Wahala a Nenli
28 Akhazi+ aarina iyaakha 20 okathi aakhanle awe mwene, nave aahilamulela iyaakha 16 oYerusalemu. Owo khaapanke itthu sooloka vamaithoni va Yehova, ntoko aapanke awe muhavinre awe, Davidi.+ 2 Ohiya-vo, Akhazi aanitthara ephiro ya mamwene a wIsarayeli,+ nave aahipaka ilatarato sa eyuuma*+ sa amuluku Bayaali. 3 Nave-tho, aahivaha mwiixi wa mukuttho woopahiwa oxepani wa Mwaana a Hinomi,* ni aahaapaha anaawe vamooroni,+ ottharaka soolema soohiloka sa maloko+ Yehova oomonle awe ohoolo wa atthu a Isarayeli. 4 Owo khaahiyale ovaha mikuttho, ni mwiixi wa mikuttho soopahiwa, mapuro oorakamela osulu yaakokhoreliwa amuluku eethiru,+ mmattumuxani ni vathi va miri sootheene suulupale.+
5 Tivo, Yehova Muluku awe, aahinvahererya mmatatani mwa mwene a oSiiria,+ nto owo aahinwerya ni aahaakuxa atthu anceene ntoko ipottha aaroiha oDamaasiko.+ Nave-tho aahinvahererya mmatatani mwa mwene a wIsarayeli, yoowo aawiivale atthu anceene a Akhazi. 6 Pekahi,+ mwaana a Remaliya, aahiwiiva alopwana 120.000 oolipa murima a oYuda nihiku nimosa, okhala wiira yaahimunyanyala Yehova, Muluku a amuhavinre aya.+ 7 Ziikiri, nakhotto ootupa a wEfrayimi, aahimwiiva Maaseya, mwaana a mwene Akhazi, Azirikami yoowo aaweherya epalaasio* ni Elikana yoowo aari mukhulupale a nenli nuumala mwene. 8 Aisarayeli yaahaakuxa axinnaya 200.000 ntoko ipottha, eyo piiyo, athiyana, anamwane axilopwana ni anamwane axithiyana. Nave-tho yaahikuxa mireerelo sinceene, aroiha oSamariya.+
9 Masi, profeta a Yehova aihaniwa Odedi aari weiwo. Owo aahirowa okumana ni anakhotto yaarwa oSamariya, onaahimeerya wiira: “Mwiiwe! Yehova, Muluku a amuhavinre anyu, oonanariwa ni atthu a oYuda, tivo oovaherenryaaweni mmatatani mwanyu.+ Masi nyuwo moowiivakasa vootakhala, mpakha Muluku osuwela eyo. 10 Vano muniphavela waakhaliha atthu a oYuda ni a oYerusalemu arumeyi anyu alopwana ni athiyana.+ Masi niireke ni nyuwo khamurina mulattu ohoolo wa Yehova Muluku anyu? 11 Mukiwiriyane ni mwaattikihe axinninyu mwaakunxe anyu ntoko ipottha, okhala wiira Yehova onanariwa vanceene ni nyuwo”.
12 Nave-tho, maxeefi makina a wEfrayimi, eyo piiyo, Azariya mwaana a Yehohanani, Berekiya mwaana a Mexilemothi, Yehizikiya mwaana a Xalumi ni Amasa mwaana a Hadilayi, yaahaavirikanya anakhotto ale yaatthika okhottoni, 13 anaahimeerya wiira: “Muhaaruuhe muumu atthu awo mwaavanre anyu, okhala wiira eyo enooniiriha okhalana mulattu ohoolo wa Yehova. Etthu mumphavela anyu opaka enimuncererya itampi sahu ni mulattu ahu, okhala wiira mulattu ahu khoreere wunnuwa, nave Muluku oonanariwa ni atthu a Isarayeli”. 14 Siiso, anakhotto ale yaakunxe ikaruma sa ekhotto yaahaakuxa atthu ale yaavanre aya ni mireerelo saya,+ yaavahererya makhulupale ni muloko wootheene. 15 Moottharelana, alopwana yaathanliwe masina aya, yaahaakuxa atthu ale yaavariwe, yaavaha ikuwo yaakunxe aya okhottoni atthu ootheene yahaawanre etthu. Yaahaavaha soowara, isantaalya, eyoolya, yoowurya ni makhura wiira yootteke. Ohiya-vo, yaahaaweliha vapuuruni ale yaatteettheyale, yaaroiha wa axinnaya oYeriko, epooma ya mikole. Nuumala-vo, yaahitthikela oSamariya.
16 Okathi ole, mwene Akhazi aahaavekela mamwene a wAsiiria wiira amukhaliherye.+ 17 Atthu a wEdomi yaahitthikela-tho orwa ni otuphela oYuda, yaakuxa atthu ntoko ipottha. 18 Nave afilisti+ yaahituphela ipooma sa oXefela+ ni oNegebi wa oYuda, akuxa oBethi-Xemexi,+ wAiyaloni,+ oXederothi, oSoko ni mittetthe saya saamukhaani,* oTiimina+ ni mittetthe saya saamukhaani, ni oXimizo ni mittetthe saya saamukhaani, anakhala weiwo. 19 Yehova aahiwuulihiha muru atthu a oYuda mwaha wa Akhazi mwene a wIsarayeli, mwaha woowaahiya atthu a oYuda yeettelaka murima aya, yiirelaka omutthekela vaalupale Yehova.
20 Mwene Tiglathi-Pileneseri+ a wAsiiria, khaamukhalihenrye Akhazi, masi aahirwa omutuphela, omukumiherya mixankiho.+ 21 Akhazi aahikuxa mireerelo sa empa ya Yehova, empa ya mwene,+ ni ipa sa makhulupale onvaha mwene a wAsiiria, masi eyo khiyaamukhalihenrye. 22 Nave, okathi saamukhumelela aya mixankiho iyo, mwene Akhazi aamutepa oohiroromeleya wa Yehova. 23 Owo aahipacerya waavaha mukuttho amuluku a oDamaasiko+ yaawo aawenrye awe+ onahimya wiira: “Amuluku ala annaakhaliherya mamwene a oSiiria, tivo kinrowa waavaha mukuttho wiira akikhaliherye”.+ Masi, amuluku awo yaahimutthekiha ni yaahaatthekiha atthu ootheene a wIsarayeli. 24 Akhazi aahittottela mireerelo sa empa ya Muluku eekeekhai, iikitthasa mireerelo iyo ipetaaso sene,+ nuumala-vo aahiwala mikhora sa empa ya Yehova,+ ni aahiipakela altaari khula ekantu ya oYerusalemu. 25 Nave ipooma sootheene sa oYuda aahipaka mapuro oorakamela osulu wiira aavaheke amuluku akina mwiixi wa mukuttho woopahiwa,+ onveehaka Yehova, Muluku a amuhavinre awe.
26 Itthu sikina siiraneyale ni Akhazi, miteko sawe sootheene, okhuma woopaceryani mpakha wookiseryani, soolempwa Muliivuruni ya Mamwene a oYuda ni a wIsarayeli.+ 27 Wanikisa waya, Akhazi aahirowa omumula vamosa ni amuhavinre awe, ovithiwa opooma, oYerusalemu, okhala wiira khaaroihiwe ovithiwa mahiye yaavithiwa aya mamwene a wIsarayeli.+ Vano, mwanawe iihaniwa Ezekiya aahikhala mwene nipuro nawe.