Zakariya
9 Moolumo a Muluku:
“Moolumo a Yehova aalavunle awe ohimyaka elapo ya oHadraki,
Oroihelaka oDamaasiko,+
Okhala wiira maitho a Yehova annaaweha apinaatamu+
Ni mahimo ootheene a Isarayeli,
2 Nave ohimyaka oHamati,+ weiwo onihela mukano niiyo,
Ni ohimyaka oTiiro+ ni oSiidoni,+ okhala wiira atthu ootepa osuwela.+
3 Tiiro ohiitekela opuro woolipihiwa.
Owo ohiithukumanyerya eparatha ntoko ntthupi,
Nave ohiithukumanyerya eweero ntoko mattophe a mustaraatani.+
4 Mwiiwe! Yehova onookuxa mireerelo saya,
Nave owo onimwaapwetexa anakhotto aya aarihelaka mphareya.+
Epooma eyo enoopahiwa ni mooro.+
5 Atthu a wAxikeloni animoona eyo ni animoova.
Atthu a oGaza anooriipiwa murima vanceene,
Vamosa ni atthu a wEkironi, okhala wiira ole yaamulipelela aya ohuulihihiwa muru.
Mwene a oGaza onimookhwa,
Nave wAxikeloni khonrowa okhaliwaka.+
6 Waxidodi onookhaliwa ni atthu a ilapo sikina,
Nave miyo kinoomaliha wiixinnuwiha wa afilisti.+
7 Miyo kinookumiha itthu sirina ephome mwaano mwawe,
Nave kinookumiha itthu soohiloka mmainoni mwawe,
Ni kinoomuhiya okhalaka para Muluku ahu.
8 Miyo kinookhala ntoko kwarta a empa aka,+
Wiira ohikhale onivira-mo nnakhala onitthika.
9 Mutteeliweke murima vanceene, nyuwo mwaana mwaamuthiyana a oSiyoni.
Mutthapeke, nyuwo mwaana mwaamuthiyana a oYerusalemu.
Mwiiwe! Mwene anyu onnoorwa wa nyuwo.+
Owo ta xariya, ni onniruuha woopowa.
10 Miyo kinookumiha ekaaro ya ekhotto wEfrayimi,
Nave kinookumiha ekhavalo oYerusalemu.
Muura onirumeeliwa okhottoni onoomala-malihiwa.
Nave owo onoolaleya murettele para atthu a maloko ootheene.+
Omwene awe onrowa okhuma ephareya emosa mpakha mpakha ephareya ekina,
Nave onrowa olamulelaka okhuma muro Eufrate mpakha omalenle elapo.+
11 Vano nyuwo muthiyana, mwaha wa ephome ya nivarihano nanyu,
Kinimwaakumiha maperesu anyu mweehimeni ahikhanle maasi.+
12 Nyuwo aperesu arina nlipelelo, mutthikele opuro woolipihiwa.+
Olelo kinooleelani wiira,
‘Kinimootthuvelani vanli, nyuwo muthiyana.+
13 Miyo kinoomurumeela Yuda ntoko muura aka.
Efrayimi onrowa okhala nttheere* na muura owo,
Nave miyo kinimwaavenxa aniinyu, nyuwo Siyoni,
Yaavirikanyaka aniinyu, nyuwo Gresia.
Nave miyo kinimookhalihani ntoko espaata ya* nakhotto’.
14 Yehova onimooniherya wiira ori naawo,
Nave nttheere nawe nnoovonyiwa ntoko overunya.
Pwiya Muulupalexa Yehova, onimoopa nlope,+
Nto owo onoorowa ohoolo ni epheyo yootupa ya osuuli.
15 Yehova a anakhotto onoowaakiherya,
Nave awo onoohonona ni anoonyakela maluku anvonyeriwa aya.+
Awo anoohakalala ni anookhuwela okhalaka ntoko awunrye eviinyu.
Nave anrowa okhalaka ntoko etixela esareyale eviinyu,
Nave anrowa okhalaka ntoko ephome emwarexeliwe ikantu sa altaari.+
16 Yehova Muluku aya onoowoopola nihiku nlo,
Ntoko nikoto na atthu awe.+
Tthiri awo anrowa olikanaka ni maluku oowaarya mulaponi mwawe, ari veekharani.+
17 Tthiri oreera wawe murima ti wuulupale,+
Nave oreera wawe ti wuulupale!
Ipyo sinimwaavaha ikuru amiravo,
Nave eviinyu ya niinaano enimwaavaha ikuru athiyana ahitonko orupa ni alopwana”.+