Wahala Oopacerya

20 Woopaceryani wa eyaakha,* okathi mamwene yaarowa aya okhottoni, Yowabi+ aahaahoolela anakhotto ni aahipwetexa elapo ya atthu a wAmoni. Owo aahirowa orukurerya oRaba,+ vano Davidi aahanle oYerusalemu.+ Yowabi aahituphela oRaba ni aahipwetexa epooma eyo.+ 2 Davidi aahikuxa ekhara yaari vamuru wa muluku Malikomi. Nto aahiweha wiira ekhara eyo yaalemela etalento* emosa ya eweero, ni yaari ya maluku oowaaryexa. Nave ekhara eyo yaahiheliwa vamuru wa Davidi. Owo aahikuxa-tho itthu sinceene epooma ele.+ 3 Davidi aahaakuxa atthu a epooma eyo wiira yathikileke maluku ni seroti, yavareke muteko+ ni ikaruma sa eyuuma soononiwa ni amaxatto. Eyo ti etthu Davidi aawiirinhe awe atthu a epooma ya wAmoni. Nuumala-vo, Davidi ni atoropa awe ootheene yaahitthikela oYerusalemu.

4 Nuumala-vo, yaahiwana ekhotto ni afilisti oXezeri. Okathi ene yoowo, Sibekayi,+ muhuxati, aahimwiiva Sipayi, a osuulu wa arefayimi.+ Siiso afilisti yaahixinttiwa.

5 Yaahiwaniwa-tho ekhotto ni afilisti, nto Elihanani, mwaana a Yayiri, aahimwiiva Lahimi, munnawe Goliyati+ a oGathi, yoowo ewiha* ya nivaka nawe yaalikana ni mwiri wa alipa yaattava ikuwo.+

6 Yaahiwaniwa-tho ekhotto oGathi,+ weiwo aakhumelenle awe mulopwana mmosa muulupale.+ Mulopwana owo, khula ntata aarina ikatha 6, nave khula nnawu aarina ilipwi 6. Otakaaherya sootheene saari 24. Nave-tho mulopwana owo aari a osuulu wa arefayimi.+ 7 Owo aanaaveeha+ atthu a Isarayeli. Tivo Yonathani, mwaana a Ximeya,+ munnawe Davidi, aahimwiiva.

8 Alopwana ala, yaari a osuulu wa arefayimi+ a oGathi.+ Nto yaahiiviwa ni Davidi, vamosa ni arumeyi awe.