Amoosi
9 Konweha Yehova+ eemenle ene vasulu va altaari, owo ohimmye so: “Mmane vasulu va ipilaari nto alisenso aya anoothukumela. Mpwexe vasulu vaya, vano miyo kinoowiiva atthu anrowa ohala ni espaata.* Khuuvo onrowa owerya otthyawa nave khuuvo onrowa owerya woopowa.+
2 Yathipa mpakha Mmahiye,*
Ntata naka nnimwaakumiha.
Nave yawela wiirimu,
Kinimwaakuruxa.
3 Awo yaipitha vasulu va mwaako Karmelo,
Kinimwaahaavya mpakha waaphwanya ni kinimwaavara.+
Vano yaipitha mphareya wiira kihiwoone,
Memmo kinooruma enowa wiira yaalume.
4 Yakuxiwa wiira yakhalihiwe ipottha ni awanani aya,
Weiwo kinooruma espaata, nto eyo enoowiiva.+
Kinimwaawehexexa wiira kaakumiherye maxakha, ohiya itthu sooloka.+
5 Masi Pwiya Muulupalexa, Yehova a anakhotto, tonkwannya elapo ela.
Tivo eyo ennitothowa,+ nave atthu ootheene anikhala memmo animunla.+
Elapo yootheene enoosarya ntoko muro Niilo,
Nave enoowelela ntoko muro Niilo a wExiitu.+
6 ‘Ole otenke eskatta awe wiirimu,
Ole oniteka vasulu va elapo,
Ole onithukumanya maasi a mphareya,
Wiira omwaraxele mulaponi,+
Nsina nawe ti Yehova’.+
7 Yehova onihimya wiira: ‘Nyuwo atthu a Isarayeli, kiira kaanoolikanyihani ni anamwane a oKuuxi?
Kiira ti miyo kaakuminhe atthu a Isarayeli elapo ya wExiitu?+
Kiira ti miyo kaakuminhe afilisti elapo ya oKereta,+ nave atthu a oSiiria elapo ya oKiri?’+
8 Yehova onihimya wiira: ‘Mwiiwe! Maitho a Pwiya Muulupalexa Yehova anniweha omwene onipaka etampi,
Nave onoomala-maliha omwene owo valaponi.+
Masi nkinrowa opwetexa voomalela etthoko ya Yakobe’.+
9 ‘Masi mwiiwe! Kinooruma oveeriwa atthu a Isarayeli,
Eriyari ya maloko ootheene,+
Ntoko siisaale mutthu oniveera awe ipyo wiira okumihe ikokhola.
Masi khiivo ekokhola enrowa omorela vathi.
10 Atthu aka ootheene anipaka itampi animwiiviwa ni espaata,
Yaawo anihimya wiira: “Ehasara khenrowa onaattamela, nnakhala oniphwanya”’.
11 ‘Nihiku nlo, kinimweemexa etenta* ya Davidi,+ yeeyo emonre.
Kinoolokiherya mapuro aya yaahononeyale,
Kinootthikela oteka mapuro yaakhaliwa,
Nave kinootthikela oteka ntoko yaari aya khalai.+
12 Siiso anookuxa itthu sihanle wEdomi,+
Nave anookuxa itthu sa maloko ootheene niromoliwe nsina naka’. Onihimya ti Yehova yoowo onipaka itthu iya.
13 Yehova onihimya wiira: ‘Mwiiwe! Anoophiya mahiku,
Mulipa-oolima onrowa awe omphwanya mulipa-oohepha,
Nave mulipa oninyakela ewuuva onrowa awe omphwanya mulipa onaala.+
Mmiyaakoni enookhoowaka eviinyu ya niinaano,+
Nave myala sootheene sinookhumaka eviinyu ya niinaano.+
14 Kinimwaattikiha atthu aka aisarayeli yaaroihiwe weepotthani,+
Awo anootthikela oteka ipooma saya sahaakhaliwa, akhaleke memmo.+
Animwaala miri saya sa ewuuva ni owurya eviinyu aya,+
Nave animwaala miri saya alyeeke mihokorokho saya’.+
15 ‘Kinimwaattikiherya elapo aya,
Nto awo khantthikela woomoliwa elapo yeeyo kaavanhe aka’.+
Yehova, Muluku anyu tonihimya”.