Zakariya
1 Mwaakha wa nenli wa Dario,+ mweeri wa neethanu neeraru, profeta Zakariya*+ mwaana Berekiya, mwaana a Ido, aahileeliwa moolumo a Yehova yaahimya wiira: 2 “Yehova oonanariwa vanceene ni axipaapa anyu.+
3 “Mwaaleele wiira: ‘Etthu onihimya awe Yehova a anakhotto, tiila: “Yehova onihimya wiira: ‘Mutthikele wa miyo, nto miyo kinootthikela wa nyuwo’.+ Yehova a anakhotto tonihimya”.
4 “‘Muhikhale ntoko axipaapa anyu, yaawo maprofeta a khalai yaalalenrye aya ariki: “Etthu onihimya awe Yehova a anakhotto, tiila: ‘Xontte, murakamele iphiro sanyu ni miteko sanyu sootakhala’”’.+
“‘Masi, awo khiyaakiwiriyanne, nnakhala khiyaavanhe ephoole moolumo aka’,+ onihimya Yehova.
5 “‘Nenna-va axipaapa anyu ari woowi? Nave niireke maprofeta anikhala mahiku ootheene? 6 Moolumo aka ni sooruma saka, seiyo kaarumme aka arumeyi aka, maprofeta, wiira yaaphwanyihe axipaapa anyu, niireke khiyaaphwanyihe?’+ Nto, awo ahoorwa wa miyo anahimya wiira: ‘Yehova a anakhotto, ooniirela etthu yeeyo uupuwenle awe, ottharaka iphiro sahu ni miteko sahu, ntoko siisaale aalakenle awe opaka’”.+
7 Nihiku 24 na mweeri wa namuloko ni mmosa, eyo piiyo, mweeri wa Sebathi,* mwaakha wa nenli wa Dario,+ profeta Zakariya, mwaana a Berekiya, mwaana a Ido, aahisuwelihiwa moolumo a Yehova yaahimya wiira: 8 “Ohiyu kaahooniheriwa etthu ni Muluku. Aahikhala mulopwana mmosa aawenle ekhavalo yooxeerya, nto owo eemenle eriyari ya miri siniihaniwa murta. Nave ottuli wawe saahikhala ikhavalo sa ekoore yooxeerya, ekoore ya koroxo ni ekoore yootteela”.
9 Nto kaahikoha wiira: “Pwiyaka, anakhavalo ala tani?”
Nlaikha naalavula ni miyo naahaakhula wiira: “Kinimoosuwelihani anakhavalo ala”.
10 Nto mulopwana eemenle eriyari ya miri siniihaniwa murta, aahihimya wiira: “Ala arummwale ni Yehova wiira yeetteette mulaponi”. 11 Awo yaahihimeerya nlaikha na Yehova neemenle eriyari ya miri siniihaniwa murta wiira: “Niheetteetta mulaponi, nihoona wiira mulaponi ti moomaaleleya ni wookhala murettele”.+
12 Siiso, nlaikha na Yehova naahihimya wiira: “Khoo Yehova a anakhotto, mpakha liini munrowa anyu okhootta omorela ikharari oYerusalemu ni ipooma sa oYuda?+ Iyaakha iya 70,+ nyuwo moonanariwa vanceene”.
13 Yehova aahaakhula nlaikha naalavula ni miyo, ni moolumo ooreera ni oomaaliha. 14 Moottharelana, nlaikha naalavula ni miyo naahikileela wiira: “Mwaaleele atthu wiira: ‘Etthu onihimya awe Yehova a anakhotto tiila: “Kinimwaakiherya oYerusalemu ni oSiyoni, tthiri, kinimwaakiherya ni murima aka wootheene.+ 15 Miyo koonanariwa vanceene ni maloko yaawo anoona wiira aakhalana murettele.+ Kaaphavela waahukhumu atthu vakhaani paahi,+ masi maloko awo ahaakumiherya ehasara yuulupale atthu aka”’.+
16 Nto, etthu onihimya awe Yehova, tiila: ‘“Kinootthikela omorela ikharari oYerusalemu.+ Empa aka enootthikela otekiwa weiwo”.+ Yehova a anakhotto tonihimya. “Nave oYerusalemu onoophimmwa ni mukhoyi”’.+
17 “Mwaaleele-tho atthu wiira: ‘Etthu onihimya awe Yehova a anakhotto, tiila: “Ipooma saka sinootthikela-tho osareya itthu sooreera. Nave Yehova onootthikela ommaaliha Siyoni+ ni omuthanla Yerusalemu”’”.+
18 Nuumala-vo, kaahitthukula maitho, kiweha manyaka maxexe.+ 19 Nto kaahikoha nlaikha naalavula ni miyo wiira: “Manyaka ala antaphulela exeeni?” Nlo naahaakhula wiira: “Ala manyaka yaale yaamwara-mwanrye atthu a oYuda,+ a wIsarayeli+ ni a oYerusalemu”.+
20 Moottharelana, Yehova aahikooniherya atthu axexe anivara muteko ni matera. 21 Miyo kaahikoha wiira: “Atthu ale anrweela-ni?”
Owo aahaakhula wiira: “Manyaka ala ti yaale yaamwara-mwanrye atthu a oYuda wiira ohikhale mutthu onrowa owerya weemexa muru. Atthu anivara muteko ni matera anrweela owoopopiha ni opwexakasa manyaka a maloko yeemenxe manyaka aya wiira yaavirikanye atthu a elapo ya oYuda, yaamwara-mwaryaka atthu anikhala weiwo”.