Ruti
4 Vano Bowazi aahirowa vamukhora wa epooma,+ okilaathi vaavo. Nto mulipa aarina ehakhi ya woopola mixankiho, yoowo Bowazi aamuhimya awe,+ aahivira. Siiso Bowazi aahimuhimeerya wiira: “Lexe, murwe mukilaathi-va”. Vano mulopwana owo aahikilaathi vaavo. 2 Nto Bowazi aahiwiihana ahooleli 10 a epooma ele,+ onahimya wiira: “Mukilaathi-va”. Siiso awo yaahikilaathi.
3 Vano Bowazi aahimuleela mulipa aarina ehakhi ya woopola mixankiho,+ wiira: “Nowemi, yoowo otthinke muttetthe wa oMowabi,+ omphavela otumiha ematta yaari ya munnihu Elimeleeki.+ 4 Tivo, miyo kihuupuwela woosuwelihani toko, ni wooleelani wiira: ‘Muthumeke ohoolo wa atthu anikhala elapo ela, ni ohoolo wa ahooleli a atthu ahu.+ Akhala wiira munoothuma, muthumeke. Masi mwaahithume, mukileele oratteene wiira kisuwele, okhala wiira nyuwo mwa mmusi ootepa waattamela, nave ti miyo kinoottharani’”. Owo aahaakhula wiira: “Miyo kinniphavela othuma”.+ 5 Bowazi aahihimya wiira: “Masi, musuweleke wiira ematta eyo khahiyo ya Nowemi paahi nave-tho ti ya Ruti, muthiyana a oMowabi, yoowo okhweliwe iyawe. Nto, muhaana othuma ematta eyo vamosa ni athiyana awo oowanli. Siiso, etthu yaahiyeriwe awe mulopwana owo okhwiiye, nlelo enookhalaka mwa nsina nawe”.+ 6 Vano, mulipa aarina ehakhi ya woopola mixankiho aahihimya wiira: “Nkikhanle oothuma ematta eyo, wiira kihihonone etthu ehiyeriwe aka. Muthumeke nyuwo ni ehakhi erina aka ya othuma, okhala wiira miyo nkinwerya othuma ematta eyo”.
7 Ela yaari yoolema ya atthu a Isarayeli khalai. Mutthu aaphavela onvahererya mutthu mukina ehaakhi ya othuma wala waakakhanya etthu, aahaana wiira so: Mutthu owo aahaana orula esantaalya awe emosa+ ni onvahererya mukhwaawe, ti siiso atthu a Isarayeli, yaalipiherya aya ele yaavarihanne aya. 8 Okathi mulipa aarina ehakhi ya woopola mixankiho aamwiirenle awe Bowazi wiira: “Muthumeke nyuwo”, mulopwana owo aahirula isantaalya sawe. 9 Bowazi aahaaleela ahooleli ni atthu ootheene wiira: “Olelo nyuwo mwa anamoona+ wiira koothuma mmatatani mwa Nowemi itthu sootheene saari sa Elimeleeki, ni itthu sootheene saari sa Kiliyoni ni Mahaloni. 10 Nave-tho, kinnimukuxa Ruti muthiyana a oMowabi, ntoko mwaaraka, yoowo aatheliwe ni Mahaloni, wiira etthu aahiyeriwe awe iyawe okhwiiye, ekhaleke mwa nsina nawe.+ Siiso, nsina na iyawe okhwiiye, khaninrowa omala-malihiwa eriyari ya axinnawe, ni vamukhora wa epooma awe. Olelo nyuwo mwa anamoona”.+
11 Siiso, atthu ootheene yaari vamukhora va epooma, ni ahooleli, yaahihimya wiira: “Aayo, hiyo na anamoona! Yehova omureelihe muthiyana onikela mpaani mwanyu, ntoko aamureelinhe awe Rakeli ni Liya, yaawo yaalipinhe nloko na Isarayeli.+ Mukhalaneke mireerelo sinceene wEfrata+ ni mukhalaneke nsina* nooloka oBetelehemu.+ 12 Mwaha wa osuulu Yehova onrowa awe woovahani omurumeelaka muthiyana owo,+ etthoko anyu elikaneke ni etthoko ya Peresi,+ yoowo Tamari aamuyarenle awe Yuda”.
13 Nto Bowazi aahimukuxa Ruti, ni aahimuthela. Vano, Bowazi aahirupa ni Ruti, nto Yehova aaheemererya wiira Ruti orupale ni omuyare mwaana mwaamulopwana. 14 Moottharelana, axithiyana a oBetelehemu yaahimuhimeerya Nowemi wiira: “Ottottopeliwe Yehova, yoowo oovanheni ole orina ehaakhi ya owoopolani mixankiho sanyu olelo. Nsina nawe nilaleiwe wIsarayeli! 15 Owo ohoovahani okumi musya, ni onrowa wookhapelelakani hata muuluvanle ene siisa, okhala wiira mwaana owo* oyariwe ni muthiyana aatheliwe ni mwaninyu, yoowo onoophentani+ ni ori ootepexa oloka waavikana anamwane axilopwana 7”. 16 Vano, Nowemi aahimukuxa mwaana owo, onvarela mmatatani, onamukhapelela. 17 Axithiyana yaattamanne ni Nowemi yaahinvaha nsina mwaana owo. Awo yaahihimya wiira: “Nowemi ooyareliwa mwaana mwaamulopwana”. Nave axithiyana awo yaahinvaha mwaana owo nsina noowi Obedi.+ Obedi aari paapa awe Yese,+ yoowo aari paapa awe Davidi.
18 Vano atthu a nloko na Peresi+ taala: Peresi aahimuyara Esironi;+ 19 Esironi aahimuyara Rami; Rami aahimuyara Aminadabi;+ 20 Aminadabi+ aahimuyara Naasoni; Naasoni aahimuyara Salimoni; 21 Salimoni aahimuyara Bowazi; Bowazi aahimuyara Obedi; 22 Obedi aahimuyara Yese;+ nto Yese aahimuyara Davidi.+