Yesaya

20 Mwaakha mwene Sargoni a wAsiiria aamurumme awe Tartani* orowa wAxidodi,+ Tartani owo, aahiwana ni elapo eyo ya wAxidodi ni aahikuxa.+ 2 Okathi ene yoowo, Yehova aahimuleela Yesaya,+ mwaana a Amozi wiira: “Mwarule isaakho nwanre anyu muyuununi mwanyu ni mwarule isantaalya sanyu”. Nto Yesaya aahiira siiso, oneetta ohiwanre ikuwo* nnakhala isantaalya.

3 Nuumala-vo, Yehova aahihimya wiira: “Ntoko siisaale murumeyi aka Yesaya, oneetta awe iyaakha tthaaru ohiwanre ikuwo nnakhala isantaalya, wiira ekhale esinaale+ enaalopola atthu a wExiitu+ ni a wEthiyopia,+ 4 siiso-tho, mwene a wAsiiria onooweettiha atthu onrowa awe waavara a wExiitu+ ni a wEthiyopia, amiravo ni alopwana oowuuluvala, ahiwanre ikuwo nnakhala isantaalya, makhuttu aya yooneyaka, eyo piiyo, wiira Exiitu uuliwe muru. 5 Ale yaamuroromela Ethiyopia ni yaixinnuwiha mwaha wa Exiitu, animoova ni animuuliwa muru. 6 Mahiku awo, atthu anikhala waattamela ophareya, anoohimya wiira: ‘Moone etthu ewiiranenle atthu yaale naarororomela ahu, yaawo naatthimakela ahu wiira anikhaliherye ni anoopole mmatatani mwa mwene a wAsiiria! Nto vano ninrowa woopowa sai?’”