Mikeya
1 Moolumo a Yehova aasuwelihiwe awe Mikeya*+ a oMorexethi, yaahimya oSamariya ni oYerusalemu, mahiku a Yotami,+ Akhazi+ ni Ezekiya,+ mamwene a oYuda,+ taala:
2 “Nyuwo atthu ootheene, nwiriyane!
Nvahe ephoole, nyuwo elapo ni itthu sootheene siri memmo,
Pwiya Muulupalexa Yehova oophukeleni,+
Yehova, ori ene empa* awe yoowaarya.
3 Nwiriyane! Yehova onnikhuma opuro onikhala awe,
Owo onookhuruwa ni onoonyakela mapuro oorakamela osulu a elapo.
4 Miyaako sinootothowa vathi va inawu sawe,+
Nave maxepa* anookawanyeya,
Ntoko eseera eri vamooroni,
Nave ntoko maasi anivira opuro wookhuruwa.
5 Sootheene iyo sinimwiiraneya mwaha wa ikirime sa Yakobe,
Ni mwaha wa itampi sa atthu a nloko na Isarayeli.+
Ekirime xeeni Yakobe opanke awe?
Khahiyo atthu a oSamariya?+
Ari woowi mapuro oorakamela osulu anikokhoreliwa amuluku eethiru a oYuda?+
Khahiyo atthu a oYerusalemu?
6 Epooma ya oSamariya kinookhaliha milepe,*
Kinookhaliha opuro onaaliwa miri sa ewuuva,
Kinoorihela maluku aya oxepani,
Nave alisenso aya kinimwaahiya yooneyaka.
7 Ilatarato sawe sootheene soopatthiwa, kinoophwatakasa,+
Nave itthu sootheene oliviwe awe, sinoopahiwa vamooroni.+
Kinoopwexakasa ilatarato sawe sootheene.
Owo oophwanya itthu iyo mwaha wa oraruwa,
Nave ti seiyo sinrowa aya olivaniwa anamararuwa”.
8 Mwaha wa yeeyo, kinimwiikhupanyerya ni kinimunla,+
Kinimweetta kihiwanre ixapattho ni kihiwanre etthu.+
Wiikhupanyerya waka onrowa olikanaka ni wa alapwa a mutakhwani,*
Nave wiipulela waka onrowa olikanaka ni wa mpisa.
Ehukhumu yoophiya vamukhora va atthu aka, mpakha oYerusalemu.+
10 “Muhilaleye etthu ela oGaathi,
Muhinle nnakhala vakhaani.
Atthu anikhala oBethi-Afara,* yootorowe vantthupini.
11 Nyuwo atthu a oXafiri, mweetteke muhiwanre etthu ni wuuliwa muru.
Atthu a oSaanani khankhuma-wo.
Onookhala wiikhupanyerya oBethi-Eseli, nave khanrowa owerya wookhaliheryani.
12 Atthu a oMarothi, yaalipelela etthu yooreera,
Masi ehoorwa etthu yootakhala ekhumaka wa Yehova, erwaaka vamukhora va oYerusalemu.
13 Nyuwo atthu a oLakixi,+ mutthukwelele ikhavalo vakaaroni sinipuruliwa ni inama.
Nyuwo mpacenrye omutthekela mwaana mwaamuthiyana a oSiyoni,
Okhala wiira mookirukunuwela ntoko atthu a Isarayeli.+
14 Ti nthowa naya mwanvanhe anyu itthu Morexethi-Gaathi okathi aakhuma awe.
Atthu a etthoko ya Akazibi,+ yaari etthu yoowoka para mamwene a wIsarayeli.
15 Nyuwo atthu a oMarexa,+ nwanani kinrowa aka wooruuhelani+ onookuxa itthu sootheene.
Ovuwa wa Isarayeli, onoophiya mpakha wAdulami.+
16 Mmetthe ikharari sanyu wiira mulikaneke ni murumaasi,*
Mwaha wa aniinyu akuxiwe.
Okhala wiira aakuxiwa aroihiwa weepotthani”.+