wIndia oneeriwa Santhosh ohimme ha: “Emusi ahu yaatthuna weera nihele mpuwa sookhovelela sa ettiini hindus mukasamentuni mwahu. Miyo ni murokora kaarowaaka othelenano naaviriha etempu yiintxiplale naaleelaka soothanla sahu. Naapaka matxentxo makina mwemmo noonaahu weera wannawereya nihimunyoonyihaka Yehova. Mwa ntakihero, naatxentxa eyootxa naathanlalaahu ni eyootxa yaarowa waasivela ni naalakela ohiipa itxipo ni ohiina, mwaha wooweera awo khiyaakhovelenle itthu iyo.”

18. Etthu heeni nyuwosa muntthuneyaanyu opaka weera itthu sootheene seette nnene nihiku na ekasamentu? (1 Akorinto 14:40) (Nwehe-tho efootu.)

¹⁸ Mumpakeke palano nnene. Wakhala weera nyuwosa mohiireherera nnene khamunrowa onyoonyiheya vantxipale nihiku na ekasamentu. (Mmusome 1 Akorinto 14:40.) Wayne oTaiwan, ohimme ha: “Nihinaaye ophiya nihiku na ekasamentu, hiyo naapaka muthukumano mukhaanini ni atthu yaaivaherenre onikhavihera. Naahuuluma naawo woohima sa apalano ahu ni naahinsayari iparte sa ekasamentu ahu weera itthu sootheene seette nnene.” Opwaha mwa yeeyo, weera moonihere nttittimiho, wa ale mwawompaanyu mpake itthu weera itthu seette mpuwa mwa iwoora nvaanenlaanyu.

19. Etthu heeni enrowa wookhavihereni owehaweha itthu sootheene nihiku na ekasamentu anyu?

¹⁹ Wakhala weera nyuwo mohiireherera vahinaaye, pooti osepa maxupo makina yaarowa okhumelela. (Mir. 22:3) Mwa ntakihero, wakhala weera nyuwo munkhala muttetthe atthu ehiwompwale ekhovelenlaaya orowa ofeestani ya ekasamentu, muupuwele etthu mukhanlaanyu oopaka weera musepe maxupo. Mwaaleeleke amusi anyu ehikhanle Anamoona a Yehova etthu enrowa weereya ni nwiiwanyeihe moonelo anyu woohima sa sookhovelela ikina sa ekasamentu. Nyuwo pooti owoonihera awo mwaha oneera “O que acontece em um casamento de Testemunhas de Jeová?”, va jw.org. Weera itthu sootheene seette nnene nihiku na ekasamentu, nyuwo pooti omwaasa munna oolipa moomunepani weera akhale “diretore a efeesta.” (Yoh. 2:8) Wakhala weera nyuwosa munoomuleela nnene sene apalano mwaapankaanyu woohima sa ekasamentu anyu, owo pooti okhavihera weera itthu seette moota muntthunaanyu ni weera ekasamentu anyu ekhale yoottittimiheya.

20. Etthu heeni ale ennamorari entthuneyaaya wuupuwelela woohima sa nihiku na ekasamentu aya?

²⁰ Vaavo nyuwo monnaanyu itthu sootheene sinhela mpuwa weera mumpake palano a ekasamentu, pooti weera nyuwosa mwaaxupeya vakhaani. Mene muupuweleke weera ekasamentu ti ya nihiku nimoha paahi. Nihiku noopatxera munrowaanyu opatxeriha ekumi yooreera munvarelaka vamoha Yehova. Mpake sootheene munweraamyu weera ekasamentu anyu ekhale yookhweya ni yoottittimiheya. Mmuroromeleke Yehova, muroromeleke miruku sawe, nyuwosa munoowera oreherera nnene ekasamentu anyu. Ni vaavo munrowaanyu owehaka muttuli, nyuwosa munoorowa wuupuwelelaka itthu sooreera ni soohakalaliha muheeraka keerelani. — Nsal. 37:3, 4.