Samuweli Oopacerya
10 Samuweli aahikuxa murinki mwaamukhaani wa makhura, ni aahiitthela vamuru wa Sawuli,+ onvaha epeexo, onahimya wiira: “Yehova ohoothanlani wiira mwaahooleleke atthu awe.+ 2 Olelo, okathi munrowa anyu okhuma-va, munimwaaphwanya alopwana anli yeemenle ene waattamela vamahiye a Rakeli,+ muttetthe wa nihimo na Beniyamini, oSelisa. Awo animooleelani wiira: ‘Apuuru mwaaronwe anyu waaphavela, aaphwanyiwa, masi, paapa anyu ohaaliyala apuuru awo,+ nto onxankiheya ni nyuwo. Owo onikoha wiira: “Kinrowa omphwanya woowi mwanaka?”’ 3 Nvenyaka-ru, murowe opuro ori mwiri muulupale wa oTabori. Weiwo munimwaaphwanya alopwana araru arowaka oBeteli, wiira yamukokhorele Muluku eekeekhai.+ Mmosa okunxe ene ipuri tthaaru, mukina okunxe ene iphaawu tthaaru, nave mukina okunxe ene murinki muulupale wa eviinyu. 4 Alopwana awo animookohani ihaali, ni animoovahani iphaawu piili. Mwaakhelele iphaawu iyo anrowa aya woovahani. 5 Nuumala-vo, munoophiya opuro woorakamela osulu onikokhoreliwa Muluku eekeekhai, weiwo eri aya ekurupu ya anakhotto a afilisti. Mwaphiya vale opooma, munoophwanya ekurupu ya maprofeta elavulaka eprofesia, ekhuruwaka opuro woorakamela osulu onikokhoreliwa Muluku. Ohoolo wa maprofeta awo, anookhala atthu anrowa owoopaka atthakare, malapa, iphivi,* ni aviola.* 6 Ikuru sa Yehova sinimoovahani owerya,+ nave munrowa olavulaka eprofesia ni maprofeta awo, ni munrowa okhalaka ntoko mutthu mukina.+ 7 Okathi sinrowa aya okhumelela isinaale iyo, mpake sootheene muniwerya anyu, okhala wiira Muluku eekeekhai ori ni nyuwo. 8 Nuumala-vo, muhooleke murowaka oXiligali.+ Miyo kinimoophwanyani weiwo wiira kivahe mikuttho soopahiwa, ni mikuttho sa opatthani. Mwakilipeleleke mahiku 7, mpakha miyo orwa. Moottharelana, kinimooleelani etthu mukhanle anyu oopaka”.
9 Nuumala Sawuli okhuma opuro aari awe Samuweli, Muluku aahipacerya oturuka murima wa Sawuli, wiira okhale ntoko wa mutthu mukina. Itthu sootheene saahimeeriwe awe ni Samuweli, saahiiraneya nihiku nenle. 10 Nuumala-vo, yaahirowa opuro woorakamela osulu, nave ekurupu ya maprofeta yaahirwa okumana nuuwo. Niinaano-ru, ikuru sa Muluku saahinvaha owerya Sawuli,+ onapacerya olavula eprofesia+ eriyari aya. 11 Okathi atthu ootheene yaamusuwela khalai yaamoonale aya olavulaka eprofesia vamosa ni maprofeta awo, yaahikohana ariki: “Exeeni enimwiiraneela mwaana a Kiixi? Niireke Sawuli nave profeta?” 12 Mulopwana mmosa a weiwo, aahikoha wiira: “Ankhi maprofeta ala makina, anamwane aawani?” Ti siiso okhumelenle awe muhapo oni: “Niireke nave Sawuli profeta?”+
13 Sawuli vaamalinhe awe olavula eprofesia, aahirowa opuro woorakamela osulu onikokhoreliwa Muluku. 14 Muhoolo mwaya, munnawe paapa awe Sawuli, aahimukoha Sawuli ni murumeyi awe wiira: “Mwaaronwe woowi?” Sawuli aahaakhula wiira: “Naaronwe waaphavela apuuru,+ masi khinaaphwannye. Tivo naahirowa wa Samuweli”. 15 Tiiyu awe Sawuli aahimukoha wiira: “Xontte, mukileele, Samuweli oohimenryeni exeeni?” 16 Sawuli aahimwaakhula tiiyu awe wiira: “Onilenle wiira apuuru awo aaphwanyiwa”. Masi Sawuli khaamulenle tiiyu awe, ele Samuweli aamuhimenrye awe mwaha wa omwene.
17 Vano Samuweli aahiwiihana atthu wiira athukumane ohoolo wa Yehova, oMisipa.+ 18 Nuumala-vo, aahaaleela aisarayeli wiira: “Etthu onihimya awe Yehova, Muluku a Isarayeli tiila: ‘Ti miyo kaakuminhe aisarayeli elapo ya wExiitu,+ nave ti miyo kiwooponleni mmatatani mwa atthu a wExiitu, ni mmatatani wa mamwene ootheene yoohaaxani. 19 Masi, olelo nyuwo moomukhootta Muluku anyu,+ yoowo owooponleni mixankiho sanyu sootheene ni ihasara, ni moohimya wiira: “Nnaari, munithanlele mwene wiira onlamuleleke”. Vano mweemele ohoolo wa Yehova, nihimo ti nihimo, ni emusi ti emusi’”.
20 Samuweli aahiihana mahimo ootheene a Isarayeli, wiira yaattamelane.+ Nto nihimo na Beniyamini naahithanliwa.+ 21 Moottharelana, Samuweli aahiihana nihimo na Beniyamini wiira nrowe ohoolo, moovarihana ni imusi saya. Nto emusi ya Matiri yaahithanliwa. Wookiseryani waya, Sawuli mwaana a Kiixi aahithanliwa.+ Masi okathi atthu yaaronwe aya omphavelasa, khiyamphwannye. 22 Vano atthu yaahimukoha Yehova ariki:+ “Niireke nlelo mulopwana owo khorwiiye?” Yehova aahaakhula wiira: “Ohoorwa, orimwiipitha”. 23 Siiso, atthu ale yaahimurowela Sawuli opuro iipinthe awe, atthimakaka. Okathi Sawuli eemenle awe eriyari ya atthu, aari ootepa orakama waavikana atthu ootheene. Nave atthu akina yammalela mmakhatani.+ 24 Vano Samuweli aahaaleela atthu ootheene wiira: “Monweha ole Yehova omuthanlale awe?+ Khaavo eriyari ya atthu ootheene onlikana nuuwo”. Vano atthu ootheene yaanikhuwela ariki: “Mwene okhaleke mahiku ootheene!”
25 Samuweli aahaaleela atthu, itthu yaarowa aya onvahaka mwene.+ Nto aahilepa itthu iyo muliivuruni, opweha ohoolo wa Yehova. Moottharelana, Samuweli aahaaleela atthu ootheene wiira aroweke owannyeya. 26 Nave-tho Sawuli aahirowa owannyawe oXibeya, ohooliwaka ni anakhotto yaawo Yehova aatumerenrye awe opaka eyo. 27 Masi alopwana akina oohifai, yaahihimya wiira: “Ola onrowa onoopola sai?”+ Nto yaahimuthanya, ni khiyanvanhe etthu.+ Masi Sawuli aaroomaala paahi.*