Yesaya
8 Yehova aahikileela wiira: “Mukuxe ethaapwa yuulupale,+ mulepe ni moolumo oowooneya, aniira: ‘Maheri-Salali-Haxi-Bazi’.* 2 Nave kiniphavela wiira anamoona oororomeleya awehe moolumo ala alempwaka. Anamoona awo, ti namukuttho Uriya+ ni Zakariya mwaana a Yeberekiya”.
3 Nuumala-vo, kaahirupa ni* profeta muthiyana.* Nto owo aahirupala ni aahimuyara mwaana mwaamulopwana.+ Nto, Yehova aahikileela wiira: “Munvahe nsina noowi Maheri-Salali-Haxi-Bazi. 4 Okhala wiira mwaana owo ohinatthi wiixutta wiira ‘paapa!’ ni ‘maama!’, mihakhu sa oDamaasiko ni mireerelo sa oSamariya sinooroihiwa wa mwene a wAsiiria”.+
5 Yehova aahitthikela-tho olavula ni miyo oriki:
6 “Okhala wiira atthu ala aakhootta maasi oomaala a oSilowe*+
Ni aathanla omukhaliherya Resini ni mwaana a Remaliya,+
7 Tivonto, moone! Yehova onimwaakumiherya,
Maasi manceene ootupa a muro Eufrate,
Eyo piiyo, mwene a wAsiiria+ ni ovuwa wawe wootheene.
Muro owo onoosarya,
Ni onoomwareela ikhopela soopiili.
8 Maasi awo anoosamiha elapo ya oYuda,
Ni anoosarya mpakha muxikoni;+
Nyuwo Emanuweli,*+ owo onimookola mapupha awe,
Ntoko mwaapalame, wiira okhuneele elapo yootheene!”
9 Nyuwo amalapo, mwaavulalihe, masi nyuwo munrowa onyakattiwa.
Nyuwo atthu a ottaiwene, nwiriyane!
Mwiilokiherye wiira mwawane ekhotto, masi nyuwo munrowa onyakattiwa!+
Mwiilokiherye wiira mwawane ekhotto, masi nyuwo munrowa onyakattiwa!
10 Mumpake palano, masi palano owo onoohononiwa!
Mulavuleke etthu muniphavela anyu, masi eyo khenrowa weetta saana,
11 Okathi Yehova aalavunle awe ni miyo, owerya wawe wuulupale waahikirweela, ni aahikileela wiira kihitthareke mweettelo wa atthu ala. Owo aahimmye wiira:
12 “Muhihimyeke wiira ‘ola palano ootakhala’, okhala wiira atthu ala anihimya wiira, ‘ola palano ootakhala’.
Muhooveke itthu anoova aya,
Nnakhala muhittettemeleke mwaha wa itthu iyo.
13 Yehova a anakhotto, ti yoowo mukhanle anyu oomoonaka okhala oowaarya,+
Ti yoowo mukhanle anyu oomoovaka,
Ni ti yoowo okhanle owiirihani ottettemela”.+
14 Owo onrowa okhala ntoko nipuro noowaarya,
Masi-tho onrowa okhala ntoko nluku ninkwattuliha,*
Ni mwala onimoroxa,+
Para omwene woomiili wa Isarayeli.
Onrowa okhala ntoko ntapha ni muraakho,
Para atthu anikhala oYerusalemu.
15 Atthu anceene anookwattuliwa,* anoomora ni animuntakasiwa;
Awo anoomorela vamuraakhoni ni anoovariwa.
16 Mukhune eroolu alempwale aya moolumo awo;
Mukhune eroolu elempwale nlamulo ni mwaavahererye awiixutti aka paahi!
17 Kinrowa omulipelelaka vanceene Yehova,+ yoowo oniwiipithiha owiitho wawe atthu a osuulu wa Yakobe,+ nave kinrowa omulipelelaka yoowo.
18 Moone! Miyo ni anamwane Yehova okivanhe awe,+ niri ntoko isinaale+ ni miiriirya wIsarayeli, seiyo sinikhuma wa Yehova a anakhotto, yoowo onikhala vamwaako Siyoni.
19 Awo yoohimeeryani wiira: “Mwaavekeleke malakiheryo anahako aahiiso ale anihimya itthu sinrowa wiiraneya ohoolo, yaawo anilavula vathi-vathi ni ehiniiwanyeya etthu anihimya aya”, niireke nyuwo mwaamwiira siiso? Atthu ahaana onvekela nikhaliheryo Muluku aya. Atthu akumi ahaavekeleke alipa-ookhwa wiira yaakhaliherye.+ 20 Awo ahaana okohererya nlamulo ni moolumo alempwale murooluni!
Okathi anilavula aya ahittharaka nlamulo nla, awo kharina muthuko.+ 21 Khula mutthu onoovira mulaponi-mme oxankale ene ni ovoliwe ene etala.+ Nave mwaha wa ovoliwa etala ni otikinihiwa, owo onooweha osulu omutakhalihe mwene awe ni Muluku awe. 22 Vano, owo onooweha mulaponi ooneke paahi ohaawa ni oriipela, muuttutthi ni okathi waaxankiha, ewiriphi ni ohikhala okokola.