Wahala Oopacerya
26 Makwarta a vamukhora+ yaakawanyiwe so: Akorathi aahikhala Mexelemiya,+ mwaana a Kore, a osuulu wa Asafi. 2 Mexelemiya aahikhalana anamwane ala: Oopacerya oyariwa aari Zakariya, a nenli aari Yediyayeli, a neeraru aari Zebadiya, a neexexe aari Yatiniyeli, 3 a neethanu aari Elami, a neethanu namosa aari Yehohanani ni a neethanu nenli aari Eliyeho-Enayi. 4 Nave Obedi-Edomi aahikhalana anamwane ala: Oopacerya oyariwa aari Xemaya, a nenli aari Yehozabadi, a neeraru aari Yowa, a neexexe aari Sakari, a neethanu aari Netaneli, 5 a neethanu namosa aari Amiyeli, a neethanu nenli aari Isakari, ni a neethanu neeraru aari Pewuletayi. Tthiri Muluku aahimureeliha Obedi-Edomi.
6 Nave Xemaya, mwaana a Obedi-Edomi, aahikhalana anamwane yaari ahooleli a imusi saya, okhala wiira yaari alopwana a ikuru ni oowerya. 7 Anamwane a Xemaya yaari ala: Otini, Refayeli, Obedi ni Elizabadi. Nave-tho, axinnawe Elihu ni Semakiya yaari alopwana oowerya. 8 Ootheene ala yaari anamwane a Obedi-Edomi. Awo ni anaaya ni axinnaya yaari alopwana oowerya ni oosuwela ovara muteko. Atthu a emusi ya Obedi-Edomi yaari 62. 9 Vano, anamwane ni axinnawe Mexelemiya+ yaari alopwana 18 oowerya. 10 Nave Hosa a osuulu wa Merari aahikhalana anamwane. Muhooleli aari Ximiri, okhala wiira nnaamwi ahaakhanle oopacerya oyariwa, paapa awe aahimuthanla wiira okhale muhooleli, 11 a nenli aari Hilikiya, a neeraru aari Tebaliya, nave a neexexe aari Zakariya. Anamwane ootheene a Hosa ni axinnawe yaari 13.
12 Ahooleli a ekurupu ela ya makwarta a vamukhora, yaahikhalana muteko yaavara aya empa ya Yehova, ntoko axinnaya. 13 Nto awo yaahivonya esoorti+ ettharaka imusi saya, ekhale acikhaani aahiiso aalupale, wiira asuwele mukhora aarowa awe okhalaka khula mutthu. 14 Vano, esoorti ya mukhora waakhala mpantta onikhuma nsuwa yaahimmorela Xelemiya. Nto, awo yaahivonya esoorti ya mukhora waakhala onorti, emmorela Zakariya, mwanawe Xelemiya, yoowo aasuwela ovaha miruku. 15 Esoorti ya mukhora wa osuuli yaahimmorela Obedi-Edomi, vano anaawe+ yaahithanleliwa waakhapelela arumasiya. 16 Esoorti ya mukhora waakhala mpantta onikela nsuwa, waattamela mukhora wa Xalekethi, mukerekhere mwa estaraata yaawela, yaahimmorela Xupimi ni Hosa.+ Ekurupu emosa ya makwarta yaakhala mpantta mukina wa ekurupu ekina ya makwarta. 17 Nave yaanikhala alevi 6 mpantta onikhuma nsuwa, ni khula nihiku yaanikhala alevi axexe onorti ni alevi axexe osuuli. Vano, waarumasiya yaanikhala makwarta+ manli yaattamana ni makwarta makina manli. 18 Nave vamukhora, mpantta onikela nsuwa, yaanikhala alevi axexe yaattamela estaraata,+ ni alevi anli yaattamela mukhora. 19 Ela yaari enamuna yaakawanyiwe aya makwarta a vamukhora, yaawo yaari a osuulu wa akorathi ni amerari.
20 Eriyari ya alevi, Ahiya aahithanliwa wiira okhapeleleke mihakhu sa empa ya Muluku eekeekhai ni mihakhu sa itthu saakhalihiwe soowaarya.+ 21 Eriyari ya anamwane a Ladani, eyo piiyo, osuulu wa Gerisoni, aahikhala Yehiyeli,+ yoowo aari mmosa a ahooleli a emusi ya Ladani. 22 Vano anamwane a Yehiyeli, aari Zetami ni munnawe, Yoweli. Awo yaahithanleliwa okhapelela mihakhu sa empa ya Yehova.+ 23 Eriyari ya atthu a wAmurami, a Isehari, a oHebroni ni a Uziyeli,+ 24 Xebuweli mwaana a Gerisomi, mwaana a Moise taathanliwe wiira aakhapeleleke arumasiya. 25 Vano eriyari ya axinnawe, anamwane a Eliyeezeri,+ aahikhala Rehabiya mwaana a Eliyeezeri, Yexaya mwaana a Rehabiya,+ Yorami mwaana a Yexaya, Ziikiri mwaana a Yorami ni Xelomothi mwaana a Ziikiri. 26 Xelomothi ola ni axinnawe ti yaathanliwe wiira akhapeleleke mihakhu sootheene sa itthu saakhalihiwe soowaarya,+ seiyo mwene Davidi,+ ahooleli a imusi,+ maxeefi a atthu 1.000, maxeefi a atthu 100 ni maxeefi a anakhotto yaakhalinhe aya soowaarya. 27 Itthu sikina yaakunxe aya+ okhottoni,+ yaahikhaliha soowaarya wiira elokiheriweke empa ya Yehova. 28 Nave-tho saahikhala itthu sikina, seiyo Samuweli, mulipa aasuwela otaphulela itthu ooniheriwe awe ni Muluku,+ vamosa ni Sawuli mwaana a Kiixi, Abineri+ mwaana a Neri, ni Yowabi+ mwaana a Seruwiya,+ yaakhalinhe aya soowaarya. Khula etthu yaakhalihiwa yoowaarya aanivahereriwa Xelomithi ni axinnawe wiira akhapeleleke.
29 Eriyari ya anamwane a Isehari,+ Kenaniya ni anaawe yaahithanleliwa miteko soovirikana sa ota wa empa ya Muluku, wiira akhale maxeefi ni alipa-oophuka+ a wIsarayeli.
30 Eriyari ya atthu a oHebroni,+ Haxabiya ni axinnawe, eyo piiyo, alopwana oowerya 1.700, yaaninvarela miteko soovirikana Yehova ni mwene, wIsarayeli mpantta onikela nsuwa wa oYordani. 31 Eriyari ya atthu a oHebroni, Yeriya+ taari muhooleli a atthu a oHebroni moovarihana ni masina a ahooleli a imusi saya. Vano, eyaakha ya namiloko mixexe ya olamulelo wa Davidi,+ yaahaavereriwa, aphwanyiwa eriyari aya alopwana a ikuru ni oowerya oYazeri,+ elapo ya oXileyaadi. 32 Nave axinnaya yaari alopwana 2.700 oowerya, yaawo yaari ahooleli a imusi saya. Siiso, mwene Davidi aahaavaha okhulupale wiira yaahooleleke atthu a nihimo na Rubeni, na Gadi, ni nimeya na nihimo na Manase, wiira akhapeleleke myaha sootheene saavarihana ni Muluku eekeekhai ni saavarihana ni mwene.