Amoosi
8 Etthu Pwiya Muulupalexa Yehova aakoonihenrye awe tiila: Kaahoona ettanka* ya mihokorokho sa elimwe. 2 Owo aahikikoha wiira: “Amoosi, exeeni muniweha anyu?” Miyo kaahimwaakhula wiira: “Kiniweha ettanka ya mihokorokho sa elimwe”. Moottharelana, Yehova aahikihimeerya wiira: “Noophiya nihiku wiira atthu aka aisarayeli ahukhummwe. Nkinrowa-tho waalevelela.+ 3 Pwiya Muulupalexa Yehova onihimya wiira: ‘Nihiku nlo,+ isipo sa mutemplo sinrowa okhala isipo soowiikhupanyerya. Opuro wootheene, sinoosareya mirutthu.+ Mapuro awo anrowa okhala oomaaleleya!’
4 Nwiriyane etthu ela, nyuwo munimunyakela mulipa-oohaawa,
Nave munaahaaxa alipa-oomaala a mulaponi,+
5 Nyuwo munihimya wiira: ‘Enrowa omala silini efesta ya mweeri musya,+ wiira nitumihe ipyo sahu?
Nave enrowa omala silini esaabadu,+ wiira nitumihe ipyo sahu?
Siiso, nnoowerya ovukula mphimo wa eefa,*
Ni wuncererya olemela wa exeekele,*
Nihononaka epalansa ahu wiira naawoke.+
6 Siiso nnoowerya omuthuma masikhini ni eparatha,
Nave nnoowerya omuthuma mulipa-oohaawa ni epaare emosa ya isantaalya.+
Nave nnoowerya otumiha ikokhola sa ipyo’.
7 Yehova oolapha mwaha wa ovuwa wa Yakobe,+ oriki:
‘Nkinkhala-khala kiliyalaka miteko sanyu sootheene.+
8 Mwaha wa etthu ela, elapo ela enoothukumela,
Nave atthu ootheene anikhala memmo animunla.+
Niireke elapo yootheene khenrowa osareya maasi ntoko muro Niilo,
Nave khanrowa osareya ni owelela ntoko muro Niilo a wExiitu?’+
9 Pwiya Muulupalexa Yehova onihimya wiira: ‘Nihiku nlo,
Kinimwiiriha nsuwa okela othana eriyari,
Nave kinimwiiriha elapo oriipela othana eriyari.+
10 Kinimwiiriha ifesta sanyu okhala wunla,+
Ni masipo anyu ootheene okhala wiikhupanyerya.
Kinimoowarihani isaakho muyuununi mwanyu, nave miru sanyu sootheene sinoometthiwa.
Kinoowiirihani wiikhupanyerya, okhalaka ntoko mukhweliwe mwaninyu mmoseene,
Nto wookiseryani waya ninrowa okhalaka ntoko nihiku noohaawa’.
11 Pwiya Muulupalexa Yehova, onihimya wiira:
‘Mwiiwe! Anoophiya mahiku kinrowa aka okumiherya etala elapo ela,
Ohiya etala mwaha woohikhala yoolya aahiiso ntthona mwaha woohikhala maasi,
Masi etala ya ophavela owiriyana moolumo a Yehova.+
12 Tthiri awo anookhuma mpantta mmosa wa ephareya arowaka mpantta mukina wa ephareya,
Nave anookhuma onorti arowaka mpantta onikhuma nsuwa.
Ipantta sootheene animwaavya moolumo a Yehova, masi khanrowa ophwanya.
13 Nihiku nlo, axithiyana ooreera anootiximayari,*
Nave-tho aximiravo anootiximayari mwaha wa ovoliwa ntthona.
14 Ale anilapha mwaha wa yoottheka ya oSamariya+ ni ale anihimya wiira:
“Ntoko siisaale amuluku ahu anikhala aya, nyuwo Dani!”+
Nave “Ntoko siisaale ephiro ya oBeri-Xeba+ enikhala aya!”
Awo anoomora, khantthikela-tho ovenya’”.+