Eezira

9 Nuumala ovariwa itthu iya sootheene, makhulupale yaahikaattamela anakileela wiira: “Atthu a Isarayeli, anamukuttho ni alevi khavalanne ni atthu a elapo ela, nave annipaka itthu soohiirya,+ eyo piiyo, sa akanaani, ahiti, aperizi, ayebusi, atthu a wAmoni, atthu a oMowabi, atthu a wExiitu+ ni atthu a wAmori.+ 2 Awo ahaathela anamwane axithiyana a atthu awo, nave ahaatheliha anaaya axilopwana.+ Vano, nloko nla noowaarya,+ nootakaahana ni atthu a ilapo iya saarukurenrye.+ Nave makhulupale ni makuvernatoro makina tatempe opaka etampi”.

3 Nuumala wiiwa etthu ela, kaahikhera nlaya naka na muhina ni na ota, kaahaasula ikharari sikina sa mmuru mwaka ni ereru aka, kikilaathi kixankale ene vanceene. 4 Moottharelana, ootheene ale yaattittimiha moolumo a Muluku a wIsarayeli yaahithukumana, akirukurerya, mwaha wa ohiroromeleya wa atthu yaakhumme weepotthani, nlelo kikilanthi ene, kixankale ene vanceene mpakha okathi wa yoovaha ya ipyo saavahiwa makaaripi.+

5 Waaphiyale aya okathi wa yoovaha ya ipyo+ saavahiwa makaaripi, kaahivenya opuro kanla aka, nlaya naka na muhina ni na ota nikhereyale ene. Nave kaahikokhora kimuteexerya matata aka Yehova, Muluku aka. 6 Nto kaahihimya wiira: “Khoo Muluku aka, kinnuuliwa muru. Nave kinoona wiira nkiniphwanela owaattamelani wiira koovekeleni. Muluku aka, ifaalya sahu khasinkontareya, nave mulattu ahu ohuukeleya mpakha ophiya wiirimu.+ 7 Okhuma mahiku a amuhavinre ahu mpakha olelo, mulattu ahu onnitepa wunnuwa.+ Mwaha wa ifaalya sahu, hiyo, mamwene ahu ni anamukuttho ahu, ninnivahereriwa mmatatani mwa mamwene a ilapo sikina, nihaaxiwaka ni espaata,*+ oroihiwa weepotthani,+ wiiyeriwa+ ni wuulihihiwa muru ntoko sinooneya aya olelo.+ 8 Masi okathi vakhaani, nyuwo Yehova Muluku ahu, moonimorela ikharari, mweemereryaka wiira atthu akina yoopowe. Moonivaha opuro woovareleleya, eyo piiyo, opuro anyu woowaarya,+ wiira maitho ahu, yaaryeke, nave wiira munimumulihe vakhaani naari ahu ipottha. 9 Hata niri ene ipottha,+ nyuwo Muluku ahu khamunihiyale weepotthani. Masi moonooniherya ophenta wanyu woororomeleya ohoolo wa mamwene a oPersia,+ munivahaka ikuru wiira nitthikele oteka empa ya Muluku ahu,+ yeeyo yaahononiwe. Nave-tho moopaka etthu wiira munikhapelele* oYuda ni oYerusalemu.

10 “Masi vano, Muluku ahu, nihimye exeeni nuumala itthu iya sootheene? Hiyo noohiya sooruma sanyu, 11 seiyo munivanhe anyu mwaarumeelaka arumeyi anyu, maprofeta, muhimyaka wiira: ‘Elapo munrowa anyu okuxa wiira ekhale yawinyu, khelonke mwaha wa atthu anikhala mulaponi memmo, ni mwaha wa itthu soohiirya anipaka aya. Awo aasariha mulaponi-mmo itthu soohiloka, okhuma oponta mpakha oponta.+ 12 Tivo muhaavahe aniinyu axithiyana wiira atheliwe ni anaaya axilopwana, nnakhala muheemererye wiira anaaya axithiyana atheliwe ni aniinyu axilopwana,+ muhipake etthu yaarowa owiiriha okhalana murettele ni othaaciri.+ Mwaiwelela, munookhala oolipa, munimoolya yoolya yooloka ya elapo eyo ni munookuxa elapo eyo wiira ekhale ya aniinyu mahiku ootheene’. 13 Nuumala itthu iya sootheene sinikhumelenle mwaha wa miteko sahu sootakhala, ni mwaha wa mulattu ahu muulupale, nyuwo Muluku ahu, khampanke etthu muttharaka soottheka sahu,+ nave mooneemererya hiyo niri-va okhala akumi.+ 14 Niireke nnootthikela ohiiwelela sooruma sanyu, nave nnootthikela othelana ni atthu anipaka itthu iya soohiirya?+ Niireke khimwaarowa onanariwa ni hiyo mpakha onipwetexa moomalela muhimuhiyaka nnakhala mutthu mmosa mukumi? 15 Yehova Muluku a Isarayeli, nyuwo mwa naxariya,+ okhala wiira nihoopowa ntoko atthu vakhaani ahanle mpakha olelo-va. Hiyo niri-va, ohoolo wanyu ni mulattu ahu, okhala wiira mwaha wa etampi ela khivanweryaneya weemela ohoolo wanyu”.+