Samuweli Oopacerya

12 Wookiseryani, Samuweli aahaaleela atthu ootheene a Isarayeli wiira: “Koovara* itthu sootheene mwaakivekenle anyu, ni koomuthanla mwene wiira oolamulelekeni.+ 2 Ola ti mwene onrowa woohoolelakani.+ Miyo kihuuluvala, koomela ipwi, nave anaaka ari eriyari anyu.+ Miyo kooweettihani okhuma omiravo aka, mpakha olelo-va.+ 3 Miyo kiri-va. Mukihimeerye ohoolo wa Yehova, ni ohoolo wa ole omuthanlale awe:+ Kiireke ookhala mutthu kimwaakhale aka epooyi awe wala puuru awe?+ Aahiiso ookhala kinwonke aka wala kimuhaaxale aka? Niireke kihaakhelela etthu wiira kihiphuke mulattu oratteene?+ Akhala wiira koopaka eyo, kinimoolivani sootheene”.+ 4 Atthu yaahaakhula wiira: “Nyuwo khamutonko oniwoka, wala onihaaxa, nnakhala khamutonko waakhelela etthu”. 5 Samuweli aahiwaakhula wiira: “Yehova ni ole omuthanlale awe, ti anamoona nihiku nla, wiira khamukiphwanyanne mulattu”. Vano atthu yaahimwaakhula wiira: “Aayo, owo ti namoona”.

6 Samuweli aahaaleela atthu wiira: “Yehova, yoowo aamuthanlale Moise ni Aroni, wiira aakumihe amuhavinre anyu elapo ya wExiitu,+ ti namoona. 7 Vano, mweemelase siiso, nave miyo kinimoophukelani ohoolo wa Yehova, mwaha wa miteko sootheene sa xariya, Yehova owiirenlaaweni ni aawiirenle awe amuhavinre anyu.

8 “Nuumala Yakobe ophiya wExiitu,+ nave amuhavinre anyu opacerya omukhuwelela Yehova wiira aakhaliherye,+ Yehova aahimuruma Moise+ ni Aroni. Alopwana awo, yaahaakumiha amuhavinre anyu elapo ya wExiitu, yaaruuha elapo ela wiira akhaleke muumu.+ 9 Masi yaahimuliyala Yehova, Muluku aya. Vano Muluku owo aahaavahererya+ mmatatani mwa Sisera,+ mukhulupale a anakhotto a oHasori, ni mmatatani mwa afilisti,+ ni mmatatani mwa mwene a oMowabi.+ Siiso awanani awo yaahiwana ni amuhavinre anyu. 10 Vano yaahimukhuwelela Yehova wiira aakhaliherye,+ ariki: ‘Hiyo noottheka,+ okhala wiira noomuhiya Yehova nnaarumeela amuluku a Bayaali,+ ni ilatarato sa Astoreti.+ Vano munoopole mmatatani mwa awanani ihu, wiira noorumeelekeni’. 11 Moottharelana, Yehova aahimuruma Yerubayali,+ Bedani, Yefte,+ ni Samuweli.+ Awo yaahiwoopolani mmatatani mwa awanani inyu ootheene, wiira nweryeke okhala ni murettele.+ 12 Okathi moonale anyu wiira Nahaxi,+ mwene a atthu a wAmoni, aahirwa wiira owane ni nyuwo, mwaahithipelela okiirela wiira: ‘Nnaari, nnimphavela mwene wiira onilamuleleke!’+ nnaamwi Yehova, Muluku anyu, ori ene Mwene anyu.+ 13 Vano, ola-va ti mwene omuthanlale anyu, yoowo mwanvekenle anyu. Mwiiwe, Yehova ohoothanlelani mwene, wiira oolamulelekeni.+ 14 Akhala wiira munoomuttittimiha vanceene* Yehova,+ ni munoomurumeela,+ ni munoomwiiwelela,+ ni khamunrowa ovirikanya sooruma sa Yehova, nave akhala wiira nyuwo ni mwene onrowa woolamulelakani munoomutthara Yehova, Muluku anyu, vaareera. 15 Masi, akhala wiira khamunrowa omwiiwelela Yehova, munavirikanya sooruma sa Yehova, ntata na Yehova nnimoovirikanyani vamosa ni axipaapa anyu.+ 16 Vano, mweemele siiso, moone etthu yootikiniha Yehova onrowa awe opaka vamaithoni vanyu. 17 Ola khahiyo okathi woohepha etiriku? Kinoomukhuwelela Yehova, wiira okumiherye okukutteya* ni epula. Nto munoosuwela wiira moopaka etthu yootepa otakhala vamaithoni va Yehova, munvekelaka mwene”.+

18 Moottharelana, Samuweli aahimukhuwelela Yehova, vano Yehova aahikumiherya okukutteya ni epula nihiku nenne. Nto atthu ootheene yaahimoova vanceene Yehova ni Samuweli. 19 Atthu ootheene yaahimuhimeerya Samuweli wiira: “Munvekele Yehova, Muluku anyu, mwaha wa arumeyi anyu,+ maana khanimphavela okhwa. Tthiri, nihincererya soottheka sahu sootheene, ninvekelaka mwene”.

20 Samuweli aahaaleela atthu wiira: “Muhoove etthu. Tthiri nyuwo moopaka etthu ela yootakhala yuulupale. Masi, muhihiye omutthara Yehova,+ ni mmurumeeleke Yehova ni murima anyu wootheene.+ 21 Muhitthareke itthu seethiru,*+ seiyo sihimphwanyiha mureerelo+ ni sihinwerya woopola, okhala wiira iyo itthu seethiru. 22 Mwaha wa nsina nawe nuulupale,+ Yehova khonrowa waanyanyala atthu awe,+ maana Yehova oolakela wiira mukhale atthu awe.+ 23 Miyo, nkinkhala-khala kimutthekelaka Yehova, kihiyaka woovekelelani. Nave nkinihiya owiixuttihani ephiro yooloka ni ya xariya. 24 Masi, kinoovekelani wiira mmuttittimiheke vanceene* Yehova,+ mmurumeeleke moororomeleya* ni murima anyu wootheene, okhala wiira mooweha itthu suulupale Muluku owiirenlyaaweni.+ 25 Vano, mwalakela opaka etthu yootakhala, munoopwetexiwa,+ nyuwo ni mwene anyu”.+