Zakariya
11 “Muhule mikhora sanyu, nyuwo Liibano,
Wiira mooro opahe miri sanyu sa eseeturu.
2 Mwiikhupanyerye, nyuwo mwiri oniihaniwa xuniiperu, okhala wiira mwiri wa eseeturu woomora,
Nave miri suulupale soopwetexiwa!
Mwiikhupanyerye, nyuwo miri siniihaniwa karvaalyo* sa oBaxani,
Okhala wiira etakhwa yuulupale yoohononiwa!
3 Mwiiweke! Amakampusi animwiikhupanyerya,
Okhala wiira ovuwa waya woomala-malihiwa.
Mwiiweke! Akharamu acikhaani anoopa murukulu,
Okhala wiira itakhwa suulupale saari mukerekhere mwa oYordani soopwetexiwa.
4 “Etthu onihimya awe Yehova, Muluku aka, tiila: ‘Mukukhuleke ipwittipwitthi saka sinrowa wiiviwa,+ 5 seiyo alipa-oothuma anihita aya+ ahinakhalana mulattu. Nto ale anitumiha+ annihimya wiira: “Ottottopeliwe Yehova, okhala wiira kinoothaaciri”. Nave amakampusi aya khanimorela ikharari ipwittipwitthi iyo’.+
6 “Yehova onihimya wiira: ‘Miyo kinoohiya waamorela ikharari atthu anikhala elapo ela. Khula mutthu kinonvahererya mmatatani mwa mukhwaawe ni mmatatani mwa mwene awe, nto awo anoohonona elapo ela, nave miyo nkinrowa owoopola mmatatani mwaya’”.
7 Nyuwo ipwittipwitthi sixankale, miyo kaahipacerya okukhula ipwittipwitthi saarowa wiiviwa,+ wiira koophwanyiheni mureerelo. Nto kaahikuxa ikopo piili, emosa kaahivaha nsina noowi Oreera Murima, ekina nsina noowi Wiiraana,+ nto kaahipacerya okukhula ipwittipwitthi. 8 Mweeri mmosa paahi kaahiwoomola amakampusi araru, okhala wiira nkaawerya waavilela, nave awo yaanikithanya. 9 Nto miyo kaahihimya wiira: “Miyo kinoohiya wookukhulani. Ele ehanle okhwa ekhweeke, ele ehanle omala-mala emala-maleke. Iye sinrowa ohala sikhuuraneke seiyo-ru”. 10 Tivonto, kaahikuxa ekopo aka eniihaniwa Oreera Murima,+ kinta, kimalihaka nivarihano naka kaapanke aka ni atthu ootheene. 11 Nto nlamulo naka naahimala-mala nihiku nle, nave ipwittipwitthi iye saahaaxiwa saakiweha, saahisuwela wiira yaari moolumo a Yehova.
12 Moottharelana miyo kaahaaleela wiira: “Moonaka oreerela, mukiliveke esalaario aka, masi mwaahooneke oreerela muhikiliveke”. Nto awo yaahikiliva* esalaario aka, musurukhu 30 wa eparatha.+
13 Nuumala-vo, Yehova aahikileela wiira: “Murihele musurukhu owo opuro onisukiwa mihakhu, musurukhu yoowo ohirina efaita, akiphwanelihale aya”.+ Siiso miyo kaahikuxa musurukhu owo 30 wa eparatha, kirihela opuro onisukiwa musurukhu empa ya Yehova.+
14 Nuumala-vo kaahinta ekopo ya nenli, yiihaniwa Wiiraana,+ kimalihaka wiiraana waakhanle eriyari ya Yuda ni Isarayeli.+
15 Nuumala-vo Yehova aahikileela wiira: “Mukuxe ekaruma ya makampusi ohirina efaita.+ 16 Kinoomukumiherya makampusi elapo ela. Owo khonrowa okhapelelaka ipwittipwitthi sihanle okhwa,+ aahiiso khonrowa owaavyaka axaana aya, nnakhala khonrowa openuxaka ipwittipwitthi sirina makhwatta,+ wala khonrowa olyihaka iye siniwerya weemela. Ohiya-vo onookhuura enama ya ipwittipwitthi sooneneva,+ ni onookumiha itthottopwa* sa ipwittipwitthi.+
17 Ootakhaliwa makampusi aka ohirina efaita,+ yoowo oninyanyala ipwittipwitthi sawe!+
Moono awe ni niitho nawe noolopwana nnoothikiliwa ni espaata.*
Moono awe onimuuma,
Nave niitho nawe noolopwana khaninrowa oweryaka woona”.