Silempwale ni Luka
20 Nihiku nimosa, Yesu owiixuttihaka atthu mutemplo ni olaleyaka ihapari sooreera, makhulupale a anamukuttho ni alipa-oowiixuttiha nlamulo ni makhulupale a ayuda, yaahirwa, 2 anamukoha, yiiraka: “Munileele, niireke muheemereriwa opaka itthu iya? Murummwale naani?”+ 3 Yesu aahiwaakhula wiira: “Ni miyo-tho kinimookohani etthu emosa. Mukileele: 4 Opatiso wa Yohani, waakhumme wa Muluku* aahiiso wa atthu?”* 5 Awo yaahipacerya ovaanela yaawo-ru ariki: “Naakhula wiira: ‘Wa Muluku’,* owo onoonikoha wiira: ‘Nto xeeni muhalaka ohimwaamini Yohani?’ 6 Masi naakhula wiira: ‘Wa atthu’, atthu ootheene anoonivonyakasa maluku, maana annimoona Yohani okhala profeta”.+ 7 Tivonto, yaahimwaakhula Yesu ahimyaka wiira khiyaasuwela waakhuma aya. 8 Nto Yesu aahaaleela wiira: “Ni miyo-tho nkinooleelani ole okivanhe owerya wiira kipake itthu iya”.
9 Yesu aahipacerya waaleela atthu nlikanyiho nla, oriki: “Mulopwana mmosa aahikhalana ematta awe ya ewuuva.+ Nuumala-vo, aahaahiyerya alimi, khurowa elapo ekina. Nto aahikhala weiwo okathi munceene.+ 10 Waaphiyale aya okathi woohepha, mwaneene ematta aahimuruma murumeyi awe orowa okumana ni alimi ale, wiira anvahererye epantta ya mihokorokho sawe. Vano, alimi ale yaahimmana murumeyi owo, emoomola matata-ru.+ 11 Masi owo aahimuruma-tho murumeyi awe mukina. Alimi awo, yaahimmana, anveeha ni amoomola matata-ru. 12 Nto aahimuruma a neeraru. Nave alimi awo yaahinvulaliha, khumoomola. 13 Nuumala-vo, mwaneene ematta ya ewuuva, aahihimya wiira: ‘Kipake exeeni? Kinrowa omuruma mwanaka mwaamulopwana, onimphentexa aka.+ Kinoona wiira awo anoomuttittimiha’. 14 Okathi alimi ale yanwehale aya mwaana owo, yaahihimeeryana wiira: ‘Ola tonrowa ohalana ematta ela. Nrowe nimwiive, nto itthu sootheene sinookhala sawihu’. 15 Siiso, awo yaahimpurulela ota wa ematta ya ewuuva, khumwiiva.+ Vano mwaneene ematta onrowa opaka exeeni? 16 Owo onimoorwa owiive alimi ale, nto ematta ele aavahe atthu akina”.
Okathi yaiwale aya nlikanyiho nle, atthu yaahihimya wiira: “Etthu eyo ehiiraneye siiso!” 17 Nto Yesu aahaawehexexa atthu ale, onaakoha iiraka: “Vano, enitaphulela exeeni yoolepa enihimya wiira: ‘Nluku nenlo alipa-ooteka empa yaakhontte aya, nookhalihiwa nluku nuulupale na alisenso’?+ 18 Nave, mutthu onimorela nluku nna, onimuntakaseya.+ Ole onrowa omoreliwa ni nluku nla, onoonyakattiwa”.
19 Ewoora ene yeeyo, alipa-oowiixuttiha nlamulo ni makhulupale a anamukuttho, yaaniphavela onvara Yesu. Masi yaaniwoova atthu, okhala wiira yaahisuwela wiira Yesu aahilavula nlikanyiho nna aahimyaka yaawo.+ 20 Awo yaaniphavela okathi wooreerela wiira anvare Yesu. Tivo, yaahaaliva alopwana akina wiira yoothereryeke okhala anaxariya, aphavelaka onvara Yesu ni moolumo awe.+ Nuumala-vo, anvahererye mukhulupale a kuvernu. 21 Vano awo yaahimukoha wiira: “Mwiixuttihi, noosuwela wiira munilavula ni muniixuttiha ekeekhai ni khamunimuthanla mutthu, masi muniixuttiha ekeekhai ya Muluku: 22 Niireke vannireerela hiyo omuliva mpoosito Seesari wala nnaari?” 23 Masi osuwelaka olavilavi aya, Yesu aahaahimeerya wiira: 24 “Mukooniherye etenaario.* Elatarato ela ni nsina munoona anyu-va, ti yawani?” Awo yaahaakhula wiira: “Ti ya Seesari”. 25 Yesu aahaahimeerya wiira: “Weeso, munvaheke Seesari ekhanle ya Seesari,+ nave munvaheke Muluku ekhanle ya Muluku”.+ 26 Siiso, khiyaawenrye onvara ni moolumo aalavunle awe ohoolo wa atthu. Vano yaahimaala, okhala wiira waakhula wawe waahaatikiniha vanceene.
27 Masi, asaduki akina, yaawo anihimya wiira alipa-ookhwa khanihihimuxiwa,+ yaahimwaattamela Yesu, anamukoha yiiraka:+ 28 “Mwiixuttihi, Moise oolepa wiira: ‘Akhala wiira mulopwana ookhalana mwaarawe, masi mulopwana owo khukhwa ohiyaranne mwaana, munnawe ohaana omuthela naamukhweli owo, wiira omuyarele anamwane ole okhwiiye’.+ 29 Nto yaahikhala axinna 7. Ole oopacerya aahimuthela mwaarawe, masi mulopwana owo aahikhwa ohiyaranne mwaana. 30 Vano a nenli 31 ni a neeraru yaahimuthela naamukhweli owo. Alopwana ale 7 yaahimuthela. Awo yaahikhwa ahiyaranne anamwane. 32 Wookiseryani waya, muthiyana ole aahikhwa. 33 Vano-nto, okathi anrowa aya ohihimuxiwa alipa-ookhwa, tuuvi onrowa omukuxa muthiyana owo? Maana alopwana ale 7, yaahimuthela”.
34 Yesu aahaahimeerya wiira: “Atthu a olumwenku ola,* annithela ni annitheliwa. 35 Masi ale aniphwanela okela olumwenku onirwa ni ohihimuxiwa mookhwaani, khanthela nnakhala khantheliwa.+ 36 Tthiri, awo khanikhwa-tho, maana ari ntoko malaikha. Nave okhala wiira anrowa ohihimuxiwa, awo anrowa okhala anamwane a Muluku. 37 Vano wiira alipa-ookhwa annihihimuxiwa, hata Moise ohooniherya muliivuruni olavulaka mwaha wa mwiri waapatta mooro, okathi aamuhimya awe Yehova* okhala ‘Muluku a Abrahamu, Muluku a Isaakhi ni Muluku a Yakobe’.+ 38 Owo khahiyo Muluku aalipa-ookhwa, masi Muluku a atthu akumi, okhala wiira onniwoona ootheene okhala akumi”.+ 39 Alipa-oowiixuttiha nlamulo akina yaahihimya wiira: “Mwiixuttihi, moolavula saana”. 40 Tthiri, khuuvo-tho aawenrye ominyala wiira omukohe etthu.
41 Yesu aahaakoha wiira: “Atthu aniwerya sai ohimya wiira Kristu ti mwaana a Davidi?+ 42 Tthiri, Davidi onnihimya eliivuru ya Isaalimu wiira: ‘Yehova* oomuleela Pwiya aka wiira: “Mukilaathi moono aka woolopwana, 43 mpakha miyo waapweha awanani inyu vathi va inawu sanyu”’.+ 44 Davidi onimuhimya Kristu okhala Pwiya. Nto, vaniweryaneya sai okhala mwanawe?”
45 Nlelo atthu ootheene anwiriyanaka, Yesu aahaahimeerya awiixutti awe wiira: 46 “Mwiikasoope ni alipa-oowiixuttiha nlamulo. Awo waasivela weetta awanre ene malaya oorakama ni okhomasiwa ni nttittimiho mapuro oowaatta atthu.* Nave waasivela okilaathi musinagoga,* mapuro oohoolo* ni mapuro oosuwanyeya ofestani.+ 47 Awo anniiya mireerelo sa anaamukhweli, nave annipaka mavekelo oorakama wiira yooniwe ni atthu. Ophukeliwa waya onrowa okhala wuulupalexa”.