Miteko sa Arummwa
21 Okhala wiira nanvalaana naawo, naahiriipiwa murima vanceene. Nuumala-vo, naahinwela pakiti nnarowa oKoosi. Mmeeloni mwaya, naahirowa oRodi. Vano, naahikhuma weiwo nrowaka oPaatara. 2 Epooma ya oPaatara, naahimphwanya pakiti aarowa oFeniisia. Nto naahinwela, nnarowa. 3 Vano naahoona esisiro* ya oKiipero, nihiya moono woothiyana. Naaheetta ni pakiti nrowaka oSiiria. Nto pakiti owo aaheemela oTiiro, weiwo aarowa awe okuruxa miritti. 4 Naahiwaavya awiixutti, naaphwanya. Nto naahikhala naawo mahiku 7. Masi awiixutti awo, aleeliwaka ni ikuru soowaarya, yaahimuhimeerya Paulo ikwaha sinceene wiira ohirowe oYerusalemu.+ 5 Naamalinhe ahu oxukurya opuro ole, naahitthikela mukwaha ahu. Masi ootheene aya, vamosa ni athiyana ni anamwane, yaahinihoola mpakha oporto.* Vano naahikokhora ophareya, nnavekela. 6 Nave, naahilaxeryana mukina ni mukhwaawe. Nuumala-vo, naahikela mpakitini, vano awo yaahitthikela mmawannyeya.
7 Vaamalihale ahu mukwaha ahu wa mphareya, naahikhuma oTiiro nirowaka oTolemaida. Nto naahaakhomasa anna ni naahikhala naawo nihiku nimosa. 8 Mmeeloni mwaya, naahivenya nnarowa oKesareya. Naahirowa owannyawe Filipe namalaleya, nikhala nuuwo. Filipe owo, aari mmosa a alopwana ale 7+ yaathanliwe ni arummwa oYerusalemu. 9 Mulopwana ola, aahikhalana anamwane axithiyana axexe yahaatheliwe.* Awo yaari maprofeta.+ 10 Nuumala okhala weiwo mahiku manceene, aahirwa profeta mmosa aihaniwa Aagabo,+ okhumaka oYudeya. 11 Profeta owo, aahirwa vaari ahu, aahikuxa esintu ya Paulo, iitthukwa inawu sawe ni matata awe, onahimya wiira: “Ikuru soowaarya sinihimya wiira: ‘Mwaneene esintu ela, onrowa otthukiwa siisa ni ayuda, oYerusalemu,+ nuumala-vo, anonvahererya mmatatani mwa amalapo’”.+ 12 Vaiwale ahu moolumo awo, hiyo ni anna a weiwo, naahimuxonttela Paulo wiira ohirowe oYerusalemu. 13 Nto Paulo aahihimya wiira: “Xeeni muninla anyu ni munikiriipiha anyu murima?* Tthiri miyo, koolikanana otthukweliwa ni okhwa oYerusalemu mwaha wa nsina na Pwiya Yesu”.+ 14 Vaawehale ahu wiira khinaawerya-tho omukhoottiherya, naahimaala, nnahimya wiira: “Yiiraneye ele Yehova* omphavela awe”.
15 Vaamanle aya mahiku awo, naahiilokiherya nnavenya nirowaka oYerusalemu. 16 Awiixutti akina a oKesareya, yaahinihoola mpakha oKiipero, owannyawe mulopwana mmosa aihaniwa Munasoni, yoowo aari mwiixutti okhuma woopaceryani. Hiyo naarowa omaka owannyawe. 17 Nuumala ophiya oYerusalemu, axinna yaahinaakhela voohakalala. 18 Mmeeloni mwaya, Paulo ni hiyo naahirowa wa Yakobo.+ Nave axitokweene ootheene yaari weiwo. 19 Vano Paulo aahaakhomasa, aatthokiherya itthu sootheene Muluku aapanke awe eriyari ya ale yahaakhanle ayuda, mwaha wa muteko woolaleerya aavanre awe.
