Yesaya
47 Nyuwo emwali yoohipaceriwa ya oBabiloonia,+
Mukhuruwe, mukilaathi vantthupini.
Nyuwo mwaana mwaamuthiyana a oKhaldeya,
Mukilaathi vathi, opuro ohinrowa-tho okhala ehice.+
Atthu khanrowa-tho owiitthanani okhala mwaana a mwene.
2 Mukuxe nxilo, muxileke otthu.*
Murule eveewu anyu.
Muxoviherye osulu esaaya anyu, muhiye metto sanyu sooneyeke.
Mulapuweke miro.
3 Nyuwo munoowehiwa muhiwanre etthu.
Munimuuliwa muru.
Miyo kinimunla ikuhu,+ nave khuuvo mutthu onrowa okikhoottiherya.*
5 Nyuwo mwaana mwaamuthiyana a oKhaldeya,+
Mukilaathi mmaale ni mukele opuro wooriipela;
Khuuvo-tho onrowa woohimyakani okhala pwiyamwene a ilapo sinceene.+
6 Kaahinanariwa vanceene ni atthu aka.+
Masi nyuwo khimwaamorenle ikharari.+
Hata atthu oowuuluvala, nyuwo mwaanaareya miritti soolemela.+
7 Nyuwo munihimya wiira: “Kinrowa okhalaka Pwiyamwene, mahiku ootheene”.+
Nto khamuupuwenle itthu mwaapaka anyu;
Khamwaatthokelenle moota itthu iya saarowa aya omalela.
8 Mwiiwe ela, nyuwo muniphenta itthu sinoosivelani,+
Mukilanthi muhoovaka etthu ni munihimya vamurimani vanyu wiira:
“Miyo ti miyo, nave khuuvo onilikana ni miyo.+
Nkinrowa okhweliwa aiyaka.
Nave nkinikhala-khala, kikhweliwaka anaaka”.+
9 Masi nihiku nimosa-ru, sinimookhumelelani mootutuxerya itthu iya piili:+
Munookhweliwa aniinyu ni munookhweliwa aiyanyu.
10 Nyuwo mwaaniroromela itthu sootakhala mwaapaka anyu,
Ni moohimya wiira: “Khuuvo onikiweha”.
Ankhili anyu ni osuwela wanyu, ti yoothweelelinheni,
Nave munnihimya vamurimani vanyu wiira: “Mi ti mi, nave khuuvo onlikana ni miyo”.
11 Enimookhumelelani etthu yootakhala,
Yeeyo ehinrowa anyu owerya okhoottiherya ni okhwiri anyu.*
Animookhumelelani maxakha, yaawo muhinrowa anyu owerya ohuluwa.
Sinimookhumelelani mootutuxerya, itthu seiyo muhitonko anyu woona.+
12 Tivo, muthipeleleke mirette sanyu ni okhwiri anyu,+
Seiyo muniira anyu okhuma omiravo anyu.
Pooti wiira sinimookhaliheryani;
Nave pooti wiira munoowerya owoopopiha atthu.
13 Moophweeliwa ni muttetthe wa atthu anyu anoovahani miruku.
Vano awo yeemele ni awoopoleni,
Yaawo anikokhorela itthu siri wiirimu,* aniwehexexa itheneeri,+
Yaawo anihimya itthu sinrowa wiiraneya khula mweeri onooneya,
Itthu seiyo sinrowa wookhumelelani.
14 Awo anlikana ni malaxi oowuuma.
Mooro onimwaapaha.
Awo khaniwerya wiixoopola owerya wa malumi a mooro.
Malumi awo a mooro, khanlikana ni makhala anooriwa,
Nnakhala khanlikana ni mooro mutthu onaattamela awe.
15 Siiso, awo anrowa okhala anamirette anyu,
Yaawo munivarana anyu muteko okhuma omiravo anyu.
Awo anrowa ohapuwa, khula mutthu onrowa weettelaka ephiro awe.*
Nto khuuvo mutthu onrowa owoopolani.+