Nyuwo munnuupuwelela?

Neereke nyuwo moomusoma Nwehereri moomaaleleya eyaakha ene yeela? Vanonto, mwaakhule moomaaleleya makoho ala:

Etthu heeni enneeriha onvaha ovuwa Yehova?

Nimpaka eyo mwaaha wooweera ninnamuttittimiha moowiixera Yehova, ni ninnamusivela vantxipale. Hiyo-tho, ninnapaka eyo mwaha wooweera nintthuna weera atthu akina emusuwele. — w25.01, epaax. 3.

Wakhala weera mutthu oonitthekela, moota heeni ninrowaahu omulevelela?

Hiyo khaninsepa moota nniisoonelaahu, mene ohiya okwipi onyoonyiheya ni ommira supi pooti onikhavihera osepa maxupo enkhumelelela mwaha wa onyoonyiwa. — w25.02, eparag. 15-16.

Mwaha wa heeni mutthareli Marko oraawe ntakihero nooreera wa asinna amiravo?

Marko aahaakhulela ni oxukurela muritti wa onvarela Yehova. Nnaamweera aanyoonyihinwe ni etthu yeereñye, Marko khaatthikenle ottuli. Owo aahunnuwihera onthamwene ni Paulo ni asinna akina oolipa moomunepani. — w25.04, epaax. 27.

Etthu heeni Yesu aatthunaawe ohima vaavo aavekenlaawe: “Miyo kihaasuweliha nsina nanyu”? (Yohani 17:26)

Atthareli awe yaasuwela nsina na Muluku. Mene Yesu aahaasuweliha itthu sinhela mpuwa osuwela nsina nno, ntoko, soolakela sawe, miteko sawe ni mikhalelo sawe. — w25.05, eparag. 20-21.

Wakhala weera naatthu oowiiyeviha, ti heeni ninrowaahu waakhulela?

Nnoorowa waakhulela weera sookhala itthu nihisuwenlaahu. Mwa ntakihero, khanisuwnle liini elapo ela enrowaaya omala naari moota heeni Yehova onrowaawe opaka itthu emaara ene yeeyo. Naari khanisuwenle etthu enrowa weereya omaalo naari moota Yehova onsuwenlaawe.— w25.06, eparag. 15-18.

Etthu heeni enrowa onikhavihera ottottela mureerelo mwaha ninsomaahu naari mwaha wa vanlakani?

Niikoheke ha: ‘Itthu heeni sivarihelinwe muteko weera yiiwanyeihiwe atthu? Neereke nookhalavo ntakihero kinrowaaka ovarihela muteko emaara kimmuxuttihaaka mutthu ekhaikhai ela? Taani aarowa osiveliwa wiiwa mwaha ola?’ — w25.07, epaax. 19.

Etthu heeni ninxutteraahu woohima sa nlevelelo na Muluku vaavo ninthokororaahu moota aamulevelenlaawe David?

Nnaamweera David aapanke soottheka itokweene, vaavo aattharunwaawe ni murima awe wootheene Yehova aamulevelela. (1 Mam. 9:4, 5) Vaavo Muluku onlevelelaawe, owo khanwehexexa yoottheka eyo ya khalayi, naari khanuupuwelela veeli muhoolo.— w25.08, epaax. 17.

Wakhala weera yookhala etthu emmuxupa namasoma anyu a Biblya, etthu heeni muntthuneyaanyo opaka?

Wakhala weera yookhala etthu emmuxupa namasoma anyu a Biblya, nnaamweera nyuwo mwerenreene omuxutthiha munvarihelaka muteko Biblya, mmuhiye ni mmutthikele emaara ekina. — w25.09, epaax. 24.

Biblya onhima weera yoottheka yookhalano “owera woowootha.” (Aheb. 3:13) Entthuna ohima eheeni masu ala?

Yoottheka pooti oneeriha opaka itthu soonanara. Nave-tho, pooti oniwoka eneerihaka ohovela, nsivelo na Muluku. — w25.10, epaax. 16.

Itthu heeni tthaaru sinrowa weeriha mavekelo ahu a omeekha okhala ooreera?

(1) Nintthuneya wuupuwelela mikhalelo sa Yehova. (2) Nintthuneya wuupuwelelaka woohima sa ele ninvirihaahu ni ohima, ntoko ntthuno nahu noomulevelela mutthu. (3) Nintthuneya ovirelela opaka mavekelo. Opaka eyo, enoonikavihera ohima miyuupuwelo sahu soowiixera. — w25.10, eparag. 19-20.

Moota heeni ninrowaahu waakavihera atthu oowuuluvala?

Hiyo pooti waaxekura naari waalikarela asinna oowuuluvala. Nave-tho, pooti waahoola ospitaale. Naaari pooti ovara vamoha ni asinna awo oowuuluvala mwa mikhalelo soovirikana mmutekoni moolaleera. — w25.11, eparag. 6-7.

Itthu heeni siri sootthuneya weera akasamantu ya mukristu ekhale yoottittimiheya?

Mukwanihereke malamulo ootheene enkumiheriwa ni kuvernu. Nwehexexeke weera efeesta ya ekasamentu ni itthu sinrowa opakiwa soonihereke soowiima sa munepa wa Muluku. Mukhaleke oowiiyeviha mwaathanlaka itthu munrowaanyu owara, ni mwiikosoope weera musepe sookhovelela sihinvarihana ni Biblya. Nvaaneleke nnene vaavo munampakaanyu palano a ekasamentu. — w25.12, eparag. 21-24.