20 Okathi vaiwale aya moolumo ala, awo yaahinvuwiha Muluku, masi yaahimuleela Paulo wiira: “Munna Paulo, moone wiira wenno ahaavo ayuda oowaamini ikonto sinceene, nave ootheene aya annikhalela nthiti weettela Nlamulo.+ 21 Awo ahiiwa vahimmwaka wiira: ‘Paulo oniwiixuttiha ayuda ootheene anikhala eriyari ya ale ahikhanle ayuda, wiira avirikanyeke malamulo a Moise. Nave owo onihimya wiira ahiwinnuwiheke anaaya, aahiiso aheetteleke soolema saya’.+ 22 Vano nipake exeeni? Tthiri awo animwiiwa wiira muri wenno. 23 Tivo, mwiire ele ninhimya ahu: Aakhala-va, alopwana axexe ammanenle natiri Muluku. 24 Mwaakuxe alopwana awo, murowe mwaireerihe vamosa naawo. Nuumala-vo, muliverye itthu sootheene sinireerela wiira ametthiwe ikharari. Siiso, atthu ootheene anoosuwela wiira itthu sinihimmwa mwaha wa nyuwo, sinimoothiwa, ohiya-vo, nyuwo mookhalana mweettelo wooloka ni munniiwelela Nlamulo.+ 25 Vano, ale oowaamini ahikhanle ayuda, nihaalepela epaphelo, naaleelaka suupuwenle ahu, wiira akhootteke itthu sinivahiwa amuluku eethiru,+ ephome,+ inama soohihitiwa*+ ni orupihana woohiloka”.*+
26 Vano Paulo aahaakuxa alopwana awo, nto mmeeloni mwaya, aahipacerya wiireeriha vamosa naawo.+ Nuumala-vo, aahikela mutemplo wiira ahimye okathi waarowa aya omala wiireeriha iwo, wiira namukuttho, ovahe mukuttho wa khula mmosa a alopwana awo nihiku nenno.
27 Nto, ahalaka omala mahiku awo 7 a wiireeriha, ayuda a wAsia, yaahimoona Paulo mutemplo. Siiso, awo yaahiwiiriha atthu ootheene onanariwa, nto yaahinvara Paulo, 28 anakhuwela yiiraka: “Nyuwo alopwana a wIsarayeli, munikhaliherye! Mulopwana ola ti yoole oniwiixuttiha atthu mapuro ootheene, wiira yaavirikanyeke atthu ahu, avirikanyeke Nlamulo nahu ni opuro ola woowaarya. Ohiya-vo, ohaakeliha mutemplo-mu akereku, nto aananariha opuro ola woowaarya”.+ 29 Awo yaahihimya siiso, okhala wiira yaapacenrye omoona Paulo opooma ori ene ni Troofimo+ a wEefeso. Nto yuupuwela wiira Paulo aahimukeliha mutemplo. 30 Atthu a epooma ele, yaaninyakula, nto ootheene aya yaahitthimakela mutemplo, anvara Paulo, ampurulela ota wa etemplo. Niinaano-ru, mikhora saahiwaliwa. 31 Aphavelaka omwiiva Paulo, kumantanti a atoropa aahiiwa wiira oYerusalemu waahikhumelela onyakulihana. 32 Niinaano-ru, owo aahaakuxa atoropa ni makhulupale a anakhotto, nto aahitthimakela opuro owo. Okathi atthu ale yanwenhe aya kumantanti a atoropa ni atoropa, yaahihiya ommana Paulo.
33 Nto kumantanti owo a atoropa, aahimwaattamela Paulo, aahinvara ni aahiruma otthukiwa ni ikwirinti piili.+ Nuumala-vo, aahaakoha atthu iiraka: “Mulopwana ola ti pani? Nave iirale-ni?” 34 Masi atthu akina a muttitthi ole, yaakhuwela etthu emosa, nave akina yaakhuwela etthu ekinaku. Nto onyakula iwo waamutepa mpakha kumantanti owo ohiwerya osuwela oratteene etthu yaakhumelenle. Tivo, aahaaruma atoropa omukuxa Paulo ni omuroiha okwartelo. 35 Okathi yaaphiyale aya opuro waaweliwa wiira mutthu okele okwartelo, atoropa yaahaana omuteexa Paulo mwaha wa muttitthi ole wa atthu wahaareere owali, 36 okhala wiira waanaatthara ottuli, okhuwelaka wiira: “Mmwiive!”
37 Ohalaka vakhaani okela mukwartelo, Paulo aahimuleela kumantanti a atoropa wiira: “Xontte, mukeemererye wooleelani etthu”. Kumantanti owo, aahimukoha wiira: “Nyuwo munnisuwela olavula ekereku? 38 Nto nyuwo khamuhiyo mwexiitu yoole aawiirinhe atthu onvirikanya kuvernu ni aaroihale moothakoni anawiive 4.000?” 39 Vano Paulo aahimwaakhula wiira: “Mweekeekhai, miyo ka muyuda,+ kiyariwe oTarso+ wa oSilisia, epooma yoosuweliwa vanceene. Xontte, mukeemererye olavula ni atthu ale”. 40 Okathi kumantanti aamweemerenrye awe olavula, Paulo eemenle ene vaxikattani yaaroiha mukwartelo, aahaavaha atthu ale esinaale ni ntata. Awo yaahimaala, vano Paulo aahaalavuliha ni nttaava na eheeperi,+ oriki: